
408ཨོ་རྒྱན་གླིང་རྟེན་བརྟེན་པ་གསར་བསྐྲུན་ངེས་གསང་ཟུང་འཇུག་བསྒྲུབ་པའི་འདུས་སྡེ་ཚུགས་པའི་དཀར་ཆག་འཁོར་བའི་རྒྱ་མཚོ་སྒྲོལ་བའི་གྲུ་ཆེན་ཞེས་བྱ་བ་བཞུགས་སོ། །
47-6-49
༄༅། །ཨོ་རྒྱན་གླིང་རྟེན་བརྟེན་པ་གསར་བསྐྲུན་ངེས་གསང་ཟུང་འཇུག་བསྒྲུབ་པའི་འདུས་སྡེ་ཚུགས་པའི་དཀར་ཆག་འཁོར་བའི་རྒྱ་མཚོ་སྒྲོལ་བའི་གྲུ་ཆེན་ཞེས་བྱ་བ་བཞུགས་སོ། །
༄། །མཆོད་བརྗོད་དང་རྩོམ་པར་དམ་བཅའ་བ།
༄༅། །ཨོ་རྒྱན་གླིང་རྟེན་བརྟེན་པ་གསར་བསྐྲུན་ངེས་གསང་ཟུང་འཇུག་བསྒྲུབ་པའི་འདུས་སྡེ་ཚུགས་པའི་དཀར་ཆག་འཁོར་བའི་རྒྱ་མཚོ་སྒྲོལ་བའི་གྲུ་ཆེན་ཞེས་བྱ་བ་བཞུགས་སོ། །ཀ༽ མཆོད་བརྗོད་དང་རྩོམ་པར་དམ་བཅའ་བ།རྒྱལ་ཀུན་མཁྱེན་བརྩེའི་ཡེ་ཤེས་སིནྡྷུའི་མཚོར་ལྷུངས་ཆུ་སྐྱེས་ལྟེ་བ་ལས་གྲོལ་སྣང་མཐའི་ངོ་བོ་པདྨ་འབྱུང་། །གང་གི་སྒྱུ་འཕྲུལ་མི་ཤིགས་རྡོ་རྗེའི་གར་བསྒྱུར་འགྲོ་བའི་ཁམས་དང་འཚམས་པར་གཟུགས་སྐུའི་བཀོད་པ་ཇི་སྙེད་ལ། །སྙིགས་དུས་འདུལ་དཀའི་ཞིང་འདིར་ངུར་སྨྲིག་གར་རོལ་ཐམས་ཅད་མཁྱེན་པ་རིས་མེད་བསྟན་པའི་བདག་པོར་མངོན་འཕགས་པ། །ངག་གི་དབང་ཕྱུག་བློ་བཟང་རྒྱ་མཚོས་ཡིད་ཅན་ཚོགས་ཀུན་རིང་དུ་སྐྱོང་ལ་ཕན་དང་བདེ་བའི་ཤིས་པ་མ་ལུས་(༢ན)སྩོལ། ༡ །བདེ་གཤེགས་ཀླུ་ཡི་རིགས་མཆོག་སེམས་ཚུལ་དུ། །འཇམ་པའི་རྡོ་རྗེར་ཡོངས་ཤར་སྒྱུ་འཕྲུལ་གཟུགས། །མི་ཡི་སྲིད་པར་རྣམ་རོལ་ཙོང་ཁ་པ། །བློ་བཟང་གྲགས་སྙན་བསྟན་པའི་བདག་དེར་འདུད། ༢ །ཕྱག་བྱའི་སྒོ་དང་པོ་རྫས་བརྗོད་པར་གསལ། རྡུལ་བྲལ་ཞིང་དུ་མགོན་ཁྱོད་
47-6-50
ཆོས་འཁོར་དུས། །ནོར་བུ་ཡིད་བཞིན་དབང་རྒྱལ་ཕྱག་རྟེན་གྱིས། །སེམས་བསྐྱེད་ཡོན་ཏན་མཐའ་ཡས་ཀུན་རྫོགས་པའི། །བདེ་གཤེགས་དྲི་མེད་རྒྱལ་མཚན་(༢ན)སངས་རྒྱས་ཀྱང་། ༣ །འཁོར་ལོས་སྒྱུར་བ་ལག་ན་བེ་ཅོན་སོགས། །ཞིང་ཁམས་དུ་མར་འགྲོ་བའི་དོན་མཛད་པའི། །པུར་རྒྱལ་མུ་ནེ་བཙན་སོགས་རྒྱལ་པོའི་སྲས། །ལེགས་པའི་ཤེས་རབ་ལ་སོགས་པཎ་གྲུབ་རིགས། ༤ །མང་མང་དག་པའི་སྐྱེ་བརྒྱུད་སྙིགས་དུས་འདིར། །མདོ་རྒྱུད་ཤེས་བྱ་རིག་པའི་གནས་ཀུན་ལ། །ལོག་རྟོག་གཉིད་ལས་སངས་པའི་ལེགས་བཤད་ཀྱི། །བསྟན་བཅོས་ཕྱག་རིས་ཆེར་རྒྱས་མི་བདག་ཚུལ། ༥ །རྨད་བྱུང་གྲགས་སྙན་ཤར་ཕྱོགས་རྒྱ་མཚོའི་མཐར། །ཡོངས་ཁྱབ་ངེས་དོན་བཤེས་གཉེན་རིག་པ་འཛིན། །གངས་ཅན་བདེར་འགོད་སྤྱི་དང་བྱེ་བྲག་ལ། །བཀའ་དྲིན་ཟླ་མེད་ཐུགས་མཆོག་རྡོ་རྗེར་འདུད། ༦ །སྟོབས་བཅུ་ཡེ་ཤེས་མངོན་གྱུར་བདེ་བར་གཤེགས། །རི་རབ་མར་མེའི་རྒྱལ་མཚན་ཕན་བདེའི་དཔྱིད། །འཁྲུལ་མེད་གླིང་པའི་ནང་ནས་ཕྱག་བྱ་བའི་སྒོ་གསུམ་པ་རྫས་བརྗོད་པ་མཐའི་གསལ་བྱེད་ཡ་མཚན་གྱི། །(༢བ)གྲུབ་བརྙེས་པདྨ་གླིང་པར་མགོས་ཕྱག་འཚལ། ༧ །བྱིན་རླབས་ཕུང་པོ་གངྒཱའི་ཡབ་གཅིག་པུ། །ཏེ་སེའི་སྤུན་ཟླར་བགྲངས་པའི་ངོ་མཚར་ཅན། །ཨོ་རྒྱན་བཟང་པོར་འབོད་པའི་འགྲོ་ཀུན་གྱི། །ཕྱག་བྱའི་སྒོ་བཞི་པ་ཆ་ཤས་གཟུགས་ཅན་མ་འདྲིས་མཛའ་བའི་བཤེས་དེར་དང་བས་བསྟོད། ༨ །གང་གི་ལུགས་ཟུང་ཡངས་པའི་འཁོར་ལོའི་རྒྱུད། །སྨིན་གྲོལ་ཟབ་རྒྱས་གདམས་པར་འཛིན་བཟོད་པའི། །ལྷ་རིགས་འཆི་མེད་གནས་ཀྱི་ཆུ་བོ་ཆེ། །ཕྱག་བྱའི་སྒོ་ལྔ་པ་ཡན་ལག་གཉིས་གཟུགས་ཀྱིས་མཛེས་པ་འདྲེན་མཛད་ཡོངས་འཛིན་ཟུང་སོགས་ཕྱག་བྱའི་གནས། །ཁྱད་པར་ཐ་མལ་སྒྲོལ་བྱེད་སྐྱེས་བུ་ཆེའི། །ཆུ་ཤེལ་དབང་པོ་གངས་ལྗོངས་ཕན་བདེའི་མཁར། །མངོན་འཕགས་ཕུལ་དུ་བྱུང་བའི་རིག་འཛིན་མཆོག །བཀྲ་ཤིས་བསྟན་འཛིན་སྒོ་གསུམ་གུས་ཕྱག་འཚལ། །གང་སོགས་ཕྱག་བྱའི་སྒོ་བདུན་པ་བསྡུས་ཤིང་མ་བསྡུས་པའི་གཟུགས་ཅན་དངོས་གྲུབ་ཀུན་འབྱུང་
47-6-51
བླ་མ་ཆེ། །སྔ་འགྱུར་(༣ན)ཐེག་པ་ནོར་བུའི་གཞལ་མེད་ནས། །སྨིན་གྲོལ་བདུད་རྩིའི་རྒྱུན་གྱི་སྐལ་ལྡན་འགྲོ། །འཁོར་བའི་རྒྱ་མཚོ་སྒྲོལ་མཛད་རྣམས་ལ་འདུད། །ཀུན་བཟང་གདོད་མའི་མགོན་པོ་རྡོ་རྗེ་འཆང་། །གཅིག་ལས་མང་ཤར་ཡི་དམ་དྲག་པོའི་སྐུར། །དངོས་གྲུབ་བསྐུལ་བའི་སྒོ་དང་པོ་ཡོན་ཏན་རང་བཞིན་བརྗོད་པ་དང་རིགས་བརྗོད་མཐའ་གསལ་བསྲེས་པ་ཡེ་ཤེས་སྒྱུ་མའི་གར་རོལ་སྒྲུབ་སྡེ་བརྒྱད། །ཐུགས་ཀྱི་མེ་ལོང་དངོས་གྲུབ་ཆར་དུ་བསྙིལ། །རབ་འབྱམས་ཞི་ཁྲོ་རྒྱལ་བའི་དཀྱིལ་འཁོར་གྱི། །གསང་བ་ཀུན་འཛིན་ལྷན་སྐྱེས་བདེ་བའི་གདངས། །འཇིགས་རུང་གར་དགུའི་ཉམས་ལྡན་གསང་བའི་བདག །དང་པོ་དངོས་གྲུབ་བསྐུལ་བའི་སྒོ་གཉིས་པ་རིགས་བརྗོད་མཐའི་གསལ་བྱེད་དྲེགས་འདུལ་གཏུམ་པས་དགྲ་བགེགས་ཕྱེ་མར་ཐོགས། །བླ་མེད་དོན་རྫོགས་ཐུགས་རྗེའི་འཕྲིན་ལས་ཀྱི། །ཚོགས་ཞིང་དག་པ་རབ་འབྱམས་ལྷའི་འཁོར་ལོ། །གཙོར་གྱུར་ཞི་ཁྲོ་རྒྱལ་བ་རྒྱ་མཚོ་ཡི། །དངོས་གྲུབ་བསྐུལ་བའི་སྒོ་གསུམ་པ་གཟུགས་ཅན་འཕར་མ་མཆོག་མཐུན་དངོས་གྲུབ་རིན་ཆེན་ཆར་དུ་(༣བ)བསྙིལ། །བསྐལ་པའི་མེ་དཔུང་འབར་བའི་ལྕེ་རྣོན་པོས། །དགྲ་སྡེའི་སྙིང་ལ་སྡང་བའི་འཇིགས་གཟུགས་ཅན། །ཆོས་སྲུང་མ་ནིང་དམ་ཅན་སྡེ་དགུ་ཡིས། །འཕྲིན་ལས་འཆོལ་བའི་སྒོ་དང་པོ་ཡན་ལག་གཅིག་གཟུགས་ལས་བཞིའི་འཕྲིན་ལས་ཐོགས་མེད་སྒྲུབ་པར་མཛོད། །རྒྱལ་ཡུམ་མི་སྲུན་འདུལ་བྱེད་དྲག་མོའི་སྐུར། །རབ་བཞེངས་སྲིད་རྒྱལ་རྗེ་ཁོལ་ཙཎྜི་ཀ །ཨེ་ཀ་ཛ་ཏིས་མཆོག་མཐུན་གང་བཅོལ་བའི། །འདོད་འཕྲིན་ལས་འཆོལ་བའི་སྒོ་གཉིས་པ་བསམ་པ་རྒྱ་ཆེ་བ་དང་ཆ་ཤས་གཟུགས་ཀྱིས་སྤུད་པ་དོན་འབྲས་བུ་ཡོངས་སུ་རྫོགས་པར་མཛོད། །དམོད་པའི་རིག་སྔགས་བཟློག་དཀའ་དྲང་སྲོང་ཆེ། །རཱ་ཧུ་ལ་དང་མཐུ་སྟོབས་རྡོ་རྗེའི་མཚན། །ལེགས་ལྡན་ཁྲོས་པའི་དཔུང་པས་དགྲ་སྡེའི་སྲེག །འཕྲིན་ལས་འཆོལ་བའི་སྒོ་གསུམ་པ་ཆོས་དཔེ་དང་འཇིགས་རུང་ཉམས་ལྡན་གཅིག་པ།དུས་མིན་གཤིན་རྗེའི་ཞགས་པས་བཞིན་དུ་ལོངས། །དགེ་བཅུ་ཀུན་ཚང་གནས་དངོས་པོ་ངེས་བསྟན་ཡོན་ཏན་རང་བཞིན་བརྗོད་པ་དང་དཔེ་བསྲེས་པ།ཆེན་(༤ན)ཁྲོམ་
47-6-52
པ་སྟེང་། །དཔའ་བོ་མཁའ་འགྲོ་རང་བཞིན་འདུ་བའི་ས། །ཁྱད་འཕགས་སྒྲུབ་གནས་དུ་མའི་དཔྱིད་གྱུར་པ། །ཨཽ་ཌི་ཡཱ་ནའི་བཀོད་པ་ལྷུན་གྲུབ་ལྟའི། །ཕུན་ཚོགས་དཔལ་གྱིས་མཛེས་པའི་ཨོ་རྒྱན་གླིང་། །གང་དེར་དག་ཞིང་དངོས་སུ་འཕོས་པའི་འཕྲུལ། །སྒྱུ་མས་སྤྲུལ་ལྟར་ཡ་མཚན་རྒྱ་ཆེའི་དང་པོ་དངོས་པོ་ངེས་གསལ་བྱེད་བསྲེས་པ་རྟེན། །དམ་པའི་མཚན་ཉིད་རྫོགས་པའི་བརྟེན་པ་བཅས། །གསར་དུ་བསྐྲུན་པའི་ཨོ་ཏན་པུ་རི་ཡ། །ཡོན་ཏན་མ་ལུས་གཉིས་སྣང་མེ་ལོང་བཞིན། །འཆར་བཟོད་ཀུན་དགའི་གནས་དེར་ངེས་གསང་གི །དངོས་པོ་ངེས་བསྟན་ཆོས་དཔེ་མཚར་བ་རྡོ་རྗེའི་ཐེག་མཆོག་མངོན་གྱུར་ཟུང་འཇུག་སྐུ། །སྒྲུབ་པའི་འདུས་སྡེ་རིག་པ་འཛིན་པ་ཡི། །དམ་ཚིག་སྡོམ་པ་མིག་ལ་འབྲས་བཞིན་དུ། །གཅེས་འཛིན་ལྷ་སྔགས་ཡེ་ཤེས་སྔ་འགྱུར་གྱི། །དངོས་པོ་ངེས་བསྟན་ཆོས་དཔེ་དང་གཟུགས་ཅན་བསྲེས་པ་བསྟན་པ་རིན་ཆེན་ཇི་སྲིད་བར་ཚུགས་པའི། །དཀར་ཆག་མ་བསྡུས་གཟུགས་(༤བ)མ་དག་འཁོར་བའི་རྒྱ་མཚོ་ལས། །སྒྲོལ་བྱེད་ལམ་གྱི་རིམ་པ་བགྲང་འདས་ཀྱང་། །སྒྱུ་ལུས་འོད་སྐུར་གྲོལ་བའི་ཐེག་མཆོག་གི །དགོས་འདོད་འབྱུང་བའི་གྲུ་ཆེན་འདི་ན་འོ། །ཞེས་སློབ་དཔོན་དབྱུག་པ་ཅན་གྱིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་དང་། ས་སྐྱ་པཎྜི་ཏས། མཆོད་བསྟོད་འདུས་པའི་བདག་ཉིད་ཅན། །ཤིས་པ་བརྗོད་སོགས་མི་འགལ་ཏེ། །ཐམས་ཅད་དུ་ཡང་སྟོན་པ་ཡི། །ཆེ་བ་འབའ་ཞིག་སྟོན་ཕྱིར་རོ། །ཞེས་པ་ལྟར་ཤིས་པ་བརྗོད་པ་བསྟོད་ཚིག་གི་མེ་ཏོག་མནྡྷ་ར་བ་འཐོར་ཞིང་། དང་བའི་ཕྱག་བྱ་བ་དང་། དངོས་པོ་ངེས་པར་བསྟན་པའི་རིམ་པ་སྔོན་དུ་བཏང་ནས།
47-6-53
༄། །གླེང་གཞི།
ཁ༽ གླེང་གཞི།གླེང་བར་བྱ་བ་ནི། རྒྱལ་སྲས་ཞི་བ་ལྷས་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས། འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །(༥ན)བཅས་ཏེ་ཡུན་རིང་གནས་གྱུར་ཅིག །ཅེས་གསུངས་པ་ལྟར། འཇིག་ཚོགས་ལྟ་བའི་རི་བོ་ཉི་ཤུ་མཐོ་ལ་བརླིང་བས་ངོས་ཀུན་ནས་བསྐོར་ཞིང་། མ་རིག་པའི་མུན་པ་སྟུག་པོ་ཅན། ལྟ་བ་ངན་པ་སྣ་ཚོགས་པའི་འཁྲི་ཤིང་གིས་ཐར་པའི་ལམ་དོག་པོར་བྱས་ལ། ཕྲ་རྒྱས་ཀྱི་དུག་གི་ལྗོན་ཤིང་སྡུག་སྔལ་གྱི་འབྲས་བུ་ཡིད་དུ་མི་འོང་བ་སྟེར་བས་དཀྲིགས་པ། སྲིད་པའི་ཆུ་ཀླུང་གི་འོབས་ཆེན་པོས་ཡོངས་སུ་འཁྱུད་པ་འཁོར་བ་མྱ་ངམ་གྱི་ཐང་ཆེན་པོར་གནས་པའི་འགྲོ་བ་ཐམས་ཅད་ཀྱི་སྡུག་བསྔལ་གྱི་ནད་མ་ལུས་པ་སེལ་ཞིང་། ཕན་པ་དང་བདེ་བའི་ཕུན་སུམ་ཚོགས་པ་མཐའ་དག་ནི་རྟག་པ། བརྟན་པ། མི་འགྱུར་བ། སྟོབས་བཅུ་དང་མི་འཇིགས་པ་བཞི་ལ་སོགས་པ་ཡོན་ཏན་གཞལ་དུ་མེད་པ་དུ་མ་དང་ལྡན་པ། སེང་གེ་ཆེན་པོའི་སྒྲ་སྒྲོག་པ། བསྙེངས་པ་དང་བག་ཚ་བ་མེད་པ། མྱུར་བ་དང་། རྣོ་བ་དང་། ཟབ་པ་དང་། རྣམ་པར་གྲོལ་བ་དང་། མཐུན་པ་མེད་པ་དང་།(༥བ) ཀུན་ཏུ་རྒྱས་པ་དང་། མཐར་ཕྱིན་པ་སྟེ་ཡེ་ཤེས་དུ་མའི་བདག་ཉིད། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་གདུལ་བའི་ཁ་ལོ་བསྒྱུར་བ། བླ་ན་མེད་པ།ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཀྱི་བསྟན་པ་རིན་པོ་ཆེ་བསོད་ནམས་ཀྱི་ཞིང་དུ་བྱས་པ་ལ་བརྟེན་ནས་འབྱུང་བས་ན། རྒྱ་ཆེར་རོལ་པ་མངོན་པར་བྱང་ཆུབ་པའི་ལེའུ་ལས། བསོད་ནམས་རྣམ་སྨིན་བདེ་སྟེར་སྡུག་བསྔལ་ཐམས་ཅད་སེལ། །བསོད་
47-6-54
ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། །བདུད་བཅོམ་ནས་ནི་བྱང་ཆུབ་མྱུར་དུ་རེག་པར་འགྱུར། །མྱ་ངན་ལས་འདས་ཞི་བ་བསིལ་བའི་དངོས་པོ་ཐོབ། །ཅེས་སྲིད་ཞིའི་དགེ་ལེགས་ཡོན་ཏན་ཐམས་ཅད་ལེགས་པར་བྱས་པའི་མཐུ་ཁོ་ན་ལས་འབྱུང་ཞིང་།(༦ན)དེ་འཕེལ་བའང་རྒྱལ་བའི་བསྟན་པ་ལ་རག་ལས་པའི་ཕྱིར་ཡང་དག་པར་རྫོགས་པའི་སངས་རྒྱས་འཇིག་རྟེན་དུ་མཛད་པ་བཅུ་གཉིས་ཀྱི་ཚུལ་སྟོན་པའི་དུས་སྒྲོན་བསྐལ་དང་། མ་བྱུང་བའི་ཚེ་མུན་བསྐལ་དུ་གྲགས་ལ། སྒྲོན་བསྐལ་གྱི་ནང་ནས་ཀྱང་སྙིང་རྗེ་ཆེན་པོ་པད་དཀར་གྱི་མདོ་ལས། འཇིག་རྟེན་འདི་ཆུས་འཇིག་པའི་ཚེ་མཚོ་ནས་གསེར་གྱི་པདྨ་སྟོང་བྱུང་བར་གྱུར་ཏོ། །དེ་ལ་ལྷ་རྣམས་ཀྱིས་བརྟགས་པས་སངས་རྒྱས་སྟོང་འབྱུང་བའི་ལྟས་སུ་ཤེས་ཏེ། ཀྱེ་མ་བསྐལ་པ་འདི་ནི་བཟང་པོའོ་ཞེས་བརྗོད་པས་བསྐལ་པ་བཟང་པོ་ཞེས་གྲགས་པར་གྱུར་ཏོ། །ཞེས་གསུངས་པ་བཞིན་བཟང་པོའི་བསྐལ་པ་འདི་ལ་གྲགས་ཅན་གྱི་སངས་རྒྱས་སྟོང་ངམ་སྟོང་དང་ལྔ་སོགས་བཤད་ཚུལ་མི་འདྲ་བ་དུ་མ་ཡོད་ཀྱང་། བཞི་པ་བདག་ཅག་གི་སྟོན་པ་ཤཱཀྱ་སེང་གེ་ཡིན་པར་མཐུན་ཞིང་དེའི་མདོ་སྔགས་ཀྱི་བསྟན་པ་ལ་རྒྱ་གར་འཕགས་པའི་ཡུལ་དུ་ཐུན་མོང་བ་རྣམས་ཁྱབ་གདལ་དུ་འཆད་པ་དང་།(༦བ) ཐུན་མོང་མ་ཡིན་པ་རྣམས་ཟབ་མོ་སྙན་ནས་སྙན་དུ་བརྒྱུད་པའི་ཆིག་བརྒྱུད་ལྟ་བུར་འཆད་པ་ལས་གསང་སྔགས་གསར་རྙིང་གི་དབྱེ་བ་མེད་ཀྱང་བོད་དུ་པཎྜི་ཏ་སྨྲྀ་ཏི་ཡན་ཆད་རྙིང་མ་དང་། དེ་ཚུན་ཆད་རྒྱ་བལ་དུ་ཡོངས་སུ་གྲགས་པའི་རྒྱུད་རྣམས་བསྒྱུར་བ་ལ་གསར་མར་གྲགས་པ་གཉིས་ལས།
47-6-55
༄། །གསང་སྔགས་གསར་རྙིང་།
ག༽ གསང་སྔགས་གསར་རྙིང་།སྐབས་འདིར་གླེང་བར་འོས་པ། རྒྱུད་སྡེ་རིན་པོ་ཆེ་རབ་འབྱམས་རྒྱ་མཚོའི་རྒྱལ་པོ།མདོ་སྡེ་ཐམས་ཅད་ཀྱི་ཟ་མ་ཏོག ཐེག་པ་ཀུན་གྱི་རྩེ་རྒྱལ། གསང་ཆེན་རྙིང་མར་གྲགས་པའི་མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་གྱིས་ཐང་ཡིག་ཤེལ་བྲག་མ་ལེའུ་དང་པོར། ཕྱི་རྒྱུད་དག་པ་སྤྲུལ་སྐུས་བསྟན་པ་འཛིན༔ ནང་རྒྱུད་དག་པ་ལོངས་སྐུས་བསྟན་པ་འཛིན༔ གསང་རྒྱུད་དག་པ་ཆོས་སྐུས་བསྟན་པ་འཛིན༔ ཞེས་པ་ལྟར། འཁོར་འདས་གང་གི་ཡང་རྒྱ་ཆད་ཕྱོགས་ལྷུང་མེད་པ་ངོ་བོ་སྟོང་པ་རང་བཞིན་འོད་གསལ་ཐུགས་རྗེ་འགགས་མེད་དུ་བཞུགས་པ་ནི་གཞི་དེ་(༧ན)བཞིན་ཉིད་དེ་འཁོར་འདས་སུ་ཤར་བ་ན་ཡང་དེ་ཉིད་ལས་གཡོ་བ་མེད་ལ། གལ་ཏེ་འདས་སུ་འདོགས་པ་ན་ནི་ཀུན་བཟང་ནས་འཇག་མིག་གི་སྲིན་བུའི་བར་ཁྱད་མེད་པར་ཤེས་བྱའི་གཤིས་གནས་ལུགས་ཀྱི་འདུག་ཚུལ་རང་བཞིན་བདེན་གཉིས་དབྱེར་མེད་ལྷག་པའི་ཆོས་སྐུ་ཆེན་པོར་ཡེ་སངས་རྒྱས་པ་ཞེས་བྱ་སྟེ། སྒྱུ་འཕྲུལ་རྒྱས་པར།ཕྱོགས་བཅུ་དུས་བཞིའི་རང་བཞིན་ནི། །དེ་བཞིན་གཤེགས་པའི་ངོ་བོ་ཉིད། །ཅེས་པ་ལྟར་ལ་འཁོར་འདས་ཀྱི་གདགས་པ་མེད་པ་ནི་ངོ་བོའི་ཆ་ནས་ཡིན་ལ་བཏགས་པ་ནི་འདོགས་འདོད་ཀྱི་ཆ་ནས་ཡིན་པས་མི་འགལ་ཞིང་། དེ་ལས་རང་བཞིན་ཐ་མི་དད་ཡེ་ཤེས་ཀྱི་རླུང་གཡོ་བ་མེད་པར་གཡོས་པས་རང་བཞིན་གོ་འབྱེད་པའི་ཆ་ལས་རང་རྩལ་ལྷུན་གྲུབ་ཀྱི་སྣང་བ་ཤར་དུས་ངོ་བོ་རང་བཞིན་ཐུགས་རྗེ་ཐ་མི་དད་པ་དེ་ཉིད་རང་ངོ་རང་གིས་ཤེས་པས་གཞི་ཐོག་དེ་ཉིད་དུ་འབྲས་བུར་རང་གྲོལ་བ་ནི་ཐོག་མའི་མགོན་པོ་འོད་མི་འགྱུར་བ་ཀུན་ཏུ་བཟང་པོ་གཞི་ཐོག་ནས་བྱང་(༧བ)ཆུབ་པ་སྟེ་སྤྲོས་བྲལ་ཆེན་པོ་གཞོན་ནུ་བུམ་པ་
47-6-56
སྐུའི་ཞིང་ཁམས་ཞེས་བྱ་བ་ཆོས་སྐུའི་ཞིང་རྒྱ་ཚད་ལས་འདས་པ་ན་ལྷུན་གྲུབ་ཀྱི་དབྱིངས་ན་དུས་བཞི་འཕོ་འགྱུར་མེད་པའི་རང་བཞིན་ནམ་མཁའ་ཇི་སྲིད་པར་ཕུན་ཚོགས་ལྔ་ལྡན་དུ་ཞུགས་ཞེས་བྱ་བ་ལ་འོན་ཀྱང་རྟེན་བརྟེན་པ་དང་དབྱིངས་ཁ་དོག་གི་རྣམ་པ་ནི་མེད་དེ།དེ་ལྟར་སངས་རྒྱས་དང་སེམས་ཅན་འཁོར་བ་དང་མྱང་འདས་ཐམས་ཅད་ཀྱི་གཞི་ཐ་མི་དད་པ་དེ་ཉིད་ལས་རང་རྩལ་ལྷུན་གྲུབ་ཀྱི་སྣང་བ་ཤར་བའི་ཚེ་རང་ངོ་ཤེས་པར་མ་ནུས་པ་ནི་མ་རིག་པ་ཡིན་ལ། དེ་ལས་ལས་ཀྱི་རླུང་གཡོས་ཏེ་ངོ་བོ་མ་རྟོགས་བཞིན་དུ་རང་བཞིན་ལ་བདག་དང་རང་རྩལ་ལ་གཞན་དུ་འཁྲུལ་པས་གཟུང་འཛིན་སྲིད་པའི་འཁོར་ལོ་སྣང་བ་ནི་འཁོར་བ་སྟེ། དེའི་ཚེ་ཡང་གཞི་ལས་གཡོས་པ་ནི་མེད་དོ། །དེ་ལྟར་རྨི་ལམ་བཞིན་མི་བདེན་ཡང་བདེན་པ་ལྟར་འཁྲུལ་པའི་སེམས་ཅན་རྣམས་ལ་འབད་པ་དང་རྟོག་པ་དང་མཚན་མ་(༨ན)མེད་བཞིན་དུ་མཁྱེན་ཅིང་བརྩེ་བ་ཐུགས་རང་བྱུང་གི་ཡེ་ཤེས་ལྔའི་རྣམ་པར་གཡོས་པ་ལས་ཆོས་ཀྱི་སྐུ་དེ་ཉིད་ལས་གཡོ་བ་མེད་བཞིན་དུ་འོག་མིན་སྟུག་པོ་བཀོད་པའི་ཞིང་ཁམས་ནས་ནམ་མཁའི་མཐའ་ཀླས་པར་རིགས་ལྔ་གངས་ཆེན་མཚོ་དང་རིགས་དྲུག་པ་དཔལ་རྡོ་རྗེ་སེམས་དཔའི་སྐུ་མཚན་དཔེ་མཐའ་ཡས་པ་ཅན་ལོངས་སྤྱོད་རྫོགས་པའི་སྐུར་བཞེངས་ཏེ་རང་ཉིད་ཀྱི་ཕུང་ཁམས་སྐྱེ་མཆེད་ལ་སོགས་པ་སྐུ་གསུང་ཐུགས་ཀྱི་ཡོན་ཏན་བགྲང་བ་ལས་འདས་པ་རྣམས་ལས་འཁོར་གྱི་རྣམ་པར་སྣང་ཡང་གཅིག་པ་དང་ཐ་དད་པ་གང་ཡང་མ་ཡིན་པ་འཇིག་རྟེན་གྱི་ཁམས་རྒྱ་མཚོའི་རྡུལ་ཕྲ་བ་སྙེད་ལ་རང་བཞིན་རྫོགས་པ་ཆེན་པོ་སྐུ་དང་ཡེ་ཤེས་འདུ་འབྲལ་མེད་པ་ཆོས་ཐམས་ཅད་གཟོད་ནས་ཡེ་སངས་རྒྱས་པ་ལྷུན་གྲུབ་ཡོངས་རྫོགས་སུ་སྟོན་པ་བྱ་རྩོལ་དང་བྲལ་བའི་ཐེག་པ་ཉིད་སྨྲ་བསམ་བརྗོད་པ་དང་བྲལ་བར་ཅི་ཡང་མི་སྟོན་པའི་ཚུལ་གྱིས་ཐོག་མ་མེད་པའི་དུས་ནས་བསྟན་ཅིང་(༨བ)ད་ལྟར་སྟོན་ལ་ཕྱི་མའི་མཐའ་གཞལ་བར་མི་ནུས་པ་ནམ་མཁའ་དང་སེམས་ཅན་ཇི་སྲིད་པ་དེ་སྲིད་ཀུན་སྟོན་པར་འགྱུར་བས་སྐད་ཅིག་ཀྱང་རྒྱུན་ཆད་པ་མེད་ལ་
47-6-57
སྐུ་ནམ་མཁའ་གང་བ་དེ་རྣམས་ཀྱི་བ་སྤུའི་སྒོ་ནས་སྤོས་ཆུའི་རྒྱུན་གངས་ཅན་མཚོ་འབབ་པས་ནམ་མཁའ་ཀུན་གང་ལ་ཕྱག་མཚན་འཁོར་ལོ་དང་རྡོ་རྗེ་དང་རིན་ཆེན་དང་པདྨ་དང་རྒྱ་གྲམ་རྣམས་སོ་སོའི་ཁོང་གསེང་ལས་སྐྱེས་པའི་པདྨ་ཉེར་ལྔ་ལ་ཞིང་གི་གཙོ་བོ་ཉེར་ལྔ་དང་དེ་ཐམས་ཅད་ཀྱི་སྒོ་ན་འབྱུང་བཞིའི་རྡུལ་ཕྲ་རབ་ཇི་སྙེད་པ་རེ་རེའི་ཁོངས་ན་ཡང་སངས་རྒྱས་ཀྱི་ཞིང་དབྱིབས་རྒྱུ་ཚད་ཁ་དོག་འགྲོ་བའི་རིས་ཐ་དད་པ་བསམ་པར་མི་ནུས་པ་ཞིང་ཐམས་ཅད་ཀྱི་རྡུལ་གྱི་གྲངས་དང་མཉམ་པ་ཡོད་ལ། དེ་རྣམས་ཀྱང་ཆགས་འཇིག་སྟོངས་གནས་སྣ་ཚོགས་པ་ཉི་ཟེར་གྱི་རྡུལ་གཡོ་བ་ལྟར་ཡིན་ཅིང་། ཕལ་པོ་ཆེ་ལ་སོགས་པར་རྣམ་སྣང་གངས་ཆེན་མཚོ་ཞེས་པ་ཙམ་ལས་མ་བཤད་ཀྱང་། ཐེག་པ་འདིར་རིགས་ཐམས་(༩ན)ཅད་ཀྱི་གངས་ཅན་མཚོའི་སྟོན་པ་གསུངས་པ་འདི་ནི་ནམ་ཡང་མྱ་ངན་ལས་འདའ་བ་མེད་པ་སྟེ་ལོངས་སྤྱོད་རྫོགས་པའི་སྐུ་དངོས་བཤད་པ་ཡིན་ནོ། །དེ་ལྟར་ནམ་མཁས་ཁྱབ་ཚད་ཞིང་གིས་ཁྱབ་པའི་ཞིང་སོ་སོའི་འགྲོ་བ་རྣམས་ཀྱི་ཆོས་སྐུ་འོད་མི་འགྱུར་བ་ཉིད་ལོངས་སྐུ་རིགས་དྲུག་གི་རྣམ་པར་བཞེངས་པ་དེ་དག་ལ་སྣང་བ་དག་པ་རྣམས་ཀྱིས་མདོའི་སངས་རྒྱས་སྟོང་ངམ་རྩ་ལྔ་ལ་སོགས་པ་མཆོག་གི་སྤྲུལ་སྐུའི་རྣམ་པ་དང་། སྔགས་ཀྱི་སངས་རྒྱས་ཧེ་རུ་ཀ་ཁ་སྦྱོར་གྱི་སྐུ་ཞི་བ་དང་ཁྲོ་བོ་སྣ་ཚོགས་སུ་སྣང་བར་གྱུར་ལ། རང་དང་འཚམས་པའི་ཆོས་ཐེག་པ་དེ་དང་དེ་གསུང་བར་མཐོང་ནས་ལམ་དེ་སྒྲུབ་པར་འགྱུར་ལ། སངས་རྒྱས་ཀྱི་རྣམ་པར་མཐོང་མི་ནུས་པ་རྣམས་ཀྱི་གྲུབ་པ་དང་རིག་པ་འཛིན་པ་དང་དགེ་བའི་བཤེས་གཉེན་དུ་སྣང་ལ། ལྷ་རྣམས་ཀྱིས་རང་རང་གི་གཙོ་བོར་སྣང་བས་བག་མེད་ལས་ལྡོག་པ་དང་། ལྷ་མིན་གྱིས་ཐགས་བཟང་རིས་སུ་སྣང་བས་རང་གི་སྲིད་བསྲུང་བར་(༩བ)མཐོང་ཞིང་། དུད་འགྲོས་སེང་གེ་ལ་སོགས་པ་སོ་སོའི་གཙོ་བོར་མཐོང་སྟེ་སྐྲག་པས་དེས་བསྟན་པ་ལས་འགོང་མི་ནུས་པ་དང་། ཡི་དྭགས་རྣམས་ཀྱིས་གཙོ་མོ་ཁ་འབར་མ་ལྟ་བུར་སྣང་སྟེ་སེར་སྣའི་ཉེས་པ་སྟོན་པ་དང་། དམྱལ་བ་པ་རྣམས་
47-6-58
ཀྱིས་གཤིན་རྗེའི་རྒྱལ་པོ་དང་དམྱལ་སྲུང་དུ་སྣང་བས་ལས་འབྲས་ལ་ཡིད་ཆེས་བསྐྱེད་པ་སོགས་གང་འདུལ་དེར་སྣང་བ་སྟོན་པ།མངོན་རྟོགས་རྒྱན་སྐབས་བརྒྱད་པ་ལས། བྱང་ཆུབ་ཕྱོགས་མཐུན་ཚད་མེད་དང་། །ཞེས་ནས། ཆོས་ཀྱི་སྐུ་ཞེས་བརྗོད་པ་ཡིན། །ཞེས་དང་། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་འདི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་དང་། གང་གིས་སྲིད་པ་ཇི་སྲིད་བར། །འགྲོ་ལ་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་ཆད། །ཅེས་(༡༠ན)སྐུ་གསུམ་གྱི་རྣམ་གཞག་དང་། ཕྱི་མ་ལ་མདོ་སྡེ་རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །ཞེས་ནང་གསེས་གསུམ་བཤད་པ་མདོ་སྔགས་ཕྱོགས་མཐུན་པར་མཆིས་ཤིང་། དེ་ལྟར་སྤྲུལ་པའི་སྐུ་ཤཱཀྱ་ཐུབ་པས་གསུངས་པ་ཉན་ཐོས་རང་རྒྱལ་བྱང་ཆུབ་སེམས་ཀྱི་ཐེག་པ་སྟེ་རྒྱུའི་ཐེག་པ་གསུམ། ལོངས་སྤྱོད་རྫོགས་པའི་སྐུ་རྡོ་རྗེ་སེམས་དཔས་གསུངས་པ་ཀྲྀ་ཡ། ཨུ་པ། ཡོ་ག །བྱ་སྤྱོད་རྣལ་འབྱོར་ཏེ་གསང་སྔགས་ཕྱིའི་ཐེག་པ་གསུམ། ཆོས་སྐུ་ཀུན་ཏུ་བཟང་པོས་གསུངས་པ་བསྐྱེད་པ་མ་ཧཱ་ཡོ་ག །ལུང་ཨ་ནུ་ཡོ་ག །རྫོགས་པ་ཆེན་པོ་ཨ་ཏི་ཡོ་ག་སྟེ་གསང་སྔགས་ནང་གི་ཐེག་པ་གསུམ་དང་དགུར་བཤད་པ་ནི། རིག་པ་རང་ཤར་གྱི་རྒྱུད་ལས། ཉན་ཐོས་དང་ནི་རང་རྒྱལ་དང་། །དེ་བཞིན་བྱང་ཆུབ་སེམས་དཔའ་འོ། །ཀྲྀ་ཡ་དང་ནི་ཨུ་པ་དང་། །དེ་བཞིན་ཡོ་གའི་ཐེག་པར་བཤད། །མཧཱ་ཨ་ནུ་ཡོ་ག་དང་། །དེ་བཞིན་རྫོགས་ཆེན་ཨ་ཏི་འོ། །ཞེས་(༡༠བ)གསུངས་པ་ལྟར་དང་། ཡང་ཕྱི་ནང་གི་རྒྱུད་གཉིས་ལས། ཕྱི་རྒྱུད་ཀྲྀ་ཡའི་བྱ་རྒྱུད་རྣམས་སྟོན་པ་ཤཱཀྱ་ཐུབ་པ། ཨུ་པའམ་སྤྱོད་རྒྱུད་དང་ཡོ་ག་རྣལ་འབྱོར་གྱི་རྒྱུད་རྣམས་རྣམ་པར་སྣང་མཛད་ཆེན་པོ། ནང་བླ་མེད་ཀྱི་རྒྱུད་རྣམས་རྡོ་རྗེ་འཆང་གི་ཆོས་འབྱུང་ཡངས་པའི་ཞིང་ཁམས་རྣམས་སུ་གསུངས་པར་བཤད།དེས་ན་སངས་རྒྱས་ཀྱི་ཞིང་དང་འཇིག་རྟེན་གྱི་ཁམས་ཀྱང་བསམ་གྱིས་མི་ཁྱབ། འཁོར་
47-6-59
བའི་སེམས་ཅན་དང་ཉོན་མོངས་པ་ཡང་བསམ་གྱིས་མི་ཁྱབ། དེ་དག་འདུལ་བའི་གཉེན་པོར་བྱོན་པའི་སྤྲུལ་པའི་སྐུ་ཡང་བསམ་གྱིས་མི་ཁྱབ་གྲངས་མེད་བརྗོད་དུ་མེད་པ་སྤྲུལ་ཞིང་། ཆོས་རྫོགས་པ་ཆེན་པོའི་ཀློང་དགུ། བམ་པོ་ཉིས་ཁྲི་ཆིག་སྟོང་། ལེའུ་འབུམ་ཕྲག་ལྔ་ལ་སོགས་པའི་སྒོ་མཐའ་ཡས་པ་དག་དང་། རྫོགས་པ་ཆེན་པོ་དགོངས་འདུས་རྩ་བའི་རྒྱུད་དྲུག་ལ་སོགས་པ་བྱ་རྩོལ་ལས་འདས་པའི་ཆོས་ཐེག་པའི་རྩེ་མོའི་(༡༡ན)ཡང་རྩེ་མུ་མེད་པ་དག །སྟོན་པའི་ཞལ་ནས་མ་གསུངས་པར། །འཁོར་གྱི་རྟོག་དཔྱོད་བློ་ལ་སྣང་། །ཞེས་གཙོ་འཁོར་ཐ་མི་དད་པ་ཡིན་པ་དེའི་ཕྱིར་ཟླ་བའི་དཀྱིལ་འཁོར་ཆུ་ནང་དུ་གསལ་བའམ། མེ་ལོང་ལ་བཞིན་རས་ཤར་བ་ལྟ་བུའི་དགོངས་པ་ལ་འདུས་འདའ་བ་ཉིད་དོ། །
༄། །འདུལ་ཞིང་སྣོད་ཀྱི་འཇིག་རྟེན།
ང༽ འདུལ་ཞིང་སྣོད་ཀྱི་འཇིག་རྟེན།འདུལ་ཞིང་སྣོད་ཀྱི་འཇིག་རྟེན་ནི། ཤིན་ཏུ་རྒྱས་པའི་མདོ་ལས།སྒྱུ་མའི་མཁན་པོས་སྔགས་དག་གིས། །སྒོ་རྣམས་སྣ་ཚོགས་སྟོན་པ་ལྟར། །དེ་བཞིན་སེམས་ཅན་ལས་རྣམས་ཀྱིས། །བསམ་གྱིས་མི་ཁྱབ་ཞིང་འབྱུང་ངོ་། །ཞེས་གསུངས་པ་དང་མཐུན་པར་གོང་དུ་བཤད་མ་ཐག་པ་ལྟར་སེམས་ཅན་གྱི་ལས་བསམ་གྱི་མི་ཁྱབ་པས་ཞིང་ཁམས་ཀྱང་དེ་སྙེད་དུ་སྣང་བས་གྲངས་ཚད་ལ་སོགས་པ་འདི་ཙམ་མོ་ཞེས་ཁ་ཚོན་གཅོད་མི་ནུས་ཀྱང་། དཔལ་ལྡན་ཟླ་བས་འཇིག་རྟེན་གྱི་གྲགས་པ་མི་འགོག་པར་གསུངས་པ་བཞིན་ཐེག་ཆེན་ལྟར་ན། ཕལ་ཆེན་ལེའུ་ལྔ་པ་ལས། ཀྱེ་རྒྱལ་(༡༡བ)བའི་སྲས་དག །འཇིག་རྟེན་གྱི་ཁམས་རྒྱ་མཚོ་གཞི་དང་སྙིང་པོ་མེ་ཏོག་གི་རྒྱན་གྱིས་བརྒྱན་
47-6-60
པ་དེ་ནི་རླུང་གི་དཀྱིལ་འཁོར་རི་རབ་ཀྱི་རྡུལ་ཤིན་ཏུ་ཕྲ་བ་སྙེད་ཀྱིས་ཤིན་ཏུ་བཟུང་བ་སྟེ།ཞེས་པ་ནས། ལེའུ་དྲུག་པར། འཇིག་རྟེན་གྱི་ཁམས་སྤོས་ཆུའི་རྒྱ་མཚོ་སངས་རྒྱས་ཀྱི་ཞིང་བརྗོད་དུ་མེད་པ་བཅུའི་རྡུལ་ཤིན་ཏུ་ཕྲ་བ་སྙེད་པོ་དེ་དག་ལ་འཇིག་རྟེན་གྱི་ཁམས་ཀྱི་རྒྱུད་སངས་རྒྱས་ཀྱི་ཞིང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་ཀྱིས་བསྐོར་བ། འཇིག་རྟེན་གྱི་ཁམས་རྒྱ་མཚོ་འབྱམས་ཀླས་པ་དེ་དག་ཐམས་ཅད་ཀྱང་གཞན་དང་གཞན་ལ་གནས་པ། དབྱིབས་གཞན་དང་གཞན་དུ་འདུག་པ། ཕྱོགས་གཞན་དང་གཞན་ལ་བལྟ་བ། ཞེས་ཚད་དབྱིབས་ངེས་པ་མེད་པའི་ཞིང་ཁམས་བར་མཚམས་དང་བྲལ་བ་ཏིལ་གྱི་ཕུང་པོ་ལྟར་གནས་པར་བསྟན་པ་དང་། ཏིང་འཛིན་རྒྱལ་པོའི་ཟླ་བ་སྒྲོན་མེའི་ལེའུ་བཅུ་དགུ་པར།སྐྲ་ཡི་ཁྱོན་ལ་འགྲོ་བ་ལྔ་རྣམས་ཏེ། །སེམས་ཅན་(༡༢ན)དམྱལ་དང་དུད་འགྲོར་འགྲོ་བ་དང་། །གཤིན་རྗེའི་འཇིག་རྟེན་ལྷ་དང་མི་རྣམས་ཞུགས། །འདྲེས་པ་མེད་ཅིང་གནོད་པར་འགྱུར་བའང་མེད། །ཅེས་སྐྲ་གཅིག་གི་ཁྱོན་ལའང་འགྲོ་བ་ལྔའི་འཇིག་རྟེན་གྱི་ཁམས་ཚང་བ་དང་། མདོ་སྡེ་དགོངས་པ་ངེས་འགྲེལ་གྱི་ལེའུ་བརྒྱད་པ་ལས། གྲངས་མེད་པ་སྟེ་བརྒྱ་དང་། གྲངས་མེད་པ་སྟེ་སྟོང་དང་། གྲངས་མེད་པ་སྟེ་སྟོང་ཕྲག་བརྒྱ་ལ་སོགས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གྲངས་མེད་པའི་སྟོང་ཕྲག་བརྒྱའི་རྡུལ་ཕྲ་རབ་ཀྱི་རྡུལ་སྙེད་དང་།ཕྱོགས་བཅུའི་འཇིག་རྟེན་གྱི་ཁམས་དཔག་ཏུ་མེད་གྲངས་མེད་པ་དག་གོ །ཞེས་གྲངས་ཀྱི་སྤྱོད་ཡུལ་མ་ཡིན་པའི་གྲས་སུ་བཞག་པ་དང་། ཐེག་དམན་གྱི་ལུགས། མཛོད་འཛིན་བརྗོད་པའི་མདོར།ས་འདིའི་འོག་ནི་གསེར་གྱི་ས་གཞིའོ། །དེའི་འོག་ཏུ་ཆུའི་དཀྱིལ་འཁོར་རོ། །དེའི་འོག་ཏུ་རླུང་གི་དཀྱིལ་འཁོར་རོ། །དེའི་འོག་ན་ནམ་མཁའ་སྟེ་ནམ་མཁའ་ལ་གནས་(༡༢བ)
47-6-61
སོ། །རླུང་གི་དཀྱིལ་འཁོར་དེའི་ཚད་ནི་དཔག་ཚད་འབུམ་དྲུག་ཁྲི་ཡོད་དོ། །ཞེང་ལ་ནི་ཚད་མེད་དེ། རླུང་གི་དཀྱིལ་འཁོར་གྱི་རྔམས་ནི་མཐུ་བོ་ཆེའི་རྡོ་རྗེས་ཀྱང་ཡོངས་མི་ཚུགས་སོ། །ཞེས་སོགས་དང་། འཇིག་རྟེན་བཞག་པའི་མདོའི་ཚིགས་བཅུ་གཉིས་པ་ལས། ནམ་མཁའ་གང་ལ་རླུང་གི་དཀྱིལ་གནས་པའི་རླུང་གི་དཀྱིལ་འཁོར་དེའི་རྔམས་སུ་དཔག་ཚད་ས་ཡ་གཅིག་དང་དྲུག་འབུམ་ཡོད་དོ། །རྒྱར་ནི་གྲངས་མེད་ཚད་མེད་དོ། །ཞེས་སོགས་ཆོས་མངོན་པའི་བཀའ་བསྟན་རྒྱ་མཚོ་ལྟ་བུ་ལས་མཁས་མཆོག་དབྱིག་གཉེན་གྱིས་བསྡུ་བའི་ཚུལ་དུ་མཛད་པ་མཛོད་གནས་གསུམ་པར། དེ་ལ་སྣོད་ཀྱི་འཇིག་རྟེན་གྱི། །ཞེས་པ་ནས། གླིང་བཞི་པ་དང་ཉི་ཟླ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་(༡༣ན)ནོ། །དེ་སྟོང་ལ་ནི་སྟོང་གསུམ་མོ། །མཉམ་དུ་འཇིག་ཅིང་འབྱུང་བ་ཡིན། །ཞེས་གླིང་བཞི་པའི་འཇིག་རྟེན་གྱི་ཁམས་བྱེ་བ་ཕྲག་བརྒྱའམ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཆགས་འཇིག་གནས་གསུམ་གཅིག་ཏུ་བྱེད་པར་བཞེད་ལ། གསང་སྔགས་རྡོ་རྗེ་ཐེག་པ་གསར་མར་གྲགས་པའི་ཕ་རྒྱུད་གསང་བ་འདུས་པ་ལེའུ་གསུམ་པར། ནམ་མཁའི་དབྱིངས་ཀྱི་དབུས་གནས་པ། །ཞེས་སོགས་ལ་བརྟེན་སློབ་དཔོན་ཀླུའི་བློས་རྣམ་བཞག་རིམ་པར་གསུངས་པའི་འཇིག་རྟེན་ཆགས་ཚུལ་དང་། མ་རྒྱུད་བདེ་མཆོག་མཁའ་འགྲོ་རྒྱ་མཚོའི་ལེའུ་གསུམ་པར། ཛམྦུའི་གླིང་ནི་ཆེན་པོ་ཡི། །དུམ་བུ་བཅུ་གཉིས་ཀྱི་ནི་དབུས། །ཞེས་སོགས་ཀྱི་འགྲེལ་པ་སློབ་དཔོན་པདྨ་རྡོ་རྗེས་མཛད་པའི་གྲུ་གཟིངས་སུ། ཟླ་བ་དཀར་པོ་དེ་བཞིན་དུ། །ཀུ་ཤ་མི་ཅི་ལོངས་སྤྱོད་པ། །ཀྲུང་ཀྲུང་དྲག་པོ་སྐྱེ་བ་ཡི། །གླིང་རྣམས་རིམ་པ་ཇི་བཞིན་ནོ། །ཞེས་(༡༣བ)དང་། གཉིས་མེད་དུས་ཀྱི་འཁོར་ལོ་བསྡུས་པའི་རྒྱུད་ཀྱི་རྒྱལ་པོའི་ཁམས་ལེ་ལས། རླུང་གི་མཐའ་ནས་ལྷུན་པོའི་མཚམས་སུ་དམྱལ་བ་གདེངས་ཅན་གྲོང་ཁྱེར་ལ་ནི་དཔག་ཚད་འབུམ་ཕྲག་གཉིས། ཞེས་མངོན་པ་དང་
47-6-62
མི་མཐུན་པའི་ཕྱི་འཇིག་རྟེན་གྱི་ཁམས་དང་ནང་རྡོ་རྗེ་ལུས་ཀྱི་གནས་ལུགས་སྦྱོར་ཚུལ་ཕྲ་ཞིབ་ཟབ་རྒྱས་སུ་གསུངས།ཕྱི་རྒྱུད་ཨུ་པའམ་སྤྱོད་པའི་རྒྱུད་ཕྱག་རྡོར་དབང་བསྐུར་བའི་གླེང་གཞི་ལས། རིགས་ཀྱི་བུ་དག་འཇིག་རྟེན་གྱི་ཁམས་ཀྱི་རྒྱུད་མེ་ཏོག་གི་གཞིའི་སྙིང་པོའི་རྒྱན་བཀོད་པ་དང་ལྡན་པ་ཞེས་བྱ་བ་འཇིག་རྟེན་གྱི་ཁམས་རབ་འབྱམས་དུ་མ་ངེས་པར་སྟོན་པ་ཡོད་དོ། །ཞེས་སོགས་རབ་འབྱམས་ཀྱི་མཚམས་སྦྱོར་ལུགས་ཀྱིས་མཚོན་མི་འདྲ་བའི་ཁྱད་པར་དུ་མ་སྣང་ནའང་། འདིར་གླེང་བར་འོས་པ་ནི། གསང་ཆེན་རྡོ་རྗེ་ཐེག་པའི་རྩེ་རྒྱལ་རྫོགས་པ་ཆེན་པོ་ཤླཽ་ཀ་འབུམ་ཕྲག་དྲུག་ཅུ་རྩ་བཞི་པ་(༡༤ན)ལས་ཕྱུངས་པ་སྒྲ་ཐལ་འགྱུར་གྱི་རྒྱུད་ལས། ཞིང་ཁམས་རྣམ་པ་བཅུ་གསུམ་ལ། འདི་ནས་འཇིག་རྟེན་འོག་ན་ནི། ཐལ་བ་དབྱངས་ཞེས་བྱ་བ་ཡི། །རྒྱ་ཁྱོན་དཔག་དཀའ་རབ་ཏུ་མཛེས། །ཞེས་པ་ནས། ཕྱོགས་དང་མཚམས་ཀུན་གསལ་བའོ། །ཞེས་པའི་བར་གྱི་སྟོན་པ་རྡོ་རྗེ་འཆང་ཆེན་པོ་སྒྲིབ་པ་མཐའ་དག་དང་བྲལ་ཞིང་ཡོན་ཏན་ཐམས་ཅད་ཡོངས་སུ་རྫོགས་པའི་རང་བཞིན་དུ་མངོན་པར་བྱང་ཆུབ་ན་ཆོས་ཀྱི་སྐུ་འགྱུར་བ་མེད་པ་དེ་ལས་རང་སྣང་ལོངས་སྤྱོད་རྫོགས་པའི་སྐུར་བཞེངས་ཏེ་རིགས་ལྔའི་སྐུ་ལས་ཞིང་ཁམས་དཔག་མེད་བཀོད་པའི་ནང་ཚན་དབུས་མ་རྣམ་པར་སྣང་མཛད་ཀྱིས་བརྒྱན་པའི་སྙིང་པོ་ལ་བརྟེན་པའི་ཞིང་ཁམས་གྲངས་མེད་པ་ལས། པདྨ་རིན་པོ་ཆེའི་སྟེང་ན་བརྩེགས་མར་གནས་པའི་མི་མཇེད་འདིའི་སྟེང་འོག་ཕྱོགས་མཚམས་ན་འོད་གསལ་རིན་པོ་ཆེས་བརྒྱན་པའི་ཞིང་ཁམས་བཅུ་གསུམ་དང་། ཁྱད་པར་རྣམ་པར་སྣང་མཛད་གངས་ཆེན་(༡༤བ)མཚོའི་ཕྱག་གི་པདྨའི་བྲུམ་ཁྲུམ་ཉི་ཤུ་རྩ་ལྔར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རེ་རེ་བརྩེགས་མར་གནས་པ་གཞི་དང་སྙིང་པོ་མེ་ཏོག་གིས་བརྒྱན་པ་དེའི་ནང་ནས་བཅུ་གསུམ་པ་ཐུགས་ཀ་དཔལ་གྱི་བེའུའི་ཐད་ན་གནས་གསང་སྔགས་རྡོ་རྗེ་ཐེག་པའི་ཞིང་ཁམས་མི་མཇེད་འཇིག་རྟེན་གྱི་རྣམ་གཞག་བསྐལ་པ་དང་པོ་ཆགས་ས། བར་དུ་
47-6-63
གནས་ས། ཐ་མར་འཇིག་ས། ཡང་མཐར་སྟོངས་ས་དང་བཞིའི་བྱེ་བྲག་རྒྱས་པར་བཤད་དུ་ཡོད་མོད་ཀྱི་ཡེ་གེའི་འཇིགས་པས་བཏང་སྙོམས་སུ་བྱས་ནས་མདོར་བསྡུ་ན་སྤྲོས་དང་བྲལ་བ་ཆོས་སྐུའི་ཞིང་རྒྱ་ཚད་ལས་འདས་པ་འོད་གསལ་རྡོ་རྗེ་སྙིང་པོ། ལོངས་སྤྱོད་རྫོགས་པའི་ཞིང་ཚངས་པ་རྔ་སྒྲ། སྤྲུལ་སྐུའི་ཞིང་དག་མ་དག་གི་འཇིག་རྟེན་ཐམས་ཅད་ཆུད་པ་ཚངས་ཆེན་ལས་ཕྱོགས་དང་ཕྱོགས་མཚམས་ཀྱི་གླིང་བྱེ་བ་ཕྲག་བརྒྱའི་དབུས། བཟོད་པས་རབ་ཏུ་བརྒྱན་པ་མི་མཇེད་ཀྱི་ནང་(༡༥ན)ཚན་ཛ་ན་སྐྱེ་བ་ལའོ་ཞེས་པའི་བྱིངས་བཞག །ནའི་ཨ་བརྗོད་དོན་ཡིན་པས་ཕྱིས། བུཀ་རྐྱེན་དུ་བྱིན། ཀ་ལ་ཡན་བཞིན་འང་སོགས་ཀྱིས་ཀ་ཕྱིས། སི་བྱིན་པ། མི་ཟད་པས་ཕྱིས་པས། དེའི་སྡེ་པ་ལ་སྡེ་པའི་མཐའ་འོས་ཛམ་ན་མར་སྒྱུར་བས་ཛམྦུ། ཞེས་ལུས་ཅན་སྐྱེ་བའི་གནས་སམ། ཤིང་ཛམྦུ་ཏྲི་ཤའི་འབྲས་བུ་མ་དྲོས་པའི་མཚོར་ལྷུངས་པའི་སྒྲ་ཛམ་ཞེས་པ་ལས་འཛམ་བུའི་གླིང་དུ་གྲགས་པ། དཔལ་སྡོམ་པ་འབྱུང་བའི་རྒྱུད་ཀྱི་རིམ་པར་ཕྱེ་བ་གཉིས་པ་ལས། ཤར་གྱི་ལུས་འཕགས་བ་གླང་སྤྱོད། །དེ་བཞིན་བྱང་གི་སྒྲ་མི་སྙན། །གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །བླུན་རྨོངས་བྱེ་བྲག་མི་ཕྱེད་ཅིང་། །རྟོག་མེད་རྣམ་པར་སྤྱོད་མེད་པའོ། །ཛམྦུའི་གླིང་དུ་ལེགས་སྐྱེས་པ། །ལས་ཀྱི་ས་བར་རབ་ཏུ་གྲགས། །ལེགས་བྱས་ཉེས་པར་བྱས་པའི་ལས། །མཆོག་དང་འབྲིང་དང་ཐ་མ་(༡༥བ)རྣམས། །སྐྱེ་བ་སྔོན་གྱི་རྣམ་སྨིན་འདིར། །སྐྱེ་བོ་རྣམས་ལ་སྣང་བར་འགྱུར། །ཞེས་དང་།དཔལ་དུས་ཀྱི་འཁོར་ལོར། བདུན་པར་འཛམ་བུའི་མི་རྣམས་གནས་པ་དག་ནི་ལས་ཀྱི་ས། ཞེས་བྱང་སྒྲ་མི་སྙན་ལ་སོགས་པར་སེམས་ཅན་གྱི་ཚེ་ཚད་ལོངས་སྤྱོད་རྣམས་གཅིག་ཏུ་ངེས་པ་ལྟ་བུ་མ་ཡིན་པར་སྐྱེ་བ་སྔོན་མའི་ལས་འབྲས་ཀྱི་ཚེ་བསོད་དབང་ཐང་ཆེ་འབྲིང་ཆུང་གསུམ་སོ་སོར་སྣང་ཞིང་། ཚེ་འདིར་བསགས་པའི་ལས་ཀྱི་རྣམ་པར་སྨིན་ཡང་འདི་ཉིད་དུ་སྨིན་ནུས་པས་ལས་ཀྱི་སར་འབོད་པ་འདིའི་དབུས་སུ། ཙནྡ་པར་པྲི་ཥོ་དྷ་རཱ་ལ་སོགས་
47-6-64
པ་རྣམས་ཞེས་མ་གྷ་དྷ་འགྱུར་མེད་རྡོ་རྗེའི་གདན་ལ་འདས་པ་དང་མ་བྱོན་པའི་རྒྱལ་བ་སྤྱི་དང་། ཁྱད་པར་བསྐལ་པ་བཟང་པོའི་སངས་རྒྱས་སྟོང་གིས་བདུད་དཔུང་བྱེ་བ་ཕྲག་བརྒྱ་བྱམས་པའི་མཚོན་གྱིས་བཏུལ་ཏེ་སྐུ་བཞི་ཡེ་ཤེས་ལྔའི་བདག་ཉིད་དུ་གྱུར་པའི་གནས། རྒྱ་རོལ་(༡༦ན)ནས། ངས་ནི་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུ་རྩ་གཅིག་དྲན། དེ་དག་དྲང་སྲོང་ཞེས་བྱ་ནགས་མཆོག་འདིར་ནི་དམ་པ་རབ་ཏུ་བསྐོར། ཞེས་ཕུག་རལ་ཅན་ནམ་འཁོར་མོ་འཇིག་སྟེ་བསྒྱུར་ལུགས་གཉིས་སུ་ཡོད་པའི་ཡུལ་ཝཱ་རཱ་ཎ་སཱི་དྲང་སྲོང་ལྷུང་བ་རི་དྭགས་ཀྱི་ནགས་སུ་སྔོན་ཆད་སངས་རྒྱས་བྱེ་བ་སྟོང་ཕྲག་དགུ་བཅུས་ཆོས་འཁོར་བསྐོར་ཞིང་། མ་འོངས་པ་ན་བསྐོར་བར་འགྱུར་བ་རྫོགས་པའི་སངས་རྒྱས་སྟོང་གི་ཁྲི་ཡོད་པ། ཏིང་འཛིན་རྒྱལ་པོའི་མདོ་ལས། སངས་རྒྱས་དག་ནི་བྱེ་བ་ཕྲག་སྟོང་དང་། །དེ་བས་ལྷག་པ་གངྒཱའི་བྱེ་མ་སྙེད། །ཀུན་ཀྱང་བྱ་རྒོད་ཕུང་པོ་འདིར་བཞུགས་ཏེ། །ཞེས་དུས་གསུམ་སངས་རྒྱས་ཐམས་ཅད་ཀྱིས་བསྟི་བར་ཞིང་བདག་ཅག་གི་སྟོན་པས་སྟོང་ཉིད་སེང་གེའི་ང་རོས་མཐའ་གཉིས་རི་དྭགས་མཐར་མཛད་པ་སྟེ། དཀོན་བརྩེགས་འདུས་པ་བཅུ་གཉིས་པ་བྱང་ཆུབ་སེམས་དཔའི་སྡེ་སྣོད་ཀྱི་ལེའུ་བཞི་པ་(༡༦བ)ལས། ཤཱ་རིའི་བུ་དེའི་དུས་དེའི་ཚོད་འབྱུང་སྟེ་ཉི་མ་བདུན་འཇིག་རྟེན་དུ་འབྱུང་བར་གྱུར་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འབར་ཀུན་ཏུ་མཆེད་ཅིང་འབར་ཏེ་ཞེས་སོགས་ནས། མེ་ཆུ་རླུང་གསུམ་གྱི་བསྐལ་པས་འཇིག་རྟེན་ཞིག་ཅིང་སྟོངས་ཀྱང་ངོ་མཚར་དང་རྨད་ཀྱི་ཆོས་བཅུ་དང་ལྡན་པར་འགྱུར་རོ་ཞེས་དང་། བཅུ་གང་ཞེ་ན། ལག་མཐིལ་ལྟར་མཉམ་པ་དང་། གསེར་མ་དང་གྱོ་མོ་མེད་ཅིང་མཐོ་བར་འགྱུར་བ་དང་། ཡངས་ཤིང་མཉམ་པ་དང་། རྩྭ་ཁ་དོག་དང་དྲི་ཕུན་སུམ་ཚོགས་པ་སྐྱེ་བ་དང་། ཡན་ལག་བརྒྱད་དང་ལྡན་པའི་ཆུ་འབྱུང་བ་དང་། ཚ་བའི་ཚེ་རབ་ཏུ་བསིལ་བའི་རླུང་ལྡང་བ་དང་། པདྨ་ཨུཏྤལ་ལ་སོགས་ཆུ་ལས་སྐྱེས་པའི་མེ་ཏོག་རྣམས་སྐྱེ་བ་དང་། ཙམྤ་ཀ་དང་སྣ་མ་སོགས་ཐང་སྐྱེས་ཀྱི་མེ་ཏོག་རྣམས་སྐྱེ་བ་དང་། ས་
47-6-65
ཕྱོགས་དེ་སྲ་ཞིང་མི་ཤིགས་པའི་རྡོ་རྗེར་(༡༧ན)འགྱུར་བ་དང་། ལྷ་དང་བཅས་པའི་འཇིག་རྟེན། ཐམས་ཅད་ཀྱི་མཆོད་རྟེན་དུ་འགྱུར་བ་སྟེ་ངོ་མཚར་རྨད་ཀྱི་ཆོས་བཅུ་པོ་དེ་དག་དང་ལྡན་པར་འགྱུར་རོ། །ཞེས་དང་། མཛོད་ལས།དེ་ནི་འཛམ་གླིང་ཕོར་གྱུར་ཉིད། །ཅེས་གླིང་བཞི་ལ་དབང་བསྒྱུར་པའི་འཁོར་ལོས་སྒྱུར་བའི་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་མི་ཆེན་པོའི་མཚན་དང་ལྡན་པ་དག་ཀྱང་ཐོག་མར་གླིང་འདི་ནས་འབྱོན་ཞིང་། མི་འགྱུར་བའི་གཟེར། ཤར་ཕྱོགས་རྒྱ་ནག་གི་ཡུལ་དུ་རྒྱལ་བ་ཐམས་ཅད་ཀྱི་མཁྱེན་པའི་སྤྱི་གཟུགས་རྗེ་བཙུན་འཇམ་དཔལ་དབྱངས་ཏྲི་ཤའི་ལྦ་བ་ལས་འཁྲུངས་ཏེ་རྩིས་སྒོ་བརྒྱད་ཁྲི་བཞི་སྟོང་གསུངས་པའི་གནས་རི་བོ་རྩེ་ལྔ། ལྷོ་ཕྱོགས་ན་རྒྱལ་བ་ཟས་གཙང་སྲས་པོ་ཟུང་འཇུག་གི་སྐུར་བཞེངས་ནས་དམ་པ་དང་པོའི་སངས་རྒྱས་དུས་ཀྱི་འཁོར་ལོ་གསུངས་པའི་གནས་དཔལ་ལྡན་འབྲས་སྤུངས་དང་། རྒྱ་མཚོའི་གླིང་དུ་འཕགས་མཆོག་(༡༧བ)སྤྱན་རས་གཟིགས་དངོས་ཀྱིས་འགྲོ་བ་རྣམས་ལ་ཆོས་སྟོན་པ་ཕོ་བྲང་རི་བོ་གྲུ་འཛིན། ནུབ་ཕྱོགས་སུ་གསང་སྔགས་རྡོ་རྗེ་ཐེག་པའི་རྒྱུད་སྡེ་རིན་པོ་ཆེ་ཐམས་ཅད་ཀྱི་བང་མཛོད་མ་ཚོགས་ཌཱ་ཀི་སྤྲིན་ལྟར་འདུ་བའི་ཨོ་རྒྱན་རྡོ་རྗེ་འཆང་ཆེན་པོའི་བཞུགས་གནས་ཧེ་རུ་ཀ་རང་བྱུང་གི་གཙུག་ལག་ཁང་། བྱང་ན་ས་བཅུའི་བྱང་སེམས་རིགས་ལྡན་གྱི་སྐུར་བཞེངས་ཏེ་དཔལ་དུས་ཀྱི་འཁོར་ལོའི་སྒོ་ནས་གྲོང་བྱེ་བ་ཕྲག་དགུ་བཅུ་རྩ་དྲུག་གི་སེམས་ཅན་རྣམས་སྨིན་ཅིང་གྲོལ་བར་མཛད་པའི་གནས་ཤམྦྷ་ལ་ལ་སོགས་པ་མདོར་ན་ཡུལ་ཉི་ཤུ་རྩ་བཞི། གནས་སུམ་ཅུ་རྩ་གཉིས། དུར་ཁྲོད་ཆེན་པོ་བརྒྱད། ཡུལ་འཁོར་ལྔ་བརྒྱ། ལྗོངས་ཆེན་པོ་བཅུ་དྲུག །ཡུལ་ཕྲན་སྟོང་། སྐད་རིགས་མི་གཅིག་བདུན་བརྒྱ་ཉི་ཤུ། ཁྱད་འཕགས་ཀྱི་ཆོས་རིའི་རྒྱལ་པོ་གངས་ལྡན། སྤོས་ངད་ལྡང་། མཚོ་མ་དྲོས་པ་གྲུ་བཞི་དང་(༡༨ན)བཅས་པ། བྲག་གསེར་གྱི་བྱ་སྐྱིབས་ལྷ་མ་ཡིན་གྱི་གནས། ཤིང་ས་ལའི་རྒྱལ་པོ་རབ་བརྟན། རྫིང་བུ་དལ་གྱི་འབབ་
47-6-66
པ། ལྷའི་དབང་པོ་བརྒྱ་བྱིན་གྱི་གླང་པོ་ཆེ་གཡུལ་ངོར་སྤྱོད་པ་སོགས་ཡོན་ཏན་དུ་མས་སྤུད་ཅིང་། ཚངས་པ་ཁྱད་པར་སེམས་ཀྱིས་ཞུས་པའི་མདོ་ལས།གང་ཞིག་བསྐལ་པ་བྱེ་བར་ཞིང་གཞན་དུ། །སེམས་ལྡན་དམ་ཆོས་འཛིན་པར་གྱུར་པ་བས། །སུ་དག་སྔ་དྲོ་གཅིག་ཙམ་མི་མཇེད་དུ། །འདི་ནི་དེ་བས་མཆོག་ཏུ་མཁས་པས་དགོངས། །ཞེས་སངས་རྒྱས་ཀྱི་ཞིང་ཁམས་གཞན་དུ་དམ་ཆོས་འཛིན་པ་ལ་སོགས་པའི་ཚོགས་གཉིས་ཀྱི་ཕུང་པོ་བསྐལ་པ་བྱེ་བར་བསགས་པ་ལས་ཞིང་འདིར་སྔ་དྲོ་གཅིག་གི་རིང་བསགས་པ་མཆོག་ཏུ་གྱུར་པ་སངས་རྒྱས་ཤཱཀྱ་ཐུབ་པའི་སྨོན་ལམ་ཡེ་ཤེས་རྒྱ་མཚོས་རབ་ཏུ་སྦྱངས་པ་འདི་དག་གི་བྱེ་བྲག་འཇམ་དཔལ་རྩ་རྒྱུད་ལེའུ་རབ་འབྱམས་སོ་དྲུག་པ་ལས།
༄། །བོད་གངས་ཅན་གྱི་ཞིང་ཁམས།
ཅ༽ བོད་གངས་ཅན་གྱི་ཞིང་ཁམས།ང་ནི་ས་སྟེང་མྱ་ངན་འདས། །(༡༨བ)ཁ་བ་ཅན་གྱི་ནང་དག་ཏུ། །སཱ་ལའི་ནགས་ནི་ཡང་དག་འབྱུང་། །ཞེས་ཐོག་མར་མཚོས་གང་བ་རིམ་གྱིས་བྲི་ནས་ཤུག་པ་ལ་སོགས་པའི་ནགས་ཆགས་དེ་ལ་སཱ་ལའི་སྨན་ལྗོངས། གངས་རིའི་འཕྲེང་བས་ཁོར་ཡུག་ཏུ་དཀྲིགས་པས་གངས་ཅན་སོགས་སུ་གྲགས་པར་བཞེད་ཅིང་། ཡུལ་ཉེར་བཞིའི་ཡ་གྱལ་དུ་གྱུར་པ།མཁའ་འགྲོ་རྒྱ་མཚོའི་རྒྱུད་ལས།བོད་ཡུལ་དུ་ནི་ལྷན་སྐྱེས་ཏེ། །ཞི་ཞིང་གསལ་བའི་གཟུགས་ཅན་མ། །ཞེས་བྱུང་ཞིང་། བོད་འདིར་འགྲོ་བ་མི་ཆགས་ཚུལ་ལ་མཁས་དབང་སྟག་ཚང་པ་སོགས་
47-6-67
རྒྱ་བལ་དང་ཆ་འདྲ་བ་དང་། སློབ་དཔོན་ཤེས་རབ་གོ་ཆས་ལྷ་ལས་ཕུལ་བྱུང་གི་བསྟོད་འགྲེལ་དུ་སྐྱ་སེང་བུ་ལྔ་དང་། དགྲ་ངན་དཔུང་ཚོགས་ཡན་ལག་བཅུ་གཉིས་འཐབ་པའི་ཚེ། རྒྱལ་པོ་རུ་པ་སྟེ་ཞེས་བྱ་བ་དམག་སྟོང་ཕྲག་གཅིག་དང་བཅས་བུད་མེད་ཀྱི་ཆས་སུ་བཞུགས་ཏེ་རི་གངས་ཅན་(༡༩ན)གྱི་དབུས་སུ་བྲོས་པ་ལས་མཆེད་པར་བཤད་པ་སོགས་མང་དུ་མཆིས་ནའང་། ཨོ་རྒྱན་དུས་གསུམ་མཁྱེན་པས། བོད་ཕྲུག་སྤྲེའུའི་ཚ་རྣམས་འདུལ་བའི་ཕྱིར༔ ལྷ་ཁང་བཞེང་པ་རྒྱལ་པོ་ངོ་མཚར་ཆེ༔ ཞེས་དང་། ཡོངས་སུ་གྲགས་པ་འཛམ་བུ་གླིང་པའི་མི་རིགས་ལ་ཕྱི་ནང་བར་གསུམ་ལས་རྒྱལ་རིགས། རྗེ་རིགས། བྲམ་ཟེའི་རིགས། དམངས་རིགས་ཏེ་ཕྱིའི་རིགས་བཞི། རྒྱ་གར་ལྷ། རྒྱ་ནག་ཀླུ། ཧོར་ལྷ་མ་ཡིན། བོད་སྤྲེའུ་སྟེ་བར་གྱི་རིགས་བཞི་ཞེས་བྱུང་བའི་ཐུགས་རྗེ་ཆེན་པོ་དང་སྒྲོལ་མས་བྱིན་གྱིས་བརླབས་པའི་སྤྲེའུ་དང་བྲག་སྲིན་མོ་འདུས་པ་ལས་འགྲོ་བ་རིགས་དྲུག་ནས་ཚེ་འཕོས་པའི་གདོང་དམར་ཤ་ཟན་གྱི་ཕྲུག་གུ་མདོག་དབྱིབས་བྱ་སྤྱོད་སོགས་མི་འདྲ་བ་དྲུག་བྱུང་ཞིང་། དེ་དག་ལས་མང་དུ་འཕེལ་བར་ཟས་དཀོན་པའི་ཚེ་སྤྲེའུ་བྱང་ཆུབ་སེམས་དཔའ་རི་བོ་པོ་ཏ་ལར་འཕགས་པ་ལ་ཞུས་པས་འབྲུ་སྣ་མང་པོ་སྩལ་བ་(༡༩བ)རྣམས་བཏབ་ནས་སྟོན་ཐོག་བྱུང་བའི་ཚེ། ཟོ་དང་བྱས་པས་ཟོ་དང་གོང་པོ་རིར་གྲགས། སྤྲེལ་ཕྲུག་རྣམས་གཅིག་ལ་གཅིག་འཇིགས་ཏེ་ཚན་བཞིར་གྱེས་པས། སེ་དང་། རྨུ་དང་། ལྡོང་དང་། སྟོང་སྟེ་མིའུ་རིགས་བཞི་ཕྱི་མོར་གྲགས།སྤྱན་སྔ་བསོད་ནམས་རྒྱལ་མཚན་གྱིས། དགའ་ལྡོང་འབྲུ་གསུམ་དབྲ་དང་བཞི། །ནུ་བོ་འདའ་གཉིས་ཏེ་དྲུག །ཅེས་དྲུག་ཏུ་ངོས་བཟུང་། ཚལ་པའི་དེབ་དམར་དུ་མ་བཟང་སྤུན་དགུ།རྒྱལ་ཕྲན་ཉི་ཤུ་རྩ་ལྔའམ། བཅུ་གཉིས། སིལ་མ་བཞི་བཅུས་རིམ་གྱིས་དབང་བྱས་པར་བཤད་པ་ལྟར། རྒྱལ་ཕྲན་སིལ་མ་སྣ་ཚོགས་བྱུང་ཡང་སྤྱི་ལ་དབང་སྒྱུར་བ་པོ་མ་བྱུང་ན་སངས་རྒྱས་ཀྱི་བསྟན་པ་འཕེལ་བ་ཆེས་དཀའ་བའི་ཕྱིར་རིགས་གསུམ་མགོན་པོ། སྒྲིབ་པ་རྣམ་སེལ།ཀུན་བཟང་སོགས་བྱང་སེམས་ས་བཅུ་པའི་རྣམ་འཕྲུལ་གྱི་རྒྱལ་པོ་བྱོན་ཞིང་།(༢༠ན) བཀའ་
47-6-68
དེ་གླེགས་བམ་རིན་པོ་ཆེར་དང་ཧྲིལ་དེ་སྒྲིལ་ན་སྔོན་གྱི་རྒྱལ་བློན་བྱང་ཆུབ་སེམས་དཔའ་དེ་དག་རིགས་གསུམ་མགོན་པོའི་སྤྲུལ་པར་གྲགས་ཏེ་ཕལ་ཆེ་བ་ནི་མགོན་པོ་སྤྱན་རས་གཟིགས་ཀྱི་སྤྲུལ་པ་རྒྱལ་བའི་འབྱུང་གནས་ཉིད་ཡིན་ལ། མཁའ་རྒྱུད་བྱང་ཆུབ་སེམས་དཔའ་དེ་རྣམས་ནི་ང་ཁོ་ན་ཡིན་གྱི་གཞན་དུ་མ་སེམས་ཤིག །ཅེས་འཕགས་མཆོག་ལག་ན་པདྨའི་འཕྲིན་ལས་གྱི་སྒོ་འཕར་འཇུག་པའི་རྟེན་འབྲེལ་དུ་བོད་སྤྱི་ལ་དབང་བའི་རྒྱལ་པོའི་ཐོག་མར་རྒྱ་གར་གྱི་རྒྱལ་པོ་དམག་བརྒྱ་པའི་སྲས་མིག་མས་འགེབས་གཡུའི་སྨིན་མ་དང་དུང་སོ་ཁོར་མ་ལག་པའི་མཐིལ་དུ་འཁོར་ལོའི་རི་མོ་ཡོད་པའི་མི་ལས་འདས་པ་ཞིག་བཙས་པ། ལྷ་འདྲེའི་སྤྲུལ་པར་དོགས་ནས་སྤྱུགས་པ་ལྷ་རི་དྲང་མཐོའི་རྩེར་བྱོན་ནས་གཟིགས་པ་ན་ཡར་ཀླུངས་ཡུལ་གྱི་དགེ་མཚན་ཕུན་སུམ་ཚོགས་པ་དང་། ཤམ་པོའི་གངས་རི་དཔྱད་བཟང་བར་མཁྱེན་(༢༠བ)པས་ལྷ་རི་རོལ་པོའི་སྟེང་ནས་ལྷ་སྐས་བརྒྱུད་མཚན་ཐང་སྒོ་བཞིར་བྱོན་པར་ཕྱུགས་སྐྱོང་བ་འགའ་ཞིག་གིས་མཐོང་སྟེ། ག་ནས་འོངས་ཞེས་དྲིས་པར་གནམ་ལ་འཛུམ་མོ་ཀེར་བས་ལྷར་ངོས་བཟུང་། གཉའ་བར་ཁྲི་བྱས་གདན་དྲངས་པས་གཉའ་ཁྲི་བཙན་པོར་གྲགས་ཏེ་བོད་སྤྱིར་དབང་བའི་རྒྱལ་པོར་གྱུར། དེ་ནས་རྒྱལ་རབས་ཉེར་བདུན་འདས་པ་ན་ལྷ་ཐོ་ཐོ་རི་སྙན་ཤལ་ཕོ་བྲང་ཡུམ་བུ་གླ་སྒང་ན་བཞུགས་པའི་ཚེ། དཔང་སྐོང་ཕྱག་བརྒྱ་པ། གསེར་གྱི་མཆོད་རྟེན། མདོ་སྡེ་ཟ་མ་ཏོག་གི་སྙིང་པོ་ཡིག་དྲུག་པ་ཚིནྡྷ་མ་ཎིའི་རྐོས་ཕོར་རྣམས་ནམ་མཁའ་ནས་ཁང་ཐོག་ཏུ་བབས། གང་ཡིན་བརྡ་མ་གོ་ཡང་གཉན་པོ་གསང་བར་བཏགས་ཏེ་མཆོད་པ་རྒྱ་ཆེར་མཛད་པས་རྒྱལ་པོ་དགུང་ལོ་བརྒྱད་ཅུ་པ་སླར་ཡང་གཞོན་ཤ་ཅན་དུ་གྱུར་ཏེ་དམ་པའི་ཆོས་ཀྱི་དབུ་བརྙེས། དེ་ནས་འཇམ་དཔལ་རྩ་རྒྱུད་ལས།ལྷ་ལྡན་ཡུལ་ཞེས་བྱ་བ་(༢༡ན)ཡི། །གངས་ཅན་རི་ཡི་ནང་གནས་པའི། །རྒྱལ་པོ་མི་ཡི་ལྷ་ཞེས་པ། །
47-6-69
ལི་ཙ་ཤི་རྣམས་རིགས་སུ་འབྱུང་། །ཞེས་དང་། གླེགས་བམ་རིན་པོ་ཆེ་དཀོན་མཆོག་འབངས་ཀྱི་སྐྱེས་རབས་ལས།ང་གངས་རིའི་མགུལ་དུ་ཆོས་ཀྱི་རྒྱལ། །སེམས་གཡོ་རྒྱུ་མེད་པ་སྲོང་པོར་སྨྲ། །ཆོས་ནུས་མཐུ་བཙན་པས་གཞན་ལ་ཕན། །མི་བདག་གི་ཡོན་ཏན་སྒམ་པོར་སྦེད། །ཅེས་ལུང་བསྟན་པ་ལྟར་ཐོ་རི་ནས་རྒྱལ་རབས་ལྔ་པ་ཆོས་ཀྱི་རྒྱལ་པོ་སྲོང་བཙན་སྒམ་པོས་ཆོས་བློན་ཐུ་མི་སམྦྷོ་ཊ་འཕགས་ཡུལ་དུ་བརྫངས་ཏེ་སྔར་བོད་དུ་ཡི་གེ་མེད་པ་ལ་འབྲི་ཀློག་གི་སྲོལ་བཏོད། གླེགས་བམ་རིན་པོ་ཆེར།ང་འཇིག་རྟེན་སྒྲོན་མ་ཟག་མེད་ལ། །མི་ཁོ་བོའི་བཙུན་མོ་བྱེད་དོ་སྐད། །རྒྱ་ནག་པོའི་མཆོད་གནས་བོད་དུ་འདྲེན། །བོད་ཡུལ་གྱི་དབུས་སུ་བྱེད་དོ་སྐད། །ཅེས་གསུངས་པ་ལྟར་བདག་ཅག་གི་སྟོན་པ་དགུང་ལོ་བརྒྱད་པ་བཅུ་གཉིས་པའི་(༢༡བ)སྐུ་ཚད་སངས་རྒྱས་དངོས་ཀྱི་རབ་ཏུ་གནས་པ་སྤྱན་འདྲེན་པའི་སླད། འཇིག་རྟེན་མཐུན་འཇུག་གི་ཚུལ་དུ་བལ་བཟའ་ཁྲི་བཙུན་དང་། རྒྱ་བཟའ་ཨོང་ཇོ་གཉིས་ཁབ་ཏུ་བསུས། འཕྲུལ་སྣང་གི་གཙུག་ལག་ཁང་བརྩིགས་པར་བརྩམས་པ་ལ་མི་མ་ཡིན་གདུག་ཅན་རྣམས་ཀྱིས་ལས་སུ་མ་སྟེར་བས། ཕོ་བྲང་མ་རུའི་ཕ་བོང་ཁར་རྒྱལ་པོ་ཡབ་ཡུམ་སྐུ་མཚམས་མཛད་ནས་ཡི་དམ་གྱི་ལྷ་བསྒྲུབས་པས་འགྲུབ་སྟེ། ལུང་བསྟན་ལྟར་བོད་སྲིན་མོ་གན་རྐྱལ་དུ་བསྒྱེལ་བའི་མོ་བཙའ་རྣམས་སུ་མཐའ་འདུལ་ཡང་འདུལ་རུ་གནོན་གྱི་གཙུག་ལག་ཁང་བརྩིགས། ས་དགྲ་ངན་པ་རྣམས་བཅོམ། ལྷ་ས་དང་ར་མོ་ཆེའི་རྟེན་བརྟེན་པར་བཅས་པ་ས་སྟེང་ན་འགྲན་
47-6-70
ཟླ་དང་བྲལ་བ་བཞེངས། རྒྱ་གར་གྱི་སློབ་དཔོན་ཀུ་ས་ར་དང་། བྲམ་ཟེ་ཤ་ཀ་ར། བལ་པོ་ཤཱི་ལ་མཉྫུ། རྒྱ་ནག་གི་སློབ་དཔོན་ཧཱ་ཤང་(༢༢ན)མ་ཧཱ་ཡ་ན་ལ་སོགས་པ་སྤྱན་དྲངས་ནས་སྡེ་སྣོད་གསུམ་དང་རྒྱུད་ཀྱི་ཆ་ལག་མང་རབ་བསྒྱུར་བར་ཡང་གྲགས་དངོས་སུ་འཆད་ཉན་མ་བྱུང་རུང་རྒྱལ་པོ་རང་གི་སྐལ་ལྡན་མང་པོ་ཐུགས་རྗེ་ཆེན་པོ་ཞི་ཁྲོའི་གདམས་པ་ལྐོག་ཆོས་སུ་གསུངས་པ་ཉམས་སུ་བླངས་པས། ཉང་བྲན་ཕ་བོང་ཁར་རྣལ་འབྱོར་སྤྱོད་པ་རལ་པ་ཅན་བརྒྱ་ཕྲག་ཙམ་རྒྱུན་མར་བྱུང་། དུས་དེར་གསུངས་པ་རྣམས་ཕྱོགས་གཅིག་ཏུ་བསྡོམས་པ་གཏེར་ཁ་གསུམ་དུ་བྱས་པ་གྲུབ་ཐོབ་དངོས་གྲུབ། མངའ་བདག་ཉང་། ཤཱཀྱ་འོད་དང་གསུམ་གྱིས་གཏེར་ནས་བཏོན་པ་མ་ཎི་བཀའ་འབུམ་མམ་ཐུགས་རྗེ་ཆེན་པོའི་ཆོས་སྐོར་དུ་གྲགས་དང་འཕྲིན་ལས་ཆ། བཀོད་པ་ཆེན་པོའི་རྒྱུད་ལས།དེ་ཡི་རྗེས་ལ་རྒྱལ་པོའི་རིགས། །སྤྲུལ་པ་ཕྱག་སྙན་བཅས་པས་འཛིན། །ཞེས་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་འཛིན་པར་ལུང་གིས་ཟིན་པ་ལྷ་བཙད་པོ་ཁྲི་སྲོང་ལྡེའུ་(༢༢བ)བཙན་སྲོང་བཙན་ནས་རྒྱལ་རབས་ལྔ་པར་བྱོན། བོད་དུ་དམ་པའི་ཆོས་དར་བའི་ཐུགས་བསམ་བསྐྱེད་ནས་ཟ་ཧོར་གྱི་མཁན་པོ་ཤནྟ་རཀྵི་ཏ་སྤྱན་དྲངས།དགེ་བཅུ་དང་ཁམས་བཅོ་བརྒྱད་དང་མཐུན་པའི་ཆོས་གསུངས་པར་བོད་ཀྱི་ལྷ་སྲིན་གདུག་པ་ཅན་རྣམས་ཁྲོས་ཏེ་ཐང་ལྷས་དམར་པོ་རིར་ཐོག་ཕབ། ཤམ་པོས་ཡར་ཀླུངས་འཕང་ཐང་ཆུ་ལ་བསྐུར། བརྟན་མ་བཅུ་གཉིས་ཀྱིས་མི་ནད་ཕྱུགས་ནད་བཏབ་པ་སོགས་མི་ཤིས་པ་དུ་མ་བྱུང་བས། བོན་བློན་སོགས་མང་པོས་ཆོས་བྱས་པས་ལན་ཞེས་སྒྲོ་སྐུར་གྱི་ལབ་གཞི་སྣ་ཚོགས་བྱུང་བར་བརྟེན་མཁན་པོས་རྒྱལ་པོ་ལ་ཁོ་བས་རྒྱུ་མཚན་ཉིད་ཀྱི་ཐེག་པར་སྦྱངས། བྱང་ཆུབ་ཀྱི་སེམས་དང་ལྡན་ཡང་བོད་ཀྱི་ལྷ་སྲིན་ཉམས་མི་ཐུལ་བར་འདུག །རྒྱལ་པོའི་དགོངས་བཞེད་རླབས་ཆེན་འདི་ལྟ་བུ་འགྲུབ་པར་བྱེད་པ་ལ་འཛམ་གླིང་ན་ཆེ་བའི་རིག་སྔགས་གྲུབ་པ་པདྨ་
47-6-71
འབྱུང་གནས་(༢༣ན)བྱ་བ་ཡོད་པ་དེ་སྤྱན་འདྲེན་པ་ལས་འོས་མེད་པའི་ལུང་བསྟན་ལྐོག་ཏུ་མཛད་པ་ལྟར་རྗེའི་ཐུགས་ལ་ཤིན་ཏུ་འཐད་ཀྱང་མཁན་པོའི་ལུང་བསྟན་ཡིན་པ་བདུད་བློན་དུ་མ་མ་གསུངས་པར་རང་ཉིད་ལ་མནལ་ལམ་དུ་བྱུང་བ་ལྟར་མཛད་དེ་ཐབས་མཁས་ཀྱི་འཕྲུལ་དང་མི་དམན་པའི་བརྩོན་འགྲུས་ཀྱིས་བོད་དུ་གདན་དྲངས་པ་ཡིན་ལ།
༄། །སློབ་དཔོན་པདྨ་འབྱུང་གནས་ཀྱི་མཛད་རྣམ།
ཆ༽ སློབ་དཔོན་པདྨ་འབྱུང་གནས་ཀྱི་མཛད་རྣམ།དེ་ཡང་གྲུབ་པའི་དབང་ཕྱུག་ཆེན་པོ་འདི་ཉིད་ཞིང་འདིར་བྱོན་པའི་མཛད་པ་རྒྱ་མཚོ་ལྟ་བུ་ལས་ཆུ་ཐིགས་ཙམ་ཞིག་བཀའ་བབས་ཀྱི་གླེང་ན། ཉིད་གསུངས་ལུང་བསྟན་བཀའ་རྒྱ་ཅན་ལས། རང་བྱུང་པདྨ་ཞེས་བྱར་གྲགས་པ་བདག༔ སངས་རྒྱས་སྣང་བ་མཐའ་ཡས་ཐུགས་ལ་བརྟོལ༔ འཕགས་པ་སྤྱན་རས་གཟིགས་དབང་གསུམ་ལས་སྤྲུལ༔ མཁའ་འགྲོ་ཡོངས་ཀྱི་མིང་པོ་དཔའ་བོའི་རྒྱལ༔ དུས་གསུམ་སངས་རྒྱས་ཀུན་གྱི་འཕྲིན་ལས་བདག༔ མཉམ་མེད་ཀུན་བཟང་རྡོ་རྗེ་འཆང་ཆེན་པོ༔ སྤྲུལ་པའི་སྐུར་སྣང་ཐུགས་རྗེ་ཆེན་པོ་ཅན༔ གང་ལ་གང་འདུལ་འཕྲིན་ལས་རླབས་པོ་ཆེས༔ སེམས་ཅན་རྣམས་(༢༣བ)ཀྱི་རེ་འདོད་ཡིད་བཞིན་སྐོང་༔ཞེས་གསུངས་པ་ལྟར་དུས་གསུམ་རྒྱལ་བ་ཐམས་ཅད་ཀྱི་སྤྱི་མེས་ཡེ་ནས་སངས་རྒྱས་པ་ཆོས་སྐུ་ཀུན་ཏུ་བཟང་པོའི་མགོན་པོ་འོད་མི་འགྱུར་བ་ཁོ་ན་ཡིན་པས་དེ་ཉིད་ཆོས་ལོངས་སྤྲུལ་གསུམ་གྱི་རྣམ་པར་སྣང་ཚུལ་གོང་དུ་སྨོས་ཟིན་པ་ལྟར་ན་སྤྲུལ་སྐུའི་སྟོན་ཚུལ་བྱེ་བྲག་གདུལ་བྱ་སོ་སོའི་བསམ་པ་མཐའ་ཡས་དང་མཐུན་པར་འདུལ་བྱེད་ཀྱི་སྤྲུལ་པའི་སྐུའི་གཟུགས་དང་། སྒྲ་སྐད་དང་། མཛད་པ་དང་། འཕྲིན་ལས་དང་ཐབས་ཚུལ་མི་འདྲ་བ་མཐའ་ཡས་པ་སྟེ། མདོར་ན་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ཁྱབ་པས།སློབ་དཔོན་འདིའི་རྣམ་པར་ཐར་པ་སྒྲ་ཇི་བཞིན་པ་ནི་ཉན་རང་དང་བྱང་སེམས་མན་ཆད་གང་
47-6-72
གིས་ཀྱང་བརྗོད་པར་རྔོ་ག་ལ་ཐོགས། འོན་ཀྱང་གདུལ་བྱའི་སྣང་ངོ་ཙམ་དང་བསྟུན། སྤྲུལ་པའི་གཏེར་སྟོན་པདྨ་གླིང་པའི་རྣམ་ཐར་འོད་ཟེར་ཀུན་མཛེས་སུ། ཕྱི་ལྟར་ན་བསྐལ་པ་བཟང་པོའི་སངས་རྒྱས་སྟོང་དུ་སྤྲུལ་ཏེ་སྡེ་སྣོད་གསུམ་གྱི་ཆོས་འཁོར་བསྐོར།(༢༤ན)ནང་ལྟར་ན་དགའ་རབ་རྡོ་རྗེ་སྟོན་པ་གཞོན་ནུ་དཔའ་བོ་སྟོབས་ལྡན་དང་རིག་འཛིན་བརྒྱད་ལ་སོགས་པ་གསང་སྔགས་འཆང་བའི་པཎྜི་ཏ་དང་གྲུབ་ཐོབ་ཕོ་མོ་མཐའ་ལས་འདས་པར་སྤྲུལ་ནས་རྒྱུད་སྡེ་རིན་པོ་ཆེ་རབ་འབྱམས་རྒྱ་མཚོ་བསྟན་པ་སྤེལ། གསང་བ་ལྟར་ན་ཨོ་རྒྱན་རྡོ་རྗེ་འཆང་ཆེན་པོར་བཞེངས་ཚུལ་འབྱུང་ལ། ཐང་ཡིག་ཤེལ་བྲག་མ་ལས།མདོ་ལྟར་རྒྱལ་བ་ཤཱཀྱ་ཐུབ་པར་གྲགས༔སྔགས་ལྟར་གུ་རུ་པདྨ་འབྱུང་གནས་ཞེས༔ཞེས་གསུངས་པ་སློབ་དཔོན་ཆེན་པོ་འདི། དབུས་འགྱུར་ཚལ་ལུང་བསྟན་པའི་མདོ་ལས། འདི་ནས་ལོ་ནི་བཞི་གཉིས་ན། །དྷ་ན་ཀོ་ཤའི་མཚོ་གླིང་ན། །རང་འཁྲུངས་པདྨའི་སྟེང་དུ་ནི། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོ་འབྱུང་། །ཞེས་དང་། བླ་མེད་དོན་རྫོགས་འདུས་པའི་རྒྱུད་ལས། འདི་ནས་མྱ་ངན་འདས་འོག་ཏུ། །ལོ་ནི་བཅུ་(༢༤བ)རུ་གཉིས་ཆད་ན། །འཇིག་རྟེན་ཀུན་ལས་རྒྱལ་བའི་མཆོག །ཨོ་རྒྱན་ཡུལ་དུ་ང་ཉིད་འབྱུང་། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པ་ལུང་དུ་སྟོན། །ཞེས་དང་། བཀའ་འདུས་རྩ་བའི་རྒྱུད་ལས།སྤྱི་དཔལ་ཆེན་པོ་ང་དང་གཉིས་སུ་མེད་པ༔ མཚོ་སྐྱེས་རྡོ་རྗེ་ཞེས་བྱ་བ་ད་ལྟ་ང་དང་ཚུལ་མཐུན་པ་ཞིག་འབྱུང་༔ དེས་བཀའ་འདུས་སྤྱི་ཏིའི་ཐེག་པ་འདི་ཟ་ཧོར་གྱི་ཡུལ་དུ་རྒྱལ་པོ་གཙུག་ལག་འཛིན་ལ་སོགས་པ་རྒྱ་ཆེན་སྟོན་པར་འགྱུར༔ ཞེས་དང་། མྱང་འདས་ཆེན་པོའི་མདོ་ལས། ཤིང་ས་ལའི་དྲུང་རྩྭ་མཆོག་གཉིས་ཀྱི་བར་ན། བཅོམ་ལྡན་འདས་ལ་འོད་སྲུང་དང་། གཅུང་དགའ་བོ་མ་གཏོགས་པ་དགེ་སློང་གི་དགེ་འདུན་བརྒྱ་ཕྲག་བཅུས་བསྐོར་
47-6-73
ནས་ཉེ་གནས་ཆེན་པོ་ཀཱ་ཏྱ་ཡ་ན་དང་། ཙུན་དང་། ཀུན་དགའ་བོ་རྣམས་ལ་བཀའ་སྩལ་པྡ།ང་ནི་ཡོངས་སུ་མྱང་ངན་འདས། །(༢༥ན)ཁྱེད་རྣམས་མྱ་ངན་མ་བྱེད་ཅིག །མདངས་ལྡན་དྲི་མེད་མཚོ་དཀྱིལ་དུ། །ང་ལས་ལྷག་པའི་སྐྱེས་བུ་འབྱུང་། །ཞེས་སོགས་ཐང་ཡིག་ཏུ་འདྲེན་པར་མཛད་པ་དང་། པདྨ་གླིང་པའི་རྣམ་ཐར་དུ།ང་འདས་བཞི་གསུམ་བཅུ་གཉིས་ན། །ང་ལས་ལྷག་པའི་སྐྱེས་བུ་གཅིག །ཡ་མཚན་རྟགས་དང་བཅས་ནས་ནི། །དྷ་ན་ཀོ་ཤའི་མཚོ་གླིང་དུ། །རིག་འཛིན་སྔགས་འཆང་གཅིག་ཏུ་འཁྲུངས། །ཞེས་སོགས་དུ་མ་ཕྱོགས་མཐུན་པ་བཞིན་ནུབ་ཕྱོགས་ཨོ་རྒྱན་གྱི་ཡུལ་དབྱིབས་ཆ་ལང་ཁ་སྦུབ་ཀྱི་རྣམ་པ་ཡངས་ཤིང་རྒྱ་ཆེ་བ། བདེ་བ། ལོ་ལེགས་པ། སྐྱེ་བོ་དང་མི་མང་པོས་གང་བ། བཟའ་ཤིང་དང་། མེ་ཏོག་དང་། སྨན་གྱི་རྣམ་པ་དུ་མ་བརྒྱན་པ། ཡུལ་ཆེན་ལྔ། གླིང་ཉི་ཤུ་རྩ་གཅིག །ཡུལ་གྲུ་བྱེ་བ་བཅོ་བརྒྱད། གྲོང་ཁྱེར་དགུ་བཅུ་རྩ་དྲུག་རྣམས་ཡོད་པའི་དབུས་ཡུལ་ཆེན་དྷ་ན་ཀོ་ཤར། རྒྱ་མཚོ་དྲི་མེད་མདངས་ལྡན་ཞེས་བྱ་བ། ཆུ་(༢༥བ)ཞེང་དཔག་ཚད་བརྒྱ་ཕྲག་ཉི་ཤུ་པ། ཟླུམ་ཞིང་འཁྱིལ་བ་དང་། སྔོ་བ་དང་། དྭངས་པ་དང་།བསིལ་ལ་འཇམ་པ་སོགས་ཡན་ཡག་བརྒྱད་དང་ལྡན་པ། དེའི་དབུས་སུ་པདྨའི་སྡོང་པོ་ཁ་དོག་དང་དབྱིབས་དང་འདབ་མ་དང་ཟེའུ་འབྲུའི་ཁྱད་པར་ཕུན་སུམ་ཚོགས་པ་ཞིག་ལ། བློན་པོ་བཀའ་ཐང་ལས།ཐོས་པས་བྱང་ཆུབ་རྣམ་ཐར་མདོར་བསྡུ་ན༔ རྒྱལ་སྲས་མཛད་པ་བཅུ་གཅིག་འདི་ལྟ་སྟེ༔ འགྲོ་འདུལ་དགོངས་མཛད་པདྨའི་ལྷུམས་ཞུགས་མཛདཿ རང་བྱུང་བལྟམས་མཛད་རྒྱལ་སྲས་རོལ་རྩེད་མཛད༔ རབ་ཏུ་བྱུང་མཛད་དཀའ་ཐུབ་སྣ་ཚོགས་མཛད༔ བདུད་དཔུང་
47-6-74
འཇོམས་མཛད་སངས་རྒྱས་བྱང་ཆུབ་མཛད༔ ཆོས་འཁོར་བསྐོར་མཛད་རྟུལ་ཞུགས་སྤྱོད་པ་མཛད༔ བསྟན་པ་མཐར་རྒྱས་མི་ནུབ་གཏེར་སྦས་མཛད༔ ཅེས་གསུངས་པའི་གོ་རིམ་དང་བསྟུན་ན་མངའ་བདག་(༢༦ན)ཉང་གིས་མཛད་པའི་རྣམ་ཐར་གསོལ་འདེབས་ལས། འཛམ་གླིང་བྱེ་བ་ཕྲག་བརྒྱའི་ཞིང་ཁམས་སུ། །ཨོ་རྒྱན་པདྨ་བྱེ་བ་ཕྲག་བརྒྱའི་སྐུ། །ཞེས་པ་ལྟར།འཛམ་བུའི་གླིང་སྤྱི་དང་བྱེ་བྲག་གངས་ཅན་པའི་འགྲོ་བ་འདུལ་བར་དགོངས་ཏེ་སངས་རྒྱས་སྣང་བ་མཐའ་ཡས་ཀྱི་ཐུགས་ཀའི་ཧྲཱིཿཡིག་ལས་འཕྲོས་པའི་འོད་ཟེར་གྱི་རྣམ་པས་ལྷུམས་སུ་ཞུགས། ཐང་ཡིག་ཏུ་ཡིག་སྐྱོན་ལྟ་བུའི་འབྲུག་ལོ་ཞེས་སྣང་ཡང་དོན་དམ་སྟོན་པ་མྱ་ངན་ལས་འདས་ནས་བགྲོད་པ་ལོར་བརྩིས་པའི་བརྒྱད་སོང་བ་ཤིང་སྤྲེལ་སྤྲེ་ཟླའི་ཚེས་བཅུ་གཟའ་ཕུར་བུ་དང་། ལས་སྐར་ཁྲར་བབས་པའི་ཚེ། ཁྱེའུ་མི་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུས་སྤྲས་པ་ལོ་བརྒྱད་པའི་ཚུལ་ཅན་ཞིག་རང་བྱུང་དུ་བལྟམས། དེ་ནས་ཨོ་རྒྱན་གྱི་རྒྱལ་པོ་ཨིནྡྲ་བོ་དྷི་ལ་སྲས་མི་མངའ་ནས། དཀོར་མཛོད་སྦྱིན་པར་བཏང་སྟེ་རྒྱ་མཚོ་ལས་ཡིད་བཞིན་(༢༦བ)ནོར་བུ་ཀླུ་མོ་མཛེས་ལྡན་མ་ལས་བླངས་ཏེ་ཚུར་ལམ་དྷ་ན་ཀོ་ཤར་བྱོན་པ་ན། རང་བྱུང་གི་ཁྱེའུ་གཟིགས་པས་ཤིན་ཏུ་ཡ་མཚན་ཏེ་གདན་དྲངས་པར།ཁྱེའུ་གར་བཞུགས་སུ་པདྨའི་གདན་འཛད་མེད་དུ་བྱུང་བས་པདྨའི་འབྱུང་གནས་སམ། མཚོ་སྐྱེས་རྡོ་རྗེར་མཚན་གསོལ་ཏེ་སྲས་སུ་བཟུང་།ནོར་བུའི་མཐུས་རིན་པོ་ཆེའི་ཁྲི་སྟན་དང་ཁང་བཟང་བྱུང་ཞིང་། ཟས་གོས་དང་རིན་པོ་ཆེའི་ཆར་གྱིས་སྐྱེ་བོ་ཚིམས་པར་བྱས། འོད་འཆང་མ་སོགས་བཙུན་མོའི་ཚོགས་དང་རོལ།རྒྱལ་སྲིད་སྤོང་བའི་ཕྱིར་རྩེད་མོའི་གར་མཛད་ཅིང་། མཚོན་ཆ་ཕྱག་ནས་ཤོར་བའི་ཚུལ་གྱིས་བློན་པོའི་བུ་གསད་པར་བརྟེན། རྒྱལ་ཁྲིམས་ཀྱི་ཕྱིར་སྤྱུགས། དུར་ཁྲོད་དུ་བྱོན་ཏེ་དེའི་རྫས་ལ་ལོངས་སྤྱད། མཁའ་འགྲོ་མ་རྣམས་དབང་དུ་བསྡུས། སྦྱོར་སྒྲོལ་གྱི་སྤྱད་པ་བསྐྱངས་པས་སྲིན་པོ་ཤནྟ་རཀྵི་ཏར་གྲགས། གསལ་ལྡན་(༢༧ན)གྱི་ཡུལ་དུ་ཤཱཀྱ་སྲིད་སྒྲུབ་ལ་རྩིས། པདྨ་
47-6-75
ཅན་དུ་འཚོ་བྱེད་གཞོན་ནུའི་བུར་གསོ་དཔྱད། ར་ག་ལའི་ཡུལ་དུ་ཨཱ་ཙཪྻ་ཀུན་གྱི་བཤེས་གཉེན་ལ་སྒྲ་དང་ཡིག་རིགས། བི་ཤྭ་ཀརྨ་ལས་བཟོ། ཕྱི་ནང་གི་པཎྜི་ཏ་དུ་མ་ལས་ཚད་མ་རྣམས་མཁས་པར་སྦྱོང་བའི་ཚུལ་བསྟན། མཁའ་འགྲོ་བདུད་འདུལ་མ་དང་ཞི་འཚོ་མས་དབང་བསྐུར་བྱིན་གྱིས་བརླབས། འཁྲུངས་པའི་མཚོ་གླིང་དུ་བྱོན་ཏེ་གསང་སྔགས་མཁའ་འགྲོའི་བརྡ་སྐད་ཀྱིས་བསྒྲུབས་པས་རྒྱ་མཚོའི་གླིང་གི་མཁའ་འགྲོ་བཞི་དབང་དུ་འདུས། རྡོ་རྗེ་ཕག་མོའི་ཞལ་མཐོང་། རྒྱ་མཚོའི་ཀླུང་དང་བར་སྣང་གི་གཟའ་སྐར་རྣམས་དམ་ལ་བཏགས། རྡོ་རྗེ་དྲག་པོ་རྩལ་དུ་གྲགས། འཕགས་པ་ཀུན་དགའ་བོ་རབ་ཏུ་བྱུང་བར་ཐང་ཡིག་ལས་བཤད་ཀྱང་། སློབ་དཔོན་པྲ་བ་ཧསྟི་ལས་རབ་ཏུ་བྱུང་སྟེ་ཤཱཀྱ་སེང་གེར་མཚན་གསོལ། ཡོ་གའི་རྒྱུད་རྣམས་ཚར་བཅོ་བརྒྱད་མཉན་པས་དེ་ཉིད་ལྷ་རྣམས་ཞལ་(༢༧བ)གཟིགས། འཇམ་དཔལ་བཤེས་གཉེན་ལ་བཀའ་འདྲི་ཞུས་པས་ངས་ཁྱོད་འདུལ་བའི་དུས་ལ་བབས་དགེ་སློང་མ་ཀུན་དགའ་མོ་ལ་དབང་ཞུས་ཤིག་གསུངས་པ་ལྟར། མཁའ་འགྲོའི་གཙོ་མོ་གསང་བ་ཡེ་ཤེས་དགེ་སློང་མར་བསྟན་པ་དང་མཇལ། གསོལ་བ་བཏབ་པས་ཧཱུཾ་ཡིག་ཏུ་བསྒྱུར་ནས་དེས་ཞལ་དུ་མིད་གསང་བའི་པདྨར་བཏོན་ནས་སྒྲིབ་པ་གསུམ་སྦྱངས། སྣང་བ་མཐའ་ཡས་ཀྱི་སྒོ་ནས་ཕྱི་ཚེའི་རིག་འཛིན་སྤྱན་རས་གཟིགས་ཀྱི་སྒོ་ནས་ནང་ཕྱག་ཆེན་གྱི་རིག་འཛིན། གསང་བ་རྟ་མགྲིན་གྱི་སྒོ་ནས་དྲེགས་པ་མཐའ་དག་འདུལ་བར་དབང་བསྐུར།དེ་ནས་སློབ་དཔོན་འཇམ་དཔལ་བཤེས་གཉེན་ལས་ཕྱི་ནང་གི་ཆོས་དུ་མ་གསན།འཕགས་པ་འཇམ་དཔལ་གྱི་ཞལ་གཟིགས། སློབ་དཔོན་ཧཱུཾ་ཀ་ར་ལས་ཡང་དག །ཤཱཀྱ་དེ་ཝ་ལས་ཕུར་པ། ནཱ་ག་རྫུ་ན་ལས་པདྨ་གསུང་། སངས་རྒྱས་གསང་བ་ལས་(༢༨ན)སྒྱུ་འཕྲུལ། རྡོ་རྗེ་མི་འགྱུར་ལས་བདུད་རྩི་ཡོན་ཏན། དྷ་ན་སཾ་སྐྲྀ་ཏ་ལས་སྲིད་པ་མ་མོ་ཤྲཱི་སིངྷ་ལས་སེམས་ཕྱོགས། གུཧྱ་ཙཎྜ་ལས་དམོད་པ་དྲག་སྔགས་རྣམས་ཚར་རེ་གསན་པས་ལྷ་སོ་སོའི་ཞལ་གཟིགས། བློ་ལྡན་མཆོག་སྲེད་དུ་གྲགས།
47-6-76
དེ་ནས་ཟ་ཧོར་རྒྱལ་པོ་གཙུག་ལག་འཛིན་གྱི་བུ་མོ་མནྡྷ་ར་བ་དབང་དུ་མཛད་དེ་རི་བོ་པོ་ཏ་ལའི་འདབས་མ་ར་ཏིའི་གནས་སུ་ཚེའི་རིག་འཛིན་གྲུབ། ཡབ་ཡུམ་གཉིས་ཟ་ཧོར་གྱི་ཡུལ་དུ་བསོད་སྙོམས་ལ་བྱོན་པས། མེ་ཕུང་དུ་བསྲེགས་པ་ཏིལ་མར་མཚོར་འཁྱིལ་བའི་དབུས་ན་པདྨའི་སྡོང་པོ་ལ་ཡབ་ཡུམ་མཉམ་པར་ཞུགས་པས་པདྨ་འབྱུང་གནས་དང་པདྨ་སམྦྷར་གྲགས་ཤིང་། རྒྱལ་པོའི་སྐུ་ཆས་རྒྱལ་སྲིད་ལྷ་ལྕམ་དང་བཅས་ཕུལ། ཨོ་རྒྱན་གྱི་ཡུལ་དུ་བྱོན་པ་འབངས་རྣམས་ཀྱིས་ངོ་ཤེས། མེར་བསྲེགས་པས་གསོལ་བའི་གུར་ཁྱིམ་ན་པདྨའི་སྡོང་པོ་ལ་བཞུགས་ཏེ་སེམས་ཅན་འཁོར་བ་(༢༨བ)ལས་བསྒྲལ་བ་མཚོན་པས་ཐོད་སྐམ་གྱི་ཕྲེང་བ་གསོལ་བར་མཐོང་སྟེ་པདྨ་ཐོད་འཕྲེང་རྩལ་དུ་གྲགས།སྔོན་རྒྱལ་པོའི་སྲས་མིན་པས་པདྨ་རྒྱལ་པོར་ཡང་གྲགས་ཏེ། ཨོ་རྒྱན་གྱི་རྒྱལ་ཁམས་བཏུལ་བ་སོགས་སེམས་ཅན་གྱི་དོན་དུ་བཀའ་སྤྱད་སྣ་ཚོགས་མཛད། རྒྱལ་པོ་འཁོར་བཅས་འོད་ལུས་སུ་ཡལ། རྒྱ་གར་དུ་མུ་སྟེགས་སྟོན་པ་ལྔ་བརྒྱས་བསྟན་པ་བསྣུབས་པའི་ཚེ། དེར་བྱོན་ནས་རྩོད་པ་མཛད་པས་སློབ་དཔོན་རྒྱལ། མུ་སྟེགས་ཀྱི་མཐུ་བྱེད་པའི་ཚེ་མཁའ་འགྲོ་མ་བདུད་འདུལ་མས་བསེའི་སྒྲོམ་བུ་ཞིག་ཕུལ་ནས་བདུད་དང་མུ་སྟེགས་ཐུལ་ཅིག་པར་གསོལ་བ་ན། སྒྲོམ་བུ་ནས་སྲོག་སེར་ཐོག་དང་བཅས་པའི་ངན་སྔགས་བྱུང་ནས་ཐོག་ཕབ་སྟེ་མུ་སྟེགས་རྣམས་ནགས་སུ་བསྲེགས། ལྷག་མ་སངས་རྒྱས་སུ་བཙུད་དེ་སེང་གེ་སྒྲ་སྒྲོག་ཏུ་གྲགས།གཞན་ཡང་གསེར་གླིང་དུ་མུ་སྟེགས་ཀྱི་རྒྱལ་པོ་(༢༩ན)ནམ་མཁའི་ཤུགས་ཅན་བཏུལ་བ་སོགས་བདུད་ཀྱི་དཔུང་མ་ལུས་པ་བཅོམ། རྒྱ་བལ་གྱི་མཚམས་ཡང་ལེ་ཤོད་ཀྱི་བྲག་ཕུག་ཏུ་བལ་པོ་ཤཱཀྱ་དེ་བ་ལ་སྒྲུབ་རྟེན་མཛད་ནས་ཡང་དག་གི་སྒོ་ནས་མཆོག་བསྒྲུབ་པས་ཀླུ་གྱོང་པོ་གནོད་སྦྱིན་རྒོད་མ་ཁ་ཁྲ་མེན་ཀློག་མ་སྲིན་གསུམ་གྱི་བར་དུ་བཅད་དེ་ལོ་གསུམ་དུ་ཆར་མ་བབས་པས་ནད་མུག་རྒྱས་པའི་ཚེ། བར་ཆད་དུ་དགོངས་ནས་རྒྱ་གར་གྱི་བླ་མ་རྣམས་ལ་
47-6-77
བར་ཆད་འདུལ་བའི་ཆོས་རྫོང་བར་ཞུས་པས། སློབ་དཔོན་པྲ་བ་ཧ་སྟི་ལ་ཕུར་པའི་ཆོས་ཞུས་ཤིག་པར་གཞན་རྣམས་ཀྱིས་ལུང་བསྟན་ཏེ་པྲ་བ་ཧ་སྟིས་ཕུར་པ་འབུམ་སྡེའི་ནང་ནས་དགྲ་བགེགས་འདུལ་བའི་སྐོར་མི་ཁུར་གཉིས་བརྫངས་པ་ཕེབས་པ་ཙམ་གྱིས་བར་ཆད་ཞི། ཆར་བབས། ནད་མུག་ཆད། ཡང་ཕུར་གྱི་ལྷ་ཚོགས་ཐམས་ཅད་ཞལ་གཟིགས། མཆོག་གི་དངོས་གྲུབ་ཐོབ། ཡང་དག་ཚོང་པ་ལྟར་དངོས་གྲུབ་ཆེ་རུང་བར་ཆད་མང་བས་(༢༩བ)ཕུར་བ་སྐྱེལ་མ་དང་འདྲ་བ་དགོས་པ་གཟིགས་ནས་ཡང་ཕུར་སྦྲགས་མའི་སྒྲུབ་ཐབས་མཛད། སྲོད་ལ་ཤྭ་ན་མ་མཆེད་བཞི། གུང་ལ་རེ་མ་ཏི་མཆེད་བཞི། ཐོ་རེངས་བསེའི་ལྷ་མོ་མཆེད་བཞི། བསེའི་སྐྱེས་བུ་བཞི། དུང་གི་སྐྱེས་བུ་བཞི། ལྕགས་ཀྱི་སྐྱེས་བུ་བཞི་སྟེ་ཕོ་རྒྱུད་མོ་རྒྱུད་ཐམས་ཅད་ཀྱིས་སྲོག་སྙིང་ཕུལ་ནས་དམ་ལ་བཏགས་ཏེ་ཕུར་པའི་བཀའ་སྲུང་དུ་བཞག །རྒྱ་གར་ཏི་ར་ཧུ་ཏི། ཐ་རུ། ཙམ་པ་ལ་སོགས་པར་གསེར་འགྱུར་དང་། བཅུད་ལེན་ལ་སོགས་པས་སེམས་ཅན་མང་པོའི་ཚེ་བསྲིངས། ལོངས་སྤྱོད་སྤེལ། ཆུ་མེད་པ་རྣམས་ཆུ་བཏོན། ཆུ་ཆེས་པ་རྣམས་ས་སྦུབས་སུ་བཅུག །མུ་སྟེགས་པ་རྣམས་ཀྱིས་དམོད་པ་བྱས་པ་ཙམ་གྱིས་ནང་པ་སངས་རྒྱས་པར་ནད་ཡམས་ཡོང་བ་རང་བྱུང་གི་ལིངྒ་། ཕྱི་པ་རྣམས་ལ་ལོངས་སྤྱོད་འབད་མེད་དུ་སྟེར་བའི་བ་ག་ལའི་ཀླུ། མིག་མཐོང་དང་མངོན་ཤེས་འཆར་བ་(༣༠ན)མ་ག་དྷ་ཤེལ་གྱི་ཕ་བོང་རྣམས་ཐལ་བར་བརླག་པའི་རྫུ་འཕྲུལ་བསྟན་པ་སོགས་སངས་རྒྱས་བྱང་ཆུབ་ཀྱི་མཛད་པ་དུ་མས་ཕྱོགས་དེའི་གདུལ་བྱའི་དོན་མཛད་དེ་རིམ་པས་བོད་ཡུལ་དུ་ཕེབས་ལྷ་འདྲེ་གདུག་ཅན་ཐམས་ཅད་དམ་ལ་བཏགས་ནས་ཟུང་མཁར་མདར་བཙད་པོ་དང་མཇལ། བྲག་དམར་མགྲིན་བཟང་དུ་བཞུགས།ལྷ་ཁང་ལ་ཞལ་བསྲོའི་སྐབས་ལྷ་སྐུ་རྣམས་ལ་མི་ལ་བྱ་བ་བཞིན་དུ་སྟོན་མོ་དྲངས་ཤིང་གསོལ། གཏམ་མཛད་པ་དངོས་སུ་ཐོས། སྤོས་དང་མར་མེ་རང་འབར། རོལ་མོ་ཐམས་ཅད་རང་འཁྲོལ། རྒུན་འབྲུམ་སྙིམ་པ་གང་དེར་འཚོགས་ཀྱི་མི་ཐམས་ཅད་ཀྱི་ལོངས་སྤྱོད་
47-6-78
ཀྱང་ཟད་མེད་དུ་བྱུང་། གཟིམས་མལ་བ་ལ་ལུང་འཚོ་བཞེར་ལ་སོགས་པར་པྲ་རྟེན་བྱས།ལྷ་གདུག་པ་ཅན་གྱི་མིང་དང་གནས་དང་སྤྱོད་ཚུལ་དྲིས། རྒྱལ་བློན་ཡིད་ཆེས་པའི་ལྷ་འདྲེ་མ་རུངས་པ་རགས་རིམ་ཞིག་དངོས་སུ་མིར་ཕབ་ནས་སྡིགས་ཤིང་གཟིར་བ་དང་(༣༠བ)ཆོས་བཤད་ནས་དམ་འོག་ཏུ་བཅུག །རང་རང་སྲོག་གི་སྙིང་པོ་ལྷོངས་གསོལ་དུ་ཕུལ། དེས་ཀྱང་མ་ཐུབ་པ་རྣམས་སྦྱིན་སྲེག་གི་འདུལ་བ་སོགས་ཐབས་ཚུལ་དེ་འདྲ་ལན་གཉིས་མཛད་དུས་ཀྱི་དགའ་སྟོན་ཞིག་ལཉྫའི་དབུ་སྐྲ་འཁྲུ་བར་བརྩམས་པའི་ཚེ། མཁན་ཆེན་ཞི་བ་འཚོས་རི་རབ་ཀྱི་བྱང་ངོས་ན་ཆུ་མིག་རྟག་ཏུ་སྣང་བ་ཡོད་པ་ནས་ཆུ་བླངས་ན་སྐུ་ཚེ་རིགས་རྒྱུད་འཕེལ་ཞིང་མངའ་ཐང་ཆེ་བ་འབྱུང་བས། ལེན་པའི་རྔོ་སུས་ཐོགས་གསུངས་པར་བློན་པོ་རྣམས་ཀྱིས་སློབ་དཔོན་སྔགས་མཁན་གྱི་ནུས་སམ་ཞེས་གསོལ་བ་ལྟར་ཞལ་གྱིས་བཞེས་ནས་དར་དཀར་གྱིས་ཁ་བཅད་པའི་གསེར་གྱི་བུམ་པ་མཁའ་ལ་བསྐྱུར་བས་ཇེ་མཐོར་སོང་ནས་མི་སྣང་བ་ལས། རེ་ཞིག་ན་ཉེ་ལོགས་སུ་ཀྲོང་གི་བྱུང་བ་ཕོ་ཉ་བར་གནང་བ་མདོག་སྐྱ་ཉོག་གེ་བ་འདུག་པས་མོན་གྱི་སྨྱོ་ཚུར་དོགས་ཏེ་ཕོ། སློབ་དཔོན་ཆེན་པོ་རྫུ་འཕྲུལ་གྱིས་བར་(༣༡ན)སྣང་ཁམས་ནས་སྦྱང་ཁམས་པའི་རྔ་མ། གྲུ་གུ་རྒྱལ་པོའི་མཛོད་ནས་ཡུམ་གྱིམ་ཤང་ཨོང་ཇོའི་བསེའི་མེ་ལོང་བལྟས་པས་མངོན་ཤེས་འཆར་བ། ཝཱ་རཱ་ཎ་སཱིའི་མཆོད་རྟེན་ནས་སངས་རྒྱས་ཀྱི་འཕེལ་གདུང་མང་པོ་སྐད་ཅིག་བླངས་ཏེ་རྒྱལ་པོར་གཏད་པ་སོགས་བརྗོད་ལས་འདས།བློན་པོ་ཁྱུང་ཙེ་སྟག་ཙེའི་བློར་བྲག་དམར་མགྲིན་བཟང་མེར་བསྲེགས་ན་སྔགས་མཁན་འདི་གསོད་ཐུབ་སྙམ་པ་ཤར་བ། སློབ་དཔོན་གྱིས་ཁྱོད་འདི་ལྟར་བསམ་པ་གསུངས་པར་ཁ་སྐྱེངས་ཏེ་སྔགས་མཁན་འདིས་ཅི་ཡང་ཤེས་པར་འདུག་ཟེར། རྗེ་འབངས་རྣམས་ལ་དབང་བསྐུར་བའི་སྐབས་མཆིམས་བཟའ་ལྷ་མོ་བཙན་དང་མཁར་ཆེན་བཟའ་མཚོ་རྒྱལ་གཉིས་མཆོད་པའི་གཟུངས་མ་བྱེད་པའི་སྐལ་བ་ཅན་དུ་ལུང་བསྟན་པ། དེ་གཉིས་ས་ཐག་རིང་བས་
47-6-79
ཇི་ལྟར་བགྱི་ཞུས་པས། སློབ་དཔོན་གྱི་དགོངས་པ་ལ་མཉམ་པར་བཞག་པས་སྐད་ཅིག་ལ་གཉིས་ཀ་དཀྱིལ་འཁོར་(༣༡བ)གྱི་མཐར་སླེབ། ཆོས་ལ་ཤིན་ཏུ་བརྣག་པ་སྦས་གཟིགས་བྱ་བ་བློན་ཆེན་དུ་གྱུར་ན་ཆོས་ལ་བར་དུ་གཅོད་པར་མཁྱེན་ནས་ཡུག་གཅིག་དགོངས་པ་ལ་བཞུགས་པ་ན་ཁོའི་ལུས་ནས་ཁྲག་འཛག་སྟེ་གུམ་པ་སོགས་མཐུ་སྟོབས་ལ་བདུད་བློན་རྣམས་བག་ཤིན་ཏུ་དོག་པར་གྱུར། ལན་ཅིག་ཆོས་རྒྱལ་ལ་སློབ་དཔོན་ཆེན་པོས། ཁྱེད་ཀྱི་ཡུལ་འདི་བཟང་པོར་བྱ་དགོས་པས་ངམ་ཤོད་ཀྱི་བྱེ་མ་ཚལ་དང་ནིའུ་གསིང་དུ་བསྒྱུར། གྲ་དོལ་དང་སྟག་ལ་ཤར་ནུབ་དང་ཡུལ་པོ་ཆེ་ཚུན་གྱི་ཆབ་མེད་པ་རྣམས་སུ་འབྱུང་བ། འཚོ་ཐབས་སུ་གྲམ་པ་འདི་དག་ཐམས་ཅད་ཞིང་འགྱུར་བ། རྣམ་ཐོས་སྲས་ལ་ནོར་བླངས་ནས་འཛམ་བུ་གླིང་གི་དཀོར་ནོར་ཡོད་དོ་ཅོག་གི་འབྱུང་ཁུངས་བོད་དུ་ཡོང་བ། གཙང་པོ་འདི་ལས་ཆེ་བ་ཞིག་ཁོ་བོས་རྒྱ་གར་དུ་སྦུབས་སུ་བཅུག་པས་འདིར་ཡང་ཡར་ཆབ་གཙང་པོ་སྦུབས་སུ་འཇུག །རྒྱ་ཧོར་སོགས་མཐའི་རྒྱལ་(༣༢ན)པོ་མཐའ་དག་དབང་དུ་འདུ་བ་སོགས་བྱེད་པའི་བཀའ་སྩལ་བ། ཉམས་སད་ཚེ་དེ་བཞིན་དུ་མཛད་པར་གསོལ་བ། དཀྱིལ་འཁོར་བཞེངས་ནས་སྔ་དྲོ་ཞིག་དགོངས་པ་མཛད་པས་བྲག་དམར་གྱི་སྐམ་པ་ཞིག་ཏུ་ཆུ་ཆེན་པོ་བརྡོལ་བར་མིང་ཀླུ་རྫིང་དུ་བཏགས། ད་དུང་མཛད་དགོས་ཞུས་པས། བྲག་དམར་མཚོ་མོ་མགུལ་སྔར་བྱེ་མར་ཡོད་པ་ནེའུ་གསིང་དུ་སྔོ་ཕྱམས་ཀྱིས་སོང་། དེའི་ཕྱི་དྲོ་བྲག་གླ་བའི་གདོང་དུ་ནགས་ཆེན་པོ་སྐད་ཅིག་ཏུ་བྱུང་བར་མིང་གླ་བའི་ཚལ་དུ་བཏགས། དེའི་སང་སྔ་དྲོ་དགོངས་པ་མཛད་པས་སྔར་ཟུང་མཁར་དུ་ཕུ་ཆུ་མེད་པ་ལ་ཆུ་ཆེན་པོ་ནར་གྱིས་བྱུང་། ད་ཞིང་ས་གང་དུ་བྱ་གསུངས། སྟག་ལ་ཤར་གྱི་ཡུལ་རྐེད་དུ་ཆུ་བྱུང་ནས་མཛོ་ཕོ་ཞིག་གིས་བརྒལ་ནས་མཛོ་ཕོ་རབ་ཏུ་གྲགས། དེའི་ཡུལ་གྱི་ཕུ་ཞིག་ཏུ་གཙང་ཆུ་སྦུབས་ལ་དྲངས་པས་བྲག་འོག་ཅིག་ཏུ་ཐོན།
47-6-80
སློབ་དཔོན་གྱི་དགོངས་པ་ལ་བློན་པོ་ངན་པའི་བར་གཅོད་ཀྱིས་(༣༢བ)རྒྱུན་དུ་ཆུ་འབབ་རྒྱུ་མ་བྱུང་ཡང་། ད་ལྟ་བྲག་འོག་གི་ཆུ་དེ་གཙང་པོའི་མདོག་གང་བྱུང་དེར་ཡོང་བ་ཞིག་ཡོད། དེ་ལ་བརྟེན་ནས་ཡུལ་གྱི་མིང་ལ་ཆུ་སྦུབ་གཞུང་དུ་གྲགས། ཡུལ་པོ་ཆེ་ནི་ལུང་པ་ཆུང་བས་ཆུ་འབད་མེད་བྱུང་། དེ་ལྟར་དགོངས་པ་གང་བསྟད་འབད་མེད་འགྲུབ་པར་ཤེས་ནས་བློན་པོ་རྣམས་ཀྱིས་མདུན་པ་ཆུང་ངུར་གྲོས་བྱས། ཞིང་དགོས་ན་ཡར་ཀླུངས་ཀྱིས་ཆོག །ཡུལ་འདི་བཟང་པོར་བཏང་ནས་རྒྱ་གར་དུ་གཏོད་འདོད་པ་ཡིན་ཏེ་འོང་ཞེས་སོགས་བསྙད་མང་དུ་བཏགས། དོན་དུ་སྡིག་བློན་རྣམས་སྤྱོད་པ་ངན་གནོང་གིས་སློབ་དཔོན་ཆེན་པོའི་རྫུ་འཕྲུལ་དང་མངོན་ཤེས་མ་བཟོད་པས། ད་བྱ་བའི་འཕྲོས་རྣམས་བཤོལ་ལ་སྔགས་མཁན་འདི་ག་རང་ཡུལ་དུ་བཏང་བར་འཐད་པས་བློན་པོ་དབང་ཆེ་བ་ཕལ་ཆེར་ཁ་མཐུན་ཏེ་རྒྱལ་པོ་ལ་རྒྱུ་མཚན་ནན་གྱིས་ཞུས་པས། རྗེ་ཐུགས་མ་བདེ་བར་སློབ་དཔོན་(༣༣ན)ལ་ལྐོག་ཏུ་གསེར་ཕྱེ་བྲེ་གང་ཕུལ་ནས་ལོ་རྒྱུས་རྣམས་གསོལ་བས། བྱེ་མ་དང་རྡོ་ལ་ཕྱག་རེག་པ་རྣམས་གསེར་དུ་སོང་བ་བསྟན་ཏེ་ཁོ་བོ་ལ་གསེར་གྱི་དགོས་པ་མེད་ཆོས་དར་བའི་ཆེད་དུ་འོངས་པ་ཡིན་ཏེ།བཟང་སེམས་བྱུར་གྱི་སྣ་འདྲེན་ཡིན། །སྙིང་རྗེ་རྒས་པ་ཞེ་སྡང་རྒྱུ། །རྗེ་ཡི་ཁ་ལོ་བློན་གྱིས་བསྒྱུར། །བོད་ཀྱི་འདྲེ་བློན་གདུག་པ་ཅན། །སེམས་ཅན་ལས་ངན་སྤྱོད་པ་ལས། །རྒྱལ་བ་རྣམས་ཀྱིས་ནུས་པའང་རྡུགས། །ཞེས་འབྱོན་པར་བཞེད་དེ་མན་ངག་ལྟ་འཕྲེང་སོགས་ཟབ་ཆོས་མང་པོ་རྒྱལ་བློན་ལ་གསུངས། མ་འོངས་པ་མཁྱེན་ནས་བསྟན་པ་བསྲུང་བའི་དྲག་སྔགས་མང་པོ་སྐལ་ལྡན་རྣམས་
47-6-81
ལ་གནང་ཞིང་། ཆོས་སྨན་རྩིས་སོགས་གཏེར་གྱིས་ས་སྟེང་བཀང་། ལྷ་འདྲེ་དམ་བཞག་དང་སྦྱིན་སྲེག་ལན་གསུམ་འགྲུབ་ན་རྒྱལ་པོ་སྐུ་ཚེ་དང་ཆབ་སྲིད་འཕེལ་རྒྱུར་གསུམ་པ་མ་འགྲུབ།བློན་པོ་རྣམས་ཀྱིས་འདོད་པ་(༣༣བ)ལྟར་བསམ་ཡས་ཀྱིས་རབ་གནས་ཀྱང་མཛད་ལོང་མེད་པར་གུང་ཐང་ལ་ཐོག་ནས་གཤེགས་པའི་དུས། ཞབས་སྐྱེལ་བར་ལྷ་འདྲེ་བསྐྱར་འདུལ་གསུམ་པ་མ་འགྲུབ་པ་ཐུགས་ལ་བཅགས་ཤིང་། ཆོས་འཁོར་ཞིག་ཀྱང་འབྱོངས་ནས་འོངས་ཏེ། དེར་འཁྲུག་པ་ཆེན་པོ་ཞིག་ཀྱང་འབྱུང་ལ། ཆོས་ལ་རྐེ་ཉག་བག་རེ་ཡོང་། ཀླུ་དེ་ཡང་རྒྱལ་པོ་ལ་ཕུགས་ཞེ་བརྣག་པར་འདུག །རྒྱལ་བརྒྱུད་ཀྱང་སིལ་བུར་འགྲོ་གསུང་བ་སོགས་ཀྱིས་ལོ་རྒྱུས་དང་། དེ་དག་ཏུ་སློབ་དཔོན་ཆེན་པོས་བོད་དུ་ཟླ་བ་དྲུག་གམ་བཅོ་བརྒྱད། ལོ་གསུམ་མམ་དྲུག་ལས་མ་བཞུགས་པར་བཤད་སྣང་བ་ནི། དཔའ་བར་འགྲོ་བའི་ཏིང་འཛིན་གྱི་མདོ་ལས། རྣམ་གྲོལ་ཤེས་པ་སྐད་ཅིག་ཏུ། །བསྐལ་པ་དུ་མ་སྟོན་པར་བྱེད། །བསྐལ་པ་རྣམས་ལ་དུ་མ་དག །བསྐལ་པ་གཅིག་ཏུ་སྟོན་པར་བྱེད། །ཅེས་དང་། ཕལ་ཆེན་འཇིག་རྟེན་(༣༤ན)འདས་པའི་ལེའུར། ལ་ལ་གཉིད་ལོག་རྨི་ལམ་དག་ན་བྱ་བ་རྣམ་པ་སྣ་ཚོགས་ཐ་དད་བྱེད། ལོ་ནི་བྱེ་བ་ཁྲག་ཁྲིག་མང་པོ་ཟད་པར་རྨིས་ཀྱང་མཚན་མོ་དེ་མ་ཟད། དེ་ལྟར་ཆོས་ཉིད་རང་བཞིན་མཚུངས་པར་རྗེས་རྟོགས་བྱ་བ་སྣ་ཚོགས་ཀུན་སྟོན་ཏེ། སྐད་ཅིག་གཅིག་ལ་བསྐལ་པ་བྱེ་བ་ཟད་བྱེད་དེ་དག་ཡེ་ཤེས་ཟད་མི་འགྱུར།ལུས་གཅིག་ལ་ནི་མཐའ་ཡས་ལུས་དང་རྒྱ་ཆེན་ལུས་རྣམས་ཐ་དད་རབ་ཏུ་སྟོན།སེམས་མེད་ཡིད་མེད་སེམས་ཀྱི་ཡུལ་མེད་འོན་ཀྱང་འགྲོ་བ་ཀུན་ཏུ་དེ་དག་སྟོན། ཞེས་བསྐལ་པ་བརྒྱ་ཕྲག་དུ་མའི་ཡུན་རིང་པོ་སྐད་ཅིག་མའི་ཁོངས་སུ་ཐུང་ངུར་གྱུར་པ་དང་།སྐད་ཅིག་མ་ལྟ་བུའི་ཡུན་ཐུང་ངུ་ཡང་བསྐལ་པ་དུ་མའི་ཡུན་ལ་བྱིན་གྱིས་རློབ་ནུས་པའི་གང་ཟག་གི་རྣམ་པར་ཐར་པ་ལ་ལོ་ཟླ་དུས་ཀྱི་ངེས་པ་མི་དགོས་པ། གོང་མ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོའི་བཀའ་ལས། སྐད་ཅིག་བསྐལ་པ་བསྐལ་(༣༤བ)པ་སྐད་
47-6-82
ཅིག་ཏུ། །བསྒྱུར་ནུས་འགྲོ་རེའི་སྣང་ངོར་མཛད་པ་རེ། །སྟོན་ལ་མཁས་གྲུབ་ཕལ་གྱི་རྣམ་ཐར་བཞིན། །ལོ་ཟླ་དུས་ཀྱི་ངེས་ཚོལ་བཞད་གད་གནས། །ཞེས་སྩལ་བ་ལྟར་དང་། བདག་ཅག་གི་སྟོན་པ་ཤཱཀྱ་ཐུབ་པ་ལ་ཡང་མི་མཇེད་ཀྱི་ཞིང་འདི་ཉིད་གཅིག་པུར་སྐུ་ཚེ་རིང་ཐུང་གི་ཚད་རྣམ་གྲངས་གསུམ་དུ་མཐོང་བར་གསུངས་ཏེ། མྱང་འདས་རྒྱ་ནག་འགྱུར་ལས། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིར་ཉན་ཐོས་རྣམས་ལ་ངས་སྐུ་ཚེ་རབ་ཏུ་ཐུང་བ་བསྟན་པས་དེ་དག་ཐམས་ཅད་ནི་དེ་བཞིན་གཤེགས་པ་སྐུ་ཚེ་རབ་ཏུ་ཐུང་བར་ཤེས།བྱང་ཆུབ་སེམས་དཔའི་རྣམས་ལ་ནི་རིང་བ་ཡང་མ་ཡིན་ཐུང་བ་ཡང་མ་ཡིན་པ་བསྐལ་པ་གཅིག་གམ་བསྐལ་པ་གཅིག་འགྲིབ་ཀྱི་བར་དུ་བསྟན་སངས་རྒྱས་རྣམས་ཀྱིས་ནི་སངས་རྒྱས་ཀྱི་སྐུ་ཚེའི་ཚད་དཔག་ཏུ་མེད་པར་གཟིགས་ཏེ། ཞེས་དང་། དགེ་བའི་རྩ་བ་ཡོངས་(༣༥ན)སུ་འཛིན་པའི་མདོ་ལས། ཁ་ཅིག་ང་ཡི་སྐུ་ཚེ་བསྐལ་པར་སེམས། །ཁ་ཅིག་ཀྱང་ནི་བྱེ་བ་ཕྱེད་དུ་སེམས། །དེ་ཚེ་ཁ་ཅིག་བར་གྱི་བསྐལ་པར་སེམས། །གཉིས་གསུམ་བཞི་དང་དེ་ལས་ལྷག་པར་ཡང་། །དེ་ཚེ་ཁ་ཅིག་ལོ་ནི་བྱེ་བར་སེམས། །ཁ་ཅིག་གིས་ནི་མང་ཉུང་རབ་ཏུ་མཐོང་། །འཛམ་བུའི་གླིང་འདིར་ང་ཡི་སྐུ་ཚེ་ནི། །ལོ་གྲངས་བརྒྱད་ཅུ་ཡིན་པར་མི་རྣམས་ཤེས། །ཁ་ཅིག་དེར་ནི་སྐུ་ཚེ་ཉིན་མཚན་ཤེས། །ཁ་ཅིག་གིས་ནི་སྐུ་ཚེ་རིང་པོར་ཤེས། །ཞེས་འབྱུང་བ་ལྟར་བོད་ཀྱི་ཡུལ་དུ་གདུལ་བྱ་ལས་དག་མི་དག་གིས་མཐོང་ཚུལ་སྣ་ཚོགས་འབྱུང་བ་གོར་མ་ཆག་པས་བདུད་བློན་མ་རུངས་པ་རྣམས་ཀྱི་ངོར་ཟླ་བ་དྲུག་ཙམ་ལས་མ་བཞུགས་པར་བཤད་པའང་དགག་པར་ག་ལ་ནུས།ངེས་དོན་དུ། ཉོན་ཅིག་པད་འབྱུང་བཀའ་ལ་ལྷ་འདྲེ་ཉོན༔ འཇིག་རྟེན་ཁམས་ན་མཚུངས་མེད་སྤྲུལ་པའི་སྐུ༔ མངལ་གྱིས་མ་(༣༥བ)གོས་མཚོ་སྐྱེས་རྡོ་རྗེ་ཡིནཿ ལུས་ལ་གང་གིས་མི་ཚུགས་འཆི་མེད་ཐོབ༔ འགྲོ་དྲུག་འཁོར་བའི་སྡུག་བསྔལ་འཇིགས་སུ་རུང་༔ དམུ་རྒོད་སེམས་ཅན་ཚེ་ཐུང་གཡེང་བ་ཆེ༔ ཁྲི་སྲོང་ལྡེའུ་བཙན་ལྷ་ཁང་བཞེངས་པ་འདི༔ རྒྱལ་མཚན་
47-6-83
རྩེ་ལ་ནོར་བུ་འཕྱར་བ་འདྲ༔ བོད་དུ་དམ་ཆོས་བསྟན་པ་ཚུགས་པ་ན༔ ལྷ་འདྲེ་སུ་མ་མགུ་ཡང་རག་མ་ལུས༔ མགྲོན་པོར་རྒྱ་གར་པཎ་ཆེན་འབོད་པ་འདི༔ མུན་པའི་གླིང་དུ་སྒྲོན་མེ་ཁྱེར་བ་འདྲ༔ བོད་དུ་བདེ་སྐྱིད་དམ་ཆོས་དར་བ་ན༔ ལྷ་འདྲེ་ཡུལ་བུད་སོང་ཡང་རག་མ་ལུས༔ དེ་བས་ཡོན་བཞེས་ས་གཞི་གནང་བ་བྱིན༔ རྒྱལ་པོ་ཁྲི་སྲོང་ལྡེའུ་བཙན་བསམ་པ་བསྒྲུབས༔ ལྷ་ཁང་རྩིགས་ཤིག་ལྷ་འདྲེ་ལས་ལ་འདུས༔ སྔགས་འཆང་པདྨ་འབྱུང་གནས་བཀའ་མ་བཅག༔ཅེས་གསུངས་ཤིང་ནམ་མཁའ་ལ་རྡོ་རྗེའི་འགྲོས་མཛད་པའི་གྲིབ་(༣༦ན)མ་ལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་གི་རྨང་ཁྲིད། ཨོ་ཏནྟ་པུ་རིའི་གཙུག་ལག་ཁང་ལ་དཔེ་བྱས་རི་རབ་གླིང་བཞི་གླིང་ཕྲན་དང་བཅས་པའི་ཚུལ་ཉིན་མོ་མི་དང་མཚན་མོ་མི་མ་ཡིན་གྱིས་བརྩིགས་ནས་བཞེངས་པས་རིང་པོར་མི་ཐོགས་པར་འབྱོངས་པ། ཐང་ཡིག་ལས།བཅུ་གསུམ་ལོན་ནས་ཡབ་ཀྱིས་བོར་བའི་བུ༔ གདོང་དམར་བོད་ཀྱི་རྒྱལ་པོ་ཡུས་མི་ཆེ༔བཅོ་ལྔ་ལོན་ནས་རྒྱལ་སྲིད་དམག་ཇག་བཟུང་༔ ལས་ཐབས་བྱ་ཕྱིར་བློན་པོར་གདམས་ངག་བསྐུར༔ བཅུ་བདུན་ལོན་ནས་ཆོས་རྒྱལ་བསམ་པ་སྐྱེས༔ གཏོ་དཔྱད་བྱས་པས་མཁན་ཆེན་སྤྱན་དྲོངས་ཟེར༔ བསོད་ནམས་མི་ཆུང་མཁན་ཆེན་བོད་དུ་ཁུགས༔ ས་འདུལ་མཛད་པས་བགེགས་ཀྱིས་སྒྲུབ་མ་སྟེར༔ སློབ་དཔོན་སྤྱན་དྲོངས་འགྲུབ་ཅེས་ལུང་བསྟན་བྱུང་༔ ལས་འཕྲོ་མི་ཞན་སློབ་དཔོན་བོད་དུ་བྱོན༔ བསམ་(༣༦བ)ཡས་བརྩིགས་པ་མི་འདྲ་སྐྱེས་པ་འདྲ༔ སྐུ་དྲིན་ཡོད་དོ་བཙད་པོས་བརྗོད་མ་ཟད༔ ཅེས་གསུངས་པ་ལྟར་ལ། རབ་ཏུ་གནས་པའི་ཚེ་ལྷ་ཐམས་ཅད་ཕྱི་རོལ་ཏུ་བྱིན་ལྷ་ཁང་ལན་གསུམ་བསྐོར་བ༔ ཁྲོ་བོའི་མེ་རི་དངོས་སུ་འབར་བ༔ ལྷ་ཁང་ཐམས་ཅད་འོད་ཀྱིས་གང་བ། པདྨའི་སྡོང་པོ་སྐྱེས་པ། སྤྲིན་གསེབ་ནས་རྣམ་སད་ཕོ་མོས་མཆོད་པ་བྱེད་པ། མེ་ཏོག་མནྡྷ་ར་བའི་ཆར་ལན་གསུམ་བབས་པས།ལྷ་རྣམས་མི་དང་མི་ལྟར་བགྲོ་གླེང་གཏོང་བ། ཉི་ཟླ་དུས་གཅིག་ཏུ་ཤར་བ། རྟ་མགྲིན་གྱིས་རྟ་སྐད་ཐེངས་གསུམ་བཏོན་པ། རོལ་མོ་ཐམས་ཅད་རང་འཁྲོལ་བ་སོགས་ལྟས་ངོ་མཚར་
47-6-84
བ་མཐའ་ཀླས༔ མཁན་ཆེན་ཐམས་ཅད་མཁྱེན་པ་ཞི་བ་འཚོས། ཐམས་ཅད་ཡོད་སྨྲའི་དགེ་སློང་བཅུ་གཉིས་ཀྱི་ཁ་སྐོང་དང་བཅས་སད་མི་མི་བདུན་སོགས་རབ་ཏུ་བྱུང་ཞིང་བསྙེན་པར་རྫོགས་ནས་བསྟན་པའི་(༣༧ན)རྩ་བ་སོ་སོ་ཐར་པའི་གཞི་བཙུགས། པཎ་ཆེན་བི་མ་ལ་མི་ཏྲས་ཐོག་དྲངས་རྒྱ་གར་མཁས་པ་མང་པོ་དང་། འཇིག་རྟེན་གྱི་མིག་གཅིག་སྐད་གཉིས་སྨྲ་བའི་དབང་པོ་བཻ་རོ་ཙ་ན་ལ་སོགས་པ་མང་དུ་བསགས་ཏེ་ཐེག་པ་གོང་འོག་གི་ཆོས་རྣམས་བསྒྱུར། འཆད་ཉན་གྱིས་གཏན་ལ་ཕབ། སློབ་དཔོན་ཆེན་པོས་མཁར་ཆེན་བཟའ་མཚོ་རྒྱལ།ཅོག་རོ་བཟའ་མཆོད་གནས་མ། ཨ་ཙ་ར་ས་ལེ་གསུམ་ལ་དཀྱིལ་འཁོར་མདུན་གྱི་ནམ་མཁར་སྤྲུལ་ཏེ་དབང་ལྷ་དང་བླ་མ་གང་ལ་ཞུ་གསུངས་པས་ཅོག་རོས་ལྷ་ལ་འདེམས། མཚོ་རྒྱལ་གྱིས་བླ་མར་འདེམས། ས་ལེ་བླ་མའི་ཐུགས་དང་སྦྱོར་བར་ཞུས་པས། ཅོག་རོ་ལ་མི་ཟབ་པར་གསུངས་པས་ཕུར་པ་དང་ཡང་དག་དང་བདུད་རྩི་རྣམས་སྒམ་ལུགས་སུ་གྲགས།མཁར་ཆེན་བཟའ་ལ་རྒྱུད་མན་ངག་སྙིང་པོར་དྲིལ་ནས་གནང་སྟེ་ས་ལེ་ལ་ཁྱོད་ཀྱིས་ཤོད་གསུངས་རྗེ་འབངས་ཉེར་ལྔས་གཙོས་(༣༧བ)སྣོད་ལྡན་མང་པོར་བླ་རྫོགས་ཐུགས་གསུམ།བཀའ་བརྒྱད་སྤྱི་བྱེ་བྲག་ཐེག་དགུའི་ཆོས་ཀྱི་འཁོར་ལོ་གྲངས་མེད་པ་བསྐོར་ཏེ་སྨིན་གྲོལ་ལ་བཀོད་ཅིང་། འཕགས་ཡུལ་དུའང་། མྱང་མཛད་རྣམ་ཐར་ལས། ནཱ་ལནྜ་རུ་ཆོས་ཀྱི་འཁོར་ལོ་བསྐོར། ཞེས་པ་ལྟར་རོ། །
༈ བརྟུལ་ཞུགས་ཀྱི་སྤྱོད་པ།
༡༽ བརྟུལ་ཞུགས་ཀྱི་སྤྱོད་པ།བརྟུལ་ཞུགས་ཀྱི་སྤྱོད་པ་ནི། སྤྱིར་བོད་དུ་ལྷ་འདྲེ་བཏུལ་པ་ཡན་བརྟུལ་ཞུགས་སྤྱོད་པ་དང་། ཡོངས་གྲགས། སིནྡྷུ་རྒྱ་མཚོ་ཆེ་བར། ལྷོ་ཕྱོགས་བསིལ་བ་ཚལ་གྱི་དུར་ཁྲོད་དུ༔རྒྱལ་སྲིད་སྤངས་ནས་བརྟུལ་ཞུགས་སྤྱོད་པ་མཛད༔ ཏ་ན་གྷ་ནའི་སྦྱོར་སྒྲོལ་དགོངས་པ་
47-6-85
ཡིན༔ མ་མོ་མཁའ་འགྲོ་ཐམས་ཅད་དབང་དུ་བསྡུས༔ ཤཱནྟ་རཀྵི་ཏ་ལ་གསོལ་བ་འདེབས༔ཞེས་གསུངས་པའི་དོན་གོང་སྨོས་ཟིན། བཀའ་ཐང་ལས། ང་ཡི་བོད་ཁམས་གཏེར་གྱིས་བཀང་ནས་ཡོད༔ དངོས་གྲུབ་འདོད་ན་ཀུན་ནས་ལང་༔(༣༨ན)ཞེས་པ་ལྟར་གཏེར་ཁ་ཆེན་པོ་བརྒྱ་རྩ་བརྒྱད་གཏེར་ཕྲན་བསམ་ལས་འདས་པ་དང་བཅས་པ་ཕྱག་རྒྱས་བཏབ་སྟེ་བསྟན་པ་མཐར་རྒྱས་མི་ནུབ་པའི་ཆེད་དུ་གཏེར་སྦས་བར་མཛད། རྒྱལ་པོ་ཁྲི་སྲོང་ལྡེའུ་བཙན་གྱིས་སློབ་དཔོན་ཆེན་པོའི་ཡོན་ཏན་རྣམས་བདག་ལ་སྟོན་དགོས་ཞུས་པས། རྒྱལ་པོ་ཆེན་པོ་སངས་རྒྱས་ཀྱི་ཡོན་ཏན་སེམས་ཅན་གྱིས་དཔག་པར་དཀའ། འོན་ཀྱང་ཅུང་ཟད་མཐོང་ཡང་སྲིད་ཀྱི་རྡོ་རྗེ་འདི་ལྟ་བུ་དབུ་སྔས་སུ་ཆུག་ལ་གཟིམས་ཤིག་གསུངས་པ་བཞིན་མཛད་པས། རྒྱལ་པོའི་ཉམས་དང་མནལ་ལམ་འདྲེས་པར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་མེ་ལོང་གི་གཟུགས་བརྙན་ལྟ་བུ་དང་། སྣང་སྲིད་ཐམས་ཅད་འཇའ་འོད་དུ་ཡལ། སངས་རྒྱས་དང་བྱང་ཆུབ་སེམས་དཔའ་བགྲང་བ་ལས་འདས་པས་གང་། དེ་རྣམས་རེ་རེའི་མདུན་ན་སློབ་དཔོན་རེ་རེ་འདུག་པ་ལ། སངས་རྒྱས་སྲས་བཅས་(༣༨བ)དེ་དག་གི་ཐུགས་ཀ་ནས་འོད་ཟེར་སྣ་ལྔ་འཕྲོས་པ་སློབ་དཔོན་ལ་ཐིམ། དེ་ལས་འོད་འཕྲོས་པས་གང་ལ་གང་འདུལ་གྱི་སྤྲུལ་སྐུས་སེམས་ཅན་དཔག་ཏུ་མེད་པའི་དོན་བྱེད་པ་དང་། བར་སྣང་ཁམས་ཐམས་ཅད་མེ་ཏོག་གིས་གང་བའི་ཞིང་ཁམས་མང་པོ་ན་ཡེ་ཤེས་ཀྱི་མཁའ་འགྲོ་མ་དཔག་ཏུ་མེད་པ་དང་། དེ་དག་གི་མདུན་དུའང་སློབ་དཔོན་རེ་རེ་དང་འོད་ཟེར་སྤྲོ་བསྡུ་གོང་བཞིན་བྱེད་པ། འཛམ་གླིང་བྱེ་བ་ཕྲག་བརྒྱའི་ལྷོ་ནུབ་སྲིན་ཡུལ་ཟངས་མདོག་དཔལ་རིའི་བཀོད་པ་ཡང་བཤད་ཚོད་ལྟར་གསལ་བ་དང་། དེའི་རྩེ་མོ་ནས་གཟིགས་པས་འགྲོ་བ་རིགས་དྲུག་གི་སྤྱོད་ཚུལ་སྣ་ཚོགས་པ་དང་། དེ་དང་དེར་ཡོད་སློབ་དཔོན་རེ་རེས་སེམས་ཅན་གྱི་དོན་མཛད་པ།པདྨ་འོད་ཀྱི་གཞལ་ཡས་ན་སློབ་དཔོན་སྔར་བས་ཀྱང་གཟི་བརྗིད་ཆེ་བ་ཞལ་བོད་དུ་གཟིགས་པ་རིག་པ་འཛིན་པའི་དཔའ་བོ་དཔའ་མོ་ལ་སོགས་པ་འཁོར་(༣༩ན)དཔག་ཏུ་མེད་
47-6-86
པའི་དབུས་སུ་ཆོས་སྟོན་པ་རྣམས་གཟིགས་པས་སངས་རྒྱས་དངོས་ཀྱི་འདུ་ཤེས་འཁྲུངས།རྣམ་སྲས་རྟ་བདག་བརྒྱད་ལ་བཀའ་བགོས་ལྷ་སྲས་མུ་ཏིག་བཙན་པོ་བོད་འབངས་ཀྱི་དཔུང་དང་བཅས་པས་རྒྱ་ཧོར་གྲུ་གུའི་ཡུལ་ཐམས་ཅད་བཅོམ། བྷ་ཏ་ཧོར་གྱི་སྒོམ་གྲ་ནས་རྒྱལ་པོ་པེ་ཧར་བསམ་ཡས་ཀྱི་དཀོར་བསྲུངས་སུ་བཀུག་པ་སོགས་མདོ་སྔགས་ཀྱི་བསྟན་པ་དར་རྒྱས་སུ་མཛད་པ་ནས། གླང་དར་གྱིས་བསྟན་པ་མ་བསྣུབས་པ་ཡན་ཆོད་ཀྱི་སྔགས་ཕྱོགས་ཐམས་ཅད་གསང་སྔགས་རྙིང་མར་མ་ཟད། མདོ་ལུགས་ཀྱང་བསྟན་པ་སྔ་དར་གྱི་ཁོངས་སུ་འདུ།
༄། །སྔ་འགྱུར་དང་ཕྱི་འགྱུར་གཉིས་ཀྱི་འགྱུར་ཁྱད།
ཇ༽ སྔ་འགྱུར་དང་ཕྱི་འགྱུར་གཉིས་ཀྱི་འགྱུར་ཁྱད།འགྱུར་ཁྱད་ནི། སྔ་འགྱུར་གྱི་ལོ་པཎ་རྣམས་རྒྱལ་བའི་རྣམ་པར་སྤྲུལ་པ་འབའ་ཞིག་པས་བསྒྱུར་བའི་ཚིག་གོ་བདེ་ཞིང་དོན་རླབས་ཆེ། ཕྱི་འགྱུར་ལོ་ཙཱ་བ་རྣམས་ཐ་སྙད་ལ་མཁས་པའི་སྒོ་ནས་བསྒྱུར་བས་ཚིག་འགྲིག་ཅིང་གོ་དཀའ་ལ་རླབས་ཆུང་བས་(༣༩བ)ཕྱི་དར་རམ་གསར་མ་ལས་རྙིང་མའམ་སྔ་དར་གྱི་རིགས་དུས་གནས་སྐབས་ཐམས་ཅད་དུ་ཁྱད་པར་འཕགས་པའི་ཚུལ་ལོ་ཙཱ་བ་རོང་ཟོམ་ཆོས་བཟང་གི་གསུང་ལས། གསང་སྔགས་སྔ་འགྱུར་ལ་ཁྱད་པར་དུ་འཕགས་ཆོས་ལྔ་ཡོད་པའི་དང་པོ་སྤྱན་འདྲེན་ཡོན་བདག་གི་ཆེ་བ་ནི། རིགས་གསུམ་མགོན་པོའི་སྤྲུལ་པ་མངའ་བདག་མེས་དབོན་རྣམ་གསུམ་གྱི་དུས་སུ་སྤྱན་དྲངས་པ་ཡིན་ལ། ཡོན་བདག་དེ་རྣམས་ཀྱི་སྨོན་ལམ་དང་དད་པའི་མཐུ་ཤུགས་ཀྱིས་བོད་དུ་གཙུག་ལག་ཁང་བསམ་ཡས་མི་འགྱུར་ལྷུན་གྱིས་གྲུབ་པ་སོགས་དང་། རབ་ཏུ་བྱུང་བའི་སྡེ་སོ་སོ་དང་། ལྷ་སྲིན་སྡེ་བརྒྱད་སོགས་དམ་ལ་བཏགས་པས་ཆོས་དར་བ་སྐྱེ་འགྲོར་བདེ་སྐྱིད་བྱུང་བ་རྙིང་མའི་བཀའ་དྲིན་ཡིན་ནོ། །
47-6-87
༈ བསྒྱུར་བྱེད་ལོ་ཙཱ་བའི་ཆེ་བ། པཎྜི་ཏའི་ཁྱད་པར་གྱི་ཆེ་བ།
༡༽ བསྒྱུར་བྱེད་ལོ་ཙཱ་བའི་ཆེ་བ།གཉིས་པ་བསྒྱུར་བྱེད་ལོ་ཙཱ་བའི་ཆེ་བ་ནི། སྔོན་སྤ་གོར་བཻ་རོ་ཙ་ན། འཁོན་ཀླུའི་དབང་པོ་སྲུང་། གཙང་ལེགས་གྲུབ། སྐ་(༤༠ན)ཅོག་ཞང་གསུམ། དེ་དུས་ཀྱི་ལོ་ཙཱ་བ་སྟོང་རྩ་བརྒྱད་སོགས་ཀྱིས་བསྒྱུར་བའི་ཆོས་རྙིང་མ་ཡིན་པས་བསམ་ཡས་ན་བསྒྱུར་བའི་རྒྱ་དཔེའི་ཚོགས་དང་སྒྱུར་ཟིན་བོད་ཡིག་ཏུ་ཕབ་པའི་ཚེ་གཉིས་བཞུགས་ཡོད་པ་བསྒྱུར་ཟིན་པ་ལ་གཟིགས་པས་སྔོན་གྱི་ལོ་ཙཱ་བས་བསྒྱུར་བར་ཐུགས་ཡིད་ཆེས་ཤིང་། སྔོན་གྱི་བཀའ་འགྱུར་དཀར་ཆག་མཆིམས་ཕུ་དང་། ལྡན་དཀར་མ་དང་། འཕང་ཐང་མར་གཟིགས་པས་ཀྱང་ཡིད་ཆེས་སྐྱེ་བར་འགྱུར་རོ། །༢༽ པཎྜི་ཏའི་ཁྱད་པར་གྱི་ཆེ་བ།པཎྜི་ཏའི་ཁྱད་པར་གྱི་ཆེ་བ་ནི། པཎྜི་ཏ་པདྨ་འབྱུང་གནས། ཤཱནྟིཾ་གརྦྷ། བི་མ་ལ་མི་ཏྲ།སངས་རྒྱས་གསང་བ། ཙནྡ་ཀཱིརྟ། པཎྜི་ཏ་དྷ་ན་ཏ་ལ། འདི་རྣམས་སྐུ་དངོས་ཀྱིས་བོད་ལ་ཕེབས་རྙིང་མའི་ཆོས་ལུགས་དར་རྒྱས་སུ་མཛད་པ་ནི་ཡོངས་ལ་གྲགས་ཤིང་། པཎྜི་ཏ་དེ་ཚེའི་རིག་པ་འཛིན་པའི་ས་ལ་གནས་པའི་བྱང་ཆུབ་སེམས་དཔའ་ཤ་སྟག་གི་རྒྱ་གར་ནས་སྤྱན་དྲངས་པའི་(༤༠བ)ཆོས་རྙིང་མ་བླ་རྫོགས་ཐུགས་གསུམ་ཡོངས་རྫོགས་དང་བཅས་པ་བོད་དུ་ཕེབས་པ་ཡིན་ནོ། །
47-6-88
༈ དབང་དང་ཆོས་ཞུ་བའི་རྟེན་ནམ་ཡོན་མེ་ཏོག་གི་ཁྱད་པར་གྱི་ཆེ་བ། བརྗོད་བྱ་ཆོས་ཀྱི་ཁྱད་པར་གྱི་ཆེ་བ།
༣༽ དབང་དང་ཆོས་ཞུ་བའི་རྟེན་ནམ་ཡོན་མེ་ཏོག་གི་ཁྱད་པར་གྱི་ཆེ་བ།དབང་དང་ཆོས་ཞུ་བའི་རྟེན་ནམ་ཡོན་མེ་ཏོག་གི་ཁྱད་པར་གྱི་ཆེ་བ་ནི། སྔོན་གསེར་ཕྱེ་བྲེ་ལ་འཇལ། གསེར་ཤ་བའི་རླིད་བུ་བཀང་ནས་ཕུལ། གསེར་རྟ་ཁལ་དང་དྲེལ་ཁལ་ཕུལ་ནས་ཞུས་པའི་ཆོས་རྙིང་མ་ཡིན། ད་ལྟ་མཆན་ཁུང་ནས་གསེར་ཞོ་རེ་རེ་གཉིས་གཉིས་མྱུག་མྱུག་བྱས་ནས་ཞུས་པ་དང་མི་འདྲའོ། །༤༽ བརྗོད་བྱ་ཆོས་ཀྱི་ཁྱད་པར་གྱི་ཆེ་བ།བརྗོད་བྱ་ཆོས་ཀྱི་ཁྱད་པར་གྱི་ཆེ་བ་ནི། ཐེག་པ་རིམ་པ་དགུ་དང་། སྒྲུབ་ཆེན་བཀའ་བརྒྱད། མདོ་སྒྱུ་སེམས་གསུམ། སེམས་སྡེ་ལ་ཀློང་སྡེ། མན་ངག་གི་སྡེ། རྫོགས་ཆེན་ཨ་རོ། རྫོགས་ཆེན་རྡོ་རྗེ་ཟམ་པ། རྫོགས་ཆེན་ཀློང་སྡེ། མན་ངག་གི་ཆོས་སྐོར་ལ་བི་མ་ལའི་སྙིང་ཐིག །རྫོགས་ཆེན་འོད་གསལ་སྒྲོན་མ་དྲུག་སྐོར། ས་སྐྱ་གོང་མའི་ཐུགས་དམ་ཉམས་བཞེས་(༤༡ན)ཡང་ཕུར་རྫོགས་རིམ། རྫོགས་ཆེན་ཨ་ཏི་སོགས་ས་ཆེན་པོའི་རྣམ་གྲངས་ཤིན་ཏུ་མང་བར་ཡོད་པ་རྣམས་ནི་བརྗོད་བྱ་ཆོས་ཀྱི་ཁྱད་པར་གྱི་ཆེ་བ་ཡིན་ནོ། །གཞན་ཡང་བརྗོད་བྱ་ཆོས་ཀྱི་ཆེ་བ་ནི། སྤྱིར་བསྐལ་པ་ལ་ཡང་དུས་བཞི་ཡོད། ཁྱད་པར་སངས་རྒྱས་ཀྱི་བསྟན་པ་ལ་ཡང་དུས་བཞི་ཡོད་པས། སངས་རྒྱས་ཀྱི་བསྟན་པའི་རྫོགས་ལྡན་གྱི་སྐབས་ཀྱི། སྔོན་སངས་རྒྱས་ཀྱི་བསྟན་པ་གྲ་མ་ཉམས། ལྷད་མ་ཞུགས་པའི་དུས་སུ། སྤྲུལ་པའི་ལོ་ཙཱ་བ་བཻ་རོ་ཙ་ན་སོགས་ཀྱིས་གཏན་ལ་ཕབ་ནས་སྒྱུར། ཤེས་བྱ་དངོས་པོའི་འདུག་ཚུལ་སྒྲ་ཇི་བཞིན་པར་བཤད། དེར་རྟོགས་བྱེད་ཐབས་དུ་མ་དང་ཟབ་མོས་བརྒྱན་པའི་ཆོས་
47-6-89
དང་། མཆོག་དང་ཐུན་མོང་གི་དངོས་གྲུབ་ཐམས་ཅད་བདེ་བླག་འབྱུང་ངེས་པ། ཆོས་བཀའ་སོ་སོའི་བླ་མ་བརྒྱུད་པའི་ལོ་རྒྱུས་ལ་ལྟོས་ཤིག་ཡིད་ཆེས་པར་འགྱུར་རོ། །ཞེས་གསུངས་(༤༡བ)པ་ལྟར། གླང་དར་གྱིས་བསྟན་པ་ལ་བར་ལྷད་ཅུང་ཟད་བཅུག་ཀྱང་དཔལ་ཨོ་རྒྱན་ཆེན་པོས་ལྷ་འདྲེ་བཏུལ་ཞིང་ས་གཞི་བྱིན་གྱིས་བརླབས་པ་ལ་བརྟེན་ནས་ལོ་ཙཱ་བ་རྣམས་ཀྱིས་མདོ་སྔགས་ཀྱི་ཆོས་འགྱུར་བ་སྔ་འགྱུར་ཕ་རྒྱུད་གསང་བ་འདུས་པ་རྩ་རྒྱུད་ལེའུ་བཅུ་བདུན་པ་འདི་བི་མཱ་ལ་མི་ཏྲ་དང་དཔལ་བརྩེགས་ཀྱིས་བསྒྱུར་བ་དང་། ཕྱིས་བྷུདྡྷ་ཀ་ར་ཝ་རྨ་དང་རིན་ཆེན་བཟང་པོས་འགྱུར་བ་གཉིས་འགྱུར་ཁྱད་ཙམ་ལས་དོན་ཁྱད་པར་མེད་པ་དང་།མ་རྒྱུད་སངས་རྒྱས་མཉམ་སྦྱོར་བརྟག་པ་བཅུ་པ་འདི་སྔ་འགྱུར་བཛྲ་ཧཱ་སྱ་ཡ་དང་། རྨ་རིན་ཆེན་མཆོག་གིས་འགྱུར་བ་དང་། ཕྱི་འགྱུར་པཎྜི་ཏ་སྨྲྀ་ཏི་རང་འགྱུར་མཛད་པ་གཉིས་འགྱུར་ཁྱད་ལས་དོན་ལ་ཁྱད་མེད་དང་། སོགས་ཁོངས་ནས་ཟླ་གསང་ཐིག་ལེའི་རྒྱུད་སྔ་འགྱུར་པདྨ་སམྦྷ་ཝ་དང་དཔལ་བརྩེགས།ཕྱི་འགྱུར་ཟངས་དཀར་འཕགས་པ་ཤེས་རབ་ཀྱིས་(༤༢ན)འགྱུར་བཅོས་ལྟ་བུ་སོགས་བསྟན་པ་ཕྱི་དར་དང་གསར་མར་གྲགས་པའི་བཤད་སྒྲུབ་ཀྱང་ཅི་དགར་སྤྱོད་ཆོག་པའི་བཀའ་དྲིན་བསམ་ལས་འདས། གོང་མ་ཐམས་ཅད་མཁྱེན་པ་ལྔ་པ་ཆེན་པོས།ཕྱག་རྫོགས་དབུ་གསུམ་ལྟ་བ་བོད་འདིར་གྲགས། །དབུ་མ་ཀླུ་སྒྲུབ་བཞེད་གཞུང་ལྟ་བའི་རྩེ། །གཞུང་ལུགས་སྦྱངས་པའི་མཁས་མིན་རྟོགས་པར་དཀའ། །དེང་དུས་ཕྱག་ཆེན་ཞེས་པ་སེམས་གནས་ཀྱི། །ལྟ་བ་ཡིན་གྱི་ཕྱག་ཆེན་དངོས་གནས་མིན། །དབང་དང་རིམ་གཉིས་ལས་བྱུང་ཏིང་འཛིན་ལ། །ཕྱག་རྒྱ་ཆེན་པོར་ཚད་ལྡན་མཁས་རྣམས་བཞེད། །
47-6-90
པད་འབྱུང་བི་མ་ལ་དང་བཻ་རོ་སོགས། །བཀའ་གཏེར་ལས་བྱུང་ངེས་དོན་རྫོགས་པ་ཆེ། །མཁས་རློམ་བར་མ་གང་གིས་ཉམས་བླངས་ཀྱང་། །ཚེགས་ཆུང་དོན་ཆེ་འཁྲུལ་གྱི་གནད་གསང་ཟབ། །ཅེས་བོད་ན་གྲགས་པའི་ལྟ་བ་ཐམས་ཅད་ཀྱི་རབ་དང་(༤༢བ)ཕུལ་དུ་མངགས་ཤིང་།འཇམ་མགོན་ཆོས་ཀྱི་རྒྱལ་བ་ཙོང་ཁ་པ་ཆེན་པོའི་དབུ་བླ་ཀུན་མཁྱེན་འཕགས་འོད་ཡོན་ཏན་རྒྱ་མཚོས་ཀྱང་། ཁོང་རང་གི་རྣམ་ཐར་ལས་ཟབ་མོ་ལྟ་བ། ཉམས་ལེན་སྒོམ་པ། རྒྱ་ཆེན་སྤྱོད་པ། འབྲས་བུ་རྫོགས་ཆེན་རྒྱལ་ཐབས་སྤྱི་བླུགས་ཞེས་རྫོགས་པ་ཆེན་པོ་ཐུགས་དམ་གྱི་མཐིལ་དུ་མཛད་པ་སོགས་དེ་ལྟ་བུའི་ཆོས་སྤྱི་ལའང་འགོས་དང་དཔལ་འཛིན་སོགས།ཚངས་པས་བྱིན་གྱིས་ཞུས་པའི་མདོ་ལས།བདག་ཉིད་རི་རབ་ཟོམ་ལྟར་མཐོར་འཛིན་ཞིང་། །ང་རྒྱལ་མོས་པ་དེ་ནི་དེ་བཞིན་དུ། །ལེགས་པར་གསུངས་པའི་ཆོས་ནི་སྟོན་པ་ན། །སྡིག་པའི་སྤྱོད་ཡུལ་ཅན་དེ་མི་འཐད་འཛིན། །ཞེས་གསུངས་པ་ལྟར་བདག་ཉིད་མཁས་པར་རློམ་པའི་ཁེངས་པ་ལྷུན་པོ་ལྟར་མཐོ་ཞིང་སྡིག་པའི་སྤྱོད་ཡུལ་ཅན་དག་གིས་སྔགས་ལོག་སུན་འབྱིན་འབྱམས་ཡིག་སོགས་རི་བོང་ཅལ་སྒྲོག་མང་(༤༣ན)དུ་སྣང་བ་ནི་ཀུན་མཁྱེན་ཀློང་ཆེན་པ་སོགས་ཆོས་ཀྱི་སྤྱན་ལྡན་རྣམས་དང་། གོང་མ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོའི་གསན་ཡིག་གངྒཱའི་ཆུ་རྒྱུན་དང་སྨིན་གླིང་དཀར་ཆག་སོགས་སུ་མི་སྨྲ་བའི་བརྟུལ་ཞུགས་ལ་བཀོད་ཟིན་པས་དེ་དག་ཏུ་བལྟ་བར་བྱ་ལ།
47-6-91
༄། །གཏེར་མའི་སྐོར།
ཉ༽ གཏེར་མའི་སྐོར།གཏེར་མའི་སྐོར་ལ། ཀརྨ་པ་མི་བསྐྱོད་རྡོ་རྗེས། བོད་འདིར་ཇོ་བོ་ལྷ་གཅིག་གིས། ལྷ་སའི་དཀར་ཆག་ཀ་བ་ལ། །མཁའ་འགྲོས་བསྟན་ནས་བཏོན་པ་འདི། །མ་གཏོགས་གཏེར་ནས་དམ་པའི་ཆོས། །ཡིད་བརྟན་རུང་བ་ན་གཅིག་མེད། །གཏེར་ཆོས་རྣམས་ནི་རང་བཟོ་ཡིན། །ཞེས་དང་། དཔལ་འཛིན་གྱིས། ད་ལྟའང་གུ་རུའི་མིང་ཙམ་གྱི། །གཏེར་སྟོན་འགའ་ཞིག་ཡོད་ཅེས་ཐོས། །སྙིགས་དུས་བདུད་སྡེ་ཤུགས་ཆེས་བས། །ད་རུང་རྫུན་གཏེར་མང་དུ་འབྱུང་། །ཞེས་དང་།རྡེག་ལྦ་བ་ཅན་གྱིས། ལྷོ་བྲག་ཉང་སྟོན་རལ་པ་ཅན་སོགས་ཀྱིས། །(༤༣བ)དྲག་སྔགས་ཕལ་ཆེར་དུམ་པ་རྒྱ་ཡི་ནི། །གདམས་ངག་བཅོས་ཤིང་ཡིག་སྣ་གཞན་ཡང་བསྲེས། །མགོ་མེད་ཞབས་མེད་ཟོལ་གཏེར་བསམ་མི་ཁྱབ། །ཅེས་ཆོས་རྣམ་དག་མ་ཡིན་པའི་སྒྲུབ་བྱེད་མང་དུ་བྱེད་པར་སྣང་ཡང་། སྤྱི་གཏེར་ཞེས་པ་རྙིང་མ་གཅིག་པུའི་ཁྱད་ཆོས་མིན་ཏེ། བསོད་ནམས་ཐམས་ཅད་བསྡུས་པའི་ཏིང་འཛིན་གྱི་མདོ་ལས། དྲི་མ་མེད་པའི་གཟི་བརྗིད་རྣམ་གྲངས་དེས་ཀྱང་ཁྱོད་ཀྱིས་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ནི་ནམ་ཡང་དེ་བཞིན་གཤེགས་པ་མྱ་ངན་ལས་འདའ་བར་མི་འགྱུར་ལ། དམ་པའི་ཆོས་ཀྱང་ནུབ་པར་མི་འགྱུར་བ་དེ་ལྟར་རིག་པར་བྱའོ། །དེའི་ཅིའི་ཕྱིར་ཞེ་ན། དྲི་མ་མེད་པའི་གཟི་བརྗིད་ཆེས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་
47-6-92
པ་ཕུན་སུམ་ཚོགས་པ་གུས་པ་དང་བཅས་པ་རྣམས་(༤༤ན)ལ་ནི་འཇིག་རྟེན་གྱི་ཁམས་གཞན་ན་འདུག་ཀྱང་སངས་རྒྱས་བཅོམ་ལྡན་འདས་རྣམས་ཞལ་སྟོན་ཅིང་ཆོས་ཀྱང་སྟོན་པར་མཛད་དོ། །དྲི་མ་མེད་པའི་གཟི་བརྗིད་ཆོས་འདོད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཆོས་ཀྱི་གཏེར་རི་དང་སུལ་དང་ཤིང་དག་གི་ནང་དུ་བཅུག་པ་དག་ཀྱང་ཡོད་དོ། །གཟུགས་དང་ཆོས་ཀྱི་སྒོ་མཐའ་ཡས་པ་གླེགས་བམ་དུ་བྱས་པ་དག་ཀྱང་འོང་བར་འགྱུར་རོ། །ཞེས་དང་། བསླབ་བཏུས་སུ་སྲེད་མེད་ཀྱི་བུས་ཞུས་པའི་མདོའི་ལུང་དྲངས་པར་ཡང་དེ་དང་མཐུན་པར་འབྱུང་ལ། མཛངས་བླུན་ལེའུ་གསུམ་པར། སངས་རྒྱས་འོད་སྲུང་གི་བསྟན་པའི་མཇུག་ཏུ་རྒྱལ་པོ་ཞིག་ལ་ཀླུས་མིར་སྤྲུལ་ཏེ་ཀུ་ཤུས་ནོར་གཞོང་བཀང་ནས་བྱིན། ང་ལ་བསྙེན་གནས་ཀྱི་དཔེ་དགོས་པ་མ་བྱུང་ན་ཁྱོད་ཀྱི་རྒྱལ་ཁམས་མཚོའི་རང་བཞིན་དུ་གཏོང་ཟེར་བས་རྒྱལ་པོ་ཤིན་ཏུ་སྐྲག་ནས་ཡོད་པའི་(༤༤ན)ཚེ། ཕ་ན་རེ། བདག་གི་ཁྱིམ་ན་ཀ་བ་ཞིག་ལ་འོད་དྲག་ཏུ་འབྱུང་བ་ཡོད་པས་དེར་ལྟོས་ཤིག་སྨྲས་པ་ལྟར་བལྟས་པས། རྟེན་འབྲེལ་གྱི་མདོ་དང་བསྙེན་གནས་ཀྱི་དཔེ་ཐོན། ཞེས་པ་དང་། བདེ་མཆོག་ཉུང་ངུ་ལས།རྒྱུད་ནས་རྒྱུད་ཀྱི་རྒྱལ་པོ་གང་། །ཕྱག་ན་རྡོ་རྗེ་ཁྱོད་ཉིད་ཀྱི། །གཏེར་ནས་གཏེར་དུ་ཕྱུངས་ཏེ་སྩལ། །ཞེས་དང་། ཆུ་ཀླུང་རོལ་པའི་མདོ་ལས། ང་ཡི་བསྟན་པ་ཆོས་ཀྱི་གཞུང་། །ཐུགས་ནས་ཐུགས་ཀྱི་གཏེར་དུ་སྦ། །ཡང་ན་ས་ཡི་སྙིང་པོ་བྱ། །ཞེས་སོགས་མང་ལ། ཁྱད་པར་བཀའ་གདམས་ཀྱི་སྤྱི་མེས་མགོན་པོ་འོད་དཔག་མེད་བསམས་བཞིན་རྒྱ་གར་པཎ་ཆེན་གྱི་ཆ་ལུགས་སུ་བྱོན་པ་ཇོ་བོ་རྗེ་ཨ་ཏི་ཤས་ལྷ་སའི་དཀར་ཆག་གཏེར་ནས་སྟོན་པ་དང་། ཞྭ་ཟེར་ཅོད་པན་འཆང་བའི་བསྟན་དང་རིན་ཆེའི་རྩ་ལག་འཇམ་མགོན་ཙོང་ཁ་པ་ཆེན་པོས་སངས་
47-6-93
རྒྱས་ཀྱི་ཆོས་དུང་ཤཱ་རིའི་བུས་འགོག་པ་རིར་(༤༥ན)སྦས་པ་ཕྱུངས། ཁམས་གསུམ་འགྲོ་བའི་མགོན་པོ་བསོད་ནམས་རྒྱ་མཚོའི་ཏཱ་ལའི་བླ་མ་བཛྲ་དྷ་རས་མདོ་ཁམས་རི་བོ་དན་ཏིག་ཏུ་ཡང་ཏིག་གི་གནས་སྒོ་ཕྱེས། དེའི་བྲག་ངོས་ནས་ཆོས་གཏེར་དང་འཆི་མེད་ཚེའི་བུམ་པ་གཏེར་ནས་བཞེས་རྩིས་ལ་ཕྱག་ཕྱིས་གྲུལ་མ་བཏུབ་ཚུལ་བྱུང་བ་དང་། བཀའ་བརྒྱུད་པ་རྣམས་ཀྱི་ཆུ་འགོ་ལྷོ་བྲག་མར་པས་ནཱ་རོའི་ཆོས་དྲུག་སྲས་མཁར་གྱི་གྱང་ལ་སྦས་པ་ཆོས་དབང་གིས་བཏོན་པ། རས་ཆུང་རྡོ་རྗེ་གྲགས་པ་ལ་ཏི་སུ་གསང་སྔགས་སྡོང་པོས།ད་ལྟ་བསྟན་པའི་དུས་མིན་པས། །ཁྲོ་བོའི་ཆ་བྱད་འདྲ་བའི་བྲག །མཁའ་འགྲོ་འདུ་བའི་གནས་ཤིག་ཏུ། །མཁའ་འགྲོ་ལྷ་འདྲེ་ཐམས་ཅད་ལ། །གཏད་གཉེར་གྱིས་ལ་གཏེར་དུ་སྦོས། །ཞེས་གསུངས་པ་ལྟར་རོ་སྙོམས་སྐོར་དྲུག་གི་ཆོས་ལྷོ་བྲག་མཁར་ཆུའི་བྲག་ལ་སྦས་པ་གཙང་པ་རྒྱ་རས་ཀྱིས་བཏོན་པ། ཞི་བྱེད་པའི་གཙོ་བོར་གྱུར་པ་ཕ་དམ་པ་སངས་རྒྱས་(༤༥བ)ཀྱིས་དུར་ཁྲོད་དཔལ་གྱི་རྒྱུ་སྐར་རོལ་པ་མཁའ་འགྲོའི་གསང་མཛོད་ནས་མཁའ་འགྲོའི་གསང་རྒྱུད་ལ་སོགས་པའི་ཆོས་བཀའ་མང་བ་བཏོན་པས་མཚོན་གངས་ཅན་དུ་དར་བའི་གྲུབ་མཐའ་གང་ལའང་གཏེར་དུ་གྲགས་པ་ཡོད་པས་རྙིང་མ་གཅིག་པོར་སྣག་ཚའི་སྒོར་བརྡུངས་མི་འོས་ཤིང་། བསྟན་པ་ཕྱི་དར་ལ་ཇོ་བོ་རྗེ་དང་པཎ་ཆེན་ཤཱཀྱ་ཤྲཱི་གྷ་ཡ་དྷ་ར་སོགས་དང་། ལོ་ཆེན་རིན་རྔོག་སོགས་མཁས་ཤིང་གྲུབ་བརྙེས་བསྟན་པའི་སྲོག་འཐུད་པ་མང་དུ་བྱུང་ནའང་། པཎྜི་ཏ་གསེར་འདོད་མང་པོས་རྒྱུད་ལུང་མན་ངག་རྣམས་དཀྲུགས་ཏེ་གཞན་དང་མི་འདྲ་བ་གཙོ་བོར་གཏན་པས་རྡོ་རྗེ་འཆང་ནས་བརྒྱུད་པའི་བཀའ་ཆད་པས་བྱིན་རླབས་ཀྱི་ངང་ཡལ། མདོ་སྒྱུ་སེམས་གསུམ་སོགས་བཀའ་མ་རྣམས་ཀྱང་ཚོང་འདུས་
47-6-94
ཀྱི་འོ་མ་ལྟར་ལྷད་ཞུགས་ཏེ་འཆལ་བའི་དུས་སུ་ལས་འཕྲོ་སད་པའི་སྐལ་ལྡན་རྣམས་གཏེར་ཆོས་ཀྱིས་རང་གཞན་གཉིས་ཀའི་(༤༦ན)དོན་འགྲུབ་པར་དགོངས་ཏེ་རྒྱུད་ལུང་མན་ངག་གི་བཅུད་ཐམས་ཅད་སྒྲོམ་བུར་རྒྱས་བཏབ་ནས་བོད་ཡུལ་གྱི་རི་བྲག་མཚོ་གསུམ། གཙུག་ལག་ཁང་རྣམས་སུ་སྦས་པའི་དགོས་ཆེད། རཏྣ་གླིང་པའི་རྟ་མགྲིན་གསང་འདུས་ཀྱི་ནང་ཚན་ཞལ་གདམས་གསལ་བའི་སྒྲོན་མེའི་ཡང་གསང་གསེར་གྱི་སྒྲོན་མེ་ལས། ཤིན་ཏུ་ཟབ་པའི་མཐར་ཐུག་སྙིང་པོ་རྣམས༔ སྤྱིར་ཡང་བོད་རྣམས་གསར་ངེས་ཆེ་བ་དང་༔ སྙིགས་དུས་འགྲོ་བ་ལྷག་པར་སྙིང་རྗེ་བས༔ མཐའ་དབུས་ཐམས་ཅད་གཏེར་གྱིས་བཀང་ནས་བཞག༔ ལས་ཅན་བུ་དང་ཕྲད་པའི་སྨོན་ལམ་བཏབ༔ མ་འོངས་དུས་སུ་རྟོག་གེ་ཐ་སྙད་མཁན༔ སྒོམ་ཆེན་ལ་སོགས་ཕྱོགས་དང་རིགས་དྲེགས་ཤིང་༔ རང་ཆེ་འབྱིན་ཞིང་གཏེར་ལ་རྩོད་ན་ཡང་༔ སྙིགས་མའི་ཆོས་བྱེད་ཕལ་གཅིག་གཏེར་གྱིས་འདྲེན༔ ཟབ་ལ་ཁ་ཚར་མ་བསྒྲིབས་མཐའ་རྒྱས་ཤིང་༔ གདམས་པ་སྣ་རེས་གང་ཟག་གྲོལ་བར་(༤༦བ)ངེས༔ དེ་བས་ལས་སད་སྐལ་ལྡན་སྦྱངས་པ་ཅན༔ འཆི་བ་དྲན་ན་གཏེར་ཆོས་ཉམས་སུ་ལོང་༔ ཚེ་གཅིག་ཐར་ལམ་ཐོབ་བོ་རྗེས་འཇུག་རྣམས༔ ཞེས་གསུངས་པ་ལྟར་སྙིགས་མ་ལྔ་ལྷག་པར་བདོ་བའི་དུས་ཀྱི་འགྲོ་བ་སྤྱི་དང་། བྱེ་བྲག་སྐོར་གསུམ་རུ་བཞི། སྒང་དྲུག་སྟེ་བོད་དང་བོད་ཆེན་པོའི་རྒྱལ་ཁམས་ཀྱི་སྐྱེ་དགུ་རྣམས་ཀྱི་ཕན་བདེའི་རྩ་ལག་དཔལ་ཨཽ་ཌཱི་ཡ་ནའི་ཨ་ཙཪྻ་རྒན་པོའི་ཟབ་ཆོས་སྤྱི་དང་ཁྱད་པར་གཏེར་ལ་རག་ལུས་ཏེ། སློབ་དཔོན་ལོ་ཆེན་གསུང་གཏེར་འབྱུང་ནོར་བུའི་ཕྲེང་བར་དྲངས་པ་ལས། མ་འོངས་དོན་དུ་རིན་ཆེན་ཆོས་གཏེར་སྦསཿ ཇི་སྲིད་སངས་རྒྱས་བསྟན་པ་མ་རྫོགས་བར༔ དེ་སྲིད་གཏེར་གྱི་བསྟན་པ་རྫོགས་མི་སྲིད༔ དེས་ན་གཏེར་གྱིས་འགྲོ་བ་དཔག་མེད་འདྲེན༔ ཞེས་དང་། རང་ཉིད་ཀྱིས་བཟོས་པའི་གཏེར་ལུང་སོགས་ཀུན་རྫོབ་མཁན་ལ་ཆ་མ་བཞག་པའི་ལུང་(༤༧ན)གཞན་ནས་གསལ་བར་བསྟན་པའི་གཏེར་སྟོན་མཚན་ཉིད་དང་ལྡན་པ་རྣམས་ཀྱང་། ང་ཡི་གཏེར་འབྱིན་སྤྲུལ་སྐུའི་རིམ་པ་རྣམས༔
47-6-95
དབུལ་ཕོངས་ལོག་ལྟས་སྒྲོ་སྐུར་འདེབས་མེད་ཀྱང་༔ སྐྱེས་མཆོག་གཞན་མ་རྣམས་ཀྱི་དོ་ཟླ་ཡིན༔ ཨོ་རྒྱན་ང་ཡི་ཐུགས་རྗེའི་འོད་ཟེར་ལས༔ འགྲོ་བ་འདྲེན་ཕྱིར་གང་འདུལ་དུས་ལ་བསྟུན༔ ཞེས་པ་ལྟར་སངས་རྒྱས་བླ་མ་ནས་བཟུང་། མངའ་བདག་ཚངས་པ་ལྷའི་མེ་ཏོག་གི་སྐུ་གསུང་ཐུགས་ཡོན་ཏན་འཕྲིན་ལས་ཀྱི་སྤྲུལ་པ། རིག་འཛིན་རྒོད་ལྡེམ། ཚེ་བརྟན་རྒྱལ་མཚན། བྱང་ཆུབ་གླིང་པ། དྲི་མེད་གསུམ་སོགས་མང་དུ་བྱོན་པའི་ནང་ནས། ཁྲི་སྲོང་རྣམ་སྤྲུལ་ཆོས་རྒྱལ་བཀྲ་ཤིས་སྟོབས་རྒྱལ་གྱིས།
༈ གཏེར་འདོན་པདྨ་གླིང་པའི་སྐུའི་སྐྱེ་བ་གོང་མ་རྣམས་ཀྱི་ཚུལ་ཅུང་ཟད་བརྗོད་པ།
༡༽ གཏེར་འདོན་པདྨ་གླིང་པའི་སྐུའི་སྐྱེ་བ་གོང་མ་རྣམས་ཀྱི་ཚུལ་ཅུང་ཟད་བརྗོད་པ།ཨོ་རྒྱན་སངས་རྒྱས་རྡོ་རྗེ་ཀུན་སྐྱོང་གླིང་། །རིན་ཆེན་རཏྣ་པདྨ་ཀརྨ་གླིང་། །ལས་འཕྲོ་བསམ་གཏན་བསྟན་གཉིས་གླིང་པ་སོགས། །འཁྲུལ་མེད་གླིང་པ་བཅུ་གཅིག་ལ་གསོལ་བ་འདེབས། །(༤༧བ)ཞེས་འཁྲུལ་མེད་གླིང་པ་བཅུ་གཅིག་གི་ནང་ཚན།དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། སྐྱེ་བུ་གདུལ་བའི་ཁ་ལོ་སྒྱུར་བ། བླ་ན་མེད་པ་ལྷ་དང་མི་རྣམས་ཀྱི་སྟོན་པ་རི་རབ་མར་མེའི་རྒྱལ་མཚན་དུ་བསྐལ་པ་དུ་མའི་སྔོན་རོལ་ནས་སངས་རྒྱས། སྐུ་བཞིའི་ཡེ་ཤེས་ལྔའི་བདག་ཉིད་དུ་གྱུར་ཟིན་ནའང་། སངས་རྒྱས་རྨ་ག་ཆད་ལས། དེ་དག་ལ་ལར་ལྷ་ཡི་བུ་མོ་བརྒྱས་བསྐོར་ལ་ལར་གཅིག་པུ་སྤྱོད་པར་སྟོན། ལ་ལར་དགེ་སློང་རབ་ཏུ་ཞི་ཞིང་ཡིད་ཞི་ལ་ལར་རྒྱལ་པོ་དབང་ཕྱུག་འགྱུར། ལ་ལར་ཆོས་ཀྱི་དྲ་བར་འཇུག་པའི་ཡེ་ཤེས་ཁྱུ་མཆོག་གཟུགས་ཀྱང་རབ་ཏུ་སྟོན། ལ་ལར་བུད་མེད་སྒྱུ་རྩལ་ཕ་རོལ་ཕྱིན་ལ་ལ་ལར་དཀའ་ཐུབ་ཅན་དུ་འགྱུར།
47-6-96
ལ་ལར་འདོད་པའི་ལོངས་སྤྱོད་རྒྱ་ཆེན་སྟོན་ཅིང་ལ་(༤༨ན)ལར་བསམ་གཏན་ཐུབ་པ་བྱེད།ལ་ལར་མྱ་ངན་འདའ་དང་ཚེ་ཡི་ས་དང་། ལ་ལར་རྒན་དང་བྱིས་པར་སྟོན། དེ་དག་སྤྱོད་པ་བསམས་ན་སྐྱེ་བོ་མྱོས་པར་འགྱུར་ཏེ་ཡིད་གཉིས་རྙེད་པར་འགྱུར། ཞེས་གསུངས་པ་ལྟར་སེམས་ཅན་རྣམས་ཀྱི་ཁམས་དང་བསམ་པ་བག་ལ་ཉལ་སྣ་ཚོགས་པ་དང་བསྟུན་གང་ལ་གང་འདུལ་གྱི་ཐབས་ཚུལ་དང་གཟུགས་ཀྱི་རྣམ་པར་འཕྲུལ་པ་ཇི་སྙེད་ཅིག་སྟོན་པ་སངས་རྒྱས་ཀྱི་ཁྱད་ཆོས་ཡིན་པ་བཞིན་རྩོད་པའི་དུས་ཀྱིས་མུན་པར་འཕངས་པའི་འགྲོ་བ་འདི་དག་གི་མིག་ངོར་གཏེར་སྟོན་གྱི་རྣམ་པར་སྣང་བ། ཐང་ཡིག་ལས། འགོས་ཀྱི་ཕག་རིར་གནས་གཞི་རྫོང་ལ་འགེབས༔ ལ་སྟོད་སྟག་གྲུར་དུག་གི་ཚོང་དུས་འོང་༔ མེ་འབར་མཚོ་ལ་སྦས་བའི་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨོ་རྒྱན་པདྨ་གླིང་པ་ཞེས་བྱ་འབྱུང་༔ ཞེས་བློན་ཆེན་འགོས་ཀྱི་འཁྲུངས་(༤༨བ)ཡུལ་ཕག་རིར་བཀའ་གདམས་ལ་སོགས་པའི་གནས་གཞིའི་ཤིང་ཆ་བཤུས་ནས་རྫོང་ལ་འགེབས་པ་དང་། ལ་སྟོད་ཀྱི་སྟག་གྲུར་དུག་ཚོང་འདུས་སུ་ཉོ་ཚོང་བྱེད་པ་བྱུང་དུས། མེ་འབར་མཚོ་ལ་སོགས་པའི་ཟབ་གཏེར་འདོན་པར་ལུང་གིས་ཟིན་པ་ཆོས་ཀྱི་རྒྱལ་པོ་པདྨ་གླིང་པ་དེའི་སྐུའི་སྐྱེ་བ་གོང་མ་རྣམས་ཀྱི་ཚུལ་ཅུང་ཟད་བརྗོད་ན།རང་གཏེར་ཚེ་སྒྲུབ་རྡོ་རྗེ་འཕྲེང་བ་ལས། ད་ལྟའི་ལྷ་ལྕམ་པདྨ་གསལ༔ དག་པའི་སྐྱེ་བ་ལྔ་ལེན་མཐའ༔ འདི་ནས་ལྷོ་ནུབ་བུམ་ཐང་ཕྱོགས༔ ལུང་པ་ཐལ་སྦྱར་འདྲ་བའི་དབུས༔དབེན་གནས་གདུགས་ཀྱི་ཤམ་བུར་མཚུངས༔ ཧོཾ་ཁུང་འདྲ་བའི་ཡུལ་ནང་དུ༔ ཕ་བཟང་མ་ཎི་པདྨའི་བུ༔ ལྕགས་ཁམས་རྟ་སྦྲུལ་ལོ་པ་གཅིག༔ ང་ཡི་ཐུགས་སྲས་སྙིང་སྟོབས་ཅན༔སྐྱེས་བུ་པདྨའི་མིང་ཅན་འབྱུང་༔ ཞེས་ལྷ་བཙན་པོ་ཁྲི་སྲོང་གི་བཙུན་མོ་བྱང་ཆུབ་(༤༩ན)སྒྲོན་གྱི་སྲས་མོ་ལྷ་ལྕམ་པདྨ་གསལ་ཞེས་བྱ་བ། དགུང་ལོ་ལྔ་ནས་དམ་པའི་ཆོས་ལ་རབ་ཏུ་མོས་ཤིང་། ཤེས་རབ་སྙིང་རྗེར་ལྡན་པས་སངས་རྒྱས་གཉིས་པ་པདྨས་རྒྱུད་བུ་ཆུང་།
47-6-97
ཀློང་གསལ། དགོངས་པ་ཀུན་འདུས། བླ་མེད་དོན་རྫོགས། ཁྲོས་ནག །རྡོར་སེམས། འོད་གསལ་རྒྱུད། སྙིང་ཐིག་མ་བུ། ནོར་བུ་རྒྱ་མཚོ་ལ་སོགས་པ་ཟབ་ལ་རྒྱ་ཆེ་བའི་ཆོས་བཀའ་དུ་མ་སྩལ། ཉམས་སུ་བླངས་པས་རིག་པའི་ངོ་བོ་མཐོང་བ་ཙམ་དུ་གྱུར།དགུང་ལོ་བརྒྱད་པར་སྔོན་གྱི་ལས་སྨོན་མཐུ་བཙན་པས་སྲིན་ནད་ཀྱིས་བཏབ་པ་སློབ་དཔོན་ཆེན་པོར་བྱིན་བརླབས་ཞུར་བྱོན་པར། ཚེའི་དུས་བྱེད་པར་མཁྱེན་ནས་གོང་གི་ཆོས་སྐོར་རྣམས་ཀྱི་དཔེ་སྒྲོམ་བུ་ཐོག་ཏུ་བཞག་སྟེ། ངའི་གདམས་པ་འདི་རྣམས་ཁྱེད་ཀྱིས་སྐྱེ་བ་ཕྱི་མ་ལོངས་སྤྱོད་པར་འགྱུར་རོ་ཞེས་ལུང་བསྟན་དབུགས་དབྱུང་། འདའ་ཁ་མའི་མཚམས་སྦྱོར་ཡང་(༤༩བ)དག་པར་མཛད་རྗེས་ཞིང་ཁམས་འཕོས། རྒྱལ་པོ་ཐུགས་ཁྲེལ་གྱིས་ལྷག་པར་ཟིན་ནས་འདས་པ་དང་མ་འོངས་པའི་སྐྱེ་བརྒྱུད་ཞུས་པར། ཐང་ཡིག་ལས།རྒྱལ་པོ་དགྱེས་ན་ལྷ་ལྕམ་པདྨ་འདི༔སྐྱེ་བ་བདུན་གྱི་གོང་དུ་རྒྱ་གར་ཡུལ༔བྲམ་ཟེའི་ཕྲུག་གུ་བྱ་ཏ་ལ་ཞེས་སྐྱེས༔དགེ་སློང་བྱས་ནས་འཚོ་བ་ཀློག་འདོན་ཚོལ༔ཞེས་བྲམ་ཟེའི་བུ་བྱ་ཏ་ལ་དགེ་སློང་དུ་བསྒྲུབས་པས་རྒྱལ་པོའི་བླ་མཆོད་བྱས། བཙུན་མོར་མི་ཚངས་པ་སྤྱད་པས་འདུལ་ཁྲིམས་ཉམས། ཀུགྐུ་རའི་ཕོ་མཚན་ཐོ་བས་བརྡུངས་ཏེ་བསད་པ་ལ་སོགས་པའི་རྣམ་སྨིན་གྱིས། བྱོལ་སོང་མོའི་ལུས་ལྔ་བརྒྱ། ཡི་དྭགས་ཀྱི་ལུས་ལྔ་བརྒྱ། དམྱལ་བའི་སྐྱེ་བ་ལྔ་བརྒྱ། ལྷ་མ་ཡིན་གྱི་སྐྱེ་བ་བརྒྱ། ལྷའི་སྐྱེ་བ་བརྒྱ། སྤྲིན་ཀྲ་མེ་འཁོར་གྱི་སྐྱེ་བ་བརྒྱ་རྣམས་བླངས་ནས་པདྨ་གསལ་དུ་སྐྱེས་པ་དང་། རྒྱལ་པོའི་སྲས་མོར་གྱུར་པ་ཡང་། སྐྱེ་བ་འདི་(༥༠ན)ལ་ཡབ་སྲས་འབྲེལ་བ་ནི༔ སྐྱེ་བ་འདི་ཡི་ཡང་སྔ་བལ་པོའི་ཡུལ༔ པདྨ་བདག་དང་མངའ་བདག་རྒྱལ་པོ་དང་༔ བོ་དྷི་ས་ཏྭ་འོ་སྐོལ་མཆེད་གསུམ་གྱིས༔མ་གུ་ཏ་ཡི་མཆོད་རྟེན་བྱ་རུང་ཁར༔ བུམ་པ་བཏགས་ནས་སྨོན་ལམ་སོ་སོར་བཏབ༔ དེ་
47-6-98
དུས་ལྷ་ལྕམ་སྦྲང་བུ་ཏྲེ་མའི་ལུས༔ རྒྱལ་པོ་ཉིད་ཀྱི་རྩིའུ་ཆུང་ལ་ཟོས༔ དྲན་མེད་ཕྱག་གིས་ཤད་པས་སྦྲང་བུ་ཤི༔ རྒྱལ་པོ་ཉིད་འགྱོད་སྙིང་རྗེ་རབ་ཏུ་སྐྱེས༔ དེ་ལ་དམིགས་པའི་སྨོན་ལམ་དྲག་པོ་བཏབ༔ ཅེས་མཆོད་རྟེན་བྱ་རུང་ཁ་ཤོར་བཞེངས་དུས་རྒྱལ་པོའི་ཕྱག་འོག་ཏུ་ཤི་བས་རྗེས་སུ་འཛིན་པའི་སྨོན་ལམ་བཏབ་པའི་མཐུས་སྲས་མོར་སྐྱེས་པའི་ཚུལ་དང་།སྐྱེ་བ་འདི་ཡི་ཕྱི་མ་ཡང་ཀླུངས་སུ༔བུ་མོ་གཟུགས་མི་སྡུག་ཅིང་བསོད་ནམས་ཆུང་༔སྤྲང་མོའི་རིགས་ཀྱི་སྐྱེ་བ་བཅུ་ལེན་གསུངས༔ཞེས་སྤྲང་མོའི་རིགས་བཅུ། བསམ་ཡས་སུ་ཁྱི་མོ་དང་། ལྷ་སར་ལུག་མོ་(༥༠བ)སྨད་ཁོག་འདྲེད་པ། སྒྲགས་གྲོང་གསར་དུ་བུད་མེད་དབང་པོ་མ་ཚང་བ་རྣམས་ཀྱི་ལུས་ལེན་པ་དང་།དེ་ནས་འཕོས་ཏེ་ལྷོ་ནུབ་ལ་ཡག་ཏུ༔བུ་མོ་སྤྲེའུའི་ལོ་པ་ཤེས་རབ་ཅན༔སྐྱེས་མ་ཐག་ཏུ་ཕ་མ་གཉིས་ཀ་འཆི༔ང་ཡི་སྤྲུལ་པ་ཉང་རལ་ཞེས་དང་ཕྲད༔དེ་ལ་མོས་གུས་བྱས་ཏེ་ལམ་སྣ་ཟིན༔ཞེས་མངའ་བདག་ཉང་རལ་པ་ཅན་གྱི་རྡོ་རྗེ་བཙུན་མོ་པདྨ་སྐྱིད་ཅེས་བྱ་བ་ཡར་འབྲོག་ཏུ་འཁྲུངས་ཤིང་། བསྟན་པའི་སྒོར་ཞུགས་ནས་དངོས་གྲུབ་ཐོབ། ལྷོ་བྲག་སྨྲ་བོའི་གནས་གཞི་ཡང་བཟུང་། དེའི་སྐྱེ་བ་ཕྱི་མ་གུ་རུ་ཆོས་ཀྱི་དབང་ཕྱུག་གི་གསང་ཡུམ་པདྨ་སྒྲོན༔ སྲས་པདྨ་དབང་ཆེན་དང་། སངས་རྒྱས་ཀུན་གྲོལ་སོགས་གསུམ་གྱི་ཡུམ་གུ་རུ་ལྷ་ཁང་བཞེང་བ་པོ་དེ་ཡིན་ལ། དེའི་ཕྱི་མ།དེ་ནས་གཙང་གི་གཡས་སུ་གྲོང་དམར་དུ༔བན་སྒོམ་ཕོ་མོ་གཉིས་ཀྱི་བུ་རུ་སྐྱེ༔
47-6-99
དེ་ཡང་བཞིན་མི་སྡུག་(༥༡ན)ཅིང་གཤིས་ངན་ཁྲོ༔རབ་ཏུ་བྱུང་བའི་ཆ་ལུགས་ལོག་ལྟ་ཅན༔ང་ཡི་སྤྲུལ་པ་ཆོས་དབང་ཞེས་དང་ཕྲད༔གདམས་པ་བྱིན་པས་རིག་པའི་ངོ་བོ་མཐོང་༔ཌཱ་ཀི་མ་ཡིས་རྗེས་སུ་འཛིན་པར་འགྱུར༔ཞེས་པ་ལྟར། གཡས་རུ་གཙང་གི་ཆ་གྲོང་གསར་དུ་སྔགས་པའི་རིགས་ལས་རིན་ཆེན་གྲགས་ཞེས་བྱ་བར་འགྱུར༔ ཐང་ཡིག་ཏུ་ཆེས་དབང་ཞེས་བྱུང་ཡང་གཏེར་སྟོན་ཨོ་རྒྱན་གླིང་པ་དང་མཇལ། རྟ་མགྲིན་ལྕགས་རལ་ཅན་གྱི་ཆོས་སྐོར་ལ་མངའ་བརྙེས་ཤིང་། དེའི་ཞལ་ལན་ལྔ་མཇལ། གནས་ལུགས་ཀྱི་དོན་ཟབ་མོ་ལ་རང་བྱན་ཆུད། དེའི་ཕྱི་མ།སྐྱེ་བ་དེ་འཕོས་འདི་ནས་ཤར་ལྷོ་མཚམས༔དྷོ་བོད་མཚམས་ཀྱི་འབྲིན་ཐང་ཞེས་བྱ་བར༔སྔགས་བཙུན་ཕོ་མོ་གཉིས་ཀྱི་བུ་རུ་སྐྱེ༔ལྕགས་མོ་ཡོས་ཀྱི་ལོ་པ་མི་གཅིག་པོ༔སྒོ་བཟང་སྐྱེ་མཆེད་དྭངས་པ་ཤེས་རབ་ཅན༔ཕ་མེད་མ་མེད་ཤིན་ཏུ་དབུལ་ཉོན་མོངས༔གང་ན་(༥༡བ)ཉེ་བ་ཐམས་ཅད་དགྲ་བྱེད་པ༔སྐྱེ་བ་སྔ་མའི་བག་ཆགས་རབ་ཏུ་བྱུང་༔ཆུ་མོ་གླང་ལོར་ང་ཡི་ཟབ་གཏེར་ཕྲད༔གཏེར་སྒོ་གསུམ་བཞི་འབྱེད་དེ་དོན་མི་འབྱུང༔སྦས་པའི་ཚུལ་དུ་ཉམས་ལེན་དུས་ཡིན་པས༔ཨོ་རྒྱན་ང་ཡི་ཟབ་གཏེར་བདག་པོར་འགྱུར༔
47-6-100
ཞེས་ཨོ་རྒྱན་མཁན་པོ་ཟབ་གཏེར་ལས་དབུས་གཏེར་ཟུག་པ་རྩ་བ་ལྟ་བུ། ལྷོ་གཏེར་དྲིལ་བ་སྡོང་པོ་ལྟ་བུ། ནུབ་གཏེར་གསལ་བ་མེ་ཏོག་ལྟ་བུ། བྱང་གཏེར་རྒྱས་པ་གལ་པ་ལྟ་བུ། ཤར་གཏེར་སྨིན་པ་འབྲས་བུ་ལྟ་བུ་དང་ལྔ་ལས། ཕྱི་མའི་བཀའ་བབས་ལས་ལྡན་གྱི་གཙོ་བོ་འདས་པའི་སངས་རྒྱས་རི་རབ་མར་མེ་རྒྱལ་མཚན་གྱི་ཐུགས་ཀྱི་འོད་ཟེར་ལས་སྤྲུལ་ཞིང་འབྱུང་འགྱུར་གྱི་རྒྱལ་བ་རྡོ་རྗེ་སྙིང་པོའི་ངོ་བོ་དཔའ་བོ་སྒང་བ་སྤྲུལ་སྐུ་རིན་ཆེན་ཚུལ་རྡོ་རྗེར་རམ་གསང་མཚན་ལས་འབྲེལ་རྩལ་ཡིན་པ། རང་གཏེར་གཞི་ལམ་འབྲས་བུའི་འཇུག་གི་ལུང་བསྟན་ལས།ཀུ་(༥༢ན)སུ་ལུ་པའི་གདམས་པའི་སྐོར༔ལྷང་ལྷུང་ལྷ་ལྷའི་བྲག་ལ་སྦོད༔ད་ལྟ་སྟོན་པའི་དུས་མ་བབས༔ཚེ་ལོ་དྲུག་ཅུ་ཁ་རལ་དུས༔གསལ་རྗེ་གངས་ཀྱི་ཤར་ཕྱོགས་ངོས༔ལྕགས་སྒྲོམ་ལྟ་བུའི་ཡུལ་གྱི་སྟོད༔འབྲོང་པོ་ཉལ་འདྲའི་དཔྱི་སྟེང་དུ༔མཁའ་འགྲོ་སྡེ་ལྔས་བྱིན་བརླབས་པས༔མུ་ས་འབྲུག་གི་སྤྲེལ་ཡོས་ལོ༔སྤྲོ་ཞིང་ཐེག་ཆེན་ཆོས་ལ་མོས༔སྦས་ཚུལ་འཁོར་མིའི་ཆ་ལུགས་འཛིན༔མ་འགགས་སྤྱོད་པ་སྣ་ཚོགས་བསྐྱངས༔ད་ལྟའི་ལྷ་ལྕམ་པདྨ་གསལ༔སྙིགས་མའི་དུས་སུ་དེ་ལྟར་སྐྱེ༔
47-6-101
དེ་དུས་གདམས་པ་འདི་དང་ཕྲད༔ཅེས་པ་ལྟར་དྭགས་པོ་ལྡང་ལྷའི་ཕྲ་མོ་བྲག་ནས་ཟབ་ཆོས་མཁའ་འགྲོ་སྙིང་ཏིག །ཕྱག་རྡོར་དྲེགས་པ་ཀུན་འདུལ། རྟ་མགྲིན་གཉེན་པོ་ལྷ་གསུམ། སྤྱན་རས་གཟིགས་དམར་པོ་དབང་ཕྱུག་རླུང་གི་ཞགས་པ། གཤིན་རྗེ་གཤོར་སང་ཉི་མ་ཁྲོས་པ། ཁྱབ་འཇུག་རཱ་ཧུ་ལ་དུག་གི་སྤུ་གྲི་རྣམས་(༥༢བ)ཀྱི་སྐོར། སྲས་བུ་གླ་རོ་བྲག་ནག་ནས་ཕྱི་གནོད་སྦྱིན་སྤུ་གྲི་དམར་ནག །ནང་བདུད་བཀྲག་མེད། གསང་བ་ཟ་རྒོད་མིག་དམར། ཡང་གསང་སྒྲོལ་གིང་བཤན་པ་མ་རུ་རྩེའི་སྐོར། ཙ་རི་ཟིལ་ཆེན་ཕུག་ནས་ཞིང་སྐྱོང་སེང་གེའི་གདོང་ཅན། གནས་སྣ་ཚོགས་ནས་ཧལ་ཁྱི་ནག་པོ། ཀུན་ཐུབ་ཆེན་མོ་ལ་སོགས་པ་ཟབ་གཏེར་མང་བ་གདན་དྲངས། ཆོས་རྗེ་ཀརྨ་པ་རང་བྱུང་རྡོ་རྗེའི་བླ་མར་གྱུར་པ་སོགས་འཕྲིན་ལས་ཀྱི་སྒོ་བྱེ་ཡང་དགུང་ལོ་ཉེར་ལྔའི་ཀག་ཐོག་གཉལ་སྨད་དུ་བུད་མེད་གཏེར་ལུང་ནས་བསྟན་པའི་མཚན་རྟགས་དང་ལྡན་པ་ལྟ་བུ་ཞིག་འདུག་པ་དང་ལྷན་ཅིག་ཟླ་ཤས་བར་བཞུགས་མཚམས། གཉལ་སྟོད་དུ་བསོད་སྙོམས་ལ་བྱོན་པས་མནལ་ལམ་དུ་མཁའ་འགྲོས་ལུང་བསྟན་ཏེ་ཕྱག་རྒྱ་མཚན་ལྡན་དང་མཇལ་བ་སྔར་གྱི་བུད་མེད་དེས་ཐོས། ཕྲག་དོག་གི་གཙོར་སུན་བྱས་པར། བྲོས་ནས་བྱོན་ཀྱང་མོའི་ཁྱོ་དང་མིང་པོ་བཅས་(༥༣ན)རྗེས་བསྙེགས་སུ་བཏང་། གཉལ་བྱར་མཚམས་ཀྱི་ལ་ཁར་སླེབ་པ་དང་རྗེས་ཟིན། རྡོ་དང་གྲི་སོགས་ཀྱིས་ཐམས་ཅད་བརྡུངས་པས་ཕྱག་གཡོག་རིན་རྡོར་དེ་ཉིད་དུ་འདས་ཤིང་། རྐྱེན་དེས་མི་རིང་བར་སྤྲུལ་སྐུ་ལས་འབྲེལ་རྩལ་ཀྱང་ཞིང་ཁམས་འཕོས་པའི་བར་ཆད་ཀྱིས་སྐུ་ཚེ་ཤིན་ཏུ་ཐུང་བས་གཏེར་ཆོས་ཀྱི་འགྲོ་ཕན་རླབས་ཆེ་བ་རང་མ་བྱུང་བར་སྣང་། དེའི་ཕྱི་མ་ནི། ཐང་ཡིག་ལས།དེ་ནས་ཚེ་འཕོས་མོན་ཡུལ་བུམ་ཐང་དུ༔དགེ་གནས་རྩི་ལུང་ཐོ་སྐོར་སྐྱེ་བར་འགྱུར༔སྤྲེའུའི་ལོ་པ་ཤེས་རབ་བློ་བསྲལ་ཅན༔
47-6-102
ང་སྤྲུལ་རིན་ཆེན་གླིང་ཕྲད་རྗེས་སུ་འཛིན༔ཚེ་སྒྲུབ་རྡོ་རྗེ་རྒྱ་མདུད་ཉམས་བླངས་པས༔ཚེ་ཡང་མཐར་ཕྱིན་སྐུ་ཚེའི་སྨད་ཉིད་ལ༔བུམ་ཐང་སྨད་ནས་གཏེར་གྱི་སྒོ་ཡང་འབྱེད༔དེ་དུས་དྲི་མེད་འོད་ཟེར་ཞེས་སུ་གྲགས༔གཏེར་སྒོ་ལྔ་འབྱེད་འགྲོ་དོན་དཔག་མེད་མཛད༔དེ་ཕྱིར་མཚོ་རྒྱལ་དཀར་ཆག་ཡི་གེར་ཐོབ༔ཞིབ་པར་(༥༣བ)ལོགས་སུ་ཐོབ་ལས་སྦོས་ཤིག་གསུངས༔ཞེས་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་པ་དང་སྤྲུལ་སྐུ་པདྨ་གླིང་པ་གཉིས་འགྲོ་དོན་སྤྱོད་ཡུལ་གཅིག་ཏུ་གྱུར་པར་གསུངས་ནའང་། རྟེན་འབྲེལ་ཅུང་འཕྱུགས་པ་སྐྱེ་བ་གསུམ་བཞེས་དགོས་བྱུང་བ་ཡིན་ལ། མཐོང་སྣང་འོད་ཀྱི་དྲ་བར། སློབ་དཔོན་རིན་རྡོར་གྱིས་གཏེར་ཐོན་ནས་རེ་ཞིག་གསངས་ཏེ་སྒྲུབ་པ་མཛད་ན་འོད་གསལ་མངོན་དུ་གྱུར་ཞིང་སྐུ་ཚེ་མཐར་ཕྱིན་རྒྱུ་ལ་མ་གསངས་པས་སྐུ་ཚེ་མཐར་མ་འཁྱོལ། སྐྱེ་བ་དེའི་འོག་ཏུ་ལོངས་སྐུའི་ཞིང་དར་གཅིག་མྱུལ་ནས་བུམ་ཐང་དུ་སྐྱེ་བར་བཤད་པ་ཀུན་མཁྱེན་ཀློང་ཆེན་པ་ད་ལྟར་གྱི་དུས་སུ་འོད་གསལ་འཇའ་ཚོན་གྱི་སྣང་བ་སྒོམ་ཞིང་ཉམས་སུ་ལེན་པ་ལ་ལོངས་སྐུའི་ཞིང་དར་གཅིག་མྱུལ་བར་བཏགས་པ་ཡིན། ཞེས་པ་ལྟར། སྐྱེ་བ་སྔོན་མ་སྤྲུལ་སྐུ་རིན་ཆེན་ཚུལ་རྡོར་གྱིས་དྭགས་ལུང་ཕྲ་མོའི་བྲག་ནས་མཁའ་འགྲོ་སྙིང་ཏིག་གི་(༥༤ན)ཤོག་སེར་རྣམས་སྤྱན་དྲངས་པས་རྗོད་བྱེད་ཀྱི་ཚིག་ཙམ་ལ་དབང་། དེའི་བག་ཆགས་ཀྱི་མཐུས་འགའ་ཞིག་ཏུ་སྒྲགས་ཞེས་ཀྱང་གཡོ་རུ་གྲའི་ཆུ་སྟོད་གྲོང་ཞེས་བྱ་བར་ངན་ལམ་རྒྱལ་བ་མཆོག་དབྱངས་ཀྱི་དབོན་བརྒྱུད་དུ་འཁྲུངས་པའི་ཀུན་མཁྱེན་དྲི་མེད་འོད་ཟེར་རམ་ངག་གི་དབང་པོ། ཀློང་ཆེན་པ་འོད་གསལ་ཁོར་ཡུག་ལོངས་སྐུའི་ཞིང་དང་མི་འབྲལ་བའི་སྐབས་
47-6-103
བསམ་ཡས་མཆིམས་ཕུར་དགོངས་གཏེར་གྱི་བཀའ་བབས་ཏེ་བརྗོད་བྱའི་དོན་མ་ལུས་པ་ཐུགས་སུ་ཆུད་པར་མ་ཟད། ཁ་བྱང་ལས།སྔོན་མའི་ཚེ་ལ་རྐྱེན་ངན་བར་ཆད་པས། །ད་རེས་འོད་གསལ་ལོངས་སྐུའི་ཞིང་མྱུལ་དུ། །གསངས་ནས་གཅིག་པུར་སྒྲུབ་པར་ཆས་ན་ཡང་། །བླ་མ་མཁའ་འགྲོའི་བྱིན་རླབས་གློ་བུར་བབས། །ཡང་ཟབ་གདམས་པའི་གནད་རྣམས་དུས་གཅིག་ཤར། །ཕྱི་རབས་ཡི་གེར་བཀོད་པའི་ལུང་བསྟན་བྱུང་། །ཞེས་རྩོམས་ཤིག་པའི་སྣང་བ་བྱུང་(༥༤བ)བར་བརྟེན་གཏེར་གཞུང་བརླིང་ལ་གོ་དཀའ་བའི་དོན་རྣམས་གསལ་ཞིང་རྒྱས་པར་བཤད་པ་མཁའ་འགྲོ་སྙིང་ཏིག་གི་དགོངས་འགྲེལ་མཁའ་འགྲོ་ཡང་ཐིག །བི་མ་ལ་སྙིང་ཐིག་གི་དགོངས་འགྲེལ་བླ་མ་ཡང་ཏིག །དེའི་སྙིང་པོར་གྱུར་བ་ཟབ་མོ་ཡང་ཏིག །མཛོད་བདུན། ངལ་གསོ་སྐོར་གསུམ། རང་གྲོལ་སྐོར་གསུམ་སོགས་ཀུན་ཏུ་བཟང་པོའི་དགོངས་པའི་ཀློང་དུ་ཟབ་མོའི་ཕྱག་རྒྱས་བཏབ་པའི་གཏེར་ཁ་རྣམ་དཔྱོད་ཀྱི་མཐུ་ཕུལ་དུ་བྱུང་བ་སྤྱན་དྲངས་པས། ཐང་ཡིག་ཏུ།ས་ཧོར་དུར་ཕག་དབུས་གཙང་ཀུན་ལ་འདེབས༔མཆོད་རྟེན་འོག་ཏུ་ཐོད་པ་ཁྱི་ཡིས་གཡེངས༔བསམ་ཡས་མཆིམས་ཕུར་སྦས་པའི་གཏེར་ཁ་འདིཿམི་བཞག་འདོན་པའི་རྟགས་དེར་བསྟན་ནས་བྱུང་༔གཏེར་སྟོན་དྲི་མེད་འོད་ཟེར་ཞེས་བྱ་འབྱུང་༔ཞེས་དུས་རྟགས་དང་མཚན་སོགས་འཁྲུངས་པ་དང་འབྲེལ་བའི་གཏེར་སྟོན་ཡིན་ཅིང་།(༥༥ན) འགྲོ་དོན་ཀྱང་དཔག་ཏུ་མེད་པ་བྱུང་རུང་། བུམ་ཐང་ཐར་པ་གླིང་དུ་བཞུགས་
47-6-104
སྐབས། བསོད་ནམས་འབུམ་གྱི་སྲིང་མོ་བཙུན་མ་གཅིག་ནང་གཡོག་གི་ཚུལ་དུ་གསང་ཡུམ་ལ་བསྟེན། སྲས་གྲགས་པ་འོད་ཟེར་འཁྲུངས་པ་ཞབས་ཕྱི་རིན་ར་གྲགས་ཀྱི་ཡིན་པར་དྲིལ་བསྒྲགས་ཀྱང་། ཨ་ནེས་གསང་མ་ཉན་པའི་སྒྲོ་སྐུར་མི་ཁ་ཆེ་བས་ཐུགས་བྱུང་ནས་བསམ་ཡས་མཆིམས་ཕུར་ཕེབས་ཏེ་དགོངས་པ་ཆོས་དབྱིངས་སུ་ཐིམ་པར་གྲགས་ཀྱང་། རྟ་མགྲིན་གྱི་སྤྲུལ་པའི་སྲས་དེ་བུ་སློབ་རྣམས་ལ་གཉེར་དུ་གཏད་ནས། ཡར་འབྲོག་ཁྲི་དཔོན་དང་། ཏ་སི་བྱང་རྒྱལ་སོགས་བོད་ཀྱི་མི་བདག་མང་པོར་ཡུན་རིང་དུ་ཆོས་འཁོར་བསྐོར་བའི་མཐར་གཤེགས་པར་བཞེད།དེའི་ཕྱི་མ་མོན་བུམ་ཐང་ཐར་པ་གླིང་གི་ཤར་ཕྱོགས་བདེ་མ་སྟེང་དུ། ཡབ་པདྨ་སྐྱབས་དང་ཡུམ་ལྷ་སྐྱིད་བཟང་མོ་གཉིས་སྲས་ཐོད་དཀར་བྱ་བར་འཁྲུངས། སྒོ་བཟང་ལ་སྐྱེ་མཆེད་དྭངས་(༥༥བ)པ། དད་བརྩོན་ཤེས་རབ་སྙིང་བརྩེར་ལྡན་པ་ཞིག་བྱུང་བ་ལྷ་ལྕམ་པདྨ་གསལ་གྱི་སྲི་ངན་ལྟ་བུས་དགུང་ལོ་བདུན་ནམ་བརྒྱད་པའི་ཐོག་དབུར་རྡོ་འཕོག་ནས་གློ་བུར་དུ་འདས་པའི་ཚུལ་བསྟན་ཏེ་རྔ་ཡབ་པདྨ་འོད་དུ་དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྡོ་རྗེ་ཐོད་ཕྲེང་རྩལ་གྱི་དྲུང་ན་བཞུགས། ལོ་ཉི་ཤུ་རྩ་ལྔ་སོང་བ་ན། གུ་རུ་རིན་པོ་ཆེའི་ཞལ་ནས། ད་ནི་བུ་ཁྱོད་ཀྱི་གདུལ་བྱའི་དུས་ལ་བབ་པར་འདུག་པས། བོད་ཡུལ་གྱི་ལྷོ་ཕྱོགས་བུམ་ཐང་དུ་ཤེལ་དཀར་རྡོ་རྗེ་མཚོ་སྒྲོན་གྱི་སྐྱེ་བ་པདྨའི་མིང་ཅན་ཞིག་ཡོད་པ་དེའི་ལྷུམས་སུ་ཞུགས་ལ། ངའི་ཟབ་གཏེར་རྣམས་རིམ་གྱིས་ལོང་འགྲོ་དོན་གྱིས་ཤིག །སེམས་ཅན་དུ་མ་ལ་ཕན་ཐོགས་པར་ཡོད་དོ། །ཞེས་གསུངས་པ་བཞིན། སྔར་བཤད་པའི་དམ་པ་དག་གི་སྐུའི་སྐྱེ་བ་རིམ་པར་བརྒྱུད་པའི་ཕྱི་མ་ནི། རང་གཏེར་བརྒྱུད་པའི་ལོ་རྒྱུས་ཆེན་མོ་ལས།དེ་འདྲའི་དུས་(༥༦ན)ངན་བྱུང་བ་དང་༔པདྨ་ང་ཡི་སྨོན་ལམ་མཐུས༔ལྷ་ལྕམ་ཁྱོད་ཀྱི་སྐྱེ་བ་ནི༔
47-6-105
ལྕགས་ཁམས་ས་སྦྲུལ་ལོ་པ་གཅིག༔བུམ་ཐང་མཐིལ་དུ་འཁྲུངས་པར་འགྱུར༔བན་བོན་སྔགས་པའི་རིགས་འཆང་བ༔པདྨའི་མིང་ཅན་ཤེས་རབ་ཅན༔མ་ངེས་སྤྱོད་པ་སྣ་ཚོགས་བྱེད༔ཚིག་རྩུབ་རྟ་སྐད་ཆོལ་ལེ་སྨྲ༔ང་ཡི་ཐུགས་གཏེར་མང་འབྱེད་ཅིང་༔ཟབ་ཆོས་རྫོགས་ཆེན་བདག་པོར་འགྱུར༔ཞེས་དང་། གསུང་ལུང་ལས།རུས་ནི་སྨྱོས་ལ་ཕ་ནི་དོན་གྲུབ་བཟང་༔མ་ནི་འབྲོག་མོ་དཔལ་གྱི་འཛོམ་གཉིས་ཀྱི༔སྲས་སུ་འཁྲུངས་པ་ལྕགས་ཕོ་ཁྱི་ཡི་ལོ༔པདྨའི་མིང་ཅན་སྐུ་ཆེ་བོང་ལུས་འཚམ༔ཞེས་པ་ལྟར་མོན་བུམ་ཐང་ཆོས་འཁོར་གྱི་དབུས་ཆལ་ལུང་བ་རི་འཕྲང་དུ་ཡབ་འོད་གསལ་ལྷ་བབས་པ་སྨྱོས་ཀྱི་གདུང་དྲི་མ་མེད་པ་དོན་གྲུབ་དང་ཡུམ་ཤེལ་དཀར་རྡོ་རྗེ་མཚོ་སྒྲོན་གྱི་ཡང་སྲིད་འབྲོག་མོ་པདྨ་(༥༦བ)སྒྲོལ་མ་གཉིས་ཀྱི་སྲས་སུ་འཁྲུངས། མཚན་དཔལ་འབྱོར་དུ་གྲགས། མནལ་ལམ་དག་སྣང་དུ་རྔ་ཡབ་གླིང་ཕྲན་ཟངས་མདོག་དཔལ་རིར་ཕེབས།ཨོ་རྒྱན་རྡོ་རྗེ་འཆང་ཆེན་པོ་དང་མཇལ། དབང་བཞི་རྫོགས་པར་བསྐུར་བའི་གསང་མཚན་པདྨ་གླིང་པར་གསོལ། རིག་འཛིན་ཆེན་པོ་འདིས་དགུང་ལོ་ཉེར་བདུན་པ་ལ་མེ་འབར་མཚོའི་སྣ་རིང་བྲག་ནས་ཀློང་གསལ་སྤྱན་དྲངས་པ་ནས་བཟུང་། སོ་གཉིས་པ་བསམ་ཡས་ནས་མན་ངག་ཤོག་རིལ་སྤྱན་དྲངས་པའི་བར་གཏེར་ཁ་སུམ་ཅུ་སོ་གཉིས་ལ་ཆོས་དང་རྫས་གཏེར་ཇི་
47-6-106
སྙེད་ཅིག་བཏོན་པའི་ཆོས་རྒྱུན་ད་ལྟའི་བར་ཉམས་མེད་དུ་བཞུགས་པའི་བླ་རྫོགས་ཐུགས་གསུམ་ལས་དང་པོ་བླ་མའི་སྐོར་གྱི་སྡེ་ཚན་ནི།
༈ གཏེར་སྟོན་འཁྲུལ་མེད་གླིང་པ་བཅུ་གཅིག་གི་རྣམ་ཐར་དང་། གཏེར་ཆོས་ཀྱི་དཀར་ཆག
༢༽ གཏེར་སྟོན་འཁྲུལ་མེད་གླིང་པ་བཅུ་གཅིག་གི་རྣམ་ཐར་དང་། གཏེར་ཆོས་ཀྱི་དཀར་ཆགགཏེར་ཁ་བཅུ་དགུ་པ་ལྷོ་བྲག་སྨན་མདོ་ནས་སྤྱན་དྲངས་པའི་བླ་མ་ཞི་བ་ནོར་བུ་རྒྱ་མཚོའི་སྐོར་ལ། ཕྱི་ནང་གསང་གསུམ་གྱི་སྒྲུབ་ཐབས་དབང་ཆེན། དབང་ཕྲན།(༥༧ན) འཁྲིད།རྒྱབ་ཆོས་སོགས་བཞུགས་པའི་གཞུང་རྩ་བའི་དཀྱིལ་འཁོར་དཔའ་བོ་རྟ་མགྲིན་དང་བླ་མ་བརྩེགས་མ་ལ། ཐོད་འཕྲེང་རིགས་བཞི། མཚན་བརྒྱད་སོགས་ཀྱིས་བསྐོར་བ། ཆོས་སྐོར་འདིའི་ནང་ཚན་བྱེ་བྲག་པ་རྣམས་འཇོམས་ཡང་གསང་བླ་མེད། དེས་མཚོན་ནས་གཤིན་རྗེ།རྟ་མགྲིན། དྲག་པོ་སྐུ་ལྔ། ཕྱག་རྡོར། ཕག་མོ། ཚེ་དཔག་མེད། ཁྲོས་ནག །བཀའ་སྲུང་རྣམ་སྲས་ཀྱི་སྒྲུབ་སྐོར་རྣམས་ལ་ཡང་གསང་སྐོར་དགུའི་ཐ་སྙད་མཛད།གཏེར་ཁ་བཅོ་བརྒྱད་པ་སྐུ་རྗེས་རྡོ་རྗེའི་ཕུག་ནས་སྤྱན་དྲངས་པ་བླ་མ་དྲག་པོའི་སྐོར་ལ་དབང་ཆོག་ཐེམས་ཅན་དང་། ཐེམས་མེད་ལྷ་དབང་དུ་གྲགས་པ་གཉིས། ཕྱི་ནང་གསང་གསུམ་གོ་ཆའི་ལྷ་དང་བཅས་པའི་སྒྲུབ་ཐབས། ལས་བྱང་། གཏོར་བཟློག །ལས་ཚོགས།གཏེར་སྲུང་ཕ་མ་བུ་གསུམ་གྱི་སྒྲུབ་ཐབས་དང་བཅས་པ། སྒྲུབ་གཞུང་རྩ་(༥༧བ)བའི་ལྷ་དྲག་པོ་ཞལ་གསུམ་ཕྱག་དྲུག་པ་ཡུམ་བཅས། འཁོར་རིགས་བཞི་དང་། སྲས་བཞི། ཁྲོ་བཅུ། སྒོ་སྲུང་བཞི་དང་བཅས་པ། གཏེར་ཁ་བཅུ་གཅིག་པ་སེང་གེ་ཁྱི་ཅོག་བྲག་ནས་སྤྱན་དྲངས་པ་དྲག་པོ་དཔའ་གཅིག་འགྲོ་འདུལ་གྱི་སྐོར་ལ་དབང་། ལས་བྱང་། གཏོར་བཟློག །ལས་ཕྲན་དང་བཅས་པ། གཏེར་ཁ་དགུ་པ་ཁྱི་ཅོག་བྲག་གི་གཏེར་མ་དྲག་པོ་མེ་རླུང་འཁྱིལ་པ་ལ་སྒྲུབ་
47-6-107
ཐབས། ལས་བྱང་། ལས་ཕྲན་སྣ་ཚོགས་དང་བཅས་པ་རྣམས།གཉིས་པ་རྫོགས་ཆེན་གྱི་སྐོར་ལ། ཆོས་རང་གི་ངོ་ནས་ཕ་རྒྱུད་མ་རྒྱུད་ཀྱི་དབྱེ་བ་ཇི་ལྟར་ཡང་། དེང་སང་གྲགས་ཆེ་བའི་དབང་གིས། གཏེར་ཁ་ཉེར་བདུན་པ་བསམ་ཡས་མཆིམས་ཕུ་ནས་སྤྱན་དྲངས་པ་ཕ་རྒྱུད་ཀུན་བཟང་དགོངས་འདུས་ལ། སྟ་གོན། ཞི་ཁྲོ། ཐེག་དགུ་སོགས་དབང་དང་། ལས་བྱང་། འཁྲིད་གཞུང་སོགས་ཆོས་སྡེ་ཤིན་(༥༨ན)ཏུ་ཆེ་བ།སྒྲུབ་ཐབས་རྩ་བའི་ལྷ་ནི་ཞི་ཁྲོ་དམ་པ་རིགས་བརྒྱའོ། །གཏེར་ཁ་དང་པོ་སྣ་རིང་བྲག་ནས་སྤྱན་དྲངས་པ་མ་རྒྱུད་ཀློང་གསལ་ལ་དབང་། ཁྲིད།སྒྲུབ་ཐབས། ཐུན་མོང་དང་ཐུན་མོང་མིན་པའི་ལས་ཚོགས་སོགས་གཏེར་ཁ་སུམ་ཅུ་པ་རྫོགས་ཆེན་རྒྱུད་བུ་ཆུང་གི་སྐོར། རང་གི་གཏེར་སྐལ་ཡིན་ཀྱང་སྔར་ཤེས་རབ་མེ་འབར་གྱིས་བཏོན་པའི་བུ་དཔེ་ལས་སྤེལ་བར་དབང་། ཁྲིད་སོགས་ཆོས་སྐོར་ཆ་ལག་ཚང་བ།གསུམ་པ་ཐུགས་རྗེ་ཆེན་པོ་ཞི་ཁྲོའི་སྐོར། གཏེར་ཁ་གསུམ་པ་བུམ་ཐང་རི་མོ་ཅན་ནས་གདན་དྲངས་པ་ཐུགས་རྗེ་ཆེན་པོ་མུན་སེལ་སྒྲོན་མེར་རྒྱུད། དབང་། སྒྲུབ་ཐབས། ལས་ཚོགས་དང་བཅས་པ། གཏེར་ཁ་ཉེར་གཅིག་པ་སྨན་མདོའི་གཏེར་མ་རྟ་མགྲིན་ཡང་གསང་བླ་མེད་ལ། དབང་། སྒྲུབ་ཐབས། ལས་བྱང་སོགས་ཆོས་སྡེ་ཚང་བ། གཏེར་ཁ་ཉི་ཤུ་པ་བྲག་མོ་(༥༨བ)འཕྲང་གི་གཏེར་མ་རྟ་མགྲིན་ལྕགས་རལ་ཅན་ལྷ་ལྔའི་སྒྲུབ་ཐབས་ལས་ཚོགས་དང་བཅས་པ་རྣམས་དང་། གཞན་ཡང་གཏེར་ཁ་བཅུ་དགུ་པ་དང་ལྷན་དུ་བྱུང་བ་ཚེ་འཁྲིད་རྡོ་རྗེའི་འཕྲེང་བར་རྒྱུད། དབང་སྒྲུབ་ཐབས། ལས་བྱང་། ལས་ཚོགས་དང་བཅས་ཆ་ལག་ཚང་བའི་རྩ་བའི་ལྷ། ཚེ་ལྷ་རིགས་ལྔ། སེམས་མ་བཞི། འགྱོགས་མ་བཞི། སྒོ་བ་ཡབ་ཡུམ་བཞི་སོགས། གཏེར་ཁ་བདུན་པ་བུམ་ཐང་སྐུ་རྗེས་ཀྱི་བྲག་ཐོད་པ་དགུ་བརྩེགས་འདྲ་བ་ནས་སྤྱན་དྲངས་པ་ཚེ་སྒྲུབ་ནོར་བུ་ལམ་འཁྱེར་ལ་རྒྱུད། དབང་། སྒྲུབ་ཐབས། ལས་བྱང་། ལས་ཚོགས་ཏེ་ཆོས་སྡེ་གཅིག །གཏེར་ཁ་ཉི་ཤུ་པར་བྱུང་བ་ཆལ་མདོ་ཕྲ་རིང་བྲག་གི་གཏེར་མ་
47-6-108
ཕྱག་རྡོར་དྲེགས་པ་ཀུན་འདུལ་ལ་རྒྱུད། དབང་། སྒྲུབ་ཐབས། ལས་བྱང་། ལས་ཚོགས་མང་བ་དང་བཅས་པ་ལས་འབྲེལ་རྩལ་གྱི་གཏེར་(༥༩ན)མ་དང་འདྲ་བ་རྩ་བའི་ལྷ་ཕྱག་རྡོར་ལ་ཁྲོ་བཅུ་དང་ཀླུ་བརྒྱད། གཟའ་བརྒྱད་ཀྱིས་བསྐོར་བ་སོགས་ཆོས་སྡེ་གཅིག །གཏེར་ཁ་ཉེར་གཉིས་པ་བྲག་དམར་དོ་བོའི་གཏེར་མ་ཕྱག་རྡོར་གཏུམ་པོར་དབང་།ལས་བྱང་། གདོན་གྲོལ། དུག་བྱུང་དང་བཅས་པ་གཏེར་ཁ་བཅུ་དྲུག་པ་བུམ་ཐང་རྩེ་ལུང་ལྷ་ཁང་གི་གཏེར་མ་བཀའ་བརྒྱད་ཐུགས་ཀྱི་མེ་ལོང་ལ་དབང་ཆེ་ཆུང་། སྒྲུབ་ཁོག །ལས་བྱང་།གཏོར་བཟློག་ཐོར་བུ་དང་བཅས་པ། ཆོས་སྐོར་འདི་དང་ལྷན་ཅིག་ཏུ་བཏོན་པ་བདུད་རྩི་སྨན་གྱི་སྐོར་ལ། སྨན་དབང་ཁྲོལ་བུ། ཕྱེ་མ་སོགས་སྨན་སྒྲུབ་ཆ་ལག་ཚང་བ། གཏེར་ཁ་ཉེར་གཅིག་པ་སྨན་མདོ་ནས་སྤྱན་དྲངས་པ་ཕུར་པ་ཡང་གསང་བླ་མེད་ལ་རྒྱུད་རྩ་དུམ། དབང་སྒྲུབ་ཁོག །ལས་ཚོགས་སོགས་ཆ་ལག་ཚང་བ་སྟེ་བཀའ་སྨན་ཕུར་གསུམ་ཞེས་གླེགས་བམ་གཅིག་ཏུ་བཞུགས། གཏེར་ཁ་ཉེར་གསུམ་པ་སྨན་མདོའི་(༥༩བ)གཏེར་ལ་དཔལ་མགོན་མ་ནིང་ལ། རྒྱུད་སྒྲུབ་ཐབས། དབང་བཀའ་ཆེ་ཆུང་། ལས་བྱང་། ལས་ཚོགས་དང་བཅས་པ་དང་། གཏེར་ཁ་སྣ་ཚོགས་ནས་སྤྱན་དྲངས་པ། གཤིན་རྗེ་ཁ་ཐུན་ནག་པོ། མུ་སྟེགས་གུ་ལང་ནག་པོ། ཕྲ་མེན་ཕག་ཤ་ནག་མོ་སྟེ་ནག་པོ་སྐོར་གསུམ། མན་ངག་སིལ་བུ་བཅས་བསྡོམས་པར་གླེགས་བམ་གཅིག །དེ་ལྟར་གཏེར་ཁ་སོ་གཉིས་ཀྱི་གྲངས་ལས་འདིར་མ་སླེབས་པ་རྣམས་ནི་སྒྲུབ་ཐབས་སོ་སོའི་ཁོངས་སུ་གནས་པ་སོགས་མདོར་ན་ཁྲོམ་གཏེར་ཉེར་ལྔ་དང་གཞན་སུམ་ཅུར་ཉེ་དམ་རྫས་སྐུ་གཏེར་ཐུགས་གཏེར་སོགས་ཉི་ཟླ་ལྟར་ཡོངས་ལ་ཁྱབ་ཅིང་སྤྱིར་གང་ཟག་གཅིག་འཚང་རྒྱ་བའི་ཆ་ལག་ཚང་བའི་ཆོས་སྐོར་སྤྱན་དྲངས་ན་གཏེར་ཆེན་དང་། མན་ངག་སྣ་རེ་དང་རྫས་གཏེར་ཙམ་སྤྱན་དྲངས་པར་གཏེར་ཕྲན་གྱི་ཐ་སྙད་འཇོག་པའི་དབང་དུ་ན་གཏེར་ཆེན་དུ་གདོན་མི་ཟ་ཞིང་།(༦༠ན) དེ་ཡང་རབ་རིབ་གཡོ་ཟོལ་གྱིས་མ་གོས་པར་ཆོས་འཁོར་
47-6-109
དཔོན་ཐུབ་པས་ཁྲོམ་བསགས་ཏེ། གཏེར་ཐོན་ན་བྱ་དགའ་སྟེར། མ་ཐོན་ན་ཟོག་པོས་ལུང་པ་འགེང་བ་འདུག་པས་ཁྲིམས་ལ་བསྒྲལ་ཞེས་བསྡིགས་པའི་ཚེ། སྒྲོན་ཤིང་མེ་འབར་བ་ཞིག་ཕྱག་ཏུ་བསྣམས་ནས་མཚོ་ནང་ལ་མཆོངས་པས་ཀུན་ཧ་ལས་པའི་མུས་ལ་མེ་མ་ཤི་བར་གཏེར་སྒྲོམ་མཆན་ཁུང་དུ་བཅུག་ཟིལ་པ་ཕྲོམ་མེ་བྱོན་པ་ངོ་མཚར་སྙན་གྲགས་ཕྱོགས་ཀུན་ཁྱབ་པས་མཚོན་ཁྲོམ་གཏེར་ཤས་ཆེ་བར་བཞེས།རྡོ་ལ་ཞབས་རྗེས་འཇོག་པ་སོགས་གྲུབ་པའི་མཚན་མ་མང་དུ་བསྟན། ཟབ་གཏེར་གྱི་འགྲོ་ཕན་མཐར་རྒྱས་པའི་ཀརྨ་པ་ཆོས་གྲགས་རྒྱ་མཚོ་སོགས་བླ་ཆེན། བྱ་ས་བཀྲ་ཤིས་དར་རྒྱས།དེའི་སྲས་བྱ་འཇམ་དབྱངས་ཆོས་གྲགས། རྒྱལ་རྩེ་བདག་པོ་རབ་བརྟན་འཕགས་སོགས་སྡེ་དཔོན། གནས་མཁན་ཆེན་ལ་སོགས་རིས་སུ་མ་ཆད་གཏེར་ཆོས་ཞུ་མི་ཤིན་ཏུ་མང་བ་(༦༠བ)བྱུང་བ་སོགས་དགུང་ལོ་དོན་གཉིས་བཞུགས་ནས་ཞིང་འདིའི་མཛད་པ་མ་ལུས་པར་རྫོགས་ཏེ་རྔ་ཡབ་གླིང་དུ་སྲིན་པོའི་རྒྱལ་པོ་རཀྵ་ཏ་ན་དང་སྲིན་མོ་མགྲིན་ཆུང་མའི་བུ་རུ་འཕོས་ཏེ་ཨོ་རྒྱན་ཆེན་པོའི་དྲུང་ན་རིག་འཛིན་གྱི་སར་བཞུགས། མ་འོངས་པ་ན་ཞིང་ཁམས་པདྨོ་རྣམ་པར་བཀོད་པར་དེ་བཞིན་གཤེགས་པ་རྡོ་རྗེ་སྙིང་པོ་ཞེས་བྱ་བར་འགྱུར་བའོ། །ལུང་བསྟན་འོད་ཀྱི་དྲ་བར། ད་ལྟའི་ལྷ་ལྕམ་པདྨ་གསལ༔ མ་འོངས་བུམ་ཐང་སྐྱེས་པའི་དུས༔ བདག་གི་ཐུགས་སྲས་སྙིང་སྟོབས་ཅན༔ པདྨའི་མིང་ཅན་སྐྱེས་བུ་དེ༔ ཟབ་མོའི་གཏེར་དང་ཕྲད་པའི་དུས༔ ལས་ལྡན་སློབ་མ་འདི་ལྟར་ཡོང་༔ ལས་ཀྱི་འབྲེལ་བ་ཁྲི་ཕྲག་གཅིག༔ སྨོན་ལམ་འབྲེལ་བ་སྟོང་རྩ་གཉིས༔ ཟབ་མོའི་གནད་འབྲེལ་བུ་བཅུ་གཅིག༔ དཀྱིལ་འཁོར་འཛིན་པའི་བུ་བདུན་དང་༔ ཐུགས་ཀྱི་སྙིང་སྲས་གསུམ་དུ་(༦༡ན)འབྱུང་༔ ཞེས་པ་ལྟར་ཆོས་རྒྱུན་གྱི་ཞལ་སློབ་མཐའ་ཡས་ཤིང་། གཙོ་ཆེ་བ་ནང་སོ་རྒྱལ་བ་དོན་གྲུབ། གཏེར་སྟོན་མཆོག་ལྡན་མགོན་པོ་གཉིས་ཡིན་འདུག་ཀྱང་ཧ་ཅང་གི་འགྲོ་ཕན་འཕྲིན་ལས་ཆེ་བ་མ་བྱུང་བར་སྣང་།
47-6-110
སྲས་དཀོན་མཆོག་བཟང་། ཟླ་བ། གྲགས་རྒྱལ་གསུམ་རིམ་བཞིན་འཇམ་དབྱངས།སྤྱན་རས་གཟིགས། ཕྱག་རྡོར་གྱི་སྤྲུལ་པར་གྲགས་པ་དང་། ཐ་ཆུང་གསང་བདག་ཏུ་གྲགས་པ་ངོ་བོ་བཞི། ཡུམ་མི་གཅིག་པ་ཀུ་རི་ལུང་དུ་མཁས་གྲུབ་ཀུན་དབང་གྲགས་པ་དང་ར་ཁྱི་གཉིས་ཀྱང་བྱུང་བའི་ནང་ནས། ཆེ་བ་འཇམ་དབྱངས་ཀྱི་སྤྲུལ་པ་དཀོན་ཅོག་བཟང་པོར་གདན་ས་པདྨ་གླིང་དུ་འཕོག །འབྲིང་པོ་སྤྱན་རས་གཟིགས་ཀྱི་སྤྲུལ་པ་ཟླ་བ་ཀུན་བཟང་གླིང་དང་བདེ་ཆེན་གླིང་། ཆུང་བ་ཕྱག་རྡོར་གྱི་སྤྲུལ་པ་གྲགས་རྒྱལ་ལ་གཏམ་ཞིང་རྣམས་འཕོག་ཅིང་ཐུགས་སྲས་ཟླ་བས་སྐུ་ལུས་ཀྱི་རྫུ་འཕྲུལ་སོགས་གྲུབ་རྟགས་དང་འཕྲིན་ལས་ཀྱི་སྒོ་ཕྱེ།(༦༡བ) དགུང་ལོ་ཡང་དགུ་བཅུ་གོ་བཞིའི་བར་དུ་བཞུགས། དེ་ལ་སྲས་དེ་བ་ཙནྡ་བྱ་བ་ཞིག་བྱུང་ཡང་ཆོས་རྒྱུན་ལ་ཕན་མ་ཐོགས། ཡུམ་མི་གཅིག་པའི་པདྨ་འཕྲིན་ལས་བྱ་བ་ཞིག་གིས་ཆོས་རྒྱུན་སྤེལ། གྲགས་རྒྱལ་གྱི་བླ་མ་ནོར་བུ་རྒྱ་མཚོ། ཀུན་བཟང་དགོངས་འདུས་བཀའ་བརྒྱད་ཚེ་སྒྲུབ་ཐུགས་རྗེ་ཆེན་པོ་ཆོས་སྐྱོང་སྐོར་སོགས་རགས་བསྡུས་ཀྱི་ཆོས་རྒྱུན་གཏམ་ཞིང་ཕྱོགས་སུ་དར། གཞན་མའི་སྲས་རྣམས་ལ་ཆོས་རྒྱུན་བྱུང་སྐད་མི་འདུག །ཆོས་རྒྱུན་ལ་བཀའ་དྲིན་ཆེ་བ་གཏེར་སྟོན་ཉིད་ཀྱི་རྣམ་ཐར་དུ་ལྷོ་བྲག་ཕྱོགས་ཀྱི་སློབ་མ་དགེ་བཤེས་དཔལ་ལྡན་དོན་གྲུབ་ཏུ་གྲགས་པ་མཚན་དངོས་ལེགས་པ་དཔལ་འབར་དང་།རཏྣ་གླིང་པའི་སྤྲུལ་སྐུ་སྟེ་སྣ་ཚོགས་རང་གྲོལ་དང་ཉེར་གནས་ཀྱི་གྲས་དབུ་མཛད་དོན་གྲུབ་དཔལ་འབར་རམ་གྲུབ་པ་ཀུན་འདུས་ཕྱག་བཞེས་འཕྲིན་ལས་ལ་ཕན་ཐོགས་པར་གྱུར། དེ་གཉིས་(༦༢ན)ལ་མཁས་གྲུབ་ཆོས་རྗེ་རྣམ་གཉིས་ཀྱི་ཐ་སྙད་དུ་གྲགས། མོན་སྔ་ལོང་དུ་གཏེར་སྟོན་པདྨ་གླིང་པ་ཉིད་ཀྱི་སྤྲུལ་པར་གྲགས་པ་བསྟན་འཛིན་གྲགས་པ་འཁྲུངས་ནས་དགུང་ལོ་བཞི་པ་ལ་གདུང་སྲས་རིགས་གསུམ་གྱི་རྣམ་འཕྲུལ་མཆེད་གསུམ་གྱིས་ངོས་འཛིན་དང་བདག་རྐྱེན་མཛད།ཁྱད་པར་འཇམ་དབྱངས་ཀྱི་སྤྲུལ་པ་དཀོན་མཆོག་བཟང་པོར་རིགས་སྲས་མེད་པའི་
47-6-111
ཚབ་མཛད་ནའང་། དཀོན་བཟང་ཉིད་མི་རིང་བར་བཤེགས་པས། བོད་དུ་སྤྲུལ་སྐུ་སྣ་ཚོགས་རང་གྲོལ་གྱི་སར་སྤྱན་དྲངས། ལས་འབྲེལ་རྩལ། ཀུན་མཁྱེན་ཀློང་ཆེན་པ། པདྨ་གླིང་པ་སོགས་ཀྱི་ཆོས་སྐོར་རྣམས་དབང་ལུང་། ཁྲིད། མན་ངག་ཕྱག་བཞེས་དང་བཅས་པ་བུམ་པ་གང་བྱོར་གསན་ཅིང་། རྩ་བའི་བླ་མའང་འདི་ཁོ་ནར་མཛད། དབུ་མཛད་སྒྲུབ་པ་ཀུན་འདུས་ལ་ཡང་དབང་ལུང་མང་བ་དང་། ལྷག་པར་འཆམ་དབྱངས་ཀྱི་ཕྱག་ལེན་གཙོ་(༦༢བ)བོར་གསན་ཅིང་། འདིའི་དེ་མ་ཐག་པའི་སྐྱེ་བ་གསུང་སྤྲུལ་ཚུལ་ཁྲིམས་རྡོ་རྗེ་ཡིན་ལ། དེ་ཡང་བསྟན་འཛིན་གྲགས་པས་སྤྲུལ་སྐུ་སྣ་ཚོགས་རང་གྲོལ་གྱི་རྗེས་སུ་གྲ་དར་རྒྱས་ཆོས་སྡིངས་ཀྱི་གདན་ས་མཛད་སྐུའི་བཀོད་པའང་གནས་དེར་བསྡུས། དེས་སྣ་ཚོགས་རང་གྲོལ་གྱི་སྤྲུལ་སྐུ་དར་རྒྱས་ཆོས་སྡིངས་པ་མཁས་གྲུབ་མདོ་སྔགས་བསྟན་འཛིན་དེ་སྲས་རིག་འཛིན་འཕྲིན་ལས་ལྷུན་གྲུབ།དེའི་སྲས་སྤྲུལ་པའི་གཏེར་སྟོན་གཏེར་བདག་གླིང་པ་ལ་གོང་མ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོས་ཀུན་བཟང་དགོངས་འདུས་ཀྱི་གཏེར་ཞབས་ཁ་ཤས་འཇམ་དཔལ་རྡོ་རྗེས་བཏོན་པ་བརྒྱུད་པར་གོང་ར་བ་ཉི་ཟླ་གྲགས་པ་ཡོད་གཤིས་མ་གསན་པ་ལས་གཞན་མ་རྫོགས་པར་བཞེས་པ་གསན་ཡིག་གངྒཱའི་ཆུ་རྒྱུན་དུ་གསལ་བ་བཞིན་དང་།པད་གླིང་གདན་ས་བ་བསྟན་འཛིན་ཆོས་ཀྱི་རྒྱལ་པོས་གཏམ་ཞིང་དུ་པདྨ་གླིང་(༦༣ན)པའི་སྲས་གྲགས་རྒྱལ་ལ་གང་བཞུགས་རྣམས་གསན་པ་བླ་མའི་སྐོར་ནོར་བུ་རྒྱ་མཚོ་ཆ་ལག་དང་བཅས་པ། རྫོགས་ཆེན་ཀུན་བཟང་དགོངས་འདུས་ཁྱུང་ལྡིང་སོགས་ཕ་རྒྱུད། མེ་འབར་མཚོ་ནས་གདན་དྲངས་པ་ཀློང་འབར་མ་སྐོར་གསུམ། གཉིས་མེད་རྒྱུད་བུ་ཆུང་། ཐུགས་རྗེ་ཆེན་པོའི་སྐོར་དང་། ཚེ་འཁྲིད་རྡོར་འཕྲེང་། ལྷ་ནོར་བུ་རྒྱ་མཚོར་གཙོ་བོ་རྟ་མགྲིན། མཚན་བརྒྱད། ཐོད་ཕྲེང་རིགས་བཞི། རྣམ་འཇོམས། མཁའ་འགྲོ་ལྔ། གུ་རུ་རིགས་ལྔ། ཁྲོ་བཅུ་སོགས། ཕུར་པ་ཡང་གསང་བླ་མེད་ལ་གཙོ་འཁོར་སྤྱི། ནོར་རྒྱལ་རྟ་མགྲིན་ཡང་གསང་བླ་
47-6-112
མེད། ཕག་མོ་ལྔ། གཤིན་རྗེ་ཡང་གསང་བླ་མེད་གཙོ་འཁོར། སྐུ་ལྔ་ཡང་གསང་བླ་མེད།ཕྱག་རྡོར་ཡང་གསང་བླ་མེད། རྣམ་སྲས། ཚེ་དཔག་མེད་ཡང་གསང་བླ་མེད། རྨོངས་བྱེད་སོགས་ལྔ། ཡང་གསང་ཕག་མོ། ཁྲོས་ནག །ཀླུ་མོ་ནོར་སྐྱོང་མ་རྣམས། གུར་དྲག་(༦༣བ)བླ་མ་ཕྱི་ནང་གསང་གསུམ། དྲག་པོ་རིགས་ལྔ། ཁྲོ་བཅུ། རཀྵ་མེ་དབལ། སྟག་ཁྱུང་གདོང་བཞི། བཀའ་སྲུང་བཙན་ཚངས་རྡོར་གསུམ་རྣམས་ཀུན་བཟང་དགོངས་འདུས་ལ་གཙོ་བོ་བུདྡྷ་ཧེ་རུ་ཀ་རིགས་ལྔ་སོགས་བཞི་བཅུ་རྩ་གཉིས། ཀོ་སིམ་བཅུ་དྲུག །དབང་ཕྱུག་ཉེར་བརྒྱད་སོགས་དང་། སྲུང་མ་ཡུམ། རྒྱལ་མཚན། ཀླུ་སོགས། ཕྱག་རྡོར་དྲེགས་འདུལ་ཕྱི་ནང་གསང་གསུམ། ཁྱུང་སྒྲུབ་སོགས། བཀའ་སྲུང་། བཀའ་བརྒྱད་ཐུགས་ཀྱི་མེ་ལོང་ལ་གཙོ་འཁོར་ལྷ་བདུན་བརྒྱ་ཉི་ཤུའི་བདག་ཉིད་ཅན། བཀའ་སྲུང་མ་ནིང་།གཞན་ཡང་སྡེ་བརྒྱད། བདུད་ཕོ་ཟོར་བ་སྐྱེས་ལ་སོགས་པའི་བརྒྱུད་པ་འདྲེན་ལུགས།ཆོས་སྐུ་ཀུན་ཏུ་བཟང་པོ། ལོངས་སྐུ་རྡོ་རྗེ་སེམས་དཔའ། སྤྲུལ་སྐུ་དགའ་རབ་རྡོ་རྗེ། རིག་འཛིན་ཤྲཱི་སིངྷ། སློབ་དཔོན་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ།(༦༤ན)གཏེར་ཆེན་པདྨ་གླིང་པ། ཐུགས་སྲས་གྲགས་པའི་རྒྱལ་པོ་པད་གླིང་གདན་ས་བ་བསྟན་འཛིན་ཆོས་ཀྱི་རྒྱལ་པོ། ཨོ་རྒྱན་གླིང་པ་མཚུངས་མེད་ཡོན་ཏན་ནོར་བུ། མེས་བསྟན་འཛིན་གྲགས་པ། བཀའ་དྲིན་མཉམ་མེད་བསྐྱེད་བྱེད་རིག་འཛིན་བཀྲ་ཤིས་བསྟན་འཛིན་གྱི་བར་ཞལ་ངོ་ནང་ཚོགས་སུ་བརྒྱུད་པའི་ལུགས་དང་། ཆོས་བཀའ་བྱིངས་མེས་བསྟན་འཛིན་གྲགས་པས་དར་རྒྱས་ཆོས་སྡིངས་མདོ་སྔགས་བསྟན་འཛིན་དང་འཕྲིན་ལས་ལྷུན་གྲུབ་གཉིས་གར་པད་གླིང་གི་ཆོས་སྐོར་གསན་པ་དང་། རིག་འཛིན་གཏེར་བདག་གླིང་པ་ཤ་འུག་གཏེར་འདོན་དུ་ཕེབས་སྐབས་མེས་བསྟན་འཛིན་གྲགས་པ་དང་། རིག་འཛིན་བཀྲ་ཤིས་བསྟན་འཛིན་གཉིས་ཀས་པད་གླིང་གི་ཆོས་སྐོར་གསན་འདུག་པས་བྱིངས་ཆེ་གོང་མའི་གསན་ཡིག་དང་དབྱེ་བ་མེད་པར་སེམས།
47-6-113
བླ་མ་ཞི་དྲག་དང་ཐུགས་རྗེ་ཆེན་པོ་རྣམས་ལ་སྣང་མཐའ། སྤྱན་རས་(༦༤བ)གཟིགས།ཨོ་རྒྱན། མཚོ་རྒྱལ་སོགས་འདྲེན་པ་དང་། རྫོགས་ཆེན་ཀློང་གསལ་རྒྱུད་བུ་ཆུང་སོགས་ལ་ཀུན་བཟང་། རྡོར་སེམས། དགའ་རབ་རྡོ་རྗེ། ཤྲཱི་སིངྷ། ཨོ་རྒྱན་མཚོ་རྒྱལ་ཞེས་བརྒྱུད་པ་དྲུག་ལྡན། རྫོགས་ཆེན་ཀུན་བཟང་དགོངས་འདུས་ཨོ་རྒྱན་གྱི་དགའ་རབ་རྡོ་རྗེར་ཞུས་པས་ཤྲཱིར་སིང་མི་འདྲེན་པ་ཞིབ་ཆ་དུ་མ་ཡོད་ཀྱང་སྤྱི་གྲགས་སུ། ཤོག་སེར་དུ་མཚོ་རྒྱལ་མི་དགོས་པར་སློབ་དཔོན་རང་ཉིད་ཀྱིས་སྦས་པ་མང་ཡང་བརྒྱུད་པར་མཚོ་རྒྱལ་འདྲེན་པ་ནི་མཚོ་རྒྱལ་གྱིས་སྦས་པའང་ཡོད་ལ། དེར་མ་ཟད་པདྨ་གསལ་དང་། ལྷ་སྲས་མུ་ཏིག་བཙན་པོ།རྒྱ་གར་བ་ཤྲཱི་སིངྷ་རྣམས་འདྲེན་མི་འདྲེན་སྣ་ཚོགས་འབྱུང་བ་ནི། མ་དྲངས་པ་ཆད་པ་དང་། དྲངས་པ་སྐྱོན་དུ་མི་འགྱུར་ཞེས་གསུང་རྒྱུན་དུ་ཡོད་པར་སྣང་། གཏེར་ཆེན་པདྨ་གླིང་པ་དང་ཡབ་ཡུམ་གཅིག་པའི་སྐུ་མཆེད་དགུའི་ཐ་ཆུང་དབོན་པོ་ཨོ་རྒྱན་(༦༥ན)བཟང་པོ་ནི། སྐུ་བཞི་ཡེ་ཤེས་ལྔའི་བདག་ཉིད་བདེ་ལྡན་ཞིང་གི་སྟོན་པ་མགོན་པོ་སྣང་བ་མཐའ་ཡས་དྲག་པོའི་སྐུར་བཞེངས་པ་རྟ་མཆོག་རོལ་བའི་སྤྲུལ་པ་ཡིན་ཏེ། ལུང་བསྟན་མེ་ཏོག་ཕྲེང་བ་ལས།ཐ་ཆུང་རྟ་མགྲིན་སྤྲུལ་པ་ཨོ་རྒྱན་བཟང་༔ཁྱོད་ཀྱི་འགྲོ་དོན་ཤར་གྱི་ཕྱོགས་ན་ཡོད༔ཅེས་པའི་ལུང་བསྟན་དང་མཐུན་པར། སྤྲུལ་པའི་གཏེར་སྟོན་གྱི་ཞལ་ནས། བུ་ཁྱོད་ཀྱི་གདུལ་བྱ་འདི་ནས་ཤར་ལ་འོག་ཡུལ་གསུམ་བྱ་བ་ན་ཡོད་པས། དེར་སོང་ལ་རུས་སྦལ་ཁ་སྦུབ་པའི་མཚན་ལྡན་རིག་མའི་གསང་མཚན་གྱི་ཕྱི་དབྱིབས་ལྟ་བུའི་ས་ཆའི་སྟེང་དུ་གནས་གཞི་བརྩིགས། ཀུན་གསལ་མེ་ལོང་དུ།ཤར་གྱི་ཕྱོགས་ནས་རྡོ་རྗེའི་མིང་ཅན་འབྱུང་༔ཞེས་འཕྲིན་ལས་ཀྱི་ཕྱག་རྒྱ་རྡོ་རྗེའི་མིང་ཅན་ཡང་དེ་དང་མི་རིང་བ་ན་ཡོད་པ་གྲོགས་
47-6-114
སུ་ཁུག་ལ་འགྲོ་དོན་གྱིས་ཞེས་གསུང་གིས་བསྐུལ་བ་ལྟར། བར་སྣང་ལ་འཕུར་ནས་བྱོན་པ་བུམ་ཐང་བ་(༦༥བ)རྣམས་ཀྱིས་རྟ་སྔོན་པོ་ཞིག་ཏུ་མཐོང་། ལ་འོག་ཡུལ་གསུམ་དུ་ཕེབས།
༄། །ཨོ་རྒྱན་གླིང་དང་ཡབ་ཀྱི་རྣམ་ཐར།
ཏ༽ ཨོ་རྒྱན་གླིང་དང་ཡབ་ཀྱི་རྣམ་ཐར།རྟི་ལི་དང་གོར་པོ་དུང་གི་ས་ནས་གཟིགས་པས། བྱང་ཤར་གྱི་མཚམས་སུ་རུས་སྦལ་ཁ་སྤུབས་པ་ལྟ་བུའི་ས་དཔྱད་འདུག་པར་ཨོ་རྒྱན་གླིང་། ནུབ་ཕྱོགས་སུ་རི་གླང་པོ་ཆེ་འདྲ་བའི་མཇིང་པར་སངས་རྒྱས་གླིང་། ལྷོའི་མདུན་ས་འབུར་ཁང་མཚོ་རྒྱལ་གླིང་སྟེ་གླིང་གསུམ་བཏབ།ལ་འོག་ཅེས་བུར་གླིང་གསུམ་གྱི་བདག་པོ༔ ཞེས་ལུང་བསྟན་དང་མཐུན། ཕུར་ཨོ་རྒྱན་པདྨ་སམྦྷ་ཝའི་དབེན་གནས་ཀྱི་སྒོ་ཕྱེ། འབྲོག་བཙུགས། མདར་འཇིག་རྟེན་མཐུན་འཇུག་གི་སོ་ནམ་དང་། ཉང་མཛད་རྣམ་ཐར་སྟོད་པ་ལས། དུས་ཀྱི་རྒྱལ་པོ་ཚེས་བཅུ་ཉི་ཤར་ལ། །སྐུ་ཡི་སྤྲུལ་པ་བྱེ་བ་ཕྲག་བརྒྱ་འགྱེད། །ཅེས་ཡར་མར་ཌཱ་ཀི་འདུ་བའི་དུས་ཆེན་ཚེས་བཅུ་ལ་སོགས་པ་ལྷ་ཆོས་མི་ཆོས་གཉིས་ཀའི་སྲོལ་བཏོད། རྗེས་རུས་བུ་(༦༦ན)མཁར་ས་ཇོ་བོ་དོན་གྲུབ་ཀྱི་བུ་མོ་གཟུགས་བྱད་མཚར་ཞིང་མཁའ་འགྲོའི་རྟགས་དང་ལྡན་པ་ཨུ་ཆུང་རྡོ་རྗེ་འཛོམ་པ་ཟེར་བ། ས་སྐྱོང་བྱ་ས་བཀྲ་ཤིས་རྣམ་རྒྱལ་གྱིས་བདག་བཟུང་ལྟ་བུར་འདུག་ཀྱང་།གཅེན་གྱི་བསླབ་སྟོན་བཞིན་དབང་དུ་བསྡུས་ནས་ཕྱག་རྒྱར་བསྟེན། གཏེར་ཆེན་ཆོས་ཀྱི་རྒྱལ་པོ་པདྨ་གླིང་པ་ལན་གཉིས་ཕེབས། ངས་ལུང་བསྟན་པ་དང་མཐུན་པ་བྱུང་འདུག་ཅེས་དགོན་པར་རབ་གནས་དང་། སྒེར་དུ་བཀའ་དབང་། གནང་སྦྱིན་བསླབ་སྟོན་སོགས་དུ་མ་གནང་། ཕ་བོང་ལ་ཞབས་རྗེས་བཞག་ཅིང་སྒྲུབ་ཆུ་བཏོན་པར་ད་ལྟ་ཡང་ཆོས་རྗེའི་ཕ་བོང་དང་སྒྲུབ་ཆུར་གྲགས།
47-6-115
ཨོ་རྒྱན་གླིང་ཞེས་ལ་འོག་ཚོ་གསུམ་པའི་ཡར་འདྲེན་ལྷ་ཆོས་དང་། བློ་གཏོད་རྒྱབ་རི་སྟེ་ཆོས་འཇིག་རྟེན་གཉིས་ཀའི་རེ་ལྟོས་འཆའ་ས་དེ་ནས་བྱུང་། དེ་སྲས་བླ་མ་དབང་ནས།འགྲོ་མགོན་བསྟན་འཛིན་བཀྲ་ཤིས། སངས་ནོར་(༦༦བ)མཆེད་བཞི་ལས་ཡོན་ཏན། དེ་སྲས་བསྟན་འཛིན་གྲགས་པ། མནལ་ལམ་དག་སྣང་དུ་ཟངས་མདོག་དཔལ་རིར་བྱོན། སློབ་དཔོན་ཆེན་པོར་ཟབ་འཁྲིད་ཞུས། ལྷ་མང་པོའི་ཞལ་གཟིགས་པ་སོགས་གྲུབ་པའི་དབང་ཕྱུག་ཆེན་པོར་གྱུར་པ་དེ་དང་ཨུ་ཆུང་བུ་འདྲེན་གཉིས་ཀྱི་སྲས་སུ་ལྕགས་མོ་ཡོས་ཀྱི་ལོ་ལ་འཁྲུངས་པ་རིག་འཛིན་བཀྲ་ཤིས་བསྟན་འཛིན།རྗེ་ས་པཎ་གྱིས། སྔར་ཡང་འདི་བཞིན་བྱས་རྣམས་བདེ། །ད་ལྟ་ན་ཡང་བདེ་བར་མཐོང་། །ཞེས་གསུངས་པ་ལྟར་དཀོན་ཅོག་མཆོད་པ་དང་དབུལ་པོར་སྦྱིན་གཏོང་སོགས་བསོད་ནམས་གསོག་པའི་ལས་ལ་བརྩོན་པ། བྱང་སེམས་ཀྱི་སྤྱོད་ཡུལ་རྣམ་པར་འཕྲུལ་པ་ལས།རྫུན་གྱི་ཚིག་ནི་ནམ་ཡང་བརྗོད་མ་མཛད། །རྒྱལ་མཆོག་གླང་པོ་དམ་བཅས་མེད་པར་མཛོད། །བདེན་པར་སྨྲ་བ་དབང་པོའི་གནས་སུ་མཆི། །རྫུན་དུ་སྨྲ་བ་གཤིན་རྗེའི་(༦༧ན)འཇིག་རྟེན་འགྲོ། །ཞེས་དགེ་བ་བཅུའི་ཕན་ཡོན་དང་མི་དགེ་བ་བཅུའི་ཉེས་དམིགས་ཞིབ་པར་འབྱུང་བ་ལྟར་སྡིག་སྤོང་དགེ་སྒྲུབ་ལ་གཞོལ་བ་གང་དང་རྒྱལ་རིགས་ཀྱི་མ་རྒན་ཚེ་དབང་ལྷ་མོ་གཉིས་འདུས་པ་ལས་ཁོ་བོ་ཅག་སྐྱེས་པ། སྐབས་དེར་མོན་ནང་དུ་ས་གཡོས་པ་དང་། ཉི་མ་བདུན་ཤར་བའི་སྣང་བ་མི་ཁ་ཅིག་ལ་བྱུང་བ། འཇའ་དང་མེ་ཏོག་གི་ཆར་དང་། ཆར་ཟིལ་བུ་སོགས་སྣ་ཚོགས་པ་བྱུང་འདུག་པ། དུས་དེར་མོན་དུ་མི་དང་དུད་འགྲོ་སོགས་ཇི་སྙེད་ཅིག་བཙས་ཡོད་པ་གཞིར་བཅས་ནས་དངོས་ཅག་གི་ཅི་ཡིན་རུང་། རི་བོང་ཅལ་སྒྲོག་གི་གླེང་གཞི་སྣ་ཚོགས་སྡེ་པས་གསན་པ་སོགས་ལ་བརྟེན་རང་གི་འདོད་པ་དང་བཞེད་པ་ཐམས་ཅད་མཁྱེན་
47-6-116
པའི་གོ་ས་སོགས་ག་ལ་ཡོད་རུང་། དཀོན་ཅོག་བརྩེགས་པ་འདུས་པ་སོ་བརྒྱད་པ་ལས།མོའུ་འགལ་གྱི་བུ་མཐུ་དང་རྫུ་འཕྲུལ་གྱི་ཤུགས་དང་ལྡན་ནའང་། སེང་ལྡེང་གི་(༦༧བ)ཚལ་པ་ཐོ་གང་པ་བཅོམ་ལྡན་འདས་ཀྱི་ཞབས་ལ་ཟུག་རྒྱུ་དེ་འདོར་བར་མི་ནུས་པ་དང་། སྟོན་པ་མངོན་པར་མཁྱེན་པ་ལྔ་དང་ལྡན་ཞིང་རྫུ་འཕྲུལ་གྱིས་སུམ་ཅུ་རྩ་གསུམ་ལ་སོགས་པར་སྐད་ཅིག་ཏུ་ཕེབས་པའི་མཐུ་དང་ལྡན་ནའང་། སྔོན་དེད་དཔོན་དོན་བྱིན་དུ་གྱུར་དུས་ངན་སེམས་ཅན་ཤཀྟི་བརྫུན་ཏེ་བསད་པའི་རྣམ་སྨིན་གྱིས་ཞབས་ལ་སེང་ལྡེང་གི་ཚལ་པ་ཟུག་དགོས་པ་ལྟར་ལས་དང་སྨོན་ལམ་གྱི་མཐུ་གང་གིས་ཀྱང་བཟློག་ཏུ་དཀའ་བས་ཐག་ཁྲ་སྦྲུལ་དུ་མཐོང་བས་ལེགས་ཉེས་ཇི་ལྟར་ཡང་གོ་ས་བབས་ཡུལ་འདི་བཞིན་དུ་གྱུར་པ། གོང་མ་ལྔ་པ་ཉིད།བློན་པོ་བཀའ་ཐང་ལས།རྒྱལ་པོ་ཁྲི་སྲོང་ལྡེ་བཙན་ཉིད༔སྐུ་གསུང་ཐུགས་ཡོན་ཕྲིན་ལས་ལྔ༔འཕྲུལ་ལྔ་བསྒྱུར་བའི་སྟོབས་སུ་འགྱུར༔གཟུགས་སྐུ་གཉིས་ཀྱིས་འགྲོ་དོན་མཛད༔བྱང་མི་གདུལ་སྐྱོང་གནས་སའི་བདག༔ཟ་ཧོར་ཆམ་ལ་འབེབས་པ་འབྱུང་༔(༦༨ན)ཞེས་དང་། རཏྣའི་སྤྱི་ལུང་ཆེན་མོ་ནས་ལུང་བསྟན་གྱི་དུས། དབུས་གཙང་རྣམས་སུ་ཆོས་གྲ་བཅུ་གསུམ་འཆའ༔ ཞེས་སོགས་ཀྱི་འཕྲོར། དབུ་ཟླུམ་མདོ་ཡི་བསྟན་པ་དར་ཞིང་རྒྱས༔ ལྕང་ལོ་སྔགས་ཀྱི་བསྟན་པས་གྲུབ་ཐོབ་ཁེངས༔ ཞེས་སོགས་གཏེར་ལུང་དང་།གླེགས་བམ་རིན་པོ་ཆེ་ཕ་ཆོས་ལས་ཀྱང་། གསང་སྔགས་ལ་དགྱེས་པའི་རྒྱུས་ཟེར་འཕྲོས་མང་། །སོགས་དང་། དཀོན་ཅོག་འབངས་ཀྱི་སྐྱེས་རབས་ལས་ཀྱང་། མི་ང་ཡི་སྤྲུལ་པ་ཕྱོགས་རིས་མེད། །དང་། སེམས་རྟོག་པ་ཆེ་ཞེས་དམོད་པར་བྱེད། །ཅེས་སོགས་ལུང་དུ་
47-6-117
མ་དང་། རྒྱལ་པོ་བཀའ་ཐང་ལས།ནམ་ཞིག་སྙིགས་མའི་དུས་ལ་བབ་པའི་ཚེ༔རྒྱལ་སྲས་སྐྱེ་ལུས་བཅུ་གཉིས་ཁ་ཐོར་མཐའ༔བོད་ཡུལ་གངས་རིའི་རྩེ་དགུའི་ལྗོངས་འདི་རུ༔རྗེ་རིགས་རྒྱལ་པོ་གདུག་པའི་ཚོགས་རྣམས་འདུལ༔ཐུགས་སྒམ་བཀའ་བཙན་ཁོང་(༦༨བ)རྒྱུད་ཡངས་པ་དང་༔ཟུང་ཐུབ་དཔྱད་པས་མཐུ་སྟོབས་རབ་ཏུ་ཆེ༔ཁ་བ་ཅན་དུ་དུས་ཀྱི་མཐའ་ལ་འབྱུང་༔ཞེས་དང་། ལྷ་འདྲེ་ཐང་ཡིག་ལས།ལོ་ནི་སྟོང་དང་སུམ་བརྒྱ་ལྷག་ཙམ་ན༔ཆོས་ཀྱི་རྒྱལ་པོས་བྱ་བ་རྣམ་བཞི་བྱེད༔ཁྲིམས་དམ་འབངས་རྣམས་བདེ་ལ་བཀོད་སྐྱོང་བྱེད༔སྐུ་ལ་སྡོ་བའི་དམག་སྡེ་ཆེན་པོ་འཇོམས༔འཆད་ཉན་སྒོམ་པའི་གྲ་འཛུགས་མཐུན་རྐྱེན་སྦྱོར༔དེ་དུས་ཨོ་རྒྱན་པད་འབྱུང་བསྟན་པ་དར༔ཞེས་ཆོས་ཀྱི་རྒྱལ་པོ་ཚངས་པ་ལྷའི་མེ་ཏོག་ཡབ་སྲས་ཀྱི་ཐུགས་སྨོན་དུས་གཅིག་ཏུ་འཛོམས་པའི་དུས་གསང་སྔགས་སྔ་འགྱུར་རྡོ་རྗེ་ཐེག་པ་པདྨའི་རིང་ལུགས་ཆེས་ཆེར་དར་བ་དང་། ཁྱད་པར་རང་རིགས་སུ་བདེ་གཤེགས་རི་རབ་མར་མེའི་རྒྱལ་མཚན་གཏེར་སྟོན་གྱི་སྐུའི་རྣམ་པར་བྱོན་པ་གཏེར་ཆེན་ཆོས་ཀྱི་རྒྱལ་པོ་པདྨ་གླིང་པའི་བླ་རྫོགས་ཐུགས་གསུམ་སོགས་ཟབ་ཆོས་རྣམས་(༦༩ན)མི་ནུབ་ཅིང་ཆེས་དར་བ་དང་། ཡང་ཟབ་ཀུན་བཟང་དགོངས་འདུས་སོགས་བསྐྱེད་པ་དང་སྒོམ་པ་རྫོགས་པའི་རིམ་པ་ཉམས་སུ་བླངས་པ་ལ་བརྟེན་ནས་
47-6-118
མར་གྱུར་ལུས་ཅན་རྣམས་སྨིན་གྲོལ་གྱི་ལམ་ལ་འགོད་པ་དང་། གཙོ་བོར་ངེད་རང་གི་ཕ་སྐྱེད་བྱེད་རིག་འཛིན་བཀྲ་ཤིས་བསྟན་འཛིན་གྱི་ཞལ་ཆེམས་ཡལ་བར་མི་དོར་ཞིང་དགོངས་པ་མ་ལུས་པ་བདེ་བླག་ཏུ་རྫོགས་པ་དང་ཞར་དུ་ངེད་རང་། སྡེ་པ་སངས་རྒྱས་རྒྱ་མཚོ། མ་རྒན་ཚེ་དབང་ལྷ་མོ་རྣམས་བསོད་ནམས་གྱི་ཚོགས་ཆེན་པོ་གསོག་པའི་ཆེད།
༄། །ཨོ་རྒྱན་གླིང་རྟེན་དང་བརྟེན་པའི་འདུས་སྡེ་བསྐྲུན་ཡུལ།
ཐ༽ ཨོ་རྒྱན་གླིང་རྟེན་དང་བརྟེན་པའི་འདུས་སྡེ་བསྐྲུན་ཡུལ།རྟེན་བརྟེན་པ་འདུས་སྡེ་དང་བཅས་བསྐྲུན་པའི་ཡུལ་ནི། བདེ་མཆོག་ཉུང་ངུའི་རྒྱུད་ལས། བོད་ཀྱི་ཡུལ་དང་དེ་བཞིན་དུ། །མ་ལ་ཝ་དང་སུ་ལི་སོགས། །ཞེས་སྐུ་འཁོར་གྱི་གནས་བརྒྱད། གསུང་འཁོར་གྱི་གནས་བརྒྱད། ཐུགས་འཁོར་གྱི་གནས་བརྒྱད། དམ་ཚིག་འཁོར་ལོའི་གནས་བརྒྱད། བདེ་ཆེན་འཁོར་(༦༩བ)ལོའི་གནས་ལྔ་རྣམས་ཡོད་པ་ལས་གསུང་འཁོར་གྱི་ཟླ་ཚང་། ཀྱཻ་རྡོ་རྗེར་གནས་དང་ས་སྦྱར་བའི་ས་བཅུ་གཉིས་པ། བཀའ་གདམས་གླེགས་བམ་རིན་པོ་ཆེ་ལས།ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུར་རྒྱལ་བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མཎྜལ་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །སྟོན་བཀྲ་བ་གསེར་གྱི་མེ་ཏོག་ཡོད། །
47-6-119
དབྱར་བཀྲ་བ་གཡུ་ཡི་མེ་ཏོག་ཡོད། །ཀྱེ་གངས་རིའི་མགོན་པོ་སྤྱན་རས་གཟིགས། །གནས་དེ་ན་ཁྱོད་ཀྱི་ཞིང་ཁམས་ཡོད། །ཞིང་དེ་ན་ཁྱོད་ཀྱི་གདུལ་བྱ་ཡོད། །ཅེས་དང་། ནུབ་ཕྱོགས་བལ་ཡུལ་གྱི་ས་ལ་སྤྱོད་པའི་དབང་པོ་དེ་བ་ལྷས།བོད་ཅེས་བྱ་བ་ཁྱད་པར་འཕགས་པའི་ཡུལ། །རི་མཐོ་ས་གཙང་གངས་(༧༠ན)རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་ཡས་ཁང་། །ངོ་མཚར་རྨད་བྱུང་ཕན་བདེ་འབྱུང་བའི་གཞི། །ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲུ་སྣ་ལྔ་འཁྲུངས་རིན་ཆེན་སྣ་ཚོགས་འབྱུང་། །ཞེས་དང་། ཤར་ཕྱོགས་རྒྱ་ནག་རྒྱལ་པོས།བོད་ཅེས་བྱ་བ་ཁ་བ་ཅན་གྱི་ཡུལ། །ཡུལ་ལ་ཁྱད་དུ་འཕགས་པ་དེ་ཡིན་ཏེ། །གངས་རི་རང་བྱུང་མཆོད་རྟེན་ཡ་མཚན་ཅན། །ལྷུན་གྱིས་གྲུབ་པའི་གནས་མཆོག་དམ་པ་ནི། །མཚོ་བཞི་གཡུ་ཡི་མཎྜལ་བཀྲམ་པ་འདྲ། །ཐང་བཞི་རང་བཞིན་མཆོད་པ་བཤམས་པ་འདྲ། །ཆུ་བོ་བཞི་ཡི་འགོ་བཞི་རང་བཞིན་ཅན། །རི་མཐོ་ས་གཙང་གངས་རི་གཉན་གྱི་ལྗོངས། །བཀྲ་ཤིས་ཉམས་དགའ་གཡུང་དྲུང་བྲིས་པ་འདྲ། །
47-6-120
ཞེས་དང་། འཇིག་རྟེན་དབང་ཕྱུག་མི་རྗེའི་ཚུལ་བསྟན་པ་སྲོང་བཙན་སྒམ་པོའི་བཀའ་ཆེམས་སུ། དེ་ལྟར་འཕགས་པའི་གང་ཟག་རྣམས་(༧༠བ)འབྱུང་ཞིང་། །འཁོར་ནི་ལེགས་གནས་སྟོན་པའི་གསུང་རབ་དང་། །སྟོན་པའི་སྐུ་གཟུགས་དངོས་སུ་བཞུགས་པ་དང་། །རི་བོ་ཡོན་ཏན་ཅན་ཡང་དེ་ན་ཡོད། །ཙ་རི་ཙ་གོང་བདེ་མཆོག་རང་བྱུང་དང་། །རྡོ་ཆུ་རིན་པོ་ཆེ་ཡང་དེ་ན་ཡོད། །ཏི་སེའི་གངས་ལ་དགྲ་བཅོམ་ལྔ་བརྒྱ་བཞུགས། །བདུད་རྩིའི་ཆུ་ཡང་རི་བོ་དེ་ན་ཡོད། །གྱེ་རེའི་བྲག་ལ་ཡིག་དྲུག་རང་བྱུང་དང་། །མཁའ་འགྲོའི་ཕྱག་རྒྱ་རི་བོ་དེ་ན་ཡོད། །མ་ཕམ་མཚོ་ལ་ཀླུ་རྒྱལ་བྱང་སེམས་གནས། །ཆུ་བོ་ཡོན་ཏན་ཅན་ཡང་དེ་ན་ཡོད། ཁྲི་ཤོག་རྒྱ་མཚོའི་ཀླུ་བློན་བྱང་ཆུབ་སེམས། །ཆུ་བོ་ཆེན་པོ་ཀུན་ལ་ཕན་པར་མཛད། །གནམ་མཚོ་ཕྱུག་མོའི་ནང་ན་བྱང་ཆུབ་སེམས། །ཐང་ལྷའི་བྲག་ལ་དགྲ་བཅོམ་ལྔ་བརྒྱ་ཡོད། །སྦུབས་མཚོའི་གླིང་ན་ཀླུ་རྒྱལ་བྱང་ཆུབ་སེམས། །ཁའུའི་བྲག་ལ་དགྲ་བཅོམ་མང་པོ་ཡོད། །རི་མཐོ་ས་གཙང་གངས་(༧༡ན)རི་གཉན་གྱིས་སྐོར། །སྒྲ་དག་སྐད་སྙན་སཾསྐྲྀ་ཏ་དང་མཚུངས། །མི་སྐད་ཆོས་ལ་བསྒྱུར་དུ་བཏུབ་པའི་སྒྲ། །ཡངས་ཤིང་མཐའ་ལེགས་ཡོན་ཏན་ཀུན་ལྡན་པ། །དེ་ལྟར་ཁ་བ་ཅན་གྱི་ཡུལ་དབུས་སུ། །ཞེས་དང་།འབྲོམ་སྟོན་པ་རྒྱལ་བའི་འབྱུང་གནས་ཀྱིས། ཤིང་རྟའི་དབྱིབས་འདྲ་འཛམ་གླིང་གི །བྱེ་བྲག་བརྗིད་ལྡན་གངས་རིའི་བྱང་། །ལོ་ཧི་ཏ་འགྲོ་རིན་ཆེན་འཁྲུངས། །ཁ་བ་ཅན་ཞེས་མིང་གྲགས་ན། །ཞེས་དང་། ཆོས་བློན་མགར་སྲོང་བཙན་ཡུལ་བཟུང་གིས། བཀྲ་ཤིས་ཉམས་སུ་དགའ། བོད་ཀྱི་རྒྱལ་ཁམས་ན། རིན་ཆེན་སྣ་ལས་གྲུབ། རྒྱལ་པོའི་ཕོ་བྲང་ན། མི་རྗེ་ལྷ་ཡིས་མཛད། སྲོང་བཙན་སྒམ་པོ་དེ། རིགས་གཟུགས་དཔལ་གྱིས་བརྗིད། མཐོང་ན་སེམས་ཡིད་འཕྲོག །ཐུགས་རྗེ་ཆེན་པོ་ལགས། རྒྱལ་སྲིད་ཆོས་བཞིན་སྐྱོང་། འབངས་རྣམས་བཀའ་ལ་ཉན། རྒྱལ་བློན་(༧༡བ)འཁོར་འབངས་རྣམས། དགའ་སྐྱིད་གླུ་རུ་ལེན། ཆོས་ཀྱི་ཉི་མ་ཤར། དཔལ་གྱི་སྒྲོན་མེ་བཏེག །རི་ལ་ཤིང་སྣ་ཚང་། ས་གཞི་ཡངས་པ་ལ། འབྲུ་སྣ་ལྔ་ཡི་
47-6-121
ཚོགས། གོ་མཚམས་མེད་པར་སྐྱེ། གསེར་དངུལ་ཟངས་ལྕགས་སོགས། རིན་ཆེན་དུ་མ་ཡོད། གནག་རྟ་ལུག་གསུམ་རྒྱས། དགའ་སྐྱིད་དེ་ལྟར་ཡོད། ཅེས་དང་།ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས། མ་ག་དྷ་སོགས་རིག་འབྱུང་གནས་ནའང་སྡིག་ཏོ་ཡི། དམག་ཚོགས་ཀྱིས་བཅོམ་ཨོ་རྒྱན་ཁ་ཆེ་བལ་ཡུལ་ཀྱང་། ལོག་སྤྱོད་ཀྱིས་ཁེངས་དེང་སང་བསྟན་སྲོག་ལེགས་གནས་ནི། བོད་ཡུལ་འདིར་ཟད་སྐྱེས་ཆེན་བྱང་ཕྱོགས་ཞབས་བསྐྱོད་ཞུ། ཞེས་དང་། ཁྲུས་ཁང་ལོ་ཙཱ་བས། ལར་དུས་གསུམ་རྒྱལ་བའི་ཐུགས་རྗེ་དང་། །རྒྱལ་སྲས་པད་དཀར་ཞབས་དྲིན་ལས། །བོད་ཀྱི་ཡུལ་ཁམས་འདི་ཉིད་ཀྱང་། །འཕགས་(༧༢ན)ཡུལ་དང་སྐལ་པ་མཉམ་པ་སྙམ། །ཞེས་དང་། རིན་སྤུངས་ངག་འཇིགས་པས། ནོར་འཛིན་མ་འདིའི་རྒྱུན་དུ་སྲིད་པ་ཡིས། །བྱིན་པའི་གངས་རི་དཔལ་གྱི་དོ་ཤལ་ཅན། །ལྟོ་བར་ཆོས་ཀྱི་རྒྱལ་སྲིད་བླ་ན་མེད། །གླིང་རྣམས་ཀུན་གྱི་གཙུག་ནོར་འདི་ཡིན་ནོ། །ཞེས་སོགས་ཀྱིས་བསྔགས་པ་ལྟར་རི་མཐོ་བ། ས་གཙང་བ། བསིལ་ལ་མཛེས་པ།ཕྱོགས་བཞིར་ཆུ་བོ་ཆེན་པོ་བཞི་འབབ་པ་གངས་རིའི་ཕྲེང་བས་ཀུན་ནས་བསྐོར་བ། གསེར་དངུལ་ཟངས་ལྕགས་སོགས་རིན་པོ་ཆེའི་འབྱུང་ཁུངས། རྩྭ་མཆོག་དྲི་ཞིམ་ལ་བཅུད་ཆེ་བ།འབྲུའི་རྣམ་པ་མང་ཞིང་བཟང་བ། རིགས་གསུམ་མགོན་པོའི་རྒྱལ་ཁམས་ཕྱོགས་དང་ཕྱོགས་བྲལ་ཀུན་ལེགས་ལམ་ཡོན་ཏན་འབའ་ཞིག་གིས་སྤ་བའི་ཤར་དུ་རྒྱ་ནག་དང་ཁྲི་བརྟན། ལྷོར་རྒྱ་གར་དང་ཁ་ཆེ། ནུབ་ཏུ་སྟག་སྡེ་དང་གཟིག་ཕན། བྱང་དུ་ཁྲོམ་དང་གེ་སར་ཏེ་བསྐོས་པའི་རྒྱལ་པོ་སྡེ་(༧༢བ)བཞིས་ཀྱང་འགྲན་པའི་ཟླ་དང་བྲལ་བ། སྔར་ཆོས་ཀྱི་རྒྱལ་པོ་མེས་དབོན་རྣམ་གསུམ་གྱི་སྐུ་རིང་ལ།
47-6-122
༄། །བོད་ཡུལ་སྐོར་གསུམ། རུ་བཞི། ཁམས་གསུམ་སྐོར།
ད༽ བོད་ཡུལ་སྐོར་གསུམ། རུ་བཞི། ཁམས་གསུམ་སྐོར།སྐོར་གསུམ། རུ་བཞི། ཁམས་གསུམ་དུ་དབྱེ་བ་ལས། སྤུ་རང་། མང་ཡུལ། ཟངས་དཀར་སྐོར་གསུམ་གཅིག །ལི། བྲུ་ཤ །སྦལ་ཏེ་གསུམ་སྐོར་གཅིག །ཞང་ཞུང་ཁྲི་ཏེ་སྟོད། ཁྲི་ཏེ་སྨད་དང་གསུམ་སྐོར་གཅིག་སྟེ་སྟོད་མངའ་རིས་རྫིང་དང་འདྲ་བའི་སྐོར་གསུམ། དབུས་ན་དབུ་རུ་དང་། གཡོ་རུ་གཉིས། གཙང་ན་གཡས་རུ་དང་རུ་ལག་གཉིས་ཏེ་བར་དབུས་གཙང་ཡུར་བ་དང་འདྲ་བའི་རུ་བཞི། མདོ་ཁམས་ལ་སྨད་ཁམས་བཏགས་པ་ཁམས་གཅིག །མདོ་སྨད་ལ་གཡར་མོ་ཐང་བཏགས་པ་ཁམས་གཅིག །ཙོང་ཁ་ལ་ཀྱི་ཐང་བཏགས་པ་ཁམས་གཅིག་སྟེ་སྨད་མདོ་ཁམས་ཞིང་དང་འདྲ་བའི་ཁམས་གསུམ་མམ་དངོས་བཞི་དང་དོན་གཅིག་པའི་སྒང་གསུམ་(༧༣ན)མམ་ཕྱིས་སྒང་དྲུག །སྟོང་སྡེའི་དབང་དུ་བཏང་ན་དྲུག་ཅུ་རེ་གཅིག །རྒྱ་ནག་པོའི་གྲོང་ཁྱེར་འདྲེན་ལུགས་ལྟར་ན་ཆོལ་ཁམས་གསུམ་མམ། ཁྲི་སྐོར་བཅུ་གསུམ།འབྲོམ་གྱིས་མཛད་པའི་བོད་ཀྱི་བཤད་པ་ལས།སྤྱི་མིང་ཁ་བ་ཅན་ལྗོངས་ལ། །སྒོས་མིང་དབུས་གཙང་ཁམས་གསུམ་ཟེར། །དྭགས་ཀོང་ལོང་པོ་ཉང་དང་བཞི། །མཐའ་འཁོབ་བྱང་ཐང་འབྲོག་དང་ལྔ། །ཡུལ་གྱི་ས་བཅད་བརྒྱད་དུ་གནས། །མངའ་རིས་ལ་ཡང་རྣམ་པ་གསུམ། །གཙང་ལ་གཡས་རུ་རུ་ལག་གཉིས། །ཟར་དང་འབྲི་མཚམས་ལྷོ་མོན་གསུམ། །ཧད་དང་རུ་མཚམས་འོད་ཡུག་ཤངས། །ལུང་ལག་ལུང་ཕྲན་ཉིས་བརྒྱ་བདུན། །དབུས་ན་དབུ་རུ་གཡོ་རུ་གཉིས། །དབུ་རུ་ལ་ཡང་ལྷོ་བྱང་གཉིས། །བྱང་ན་འཕན་ཡུལ་སྟོད་ལུང་གཉིས། །ཤར་ན་གཞོ་དང་མལ་དྲོ་གཉིས། །ལུང་ལག་ལུང་ཕྲན་ཉིས་བརྒྱ་གསུམ། །(༧༣བ)གཡོ་རུ་ལ་ཡང་སྟོད་སྨད་གཉིས། །སྟོད་ན་མཉེས་ཐང་གསང་ཕུ་དང་། །ཆུ་ཤར་ཡར་རྒྱབ་བསམ་ཡས་དང་། །སྨད་ན་ཡར་འོན་ཨེ་
47-6-123
རོང་སོགས། །ལུང་ཕྲན་ཆེན་པོ་ཉིས་བརྒྱ་བརྒྱད། །ཁམས་ཀྱི་ཆ་ལ་ཉིས་བརྒྱ་བཅུ། །མདོ་སྨད་ཆ་ལ་སྟོང་ཕྲག་བཞི། །མདོར་ན་གངས་རིའི་ཁྲོད་འདི་རུ། །ལུང་ཆེན་སྟོང་དང་ལྔ་བརྒྱ་སྟེ། །ལུང་སུལ་ཁྲི་དང་ཉིས་སྟོང་གནས། །རི་ཕྲན་འབུམ་ཚོ་ཉི་ཤུ་ལྔ། །ཐང་ཆེན་སྟོང་དང་དྲུག་ཅུ་བདུན། །ཐང་ཕྲན་འབུམ་ཕྲག་བཅུ་བདུན་འདུག །བྲག་གི་རི་བོ་ཁྲི་ཕྲག་དགུ། །ལམ་འཕྲང་ཁྲི་ཕྲག་བཅུ་དགུ་སྟེ། །ཆུ་བོ་ཆེན་པོ་བཞི་རུ་གནས། །ཆུ་ཆགས་འབུམ་ཚོ་ཉི་ཤུ་གཉིས། །ཤིང་སྒོ་འབུམ་ཕྲག་ལྔ་སྟོང་གནས། །སྦྲ་ཁྱིམ་འབུམ་ཕྲག་ཉི་ཤུ་ལྔ། །སྡེ་དགོན་སྟོང་དང་ལྔ་བཅུ་ལྔ། །བོད་ཡུལ་ཁོངས་འདིར་དེ་ཙམ་ཞིག །ཅེས་པ་དཔྱད་ཞིབ་པའི་(༧༤ན)ཁོངས་སུ་གསལ་བ་ལྟར་དང་།དེ་དག་གི་ནམ་ས་སྡེ་རྒྱལ། བལ་པོ་ལི་རྒྱལ། སུམ་པ་ལྕགས་རྒྱལ། མོན་རྩེ་རྒྱལ་ཞེས་མེས་དབོན་རྣམ་གསུམ་ཡན་བོད་ཀྱི་བཀར་གཏོགས་པ་ལས། མོན་རྩེ་རྒྱལ་གྱི་སའི་ཆ། གཏེར་ལུང་དུ། བསམ་ཡས་འདི་ནས་བོང་ལམ་བཅོ་བརྒྱད་སར༔ མོན་བོད་གཉིས་བར་གནམ་མཐོ་གུང་རྒྱལ་རྩེར༔ ང་ཉིད་ཆེན་པོ་པདྨའི་བཞུགས་ཁྲི་དང་༔ རིགས་གསུམ་མགོན་པོའི་སྐུ་ནི་རང་བྱོན་བཞུགས༔ ཨོ་རྒྱན་ལུང་བསྟན་སྦས་ཡུལ་སྐྱིད་མོ་ལྗོངས༔ གནས་ཆེན་ཁྲོམ་པ་སྟེངས་ཞེས་བྱ་བ་ཡོད༔ ཅེས་པ་ལྟར་རྒྱ་གར་འཕགས་ཡུལ་གྱི་དུར་ཁྲོད་བསིལ་བ་ཚལ་གྱི་གནས་ལྷག །བློན་པོ་བཀའ་ཐང་ལེའུ་དགུ་པ་ལས།གཙང་རོང་ལྷོ་རོང་གཉལ་རོང་དང་༔ ཀོང་པོ་རོང་སྟེ་ལས་སྒོ་བཞི༔ རི་ནི་མཚོན་ཆ་གནམ་གཟིང་འདྲ༔ ཆུ་ནི་རྦ་ཀློང་རལ་ནག་གསིག༔ ནགས་ཚལ་རྩི་(༧༤བ)ཤིང་མུན་གཏིབས་འདྲ༔ ས་ནི་གཞུ་རྒྱུད་ཙམ་པ་ལ༔ གནམ་ནི་རལ་གྲི་ཙམ་ལས་མེད༔ ཟས་སུ་སྔོ་དང་ཤིང་ཏོག་ཟ༔ གོས་སུ་མེ་རླུང་སྦྱོར་བ་གྱོན༔ གནས་ས་བྲག་དང་ཆུ་ཡོད་དེར༔ ཞེས་དང་།བྱང་གཏེར་རང་བྱུང་རང་ཤར་གྱི་ལུང་བསྟན་ལས། བོད་སྐྱོབས་པའི་གངས་བརྒྱད༔ བཀྲ་ཤིས་པའི་རི་བརྒྱད༔ སྦས་པའི་ཡུལ་བཅུ་གཅིག༔ མཐའ་དམག་ཐུབ་པའི་རོང་བཅོ་བརྒྱད༔
47-6-124
ཅེས་སྦས་ཡུལ་བཞིའམ་བཅུ་གཅིག་ཏུ་བཤད་པའི་ནང་ཚན་སྐྱིད་མོ་ལྗོངས༔བཀའ་ཐང་ལས༔ གཙང་ལ་གྲོ་མོ་ལས་སྒོ་ཡོད༔ ཀོང་པོ་བྲག་གི་ལས་སྒོ་ཡོད༔ མོན་ལ་ཤ་འུག་སྟག་སྒོ་ཡོད༔ གཉལ་ལ་འགྲིན་ཐང་ལས་སྒོ་ཡོདཿ ཅེས་ཁ་བ་ཅན་པའི་སེམས་ཅན་གྱི་ལས་ལ་གྲུབ་པའི་སྒོ་བཞི་ཡོད་པ་ལས་ཧོར་སོག་ལ་སོགས་པ་མཐའ་དམག་གི་འཇིགས་པས་(༧༥ན)མི་བརྫི་བ་ཤ་འུག་སྟག་གི་སྒོ་མོས་བཅད་པའི་ནང་། རྒྱབ་རི་དར་དཀར་པོའི་ཡོལ་བ་བྲེས་པ་འདྲ་བ། མདུན་རི་བླ་མའི་དྲུང་ན་བུ་སློབ་ཆོས་ཞུ་བའི་རྣམ་པ་ལྟར་འདུད་པ། གཡས་རི་དཔའ་བོ་གདན་ལ་བཞུགས་པ་ལྟ་བུ། གཡོན་རི་མཁའ་འགྲོ་མ་གར་བྱེད་པའི་དབྱིབས་སུ་ཡོད་པའི་དབུས། ས་པདྨ་འདབ་བརྒྱད་ཁ་ཆེ་བའི་མཎྜལ་དང་མཚུངས་པ། ལུང་པ་ཕུ་ཆུང་ཞིང་མདའ་ཡངས་པ། ཤར་ཚོ། བསེ་རུ། ལྷའུ་སྡེ་མཚོ་གསུམ་མམ། ལ་འོག་ཡུལ་གསུམ་དུ་གྲགས་པ། ཕུར་གནས་ཆེན་ཁྲོམ་པ་སྟེངས་རི་བོ་ཁ་ཊྭཾ་རྩེ་གསུམ་དང་། ས་ཆོས་འབྱུང་གི་རྣམ་པ། འཕགས་མཆོག་རིགས་གསུམ་གྱི་མགོན་པོའི་རང་བྱོན་ཅན། རྩེ་མོར་གནམ་མཐོ་གུང་རྒྱལ་ཏེ་རྒྱ་བོད་མོན་གསུམ་གྱི་རི་བོ་ཐམས་ཅད་མཐོང་བ། སློབ་དཔོན་ཆེན་པོ་པདྨའི་བཞུགས་ཁྲིས་མཛེས་པ། སྐུའི་གནས་བྱང་(༧༥བ)དོམ་ཚང་། གསུང་གི་གནས་ཤར་གཟིག་ཚང་། ཐུགས་ཀྱི་གནས་ནུབ་སྟག་ཚང་། ཡོན་ཏན་གྱི་གནས་ལྷོ་སྒམ་པ་ཕུག །འཕྲིན་ལས་ཀྱི་གནས་དབུས་གུ་རུའི་སྒྲུབ་ཕུག་ཆེན་མོ་གཏེར་ཁ་དུ་མ་དང་བཅས་པ།གཡས་སུ་མཁའ་འགྲོའི་གཙོ་མོ་ཡེ་ཤེས་མཚོ་རྒྱལ་གྱི་ཕུག་པ་དང་ས་བདུད་རྩི་སྨན་གྱི་ཆུ།གཡོན་དུ་སྲ་མཁྲེགས་རྡོ་བའི་ངེས་ལ་སློབ་དཔོན་ཆེན་པོའི་ཞབས་རྗེས་དང་འཆི་མེད་ཀྱི་ཚེ་ཆུ། སྟེང་དུ་རྒྱལ་ཆེན་རྣམ་ཐོས་སྲས་ཀྱི་ཕོ་བྲང་། འོག་ཏུ་ཆེ་མཆོག་ཕུག་པ་སངས་རྒྱས་གཉིས་པ་ཐོད་འཕྲེང་རྩལ་ལ་ཡེ་ཤེས་ཀྱི་ཌཱ་ཀི་མ་བཞིས་བསྐོར་བ་དང་སྒོ་སྲུང་ཁྲོ་བོའི་སྐུ་རང་བྱུང་ཆུ་ཟླ་ལྟར་གསལ་བ། བདུད་རྩི་དང་རཀྟ་འབབ་པ་སོགས་ངོ་མཚར་རྨད་བྱུང་བའི་རྟགས་དུ་མ་དང་ལྡན་པའི་ཤར་ན་སྡིག་སྒྲིབ་འདག་པ་ཁྲུས་མ་གླིང་། ལྷོར་དགོས་འདོད་འབྱུང་
47-6-125
བ་དུང་གི་སྒོ་མོ། ནུབ་(༧༦ན)ན་མཆོག་ཐུན་དངོས་གྲུབ་ཐོབ་པའི་གནས་ཨོ་རྒྱན་གླིང་། བྱང་ན་བར་ཆད་སྲུང་བ་སྟག་གི་སྒོ་མོ་སོགས་ཀྱིས་ཉེ་བར་མཛེས་ཤིང་། ཇི་སྐད་དུ།ཁང་ས་ཞིང་ས་ས་ཡི་དགེ །འཐུང་ཆུ་ཞིང་ཆུ་ཆུ་ཡི་དགེ །གམ་འབྲོག་རྒྱང་འབྲོག་རྩ་ཡི་དགེ །ཁང་ཤིང་བུད་ཤིང་ཤིང་གི་དགེ །ཁང་རྡོ་ཐག་རྡོ་རྡོའི་དགེ་སྟེ། །ཞེས་པའི་དགེ་བཅུ་མ་ལུས་པར་ཚང་ཞིང་། མཐིལ་ན་རྒྱ་ཟས་ཀྱི་འབྲུ་བཅུ་གསུམ།བར་ན་མོན་ཟས་ཀྱི་འབྲུ་བཅུ་གསུམ། རྩེར་བོད་ཟས་ཀྱི་འབྲུ་བཅུ་གསུམ་སྟེ་འབྲུ་རིགས་བཅུ་ཕྲག་གསུམ་དང་བུག་པའི་གྲངས་ལྡན་སྨིན་པ་སོགས་ཕུན་སུམ་ཚོགས་པའི་བཀོད་པ་འཆི་བ་མེད་པའི་གྲོང་ཁྱེར་ས་ལ་འཕོས་པ་ལྟ་བུའི་ཡུལ་གྱི་ནང་ཚན།
༄། །ཨོ་རྒྱན་གླིང་གསར་བཞེངས་རྒྱ་བསྐྱེད་གནང་ཚུལ་གྱི་དཀར་ཆག
ན༽ ཨོ་རྒྱན་གླིང་གསར་བཞེངས་རྒྱ་བསྐྱེད་གནང་ཚུལ་གྱི་དཀར་ཆགསྤྲུལ་པའི་གཏེར་སྟོན་པདྨ་གླིང་པས་ལུང་བསྟན་ཅིང་རྟ་མགྲིན་གྱི་སྤྲུལ་པ་དབོན་པོ་ཨོ་རྒྱན་བཟང་པོས་ཕྱག་བདར་ཏེ་བཏབ་པ་ངེས་པ་དོན་གྱི་འོག་མིན་ཨོ་རྒྱན་གླིང་ཐོག་མ་འདེབས་(༧༦བ)དུས་ཀྱང་ཧ་ཅང་གི་རྒྱ་མི་ཆེ་ཞིང་། བར་དུ་ཉམས་ཆགས་དང་སྔུན་སང་གི་ཧྲུལ་སྐྱོན་ཆེ་བར་ལྷ་སྲས་མུ་ནེ་བཙན་པོ་མིའི་བདག་པོ་པཎྜི་ཏའི་ཚུལ་འཆང་བ་སངས་རྒྱས་རྒྱ་མཚོ་ལ་རྒྱུ་མཚན་ཞིབ་པར་མོལ་བ་བཞིན། འཕྱོངས་རྒྱས་ལྐོག་བུ་མགོན་པོ་རབ་བརྟན་དུ་ཞལ་ཏ་མཛད་དེ། བསྟན་པའི་བདག་པོ་རྒྱལ་བ་དོན་ཀུན་གྲུབ་པ་ལུམྦིའི་ཚལ་དུ་བལྟམས་ནས་བགྲང་བྱ་ཉིས་སྟོང་དྲུག་བརྒྱ་ཉི་ཤུ་རྩ་ལྔ་དང་། ཁྱད་པར་དུ་བཀའ་དྲིན་ཆེ་བ་
47-6-126
སློབ་དཔོན་ཆེན་པོ་པདྨ་འབྱུང་གནས་དྷ་ན་ཀོ་ཤའི་མཚོ་གླིང་དུ་བརྫུས་ཏེ་བལྟམས་པའི་ཚུལ་བསྟན་ནས་ཉིས་སྟོང་ལྔ་བརྒྱ་དོན་ལྔ་འདས་པ། རབ་བྱུང་བཅུ་གཉིས་པའི་བྱིངས་དང་རྐྱེན་ལས་བསྒྲུབས་པའི་ལེགས་པར་སྦྱར་བ་ལྷའི་སྐད་དུ་སྲ་མ་དཱི། སྟོད་འགྲེལ་པའི་ལུགས་ལ་མྱོས་ལྡན། དབང་ཕྱོགས་རྒྱལ་པོའི་མདུན་སར་གྱ་མའུ། འབྱུང་བ་ཆེན་པོ་གསུམ་ལ་(༧༧ན)དབང་བ། ཕོ་བྲང་ལྷ་ལྔའི་དབུས་སུ་ཀླུའི་མེ་ལོང་གནས་པའི་ལོར་ལུས་ཅན་རྣམས་ཀྱི་སྡུག་བསྔལ་རྒྱུ་བཅས་ཞི་བར་བྱེད་པའི་སྨན་དང་། ཕན་བདེ་མ་ལུས་པའི་གནས་སུ་གྱུར་པ་ནི་རྒྱལ་བའི་བསྟན་པ་རིན་པོ་ཆེ་ཉིད་ཡིན་ལ། དེ་ལའང་མཛོད་ལས།སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། །དེ་འཛིན་བྱེད་དང་སྨྲ་བྱེད་དང་། །སྒྲུབ་པར་བྱེད་པ་ཁོ་ན་ཡིན། །ཞེས་པ་ལྟར་ལུང་དང་རྟོགས་པའི་དམ་ཆོས་གཉིས་དེ་འཛིན་བྱར་བྱེད་པའི་གང་ཟག་ཀྱང་ཀློག་པ་ཐོས་བསམ་དང་སྤོང་བ་བསམ་གཏན་ནམ་སྒྲུབ་པ་ཉམས་ལེན་གཉིས་ལ་རག་ལུས་པར་བསམ་ནས་འཁོར་ལོ་གསུམ་ལ་ལྷུར་ལེན་པའི་ཁྲིམས་གཙང་འདུས་པའི་སྡེ་གསར་དུ་ཚུགས་ཤིང་། ལོ་དེ་ཉིད་ལ་བཞུགས་གནས་ཀྱི་གནྡྷོ་ལ་བཞེང་བའི་དབུ་བརྩམས།གཙུག་ལག་ཁང་རྙིང་པ་དམ་པ་དུ་མས་བྱིན་གྱིས་(༧༧བ)བརླབས་པས་ཡོ་སྒུལ་མེད་པར་གསར་དུ་བསྐྲུན་པ་ཕྱིའི་ཁོར་ཡུག་ལྕགས་རིས་བསྐོར་བའི་གཞུང་སྒོ་སྦུས་འབྱེད་ཅན།སྒོ་མཆོར་ཀ་བ་བཞི། དེའི་ནང་ཤག་སྐོར་སྟེངས་ཤོད་ལ་སྒོ་མཆོར། རབ་གསལ། རུང་ཁང་ཀ་བཞི། གཉེར་ཚང་ཀ་བ་དྲུག་པ་གཅིག་དང་། བཞི་པ་གཅིག །ཟུར་ཤག །རབ་གསལ་སོགས་ཁང་ཕྲན་བཅུ་སྐོར། གསང་སྤྱོད། བདེ་ཡངས་དང་བཅས་པ། གཙུག་ལག་ཁང་རྙིང་པ་རང་གནས་སུ་བཞག་ནས་གསར་པའི་ལྟེ་བ། སྒོ་མཆོར་ཀ་བཞི་ཤིང་བརྩེགས་ཚོན་རྩི་
47-6-127
ལེགས་པའི་ལྡེབས་རིས་སུ། རྒྱལ་པོ་ཆེན་པོ་བཞི། ཕྱག་རྡོར། ཛམ་ལྷ། གཡས་སུ་སྲིད་པ་འཁོར་ལོ་དང་། གཡོན་དུ་རྗེ་ས་པཎ་གྱི་བཞེད་པ་སྡོམ་བརྩོན་དམ་པ། སྐྱ་གདོང་ཕན་ཚུན་སོ་སོར་ཀུན་འཁོར་རེ།ནང་འདུ་ཁང་ཀ་བ་བརྒྱད་ཤིང་བརྩེགས་ཚོན་རྩི་རྒྱས་(༧༨ན)པའི་སེང་གཡབས་ལ་ལྡེབས་རིས་བདག་ཅག་གི་སྟོན་པ་ཤཱཀྱའི་རྒྱལ་པོ། ཉན་ཐོས་མཆོག་ཟུང་། གཡས་སུ་འཁོར་འདས་རྒྱལ་པོ་ཨོ་རྒྱན་པདྨ་གཙོ་འཁོར་དང་། རིག་འཛིན་གཏེར་བདག་གླིང་པ། གཡོན་དུ་ངེད་རང་གི་འདྲ་འབག །ཚེ་དཔག་མེད། དངོས་ཅག་དང་སྡེ་པའི་ཁྲི། ཤིང་རྐོས་རྒྱབ་ཡོལ།བལ་གཟར། གོས་གདན་ཁ་གང་མ་བཞི་བརྩེགས། སྟན་དམར་སྙེ་འབོལ་ཁ་དཀར། མདུན་ཅོག །བླ་བྲེ་སོགས་གང་ཅི་ཆ་འགྲིག །གཙང་ཁང་ཀ་བཞི་མར་ས་ཁྲི་འདེགས་གླང་ཆེན་དང་སེང་གེ་སོགས་ཤིང་རྐོས་འཕྲུལ་ལྷོངས་ཆེ་ཞིང་གསེར་ཆ་ཕྱུག་པའི་སྟེངས། གཙོ་བོ་དངུལ་གདུང་རིན་པོ་ཆེ་བྱང་ཆུབ་མཆོད་རྟེན་ས་འཛིན། ཐེམ་སྐས་གཉིས་པ། སེང་ཁྲིའི་ཀ་བ་དང་གཟུགས་བརྙན། བད་ཆུང་པདྨ། བུམ་གདན། སྐེད་བཅིངས་བབ་ལེ། སྒོ་རྒྱན་པ་ཏྲ། བུམ་(༧༨བ)པའི་དྲ་ཕྱེད། ཆོས་འཁོར་བཅུ་གསུམ། གདུགས་འདེགས་པདྨ། ཐུགས་རྗེ་མདོ་གཟུངས། གདུགས་ཉི་མ་རྣམས་གསེར་ཟངས། དེ་ཕྱིན་དངུལ་ལས་གྲུབ་པའི་དཔངས་འདོམ་གང་སོར་དྲུག་ཡོད་པའི་སྐུ་རྒྱུར་དངུལ་སྲང་བཞི་བརྒྱ་དང་སུམ་ཅུ། ཟངས་མཁར་རྒྱའི་ཁལ་བཅུ་གཉིས་ཉག་བརྒྱད། གསེར་འདམ་ཞོ་དྲུག་བརྒྱ་བཞི་བཅུ། དངུལ་ཆུ་ཞོ་སྟོང་དང་བཞི་བརྒྱ། ཕྲ་རྒྱན་ལ་གཡུ་པད་གསེར་སྐོངས་མ་ལེགས་པ་གཉིས། ཀོང་རྣ་ཉིས་བརྩེགས་དུང་ཁ་ཕུབ་ཆུང་ཆ་འགྲིག་གཉིས། དཔྲལ་གཡུ་གསེར་སྐོངས་མ་བཞི། གཙུག་གཡུ་གསེར་སྟེགས་མ་བཞི། དཔྲལ་མཚར་གྱི་དཀྱིལ་མཚོ་གཅིག །བཻཌཱུཪྻའི་བྱེ་བྲག་དཀར་ལ་དྭངས་པ་ཀརྐེ་ཏ་ཟུར་ཆག་པའི་ཀེ་ཀེ་རུ་སྒོང་གཟུགས་གཉིས། སྟོད་ཧོར་གྱི་ཕྲ་ཚོམས་པདྨ་རཱ་ག་དང་མར་གད་སོགས་སྤེལ་མ་གསེར་སྐོངས་
47-6-128
(༧༩ན)མ་གནངས་ཆེ་བར་མཆིང་བུའི་འདྲེས་ཅུང་ཟད་ཡོད་པ་ངོ་གྲངས་བདུན་ཅུ་དོན་དྲུག །མུ་ཏིག་ཆེ་ཆུང་བརྒྱད་ཅུ་གྱ་དྲུག །བྱུ་རུ་རྡོག་ཆེ་བ་ཀོང་རྣ་འབྲིང་སྟོད་ནས་ཆུང་བ་སྲན་སྦོས་ཙམ་གྱི་བར་ལྔ་བརྒྱ་དང་གཅིག །རྡོ་ཤེལ་དང་བླུག་ཤེལ་འདྲེས་པ་ཁ་དོག་དམར་པོར་བསྒྱུར་བ་སུམ་ཅུ་སོ་བཞི། སྦུར་ལེན་ནམ་སྤོས་ཤེལ་ཆེ་ཙམ་བརྒྱད། ཤེལ་བརྒྱད་གཞོགས་མ་དྲུག་ཅུ་རེ་བརྒྱད། ཧོར་ཤེལ་ལྔ་བརྒྱ་དང་དྲུག་ཅུ། ཤེལ་བཅོས་བུ་བ་ལེབ་ཆགས་མདོག་སྣ་ཚོགས་སུམ་ཅུ་སོ་དགུ། གཡང་ཏྲིའུ་དང་མ་ན་ཧེའི་ཕ་གུ་བཟོ་དབྱིབས་ཐ་དད་པ་བརྒྱད།སེང་གཟུགས་གཉིས། མུ་མེན་རྡོའི་རྒྱལ་པོ་རྡོག་བརྒྱ་དང་བཅུ་དྲུག །མཆོང་ལྔ་བཅུ་ང་བཞི།ཉ་ལྕིབས་ཧྲིལ་མོ་དགུ་བཅུ་གོ་བཞི། གསེར་གྱི་སྦ་ཏོག་གཡུ་ཕྲ་ཅན་བཞི་རྣམས་ཀྱི་ཕྲ་ཁུང་གསེར་ཟངས། སྙན་ཤལ་བྱང་དར་དམར་སེར་སྔོ་ལྗང་དཀར་(༧༩བ)ལྔ་སོ་སོ་ནས་ཁ་བཅུ་དགུ་རེ། ཉིན་བདེ་དང་བསོད་ནམས་ཁ་བཏགས་སོགས་བཅུ།འབུར་སྐུ་སྨན་འདམ་དཔངས་ཁྲུ་དོ་མཐོ་གང་སྐོར་ཡོད་པ་ཞེ་གཅིག་གི་གཡས་དང་པོར། སློབ་དཔོན་ཆེན་པོའི་སྐུ་ཟ་ཧོར་མ། ལྷ་ལྕམ་མནྡྷ་ར་བ་དང་ཡེ་ཤེས་མཚོ་རྒྱལ། གཡས་གཉིས་པ་གུ་རུ་པདྨ་འབྱུང་གནས་ཡབ་ཡུམ། གཡས་གསུམ་པ་པདྨ་སམྦྷ་ཝ། གཡས་བཞི་པ་བློ་ལྡན་མཆོག་སྲེད། གཡས་ལྔ་པ་པདྨ་རྒྱལ་པོ། གཡས་དྲུག་པ་ཉི་མ་འོད་ཟེར། གཡས་བདུན་པ་ཤཱཀྱ་སེང་གེ །གཡས་བརྒྱད་པ་སེང་གེ་སྒྲ་སྒྲོག །གཡས་དགུ་པ་རྡོ་རྗེ་གྲོ་ལོད་རྣམས་སོ་སོར་སྙན་དར་བཅུ་ནས་ལྔའི་བར་རེ། དངུལ་གྱི་གཡོན་དང་པོར་ངེད་རང་གི་འདྲ་འབག །གཡོན་གཉིས་པར་འཇམ་མགོན་བླ་མ་ཙོང་ཁ་པ་ཆེན་པོ། གཡོན་གསུམ་པ་རྒྱལ་བའི་དབང་པོ་ཐམས་ཅད་མཁྱེན་གཟིགས་(༨༠ན)ལྔ་པ། གཡོན་བཞི་པ་གཏེར་ཆེན་ཆོས་ཀྱི་རྒྱལ་པོ་པདྨ་གླིང་པ། གཡོན་ལྔ་པར་ལྷ་སྲས་མི་དབང་སངས་རྒྱས་རྒྱ་མཚོ། གཡོན་དྲུག་པར་སྨྱོན་རིགས་ཀྱི་ཐིག་ལེ་རིག་འཛིན་བཀྲ་ཤིས་བསྟན་འཛིན། གཡོན་བདུན་པར་རྒྱལ་རིགས་མ་རྒན་ཚེ་དབང་ལྷ་མོ་རྣམས་ལ་སོ་སོར་སྙན་དར་བཅུ་ནས་ལྔའི་བར། ལྡེབས་རིས་
47-6-129
ལ་གཡས་ཕྱོགས་སུ་ཞི་བ་བཞི་བཅུ་རྩ་གཉིས་དང་ཁྲག་འཐུང་ལྔ་བཅུ་རྩ་བརྒྱད་དང་དམ་པ་རིགས་བརྒྱད།གཡོན་དུ་བཅོམ་ལྡན་འདས་རྣམ་པར་སྣང་མཛད་ཆེན་པོ་ངན་སོང་སྦྱོང་རྒྱུད་ཀྱི་ལྷ་ཚོགས་མཆོད་ཆས་སྐོར། དངུལ་གྱི་མཆོད་ཀོང་གཉིས་དང་། མཎྜལ་ཆེ་ཆུང་གཉིས། དཀར་ཡོལ་གྱི་རྫ་མ་གཟུགས་མེ་དམ་གྲུ་ནར་སོགས་དཔྱད་པ་སྣ་ཚོགས་བཅོ་བརྒྱད། འབྲས་ཤེལ་སོགས་ཧོར་དཀར་བདུན། དངུལ་དཀར་གྱི་དཀར་སྟེགས་བདུན། བཟེད་ཞལ་ལྔ། ཆབ་རིལ་རྒྱན་དྲུག་(༨༠བ)མ་གསུམ། གུ་གུ་ཤའི་མཎྜལ་གཉིས། ཤེལ་སྒོ་གཉིས། བཞུ་ཤེལ་གྱི་དཔྱད་པ་གཉིས། ལྕགས་ཀྱི་སྤོས་ཁྲ་གཅིག །སྦུབ་ཆོལ་ཆ་གཅིག །སིལ་སྙན་ཆ་གཅིག །ཕུད་ཕོར་གཅིག མཉྫི་གསུམ། ལི་ཏིང་བདུན་ཚར་གཉིས། རག་གི་མེ་དམ་བཞི། ཟངས་རྒྱན་གཉིས།རྒྱ་གླིང་ཆ་གསུམ། དར་ཕྱག་གཅིག །བུམ་སྟན་མ་སོགས་གོས་བཟང་བསྒྲིགས་ཀྱི་གནམ་རྒྱན་ལྕམ་གླིང་དང་མཚུངས་པ། བཀྲལ་བཏགས་སོགས་ཀྱི་ཀ་འཕན་ཆ།བཀའ་འགྱུར་ཁང་དུ། བཀའ་འགྱུར་རིན་པོ་ཆེ་རྙིང་མའི་རྒྱུད་འབུམ་བསྣན་པའི་གསར་བཞེངས་པུས་ཏ་ཀ་བརྒྱ་དང་ཉི་ཤུ་རྩ་བརྒྱད་ཀུན་དགའ་ར་བ་དང་བཅས་པ། སངས་རྒྱས་བྱང་སེམས་ཀྱི་ཁྲོ་སྐུ་བཅུ་གཉིས་དང་། གསེར་སྐུ་གཉིས། བླ་སྐུ་གསུམ། སྙན་དར་ཚོས་ཁ་སྣ་ཚོགས་དྲུག་ཅུ་རེ་བརྒྱད། དངུལ་གྱི་མཎྜལ་(༨༡ན)གཅིག །དཀར་ཡོལ་གྱི་དཔྱད་པ་བཞི།འཁར་རྔ་གཅིག །ཕུད་ཕོར་གཅིག །མཉྫི་གཅིག །མཆོད་ཀོང་གཅིག །ཏིང་བདུན་ཚར་གཉིས།རག་གི་མེ་དམ་གཉིས། རྡོ་མཉེན་གྱི་སེང་གེ་གཅིག །ཤིང་གི་སྤོས་གཞོང་གཅིག །ཐོན་ཐི་རྙིང་མ་སོགས་ཀྱི་གནས་རྒྱན་ལྕམ་གླིང་དང་མཚུངས་པ། གོས་བཟང་བསྒྲིགས་ཀྱི་ཀ་འཕན་ཆ་གཅིག །ཕྱེ་ཕུར་ཆ་གཅིག །རྒྱལ་མཚན་ཆ་གཅིག །མགོན་ཁང་དུ་དཔལ་མགོན་མ་ནིང་།རྟ་མགྲིན། ཕྱག་རྡོར། ཨེ་ཀ་ཛ་ཊི། ཁྱབ་འཇུག་དུག་གི་སྤུ་གྲི། ལས་མགོན་སྲོག་བདུད་ནག་པོ། བཤན་པ་ནག་པོ། གནོད་སྦྱིན་དམར་ནག །འདོད་ཁམས་དབང་ཕྱུག །
47-6-130
དམ་ཅན་རྡོར་ལེགས་རྣམས་ཀྱི་འཇིམ་སྐུ་དཔངས་ཁྲུ་ཕྱེད་གསུམ་ནས་ཁྲུ་དོའི་བར།ཏོང་སྐུད་ལས་གྲུབ་པའི་མགོན་པོ་སྡེ་བརྒྱད་ཀྱི་རྟེན་མདོས། སྲོག་འཁོར། རིན་པོ་ཆེ། གོས་སྣ།(༨༡བ) དར་སྣ་སོགས་ཡོ་བྱད་ཕུན་སུམ་ཚོགས་པ་དང་ལྡན་པ། ལྡེབས་རིས་ལ་འཇམ་དཔལ་སྐུ། པདྨ་གསུང་། ཡང་དག་ཐུགས། བདུད་རྩི་ཡོན་ཏན། ཕུར་པ་འཕྲིན་ལས། མ་མོ་རྦོད་གཏོང་། དམོད་པ་དྲག་སྔགས། འཇིག་རྟེན་མཆོད་བསྟོད་དེ་སྒྲུབ་ཆེན་བཀའ་བརྒྱད་ཀྱི་ལྷ་ཚོགས་ཐུགས་ཀྱི་མེ་ལོང་གི་དགོངས་པ་ལྟར་དང་། དེའི་བཀའ་བབས་རིག་འཛིན་ཆེན་པོ་བརྒྱད། སྙན་དར་ཚོས་ཁ་སྣ་ཚོགས་བདུན་ཅུ། དཀར་ཡོལ་གྱི་དཔྱད་པ་བདུན། རྒྱ་དྲིལ་རྡོར་བཅས་གཅིག །སྦུག་ཆོལ་ཆ་གཅིག །རྔ་གཅིག །སྤོས་ཕོར་གཅིག །ཟངས་ཀྱི་མཆོད་ཀོང་གཅིག །ལིས་ཏིང་བདུན་ཚར་གཉིས། ཁྲབ་རྨོག་ཆ་གཉིས། སག་ཐག་མདའ་གཞུ་ཆ་འགྲིག་གཉིས། དཔའ་དམ་ལག་ལོངས་ཤུབས་གསར། གོས་བཟང་བསྒྲིགས་ཀྱི་གནམ་རྒྱན་ལྕམ་གླིང་དང་མཚུངས། གོས་བཟང་བསྒྲིགས་ཀྱི་ཕྱེ་ཕུར་ཆ།(༨༢ན)གསང་སྔགས་ཆོས་སྤྲིན་ཁང་ཀ་གཉིས། དཀོན་གཉེར་ཁང་ཀ་གཉིས། སྒོ་མཆོར་སྟེང་གཟིམས་ཆུང་ཟིལ་གནོན་འཁྱིལ་པ་ཀ་གཉིས། ལྡེབས་རིས་ལ་ཁོ་བོ་ཅག་གི་འདྲ་འབག །ངེད་རང་གི་མ་ཚེ་དབང་ལྷ་མོ། ཨོ་རྒྱན་སངས་རྒྱས་གཉིས་པ་གཙོ་འཁོར། ཚེ་དཔག་མེད།རིག་འཛིན་བཀྲ་ཤིས་བསྟན་འཛིན། སྒྲོལ་དཀར་གྱི་སྐུ། ཚེ་རིང་ལྗོངས། སྡོམ་བརྩོན་དམ་པ། གཟིམས་ཆུང་ངོ་མཚར་ཀུན་གཟིགས་ལྡེབས་རིས་འདོད་ལྷ་དང་བཅས་པ་སོགས་ཤིང་རྐོས་ཚོན་རྩི་ལེགས་པ། རྣམ་སྲས་བང་མཛོད་ཀ་གཉིས། གནོད་སྦྱིན་བང་མཛོད་ཀ་གཉིས།གཟིམས་ཆུང་ཀུན་བཟང་བདེ་ཆེན། བར་ཁྱམས་ཀ་བ་བཅུའི་ས། ཕྱག་མཛོད་ཕུན་ཚོགས་བདེ་ལྡན་ཀ་བ་བཞི། མདོར་ཁྱམས་ཆེན་ཀ་བ་ཉི་ཤུ་རྩ་གཉིས་ཀྱིས། གསོལ་ཐབ་སོགས་ཁང་བཟང་མང་བ།རྒྱན་ཁང་དུ། གོས་དར་བཟང་བསྒྲིགས་(༨༢བ)ཀྱི་རྒྱལ་མཚན་བཀྲ་ཤིས་དགུ་བརྩེགས་
47-6-131
གསུམ། ཕྱེ་ཕུར་བརྒྱད། ཀ་འཕན་རིང་ཐུང་བཅུ། ཁ་བཏགས་ཀྱི་ཡོལ་བ་གོས་གོང་ཨ་ལོང་སོགས་ཆ་འགྲིག་གསུམ། སྨན་རྙིང་གི་ཡོལ་བ་གཉིས། བྱང་དར་གྱི་ཡོལ་བ་གཅིག །གོས་བཟང་བསྒྲིགས་ཀྱི་རྟེན་ཁེབས་བཅུ་གཅིག །ཚུ་མི་རྣམ་བཞིའི་འབོག་གཅིག །ཁ་བཏགས་འཁོར་ལོ་མ་སོགས་སྙན་དར་ངོ་གྲངས་ཉི་ཤུ་རྩ་བདུན། རྒྱ་སྦུག་ཚངས་དབྱངས་ཀུན་ཁྱབ་ཉི་མ་འབྲུག་གྲགས། ཟིལ་གནོན་འཁྱིལ་བ། ཕུན་ཚོགས་དབྱངས་སྙན་སོགས་ཆ་ལྔ། ཧོར་སིལ་ཟླ་བ་འབྲུག་གྲགས། སྙན་པ་ཀུན་ཁྱབ། དབྱངས་སྙན་མཆོད་སྤྲིན་སོགས་ཆ་བཞི།འཁར་རྔ་གཉིས། དབང་བུམ་གསུམ། གཟུངས་ཐག་གཅིག །ལི་སྡེར་གཅིག །མེ་ལོང་གཉིས། རབ་གཙང་ཆ་ཚང་ཐེག་ཆེན་གན་དྲིལ་སོགས་རྡོར་དྲིལ་ཉི་ཤུ་རྩ་གཉིས།(༨༣ན) ཐོད་ཊཱཾ་གཅིག །ལྕགས་ཀྱི་མཉྫི་གཉིས། ཕུད་ཕོར་གསུམ། ཀང་དེར་གཉིས།སྤོས་ཕོར་གཅིག །འགའ་ཊུ་བུམ་པ་གཉིས། ཟངས་དམར་སེར་གྱི་པད་སྡེར་སུམ་ཅུ་སོ་བརྒྱད། མཆོད་ཀོང་ཆེ་བ་བདུན། ཆུང་བ་ཉིས་བརྒྱ་ཉི་ཤུ་རྩ་ལྔ། ཟངས་གཞུ་ཆ་གཅིག །ཁོ་ཏིང་བརྒྱ་དང་ཉི་ཤུ། ལི་ཏིང་ལྔ་ཚར་གཅིག །མེ་དམ་གསུམ། ནང་མཆོད་འབུལ་སྣོད་ཁྲོའི་ཀ་པ་ལིའི་གཟུགས་སྟེགས་བཅས་ཆ་གཉིས་སོ་སོར་ཕུད་སྐྱོགས་དང་བཅས་པ། དུང་ཆེན་ཆ་གཅིག །རྒྱ་གླིང་ཆ་གཅིག །དུང་དཀར་དངུལ་གཤོག་དུང་ཁ་ཕྲ་ལྡན། དུང་གོས་དུང་དར་སྒམ་སོགས་འགྲིག་པ་ཆ་གཅིག་དང་། ཁ་གཞན་ལ་གསུམ། སྤོས་མདོང་ཆ་གཅིག །དགང་གཟར་བླུག་གཟར་ཆ་འགྲིག་གཉིས། གོས་ཆེན་གྱི་ཕོད་ཀ་སྟོད་ལེ་སོགས་ཆ་ཚང་གཅིག །ཞྭ་ནག་ཐོད་སྐམ་རྒྱུ་ཞགས་རྡོ་རྗེ་བཅས་ཚང་བ། ཁྲོ་རོལ་(༨༣བ)དཔལ་དགུ་དང་། འཆར་ཀའི་མདོས་ཙཀ །སྲིད་པ་ཧོ་སོགས་ཙཀ་ལི་ཆེ་ཆུང་མང་བ། གོས་བཟང་བསྒྲིགས་ཀྱི་བླ་བྲེ་གཉིས། ལྕགས་ཀྱི་ཧོམ་ཁུང་ཚགས་མ་གཅིག །ལྕགས་ཀྱུ། ལྕགས་སྒྲོག །རྡོར་དྲིལ། རལ་གྲི། ཐོ་བ། ཧོམ་གཟར་སོགས་ཆ་འགྲིག །གོས་དར་གྱི་འཕྱར་དར་ཆེ་ཆུང་བདུན་ཐུག་ལྕགས་རྔ་བཅས། སྒམ་ལྔ།
47-6-132
རུང་ཁང་དུ། ཁྲོ་བཟོ་དབྱིབས་དང་ཆེ་ཆུང་སྣ་ཚོགས་དྲུག །ཆུ་ཟངས་ཆེ་བ་གཅིག །ལྕགས་སྐྱེད་གཅིག །ཟོ་ལག་ལྕགས་ཤན་མ་ཆ་བདུན། སྐྱོགས་དཀར་ཆ་གཅིག །ཟངས་སྐྱོགས་ཆ་གཉིས། ཀང་དེར་ཆ་གཅིག ལྕགས་སྐྱོགས་དྲུག །ལྦ་ལྡིར་རག་ཤན་མ་ཆ་གཉིས། ཆུ་ཟོམ་བཞི། ཇ་ཚགས་གཅིག །གཞོང་སྒོར་གསུམ། ལྕགས་སྐམ་གཅིག །མེ་འཐོན་དང་བཅས་པ། གཙུག་ལག་ཁང་སྤེལ་(༨༤ན)ཞོལ་གྱི་རྩེ་མོར་གསེར་ཟངས་གྱི་གཉྫིར་བུམ་གཟུགས་མ་གཅིག་དང་། རྣམ་པར་རྒྱལ་བའི་རྒྱལ་མཚན་ཚ་གསེར་གྱི་ཏོག་བཅས་གསུམ། ཐུག་ལྕགས་མི་རི་ལ་བ་དན་རྔ་བཅས་གཉིས། སྤོན་པད་ལ་མཎྜལ་གྱི་རྒྱན་མང་བ་དང་བཅས་པས་མཐའ་བརྟེན་པ།ལེགས་སྦྱར་ལྷའི་སྐད་དུ་བི་ཀྲ་མ། སྟོད་འགྲེལ་ལུགས་རྣམས་གནོན། ཙི་ནའི་སྐད་དུ་གིན་ཤིང་། དབང་ཐང་དང་བསྟུན་པའི་ལྕགས་འབྲུག །འབྱུང་བ་བཞི་ལྡན། བཀྲ་ཤིས་ཀྱི་ཀླུངས་ཀྱི་ལོར་རབ་གནས་ཙམ་མ་གཏོགས་རྟེན་བརྟེན་པ་བཅས་འབྱོངས་པར། རྒྱལ་བའི་དབང་པོ་ངག་དབང་བློ་བཟང་རྒྱ་མཚོའི་ཞལ་སྔ་ནས།རྒྱལ་བས་དབང་པོ་དང་འཚམ་དམ་པའི་ཆོས། །ཐུན་མོང་ཐེག་པར་སྐུ་དང་ཐུགས་ཀྱི་རྟེན། །གྲུབ་ཙམ་ཉིད་ནས་ལུས་ཅན་བསོད་ནམས་ཀྱི། །ཞིང་དུ་འགྱུར་ཞེས་བསྔགས་པ་ཆེས་ཆེར་མཛད། །འོན་ཏེ་ཐེག་པའི་ཡང་རྩེ་གསང་(༨༤བ)སྔགས་ཀྱི། །བགྲང་ཡས་རྒྱུད་སྡེ་དུ་མར་གཟུངས་འབུལ་དང་། །རབ་ཏུ་གནས་པ་རྒྱ་ཆེར་གསུངས་པ་ཡི། །རྗེས་སུ་འཕགས་བོད་ཚད་ལྡན་མཁས་ཀུན་འབྲང་། །དེའི་ཚུལ་ཡིད་ཆེས་དམ་པའི་གསུང་རབ་དང་། །
47-6-133
ཕྱག་བཞེས་མན་ངག་སྙན་བརྒྱུད་ཟབ་མོའི་གནད། །འཁྲུལ་བྲལ་ཇི་བཞིན་རིང་བསྲེལ་རྣམ་པ་བཞི། །ཞེས་སྩལ་བ་ལྟར་སྐུ་དང་ཐུགས་ཀྱི་རྟེན་བཞེང་བ་ལ་མཆོག་ཏུ་གཅེས་པའི་ཡན་ལག །ཡུངས་འབྲུ་ལྟ་བུའི་རིང་བསྲེལ། སྐུ་གདུང་གི་རིང་བསྲེལ། སྐུ་བལ་གྱི་རིང་བསྲེལ།ཆོས་སྐུའི་རིང་བསྲེལ་དང་བཞི་གཞུག་དགོས་པར་གསུངས་པ་ལྟར། བདག་གི་སྟོན་པ་གླང་པོ་སྟོང་ཐུབ་ཀྱི་འཕེལ་གདུང་རྒྱལ་རྩེ་སོགས་ཡོང་ཁུངས་མི་གཅིག་པ་རྣམ་གྲངས་བཅུ་གསུམ། ཆོས་སྐུའི་རིང་བསྲེལ་གཟུངས་ཆེན་སྡེ་བཞི་ལ་སོགས་པ་མ་ཚང་བ་མེད་པ་འཛམ་གླིང་མཆོད་སྡོང་ཆེན་པོའི་གཟུངས་(༨༥ན)འབུལ་སྐབས་སྡེ་པ་སངས་རྒྱས་རྒྱ་མཚོས་ཞལ་བཀོད་མཛད་པའི་པར་མ་བྱིན་རྟེན་འགངས་ཆེན་རྣམས་ཀྱི་ཆ་ཤས་རེ་ཡོད་པ། རྫོགས་པའི་སངས་རྒྱས་ཀྱི་མཁར་གསིལ་གྱི་ཤིང་། བྱང་ཆུབ་ཤིང་གི་ཤུན་པ། ལོ་མ། འབྲས་བུ། མ་ག་དྷ་བཟང་མོས་བཅོམ་ལྡན་འདས་ཀྱི་སྐུ་ལ་གཏོར་བའི་མེ་ཏོག་རྩྭ་མཆོག་གྲོང་གི་གཟིམས་ཁྲིའི་རྡོ། ཤཱ་རིའི་བུའི་གདུང་། དགྲ་བཅོམ་པ་འཆར་ཀའི་རྣམ་སྦྱར། ཉི་མ་གུང་པའི་སྐུ་རུས།གྲུབ་ཆེན་ས་ར་ཧའི་སྒོམ་ཐག །བྲམ་ཟེ་དཔལ་འཛིན་གྱི་རུས་རྒྱན། མཁན་ཆེན་ཞི་བ་འཚོའི་ཕྱག་མཛུབ། སློབ་དཔོན་ཀ་མ་ལ་ཤཱི་ལའི་གདུང་། རྒྱལ་པོ་འོད་ཟེར་གོ་ཆའི་བ་སོའི་སྐུ་རྒྱན།གྲུབ་པའི་དབང་ཕྱུག་ཏཻ་ལོ་པའི་བཞུགས་སྟན། པཎ་ཆེན་ནཱ་རོ་པའི་རྭའི་སྙན་རྒྱན། སྒོམ་ཐག །རུས་རྒྱན། ཕྱག་འཁར། ཚེམས། བལ་པོ་ཨ་སུའི་རྡོའི་སྒོམ་ཐག །གྲུབ་(༨༥བ)ཆེན་ནག་པོ་སྤྱོད་པ་དང་མ་གཅིག་གྲུབ་རྒྱལ། ཏི་ཕུ་གསང་སྔགས་སྡོང་པོ་གསུམ་གྱི་རུས་རྒྱན།ཁ་ཆེ་དགོན་པ་བའི་གདུང་། པཎྜི་ཏ་འབུམ་ཕྲག་གསུམ་པའི་ན་བཟའ། རྗེ་གཉའ་ཁྲི་བཙན་པོའི་སྐུ་ཤ །ཆོས་རྒྱལ་སྲོང་བཙན་སྒམ་པོའི་ཕྱག་འཕྲེང་། ཞབས་ཕྱག །ཚངས་པ་ལྷའི་མེ་ཏོག་གི་གདུང་། དབུ་སྐྲ། མངའ་བདག་ཁྲི་རལ་གྱི་གདུང་སོགས་རིས་སུ་མ་ཆད་པའི་དམ་པ་དུ་མའི་བྱིན་རྟེན་དང་། ཁྱད་པར་སྔ་འགྱུར་སྐོར། སློབ་དཔོན་དགའ་རབ་རྡོ་རྗེ་དང་། འཇམ་
47-6-134
དཔལ་བཤེས་གཉེན། ཤྲཱི་སིངྷ་གསུམ་གྱི་དབུ་ལོ། ཕྱག་སེན། དཔལ་ཨོ་རྒྱན་ཆེན་པོའི་དབུ་སྐྲ་འཇའ་ཚོན་མ། ཕྱག་ཕྲེང་། ཨོ་རྒྱན་ཡབ་ཡུམ་གྱི་བྱང་སེམས་དཀར་དམར། ཤ་ལྔ་བདུད་རྩི་ལྔ་བསྲེས་པའི་ཕབས་རྒྱུན། བསམ་ཡས་བར་ཁང་གི་རྒྱ་དཔེ། པཎ་ཆེན་བི་མཱ་ལ་མི་ཏྲའི་(༨༦ན)ཤངས་མཚལ། གདུང་དབུ་སྐྲ། སྐུ་རག །ན་བཟའ། ཟ་ཧོར་རྒྱལ་པོ་གཙུག་ལག་འཛིན་གྱི་གདུང་རུས། བྲམ་ཟེ་སྐྱེ་བ་བདུན་པའི་ཤ །དུང་རྣ་ཅན་གྱི་མཆིན་པ། མཁའ་འགྲོ་ཡེ་ཤེས་མཚོ་རྒྱལ་གྱི་དབུ་ལོ། ལོ་ཆེན་བཻ་རོ་ཙ་ནའི་གདུང་། ན་བཟའ། རྒྱ་དཔེ། ལྡན་མ་རྩེ་མང་གི་ཡི་གེའི་དྲིལ་ཆས། དགེ་སློང་ནམ་མཁའི་སྙིང་པོའི་དབུ་ལོ། ངན་ལམ་རྒྱལ་བ་མཆོག་དབྱངས་ཀྱི་གདུང་། སྐུ་ཤ །ལྷ་ལུང་དཔལ་རྡོར་གྱི་སྐུ་ཕོད། དབུ་རྒྱན། རྒྱ་ཞང་ཁྲོམ་གྱི་ཤོག་སེར། གཡུང་སྟོན་པའི་ཕྱག་འཕྲེང་། ཨ་མི་བྱ་ནག་ཆེན་མོའི་བེར། ཆོས་སྐྱོང་ཁྲོ་བོ། ན་བཟའ།དེས་དྲང་སྲོང་སྒྲུབ་པ་སྦྲར་ཐིམ་པ། སྙེ་མདོ་བའི་དབུ་ཞྭ། སོ་ཤཱཀྱ་དཔལ་བའི་གདུང་།ཕྱག་འཕྲེང་། དབུ་ཞྭ། བེར། མངའ་བདག་ཉང་ཉི་མ་འོད་ཟེར་གྱི་དབུ་ལོ། སྐུ་ཤ །ཆོས་སྨན།སྐྱེ་(༨༦བ)བདུན། མྱོང་གྲོལ་ཤོག་སེར། ཁྲོས་ནག་ཤོག་སེར། བདེ་འདུས་ཤོག་སེར། འགྲོ་འདུལ་ཤོག་སེར། རིག་མ་སངས་རྒྱས་སྐྱིད་ཀྱི་གདུང་། ཉང་བདུད་འདུལ་དང་འགྲོ་མགོན་གྱི་སྐུ་ཤ །མྱོང་གྲོལ། གུ་རུ་ཆོས་དབང་གི་སྐུ་ཤ །གདུང་རུས། ཤངས་མཚལ། གཟིམས་ཆ། ཆོས་སྨན། སྐྱེ་བདུན། མྱོང་གྲོལ། གསང་རྫོགས་ཀྱི་ཤོག་སེར། བྱེ་མ་ཨ་ཀྲོང་། ཁྲུས་མོང་མ་ཎི་མའི་ཁྲུས་དར། ཐུགས་སྲས་མི་བསྐྱོད་རྡོ་རྗེའི་དབུ་སྐྲ། སྲས་དབང་ཆེན་གྱི་སྐུ་ཤ །གདུང་རུས། གུ་རུ་ཇོ་ཙེའི་སྐུ་ཤ །རིག་འཛིན་རྒོད་ལྡེམ་གྱི་སྐྱེ་བདུན། སྐུ་རུས། ན་བཟའ།ཨོ་རྒྱན་གླིང་པའི་གདུང་རུས། སངས་རྒྱས་གླིང་པའི་དབུ་ལོ། སྐུ་ཤ །རྡོ་རྗེ་གླིང་པའི་སྐུ་ཤ །ན་བཟའ། རཏྣ་གླིང་བའི་གདུང་། ཚེམས། དབུ་སྐྲ། བྱང་ཆུབ་གླིང་པའི་དབུ་སྐྲ། སྐུ་(༨༧ན)མཚལ། ཀུན་སྐྱོང་གླིང་པའི་གདུང་། དབུ་ལོ། དྲི་མེད་རྣམ་གསུམ་གྱི་དབུ་ལོ། སྤྲུལ་པའི་
47-6-135
གཏེར་སྟོན་པདྨ་གླིང་པའི་པུར་རས། སྐུ་ཤ །དབུ་སྐྲ། ཕུར་དར། སྐུ་སྲུང་ཐག་པ། སྐྱེ་བདུན།ཆོས་སྨན། མྱོང་གྲོལ། ཤོག་སེར། ཨ་ཐམ་མ། དེའི་གཏེར་མའི་ཨོ་རྒྱན་རིན་པོ་ཆེའི་སྐུ་ཆོས་གསེར་གྱི་པ་ཏྲ་ཧ་རི། པདྨ་ལས་འབྲེལ་རྩལ་གྱི་ཚེམས། སྐྱེ་བདུན། སྤྲུལ་སྐུ་མཆོག་ལྡན་མགོན་པོའི་སྐུ་ཤ །དབུ་ལོ། སྙན་ལོང་། སྣ་ཚོགས་རང་གྲོལ་གྱི་གདུང་། ཆོས་སྨན། གསུང་སྤྲུལ་གྱི་དབུ་ལོ། སྐྱེ་བདུན། ཆོས་སྨན། བསམ་གཏན་གླིང་པའི་སྐུ་ཤ །ཤེས་རབ་མེ་འབར་གྱི་གདུང་རུས། མཚོ་སྣ་གཏེར་སྟོན་མགོན་པོ་རིན་ཆེན་གྱི་སྐུ་ཤ །ལྷོ་ལས་འཕྲོ་གླིང་པའི་ཤོག་སེར། ཀུན་མཁྱེན་ཀློང་ཆེན་རབ་འབྱམས་པའི་སྐུ་རག །ཕྱག་ཕྲེང་།མངའ་རིས་པཎ་ཆེན་སྐུ་མཆེད་(༨༧བ)ཀྱི་དབུ་ལོ། ན་བཟའ། རྡོ་རྗེ་བྲག་སྤྲུལ་པའི་སྐུ་བློ་བཟང་པདྨ་འཕྲིན་ལས་ཀྱི་བདུད་རྩི་འཁྱིལ་བའི་ཚེ་རིལ། འཆི་མེད་སྐུ་གསུམ་འདུས་པའི་རིལ་བུ། སྐྱེ་བདུན། ཆོས་སྨན། ཟུར་ཆེན་ཆོས་དབྱིངས་རང་གྲོལ་གྱི་སྐུ་ཤ །ན་བཟའ།ཁྲ་ཚངས་བློ་མཆོག་རྡོ་རྗེའི་དབུ་ལོ། ཆོས་སྨན། སྙིང་རུས་བ་རྒྱལ་སྲས་བདེ་བ་བཟང་པོའི་དབུ་རལ། དར་རྒྱས་ཆོས་སྡིངས་པ་འཕྲིན་ལས་ལྷུན་གྲུབ་ཀྱིས་ཤེལ་བྲག་ཏུ་བསྒྲུབས་པའི་ཆོས་སྨན། ཆོས་རྒྱལ་གཏེར་བདག་གླིང་པའི་སྐུ་མཚལ། དབུ་ལོ། ཨ་ཐམ་མ། ཆོས་སྨན།ཚེ་རིལ། རྡོར་སེམས་ཀྱི་མྱོང་གྲོལ་བདུད་རྩི་རིལ་བུ། དེའི་གཏེར་བྱོན་ཨོ་རྒྱན་ཆེན་པོའི་སྐུ་རག་ན་བཟའ། རྗེ་ཐམས་ཅད་མཁྱེན་པ་ལྔ་པ་ཆེན་པོའི་བུམ་ཆུ། ཚེ་རིལ། ཚེ་ཆང་། སྒྲུབ་གཏོར། བདུད་རྩི་རིལ་བུ། མགུལ་སྲུང་ཐག་པ། ཆབ་སེར་སོགས་ཀྱིས་(༨༨ན)མཚོན་རིང་བསྲེལ་རྣམ་པ་བཞིས་གཏམས་ཤིང་། བྱིན་རྟེན་རྣམས་ནས་སྨན་འདམ་ལའང་བསྲེས། དེ་ལྟར་བསྒྲུབས་པའི་རྡོ་ཤིང་གི་བཟོ་བོ། འབུར་བ། རི་མོ་བ། ལྕགས་ཟངས་མགར་བ་སོགས་བཟོ་རིགས་རྣམས་ལ་བཟའ་བཏུང་། ཐོག་མཐའ་བར་གསུམ་གྱི་སྟོན་མོ། མཚར་ཁ། ཡོན་གྱི་དངོས་པོ་དང་བཅས་པས་ཚིམ་པར་བྱས་ཤིང་། བར་དུ་གཅོད་པའི་བགེགས་ཀྱི་ཉེར་འཚེ་གང་གིས་ཀྱང་མ་གོས་པར་རྣམ་གནོན་ལྕགས་ཕོ་འབྲུག་གི་ལོར་འགྲུབ།
47-6-136
༄། །འདུས་སྡེ་གསར་དུ་ཚུགས་ཚུལ།
པ༽ འདུས་སྡེ་གསར་དུ་ཚུགས་ཚུལ།དེ་ལྟར་འགྲུབ་པའི་གནས་སུ། དཀོན་ཅོག་བརྩེགས་པའི་འདུས་པ་ཞེ་བཞི་པ་རིན་པོ་ཆེའི་ཕུང་པོའི་མདོ་ལས། འོད་སྲུང་འཕགས་པའི་དགེ་འདུན་ནི་ངས་རྒྱ་མཚོ་ཆེན་པོ་ལྟ་བུ་དང་། བསོད་ནམས་ཀྱི་ཞིང་དང་། སྦྱིན་གནས་རྣམས་ཀྱི་མཆོག་ཏུ་བསྟན་པ་ཡིན་ནོ། །ཞེས་དང་། དྲིན་ལན་བསབ་པའི་མདོ་ལས། ཕ་མ་དང་དགེ་འདུན་ནི་བསྔགས་ཤིང་(༨༨བ)བསྟོད་པར་འོས་པས་ཚིག་འཇམ་པོར་སྨྲ་ཞིང་རྒྱུན་དུ་དྲིན་དྲན་པར་བྱའོ། །དགེ་འདུན་ཞེས་བྱ་བ་ནི་ཁམས་གསུམ་ལས་འདས་པར་བྱེད་པའི་བསོད་ནམས་ཀྱི་ཞིང་ངོ་། །མ་མ་ནི་ཁམས་གསུམ་གྱི་བསོད་ནམས་ཀྱི་ཞིང་མཆོག་དམ་པའོ། །དེའི་ཅིའི་ཕྱིར་ཞེ་ན། དགེ་འདུན་གྱི་ནང་ན་སྐྱེས་བུ་ཟུང་བཞི་ཡ་བརྒྱད་དང་། འཕགས་པ་བཅུ་གཉིས་ཡོད་དེ་རིམ་གྲོ་བྱས་ན་བསོད་ནམས་དཔག་ཏུ་མེད་པ་ཐོབ་ལ་བསྒྲུབས་ན་བྱང་ཆུབ་འགྲུབ་བོ། །ཞེས་དང་། རྡོ་འཕངས་པའི་མདོ་ལས། གནས་འཇོག་གི་རྒྱུད་དག །གླིང་ཞིང་པའི་འཇིག་རྟེན་གྱི་ཁམས་ཀྱང་ཞོག །རིའི་རྒྱལ་པོ་ཁོར་ཡུག་དང་། ཁོར་ཡུག་ཆེན་པོ་དག་ཀྱང་ཞོག །རྒྱ་མཚོ་ཆེན་པོ་ཡང་ཞོག་གི །གནས་འཇོག་གི་རྒྱུད་དག །རིའི་རྒྱལ་པོ་རི་རབ་ནི་དཔག་ཚད་བརྒྱད་ཁྲི་ཆུ་ལས་གྱེན་དུ་མངོན་པར་འཕགས་པ་ལ་ཡང་སྲང་འདི་(༨༩ན)སྙེད་ཅིག་ཡོད་དོ་ཞེའམ། སྲང་བརྒྱའམ། སྲས་སྟོང་ངམ།སྲང་བརྒྱ་སྟོང་ཞིག་ཡོད་དོ་ཞེས་བགྲང་བ་དང་ཚད་བཟུང་བར་ནུས་ཀྱི། གནས་འཇོག་གི་རྒྱུད་དག་དགེ་འདུན་ལ་དགེ་བའི་རྩ་བ་བསྐྱེད་པའི་བསོད་ནམས་ནི་བགྲང་བ་དང་ཚད་བཟུང་བར་མི་ནུས་ཏེ། འཁོར་བར་ཟད་པར་མི་འགྱུར། ཡོངས་སུ་གཏུགས་པར་མི་འགྱུར་ཞིང་མྱ་ངན་ལས་འདས་པ་མི་ཟད་པ་ཡང་ཐོབ་པར་བྱེད་དོ། །ཞེས་བསོད་ནམས་ཀྱི་ཞིང་མཆོག་རབ་དང་མཆོག་དང་ཕུལ་དུ་གྱུར་པ་ནི་དགེ་འདུན་དཀོན་ཅོག་ལ་སྲི་ཞུ་རིམ་གྲོ་བྱས་པ་ཡིན་
47-6-137
པར་གོ་སྟེ་བརྒྱད་གྲ་ཞིག་པས་ཡོས་ལོར་ཚུགས་ཐོག །འདི་ལོ་ནས་ཐོ་བཙུན་གསར་རྒྱག་གི་རྒྱུན་བརྟན་ཚོགས་བཞུགས་བཅུ་ཕྲག་བཅུ་སྟེ་བརྒྱའི་བདག་ཉིད་ཅན། བླ་མ་ལུགས་ཀྱི་རྡོར་འཛིན་ཟུང་འཇུག་སྒྲུབ་པའི་སློབ་དཔོན། གཉེར་པ། ཇ་མ་ལག་བདེ་དང་བཅས་པའི་འདུས་གྲྭ་གསར་དུ་ཚུགས་པ་ནི། སློབ་དཔོན་(༨༩བ)ཆོས་ཀྱི་ཚོང་དཔོན་གྱིས།རྒྱལ་བ་སྟོན་པ་དེ་ཡི་དམ་ཆོས་དག །མདོ་དང་ཆོས་མངོན་ཡིན་གསུངས་འདུལ་བ་ནི། །སྟོན་དང་བསྟན་བཅོས་དངོས་ཡིན་དེ་ཡི་ཕྱིར། །གཉིས་གྱུར་ཕྱག་བྱས་སངས་རྒྱས་ཁྱོད་གཅིག་བཞིན། །ཞེས་བསྟན་པ་དང་སྟོན་པ་གཉི་གའི་ངོ་བོ་ཕྱི་སོ་སོ་ཐར་པ་འདུལ་བའི་སྡེ་སྣོད་དང་།ཚུལ་གསུམ་སྒྲོན་མེ་ལས།དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པ་ལྟར་གསང་སྔགས་རྡོ་རྗེ་ཐེག་པ། དེ་ལ་ཡང་གསར་རྙིང་དང་བཀའ་གཏེར་སོགས་ཀྱི་ནང་ཚན། བརྒྱུད་པ་ཐག་ཉེ་ཞིང་གདམས་ངག་མི་འཕྱུགས་པ་བྱིན་རླབས་མི་ཡལ་བ་སོགས་དགོས་པ་ཁྱད་པར་དུ་ཆེ་བ་གཏེར་མ་ཤས་ཆེ་བའི་ནང་གསང་སྔགས་རྡོ་རྗེ་ཐེག་པའི་ལྷ་སྔགས་(༩༠ན)ཡེ་ཤེས་ཀྱི་རྣལ་འབྱོར་པ། སྤྱོད་འཇུག་ལས།བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །འཁོར་བའི་བཙོན་རར་བསྡམས་པའི་ཉམ་ཐག་རྣམས། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་། །
47-6-138
འཇིག་རྟེན་ལྷ་མིར་བཅས་པས་ཕྱག་བྱར་འགྱུར། །ཞེས་ཁྱད་པར་འཕགས་པ་བྱང་སྡོམ་སྟེ། རྡོ་རྗེ་རྩེ་མོ་ལས། སོ་སོ་ཐར་དང་བྱང་ཆུབ་སེམས། །རིག་འཛིན་སྔགས་ཀྱི་སྡོམ་པའོ། །ཞེས་པའི་སུམ་ལྡན་རྡོ་རྗེ་འཛིན་པའི་ཁོ་ལག་རྫོགས་པ་ཞིག་གལ་ཆེ་བར། གཙོ་བོ་རྡོ་རྗེར་འཛིན་པའི་མཚན་ཉིད། རྒྱུའི་ཐེག་པ་ལྟར་ན་མདོ་སྡེ་རྒྱན་ལས།བཤེས་གཉེན་དུལ་བ་ཞི་བ་ཉེར་ཞི་བ། །ཡོན་ཏན་ལྷག་པར་བརྩོན་བྱས་ལུང་གིས་ཕྱུག །དེ་ཉིད་རབ་ཏུ་གསལ་བ་སྨྲ་མཁས་ལྡན། །བརྩེ་བའི་བདག་ཉིད་སྐྱོ་བ་སྤངས་ལ་བསྟེན། །ཞེས་གསུངས་པ་ལ་སོགས་པ་དང་། འབྲས་བུ་སྔགས་ཀྱི་ཐེག་པར། གསང་(༩༠བ)སྔགས་གསར་མར་ཇི་སྙེད་གསུངས་མོད་ཀྱང་སྐབས་འདིར། ཏནྟ་ཁྲག་འཐུང་གལ་པོ་ལས།ཚོགས་ཀྱི་སློབ་དཔོན་བྱ་བ་ཡང་། །ཀུན་གྱིས་བྱ་བར་མ་གསུངས་ཏེ། །ལྟ་བ་གཉིས་མེད་རྩོལ་དང་བྲལ། །སྤྱོད་པ་གསང་བའི་བཀའ་དང་ལྡན། །ཐབས་མཁས་འཕྲིན་ལས་ཐོགས་རྡུགས་མེད། །དམ་ཚིག་འཇིགས་པའི་མེ་ལྟར་སྲུངས། །དབང་རྣམས་རིམ་པར་བརྩེགས་པ་སྟེ། །རིག་པའི་རྒྱལ་པོ་རང་དབང་ཐོབ། །དེ་ནི་ཚོགས་ཀྱི་སློབ་དཔོན་ཡིན། །
47-6-139
ཞེས་གསུངས་པའི་ཡོན་ཏན་ཡོངས་སུ་ཚང་ན་སྨོས་ཅི་དགོས། རགས་པ་ཙམ་རྒྱུད་ལ་གནས་ཤིང་ཕྱག་ལེན་དུ་ངེས་པར་འཁེལ་དགོས་པ་དང་།
༄། །དམ་ཆོས་འདུལ་བའི་བསྟན་པ།
ཕ༽ དམ་ཆོས་འདུལ་བའི་བསྟན་པ།སྤྱི་ཁྱབ་ཏུ་སོ་སོ་ཐར་པའི་སྡོམ་པ་ནི། རྗེ་ཙོང་ཁ་པས།ཕམ་པ་བཞི་དང་ལྷག་མ་ནི། །བཅུ་གསུམ་སྤང་ལྟུང་སུམ་ཅུ་དང་། །ལྟུང་བྱེད་འབའ་ཞིག་དགུ་བཅུ་དང་། །སོར་བཤགས་(༩༡ན)བཞི་དང་ཉེས་བྱས་ནི། །བརྒྱ་རྩ་བཅུ་གཉིས་བསྡོམས་པ་ནི། །ཉིས་བརྒྱ་ལྔ་བཅུ་རྩ་གསུམ་རྣམས། །སྤོང་བར་བྱེད་པ་དགེ་སློང་ངོ་། །ཞེས་གསུངས་པ་ལྟར། གསོན་པོའམ་ཤི་བའི་ལུས་ཕྱེད་དུ་ལོངས་པའི་བུ་གར་རྡོ་རྗེ་བཅུག་པ་བདེ་བ་ཉམས་སུ་མྱོང་བ་མི་ཚངས་སྤྱོད། གཞན་གྱི་དངོས་པོ་རིན་ཐང་ཚང་བ་རང་གིས་བརྐུས་སམ་གཞན་རྐུར་འཇུག་པ་མ་བྱིན་ལེན། མིའམ་མངལ་དུ་ཡོད་པའི་མེར་མེར་བོ་ལ་སོགས་པ་མཚོན་དུག་རིག་སྔགས་ཀྱིས་གསོད་དམ་གསོད་དུ་འཇུག་པ་སྲོག་གཅོད།མངོན་ཤེས་དང་གྲུབ་རྟགས་སོགས་མེད་བཞིན་དུ་ཁས་འཆེ་བས་མཚོན་མ་ཡིན་པར་སྨྲ་བ་རྫུན་ཏེ་ཕམ་པ་བཞི། ཁུ་བ་འབྱིན་པ། འཛིན་པའི་རེག་པ་འཁྲིག་ཚིག་སྨྲ་བ་བསྙེན་བཀུར་ལ་བསྔགས་བརྗོད། སྨྱན་བྱེད་པ། ཁང་པ། ཁང་ཆེན། བག་ཙམ། དབྱེན་བྱེད་པ། དེ་རྗེས་ཕྱོགས། ཁྱིམ་སུན་འབྱིན་པ། བཀའ་(༩༡བ)བློ་མི་བདེ་བ་སྟེ་ལྷག་མ་བཅུ་གསུམ།
47-6-140
བྱིན་གྱིས་མ་བརླབས་པའི་གོས་འཆང་བ། ཆོས་གོས་རྣམ་གསུམ་དང་ཉིན་ཞག་གཅིག་གི་བར་འབྲལ་བ། ཟླ་འཇོག །ཆོས་གོས་དགེ་སློང་མར་འཁྲུར་འཇུག་པ། རང་ལ་ཆོས་གོས་རྣམ་གསུམ་ཡོད་བཞིན་དུ་གཞན་ལ་སློང་བ། གོས་ལེན་པ། རིགས་པ་སློང་བ། དཔགས་པ།སོ་སོ། བསྐུར་བ། སྲིན་བལ་གྱི་སྟན། བལ་ནག་གི་སྟན། ཆ་གཉིས་བསྲེས་པ། ལོ་དྲུག །མཐོ་གང་། ལམ་དུ་བལ་ཐོགས་པ། བལ་འཁྲུར་འཇུག་པ། རིན་པོ་ཆེ་ལ་རེག་པ། མངོན་ཚན་ཅན། ཉོ་ཚོང་། ལྷུང་བཟེད་མི་འཆང་བ། ལྷག་པོ་ཚོལ་བ། ཐགས་འཐག་འཇུག་པ། འཐག་པ་བསྐྱེད་པ། བྱིན་པ་འཕྲོག་པ། གཏད་པ་ལས་བྱུང་བ། དགོན་པ་བའི་འབྲལ་སྤང་། རས་ཆེན་གྱི་སྤང་བ། དགེ་འདུན་ལ་བསྔོས་པའི་ཡོ་(༩༢ན)བྱད་རང་ཉིད་ལ་བསྒྱུར་བ། སྨན་གསུམ་པོ་གང་རུང་དུས་ལས་འདས་པར་བཅང་བ་སྟེ་སྤང་ལྟུང་སུམ་ཅུ།ཤེས་བཞིན་དུ་རྫུན་སྨྲ་བ། དབང་པོ་མ་ཚང་བ་སོགས་ལ་དེའི་སྐྱོན་ནས་བརྗོད་པ། ཕྲ་མ་འཇུག་པ། རྩོད་པ་སློང་པ། སྐྱེས་པ་མེད་པར་བུད་མེད་ལ་ཆོས་སྟོན་པ། བསྙེན་རྫོགས་མ་བྱས་པ་དང་ལྷན་དུ་འདོན་པ། གནས་ངན་ལེན་བྱེད་པ། མི་ཆོས་བླ་མ། སྐུར་བ་འདེབས་པ། ཁྱད་དུ་གསོད་པ། ས་བོན་དང་སྐྱེ་བ་འཇིག་པ། གཞན་ལ་འཕྱ་སྨོད་བྱེད་པ། བསྒོ་བ་རྣར་གཟོན་པ། གནས་མལ་ཆུད་ཟོས་སུ་འཇུག་པ། གདིང་བ་ལས་གྱུར་པ། གནས་ཁང་ནས་དགེ་སློང་གཞན་བསྐྲོད་པ། ཕྱིས་གནོན་པ། རྩ་བ་འབྱུང་བ་ལ་འདུག་པ། སྲོག་ཆགས་ཡོད་པའི་ཆུར་ལོངས་སྤྱོད་པ། རིམ་པ་ལྷག་པར་བརྩིག་པ། དགེ་སློང་མ་ལ་ཆོས་སྟོན་པ། ཉི་མ་ནུབ་པར་སྟོན་པ།(༩༢བ) ཟས་ཅུང་ཟད་ལ་བལྟས་ནས་ཆོས་སྟོན་པ། དགེ་སློང་མར་གོས་བྱིན་པ། བུད་མེད་ཀྱི་གོས་འཚེམ་པ། བུད་མེད་དང་ལྷན་ཅིག་རྒྱང་གྲགས་འདས་ནས་འགྲོ་བ།དེ་བཞིན་དུ་གྲུར་འཇུག་པ། དབེན་པ་སྐྱབས་ཡོད་དུ་འདུག་པ། འབྲེང་བ་ཟས་སྦྱོར་དུ་འཇུག་པ། ཉེ་དུ་མ་ཡིན་པའི་ཁྱིམ་པ་ལ་དུས་རུང་གི་ཟས་ཉི་མ་གཅིག་ལན་གཉིས་གསུམ་དུ་སློང་བ། མུ་སྟེགས་པའི་ཁྱིམ་དུ་ཟས་ཟ་བ། ལྷུང་བཟེད་གསུམ་ལས་ལྷག་པ་ལེན་པ། སྤངས་
47-6-141
པ་ཟ་བ་དང་། བསྟབས་པ། འདུས་ཤིང་ཟ་བ། གླིང་འདིའི་ཉི་མ་ཕྱེད་ཡོལ་ནས་སང་གི་སྐྱ་རེངས་མ་ཤར་བར་དུས་རུང་གི་ཟས་ཟ་བ། གསོག་འཇོག་བྱེད་པ། བྱིན་ལེན་མ་བྱས་པར་ཟ་བ། རང་དོན་དུ་སྲོག་ཆགས་གནས་པའི་ཆུར་ཁྲུས་བྱེད་པ། ཕོ་མོ་ཉལ་བོ་སྤྱོད་པ་ལ་བར་ཆད་བྱེད་པ། དེའི་ཁྱིམ་དུ་འགྲོ་བ། ཕྱི་རོལ་པའི་བུད་མེད་ལ་གོས་སྟེར་བ།དམག་(༩༣ན)ལ་ལྟ་བ། དམག་གི་ནང་དུ་གནས་པ། བཤམས་པ་དཀྲུགས་པ་བརྡེག་པ། བརྡེག་པར་གཟས་པ། གནས་ངན་ལེན་འཆབ་པ། གྲོགས་དགེ་སློང་ལ་དུས་རུང་གི་ཟས་བཀག་པ། རྒོད་བག་གིས་མེ་ལ་རེག་པ། འདུན་པ་ཕྱིར་བསྒྱུར་བ། བསྙེན་པར་རྫོགས་པ་དང་མཚམས་ནང་གཅིག་ཏུ་ནུབ་གཉིས་ལ་ལྷག་པ་ཉལ་བ། སྡིག་ལྟ་མི་གཏོང་བ། སྤངས་པ་རྗེས་སུ་ཕྱོགས་པ། དགེ་ཚུལ་བསྙིལ་བ་སྡུད་པ། རུང་བའི་ཚོན་གསུམ་གྱིས་ཁ་མ་བསྒྱུར་བའི་གོས་གྱོན་པ། རྒོད་བག་གི་བསམ་པས་རོལ་མོ་དང་མཚོན་ཆར་རེག་པ། ཟླ་བ་ཕྱེད་ཀྱི་སྔ་རོལ་ཁྲུས་བྱེད་པ། བསམ་བཞིན་དུ་དུད་འགྲོ་གསོད་པ། འགྱོད་པ་བསྐྱེད་པ། གཡའ་སྒོག་པ། ཆུར་རྩེ་བ། བུད་མེད་དང་ལྷན་ཅིག་ཉལ་བ། དངངས་པར་བྱེད་པ། སྦྲིད་པ། མ་བྱིན་པས་ཉེ་བར་མཁོ་བ།སྐུར་བ་འདེབས་པ། བུད་མེད་དང་ལྷན་ཅིག་ལམ་(༩༣བ)འགོལ་སར་འགྲོ་བ། རྐུན་པོ་དང་ཐབས་གཅིག་ཏུ་འགྲོ་བ། ལོ་ཉི་ཤུ་མ་ལོན་པར་བསྙེན་རྫོགས་བྱེད་པ། ས་རྐོ་བ། མགྲོན་དུ་གཉེར་བ་ལས་རིང་དུ་འདུག་པ། བསླབ་པ་ཉེ་བར་འཇོག་པ། གཞན་ལ་ཉན་རྣ་བྱེད་པ།མི་སྨྲ་བར་འགྲོ་བ། དགེ་འདུན་ཆོས་ལྡན་གྱི་བྱ་བ་ལ་མི་གུས་པ། ཆང་ལ་སོགས་པ་མྱོས་པོར་འགྱུར་བའི་བཟའ་བཏུང་བསྟེན་པ། ཕྱི་དྲོ་གྲོང་དུ་འཇུག་པ། རང་གྲོང་གཞན་དུ་རྒྱུ་བ་ལ་བརྟེན་ནས་དགེ་འདུན་གྱི་གདུགས་ཚོད་དུས་ལས་ཡོལ་བ། རྒྱལ་པོའི་ཕོ་བྲང་དུ་ནུབ་མོ་འགྲོ་བ། གསོ་སྦྱོང་གི་དུས་སུ་བསླབ་བྱ་ཁྱད་དུ་གསོད་པ།ཁབ་རལ་བྱེད་པ། ཁྲི་རྐང་འཆོས་པ། ཤིང་བལ་གྱིས་གོས་པར་བྱེད་པ། གདིང་བ།
47-6-142
གཡན་པ་དགབ་པ། རས་ཆེན། ཆོས་གོས་རྣམས་ཚད་ལས་ལྷག་པ་སྟེ་ལྟུང་བྱེད་འབའ་ཞིག་པ་དགུ་བཅུ་ཐམ་པ། དགེ་སློང་མར་ཟས་ལེན་པ། གྲལ་རིམ་(༩༤ན)དུ་མ་ཕེབས་པར་འགྲིམ་དུ་འཇུག་པ་མ་བཟློག་པ། བསླབ་པ་དྲལ་ཏེ་ཁྱིམ་དུ་འཇུག་པ། ནགས་མ་བརྟགས་པར་ཟས་ཟ་བ་སྟེ་སོར་བཤགས་བཞི། མཐའ་གཉིས་ཟླུམ་པོར་གྱོན་པ་སོགས་ཤམ་ཐབས་ཀྱི་སྡེ་ཚན་བདུན་དང་། སྟོད་གཡོགས་ཀྱི་གསུམ། དྲན་ཤེས་མ་བསྟེན་པ་སོགས་ཁྱིམ་དུ་འགྲོ་བ་སོགས་ལྔ།ཤམ་ཐབས་འདོམས་མཐོང་བར་བརྫེས་པ་གཟན་ཕྲག་པ་གཡས་གཡོན་ལ་བཀལ་བ་སོགས་ལྔ། མཆོངས་ནས་འགྲོ་བ་སོགས་ལྔ། ལག་སྦྲེལ་གྱིས་འགྲོ་བ་སོགས་ལྔ། འདོམས་སྣང་བ་དང་མ་བརྟགས་པར་སར་སྡོད་པ་སོགས་བཅུ། ཟས་ལེགས་པར་མ་བླངས་པ་སོགས་བཅུ། ལེགས་པར་མ་ཟོས་པ། ཁམ་ཧ་ཅང་ཆེ་བ་དང་། ཧ་ཅང་ཆུང་བ་སོགས་དྲུག་མངར་བ་ལ་ཙུག་ཙུག །སྐྱུར་བ་ལ་ཅག་ཅག །གྲང་བ་ལ་ཧུ་ཧུ། ཚ་བ་ལ་ཕུ་ཕུ། ལྕེར་ཕྱིར་ཕྱུང་ནས་ཟ་བ་དང་ལྔ། རྐན་སྒྲ་ཏོག་པ་སོགས་ལྔ།(༩༤བ) ལག་པ་ལ་ཟས་ཆགས་པ་ལྕེས་བལྡག་པ་སོགས་ལྔ། གཞན་གྱི་ལྷུང་བཟེད་ས་ལ་འཇོག་པ་སོགས་བརྒྱད། ལངས་ནས་དང་། ཉལ་ནས་ལ་སོགས་པ་ཆོས་ཉན་བཤད་ཀྱི་སྡེ་ཚན་ཉི་ཤུ་རྩ་ལྔ། འགྲེང་ནས་བཤང་གཅི་འདོར་བ།ཤིང་འདོམ་གང་ཡན་ལ་འཛེག་པ་དང་བཞི་སྟེ་ཉེས་བྱས་བརྒྱ་དང་བཅུ་གཉིས།དེ་ལྟར་དགེ་སློང་གི་ཁྲིམས་བརྒྱ་ཕྲག་ཕྱེད་གསུམ་དང་ཉག་མ་མེའི་གྲངས་ལྡན་དུ་གསུངས་ལ། དགེ་ཚུལ་གྱི་བཞི་བཅུ་ལ་སོགས་པ་དེའི་ཁོངས་སུ་མ་འདུས་པ་མེད་དེ་ཡང་འཁོར་བ་མཐའ་དག་མེ་འབར་བའི་འོབས་ལྟར་མཐོང་བའི་ངེས་འབྱུང་གི་བསམ་པས་སོ་སོ་ཐར་པའི་སྡོམ་པ་ཡང་དག་པར་བླངས་པས། གོང་དུ་བཤད་པའི་བསླབ་པ་རིན་པོ་ཆེ་ནན་ཏན་སྙིང་པོར་བྱེད་པ་ཙམ་ཞིག་གིས་གོམས་པ་གོང་ནས་གོང་དུ་སྤེལ་བ་ལས་ཀྱང་འཁོར་བའི་སྡུག་བསྔལ་མ་ལུས་པར་སྤངས་པའི་ཐར་པ་མྱ་ངན་ལས་འདས་(༩༥ན)པའི་གོ་
47-6-143
འཕང་ཐོབ་མོད་ཀྱི། འོན་ཀྱང་དེ་ནི་སྐྱོན་ཟད་པ་དང་ཡོན་ཏན་རྫོགས་པ་ཕྱོགས་རེ་བ་ཡིན་པས་རང་དོན་མ་རྫོགས་ཤིང་གཞན་དོན་ཉི་ཚེ་བ་ཡིན་ལ། དེ་ནས་ཀྱང་མཐར་སངས་རྒྱས་ཀྱིས་བསྐུལ་ཞིང་ཐེག་པ་ཆེན་པོར་ཐུན་མོང་མ་ཡིན་པའི་ལམ་ལ་གཞི་ནས་སློབ་དགོས་པའི་ཕྱིར། བློ་དང་ལྡན་པ་རྣམས་ཀྱིས་ནི་ཐོག་མ་ནས་ཐེག་པ་ཆེན་པོར་འཇུག་པར་རིགས་ཏེ།ཕར་ཕྱིན་བསྡུས་པ་ལས།འཇིག་རྟེན་དོན་སྒྲུབ་ཚུལ་ལ་མཐུ་མེད་པའི། །ཐེག་པ་གཉིས་པོ་གཏན་དུ་སྤང་བྱ་ཞིང་། །ཐུབ་རྒྱལ་ཐེག་པ་སྙིང་རྗེས་བསྟན་པ་ལ། །གཞན་ཕན་རོ་གཅིག་རང་བཞིན་དེ་དག་འཇུག །ཅེས་གསུངས་པ་ལྟར་ཐེག་པ་དེར་འཇུག་པ་ལ་མེད་དུ་མི་རུང་བ་ནི་བྱང་ཆུབ་ཀྱི་སེམས་ཁོ་ན་ཡིན་ལ། དེའི་བསྲུང་སྡོམ་གྱི་རིམ་པའང་ཞིབ་ཏུ་ན་བསམ་ལས་འདས་ཀྱང་། རགས་པ་ཙམ་དུ་ན། དཀོན་ཅོག་གསུམ་གྱི་དཀོར་འཕྲོག་པ། ཕས་(༩༥བ)ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་ཐུབ་པས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལའང་། །ངུར་སྨྲིག་འཕྲོག་དང་བརྡེག་པ་དང་། །བཙོན་རར་འཇུག་པར་བྱེད་པ་དང་། །རབ་ཏུ་བྱུང་ལས་འབེབས་པ་དང་། །མཚམས་མེད་ལྔ་པོ་བྱེད་པ་དང་། །ལོག་པར་ལྟ་བ་འཛིན་པ་དང་། །གྲོང་ལ་སོགས་པ་འཇིག་པ་ལ། །རྩ་བའི་ལྟུང་བར་རྒྱལ་བས་གསུངས། །བློ་སྦྱོང་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང་། །སངས་རྒྱས་ཉིད་ལ་ཞུགས་པ་རྣམས། །རྫོགས་པའི་བྱང་ཆུབ་བཟློག་པ་དང་། །སོ་སོ་ཐར་པ་ཡོངས་སྤངས་ཏེ། །ཐེག་པ་ཆེ་ལ་སྦྱོར་བ་དང་། །སློབ་པའི་ཐེག་པས་ཆགས་ལ་སོགས། །སྤོང་བར་འགྱུར་བ་མིན་ཞེས་འཛིན། །ཕ་རོལ་དག་ཀྱང་འཛིན་འཇུག་དང་། །རང་གི་ཡོན་ཏན་བརྗོད་པ་དང་། །རྙེད་པ་དང་ནི་བཀུར་བསྟི་(༩༦ན)དང་། །ཚིགས་བཅད་རྒྱུ་ཡིས་གཞན་
47-6-144
སྨོད་དང་། །བདག་ནི་ཟབ་མོ་བཟོད་པའོ་ཞེས། །ལོག་པ་ཉིད་ནི་སྨྲ་བ་དང་། །དགེ་སྦྱོང་ཆད་པས་གཅོད་འཇུག་དང་། །དཀོན་མཆོག་གསུམ་གྱི་སྦྱིན་བྱེད་དང་། །སྦྱིན་པ་ལེན་པར་བྱེད་པ་དང་། །ཞི་གནས་འདོར་བར་བྱེད་པ་དང་། །ཡང་དག་འཇོག་གི་ལོངས་སྤྱོད་དག །ཁ་ཏོན་བྱེད་ལ་སྦྱིན་པ་རྣམས། །འདི་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །ཞེས་རྩ་བའི་ལྟུང་བ་ཉི་ཤུ་ཙམ་ཞིག་བསྟན་ལ། མདོར་ན་སློབ་དཔོན་ཙནྡ་གོ་མི་ཡིས།གཞན་རྣམས་དང་ནི་བདག་ལ་ཡང་རུང་། །སྡུག་བསྔལ་ཡིན་ཡང་གང་ཕན་དང་། །ཕན་དང་བདེ་བ་རྣམས་བྱ་སྟེ། །དེ་ཡང་མི་ཕན་མི་བྱའོ། །ཞེས་གསུངས་པ་ལྟར་རོ། །
༄། །གསང་སྔགས་རྡོ་རྗེ་ཐེག་པའི་བསྟན་པ།
བ༽ གསང་སྔགས་རྡོ་རྗེ་ཐེག་པའི་བསྟན་པ།གསང་སྔགས་རྡོ་རྗེ་ཐེག་པ་ནི། སྤྱི་ལྟར་བཤད་ཚུལ་དུ་མ་ཡོད་ཀྱང་། གསར་མ་དཔལ་གསང་བ་འདུས་པའི་རྩ་རྒྱུད་ལེའུ་བཅུ་བདུན་པ་དང་། སྔ་འགྱུར་(༩༦བ)བསྟན་པའི་བདག་པོ་ཨོ་རྒྱན་ཆེན་པོས་གསོལ་འདེབས་ལེའུ་བདུན་མའི་སྟོང་ཐུན་དུ་བཀའ་སྩལ་པ་ལྟར། བསྐལ་བཟང་གི་རྒྱལ་བ་ཉི་མ་སྟོང་རྩ་ལྔའི་ནང་ནས་ཤཱཀྱ་ཐུབ་པ་ཁོ་ནས་ཞིང་འདིར་གསུངས་ཀྱི།གཞན་དག་གིས་ནི་མ་གསུངས་གསུང་བར་མི་འགྱུར་བས་སངས་རྒྱས་ལས་ཀྱང་ཕྲད་པར་དཀའ་ཞིང་། ཐེག་པ་གཞན་གྱི་ལམ་ལ་བརྟེན་ནས་བསྐལ་པ་གངྒཱའི་ཀླུང་གི་བྱེ་མ་སྙེད་ཀྱིས་ཀྱང་ཐོབ་པར་དཀའ་བའི་རྫོགས་པའི་བྱང་ཆུབ་དེ་ཉིད་ཐེག་པ་འདིའི་ལམ་མཆོག་ཏུ་གྱུར་པ་དག་ལ་བརྟེན་ནས་སྙིགས་དུས་ཀྱི་ཚེ་གཅིག་ལ་ཡང་ཐོབ་པར་ནུས་པ་འདིའི་འཇུག་སྒོ་ནི།ས་པཎ་གྱི་སྡོམ་གསུམ་དུ།རྡོ་རྗེ་ཐེག་པའི་ལམ་ཞུགས་ཏེ། །མྱུར་དུ་སངས་རྒྱས་ཐོབ་འདོད་ན། །
47-6-145
སྨིན་གྲོལ་གཉིས་ལ་འབད་པ་བྱ། །སྨིན་པར་བྱེད་པའི་དབང་བསྐུར་ཡང་། །བླ་མ་བརྒྱུད་པ་མ་ཉམས་ཤིང་། །ཆོ་ག་འཁྲུགས་པར་(༩༧ན)མ་གྱུར་པ། །ཕྱི་ནང་རྟེན་འབྲེལ་བསྒྲིག་མཁྱེན་ཅིང་། །སྐུ་བཞིའི་ས་བོན་ཐེབས་ནུས་པ། །སངས་རྒྱས་གསུང་བཞིན་མཛད་པ་ཡི། །བླ་མ་བཙལ་ལ་དབང་བཞི་བླངས། །དེ་ཡི་སྡོམ་པ་གསུམ་ལྡན་འགྱུར། །ཞེས་སྨིན་བྱེད་ཀྱི་དབང་གལ་ཆེ་བར་སྤྲུལ་པའི་གཏེར་སྟོན་པདྨ་གླིང་པ་ནས་བཟུང་།དམ་སེལ་མི་དབར་ཁྱི་ཞུགས་ཀྱིས་བསླད་པ་མེད་པ་གོང་མ་རྒྱལ་བ་ལྔ་པ་ངག་དབང་བློ་བཟང་རྒྱ་མཚོའི་ཡོངས་འཛིན་དུ་གྱུར་ཞིང་ཐང་ཡིག་ཡང་གསང་རྒྱ་ཅན་སོགས་དུ་མ་ལས་ལུང་གིས་བསྟན་པ་རྩོད་བྲལ་དུས་བབས་ཀྱི་གཏེར་སྟོན་རིག་འཛིན་གཏེར་བདག་གླིང་པ་ལྟ་བུ་ནས་དབང་བཞི་ལེགས་པར་ནོད་དགོས་ལ། ནོས་ཟིན་ནས་ནི། བདེ་མཆོག་སྡོམ་འབྱུང་ལས།ཅི་སྟེ་དངོས་གྲུབ་མཆོག་འདོད་ན། །སྲོག་ནི་ཡོངས་སུ་གཏོང་ཡང་བླ། །རྟག་ཏུ་དམ་ཚིག་བསྲུང་བར་བྱ། །ཞེས་གསུངས་ལ། ཧེ་རུ་ཀ་གལ་པོའི་(༩༧བ)རྒྱུད་ལས། རྡོ་རྗེ་སློབ་དཔོན་གཙོ་བོ་ཉིད། །རྡོ་རྗེ་མཆེད་དང་ལྕམ་དྲལ་ལ། །ལུས་དང་སྲོག་ལ་བབ་གྱུར་ཀྱང་། །ཞེ་སྡང་མནར་སེམས་མི་བསྐྱེད་དོ། །འདི་ནི་སྐུ་ཡི་དམ་ཚིག་གོ །ལུང་དང་ལྡན་པའི་སློབ་དཔོན་གྱིས། །སྣོད་དང་ལྡན་པའི་སློབ་མ་ལ། །ཡི་དམ་གསལ་བའི་ལྷ་ཕོག་པས། །སྔགས་དང་ཕྱག་རྒྱ་རྒྱུན་མི་ཆད། །འདི་ནི་གསུང་གི་དམ་ཚིག་གོ །བསྐྱེད་དང་རྫོགས་པའི་མན་ངག་
47-6-146
ནི། །གནས་པ་རྩ་ཡི་དཀྱིལ་འཁོར་དང་། །གྲུབ་པ་སྔགས་ཀྱི་ཡི་གེ་དང་། །རྟེན་པ་ཁམས་ཀྱི་བདུད་རྩི་དང་། །སྙིང་པོ་རླུང་གི་མན་ངག་རྣམས། །འདི་ནི་ཐུགས་ཀྱི་དམ་ཚིག་སྟེ། །དམ་ཚིག་གསུམ་པོ་མ་འདས་ན། །རྡོ་རྗེ་སེམས་དཔའ་སྙིང་གནས་ཏེ། །སྐུ་གསུང་ཐུགས་ཀྱི་དངོས་གྲུབ་ནི། །ཚེ་འདི་ཉིད་ལ་ཐོབ་པར་འགྱུར། །ཞེས་དང་།དེ་ཉིད་ལས། དམ་ཚིག་རྩ་བ་བསམ་ཡས་ཀྱང་། །རྩ་བ་(༩༨ན)བརྒྱ་དང་རྩ་བརྒྱད་དོ། །དེ་ལ་བསྡུ་ན་ཉི་ཤུ་བརྒྱད། །དེ་ལས་བསྡུས་པ་བཅུ་རུ་འདུས། །ཞེས་དང་། གསང་སྔགས་གསར་མར་རྩ་ལྟུང་བཅུ་བཞི་དང་བཅུ་ལ་སོགས་པ་གསུངས་མོད་ཀྱི། འདིར་སྐབས་སུ་བབས་པ་བཀའ་བརྒྱད་རང་བྱུང་རང་ཤར་གྱི་རྒྱུད་ལེའུ་བཅོ་བརྒྱད་པར། རྩ་བ་སྐུ་གསུང་ཐུགས་དང་གསུམ༔ ཡན་ལག་ཉི་ཤུ་རྩ་ལྔའོ༔ དབྱེ་བ་རྣམ་གྲངས་བསམ་ཡས་ཏེ༔ ས་ཡ་འབུམ་སྡེ་བརྗོད་ལས་འདས༔དེ་ཡང་སྐུ་ཡི་དམ་ཚིག་ནི༔ རྡོ་རྗེ་སློབ་དཔོན་མིག་ལྟར་བཀུར༔ ལོངས་སྤྱོད་ཅི་ཡོད་ཕངས་པ་མེད༔ བུ་དང་ཆུང་མ་ནོར་གྱི་དབྱིག༔ རབ་ཏུ་གཅེས་དང་ཡིད་འཐད་འབུལ༔ ལུས་དང་ངག་དང་ཡིད་དང་གསུམ༔ རྡོ་རྗེ་སློབ་དཔོན་ཅི་མཉེས་བྱ༔ བྲན་བཞིན་ཅི་བསྒོ་ཉན་པར་གྱིས༔ བཞུགས་ན་འགོམ་ཡུག་མི་བྱ་སྟེ༔ བཞེངས་ན་ས་ལ་བསྡད་མི་བྱ༔ སློབ་དཔོན་དེ་ཡི་(༩༨བ)ན་བཟའ་དང་༔ གྲིབ་མ་དང་ནི་ཞབས་ཀྱི་རྗེས༔ མཆིལ་མ་ལུས་ཀྱི་དྲི་མ་དང་༔ དྲི་ཆུ་ཕྱི་ས་བཞུགས་པའི་གདན༔ ཟས་ཀྱི་སྣོད་དང་ཞབས་ཀྱི་ལྷམ༔ ཀུན་ལ་འགོམ་ན་དམྱལ་བར་སྐྱེ༔ སློབ་དཔོན་དེ་ཡི་སྤྱན་སྔ་རུ༔ ཁྲི་དང་སྟེགས་ལ་འདུག་མི་བྱ༔ སློབ་དཔོན་སྐུ་ནི་མ་འདས་བར༔ དེ་ཡི་སློབ་བུ་སློབ་མར་མིན༔ སྐྱབས་འགྲོ་འབོགས་དང་རིས་སུ་འཇུག༔ དབང་དང་རབ་གནས་མན་ངག་བཤད༔ སློབ་དཔོན་བཞུགས་པའི་བར་ལ་མིན༔ བརྡེག་འཚོག་རྐུ་འཕྲོག་ངན་སེམས་དང་༔ སྒྲོ་དང་སྐུར་པ་སྤྱོ་བའི་སེམས༔ དངོས་སུ་བསམ་པ་ལྟ་ཅི་སྨོས༔གྲེ་མོ་སེ་གོལ་ཡུན་དུ་མིན༔ སློབ་དཔོན་དེའི་གཟུངས་མ་དང་༔ སྲས་ལ་གཙོ་བོ་ཇི་བཞིན་
47-6-147
སྲུང་༔ བཞུགས་ན་ཞག་དང་ཟླ་བ་དང་༔ ལོ་ཡི་ཁོངས་སུ་ཅིས་ཀྱང་མཇལ༔ གཤེགས་ན་གོང་བཞིན་མཆོད་(༩༩ན)པ་བཟུང་༔ བླ་མའི་གཟུངས་མ་དམད་མི་བྱ༔ ཆགས་སེམས་སྐྱེས་ན་དམྱལ་བར་སྐྱེ༔ རྡོ་རྗེ་མཆེད་དང་ལྕམ་དྲལ་ལ༔ ཤིན་ཏུ་བརྩེ་ཞིང་དུང་སེམས་བྱ༔ ལོ་ཡི་དུས་སུ་མཇལ་ནས་ཀྱང་༔ དམ་ཚིག་གསོ་བའི་ཆོ་ག་བྱ༔ གསུང་གི་དམ་ཚིག་ངས་བཤད་ཀྱི༔གསང་སྔགས་དབང་གི་སྒོར་ཞུགས་ནས༔ ཡི་དམ་ལྷ་ཚོགས་སྲོག་ལྟར་གཙོ༔ སྔགས་དང་ཕྱག་རྒྱ་རྒྱུན་དུ་བཅང་༔ ཉིན་ཞག་ཕྲུགས་གཅིག་བར་དུ་ཡང་༔ བཞི་ཁྲི་ཉི་ཁྲི་ཁྲི་ཕྲག་གཅིག༔གང་ཟག་རབ་ཀྱིས་རྒྱུན་མི་བཅད༔ སྟོང་བརྒྱད་ལྔ་སྟོང་ཕྲག་གཅིག་ནི༔ གང་ཟག་འབྲིང་གིས་རྒྱུན་མི་བཅདཿ བརྒྱད་བརྒྱ་ལྔ་བརྒྱ་རྩ་གཅིག་གི༔ ཐ་མ་གསུམ་གྱིས་རྒྱུན་མི་བཅད༔དེ་ལས་འདས་ན་ཡི་དམ་ལྷ༔ སྤངས་པ་ཡིན་པས་ནན་ཏན་བསྐྱེད༔ ལྷ་རྣམས་ཡིད་གསལ་དྲན་དང་མོས༔ ཕྱག་རྒྱ་བཅའ་བ་རིང་ཐུང་གསུམ༔(༩༩བ) རྒྱུན་མི་ཆད་པ་ཉམས་སུ་བླང་༔ དེ་ནི་གསུང་གི་དམ་ཚིག་ཡིན༔ ཐུགས་ཀྱི་དམ་ཚིག་གསང་བ་བཅུ༔ ཐེམས་སུ་རྩིས་ལ་གཅེས་པར་བཅང་༔ སྒྲུབ་པའི་གནས་དང་འཇུག་པའི་དུས༔ གྲོགས་དང་བྲན་གཡོག་ཐམས་ཅད་གསང་༔ མ་གསང་བདུད་ཀྱི་བར་ཆད་འོང་༔ ཤ་ཆང་བདུད་རྩི་ལྔ་ཡི་རྫས༔ གིང་དང་ཕུར་པ་ཐོད་པ་ལྔ༔ སྒྲུབ་པའི་ལག་ཆ་ཐམས་ཅད་གསང་༔ མ་གསང་མུ་སྟེགས་འཆལ་པར་སྐྱེ༔ སྨན་དང་རཀྟ་གཏོར་མ་གསང་༔ མ་གསང་དངོས་གྲུབ་ཐམས་ཅད་ཉམས༔སྙིང་པོ་ལས་སྔགས་ཐམས་ཅད་གསང་༔ མ་གསངས་མཐུ་དང་བྱིན་བརླབས་ཡལ༔དབྱངས་དང་འཆམས་དང་གར་སྟབས་གསང་༔ དེ་མ་གསང་ན་སྨྱོན་པར་སྐྱེ༔ སྦྱོར་སྒྲོལ་གཉིས་ཀྱི་ལག་ལེན་གསང་༔ མ་གསང་སྐྱེ་བོས་ཡ་ག་སྨོད༔ འཕྲིན་ལས་རྣམ་བཞིའི་(༡༠༠ན)སྤྱོད་པ་གསང་༔ མ་གསངས་མཁའ་འགྲོས་བཀའ་ཆད་འོང་༔ རྒྱུད་དང་སྒྲུབ་ཐབས་མན་ངག་གསང་༔ མ་གསངས་བཀའ་ལ་རལ་སྤྱོད་འགྱུར༔ མདོར་ན་གསང་སྔགས་གསང་བའི་རྒྱུད༔རང་དང་དམ་ལྡན་རེ་རེས་སྤྱད༔
47-6-148
ཁྲོམ་དང་གྲོང་ཡུལ་ལོག་ལྟ་ཅན༔ ཉན་ཐོས་ཐེག་པ་དམན་པ་དང་༔ སྐལ་མེད་རྟོག་གེ་བ་ལ་གསང་༔ ཆེད་དུ་གཉེར་གཏད་ཟབ་པའི་གནད༔ མན་ངག་སྙིང་ཏིག་ཐམས་ཅད་གསང་༔ མ་གསངས་དམ་ཉམས་ཆེན་པོ་སྟེ༔ ཐོན་པའི་དུས་མེད་དམྱལ་བར་སྐྱེ༔ དེ་རྣམས་ཐུགས་ཀྱི་དམ་ཚིག་ཡིན༔ ཞེས་དང་། གཞན་ཡང་གྲུབ་པའི་རྫས་དང་སྦྱོར་སྒྲོལ་གྱི་དུས་ལ་སོགས་པ་ཁྲོམ་བསྒྲགས་མི་འོས་པ་དུ་མ་ཡོད་པ་རྣམས་ནི་བླ་མའི་ཞལ་ལས་ལེན་པར་བྱས་ཏེ་ཐོག་མར་སྡོམ་པ་གསུམ་རྣམ་པར་དག་དགོས་པ་ནི། དཔལ་མགོན་ཀླུས། ཁྲིམས་ནི་རྒྱུ་དང་མི་རྒྱུའི་ས་(༡༠༠བ)བཞིན་དུ། །ཡོན་ཏན་ཀུན་གྱི་གཞི་རྟེན་ལེགས་པར་གསུངས། །ཞེས་པ་ལྟར་གོང་དུ་བཤད་པའི་སོ་ཐར། བྱང་སེམས། རིག་འཛིན་སྔགས་དང་བཅས་པའི་སྡོམ་པ་སྤྱི་བྱེ་བྲག་ལ་གནས་པ་དེས། ཐོག་པའི་ཐོ་བཙུན་དུ་མ་ཟད། །སླར་བཙུན་གསར་འཇུག་པ་བྱུང་ན། །རབ་ཏུ་བྱུང་བའི་ལོ་ཚིགས་མ་ལོན་པ་སོགས་བར་ཆད་ཀྱི་སྐྱོན་དང་བྲལ་བ།སོ་ཐར་གྱི་རབ་བྱུང་དང་། སྔགས་ཀྱི་དབང་མ་ཐོབ་པ་ཡིན་ན་ཟླ་བ་གསུམ་ལས་མ་འགྱངས་པར་སྡོམ་པ་དང་དབང་ཐོབ་པ། ཆ་ལུགས་ཀྱང་རྩེ་ཞྭ། ཟླ་གམ། ལྷུང་བཟེད། གདིང་བ། རྔུལ་གཟན་སོགས་དགེ་འདུན་གྱི་ཆས་ཚུལ་དང་ལྡན་པའི་སྟེང་། སྔགས་པའི་ཆ་ལག་ཕུར་པ་དར་བཅས་ཙམ་ལས་གཞན་པའི་གྲི་སོགས་མི་གཟུང་། ཚོགས་འཚོགས་པའི་དུས་དུང་ལ་སོགས་པའི་སྒྲ་དང་བསྟུན་སྐྱེ་བོ་མ་དད་པའི་སྤྱོད་ལམ་སྤང་ཞིང་།(༡༠༡ན) གྲལ་དུ་གྲལ་མཚེས་དང་གཏམ་སྨྲ་བ། སྙེ་བ། མཆིལ་སྣབས་གོས་ཀྱིས་མ་བཀབ་པར་འདོར་བ་དག །གཉིད་ལོག་པ།ཟ་འཐུང་གི་རྗེས་ཅག་ཧྲུག་གི་སྒྲ་འབྱིན་པ། ལྷུང་བཟེད་རྩི་མེད་དང་། ཕོར་པ་སོགས་ཚད་ལས་འདས་པ་ཁྱེར་བ། རང་དྲན་གྱི་ཚོགས་མ་གྲོལ་བར་འགྲོ་འདུག་གི་བྱེད་པ་སོགས་རྣམ་པ་ཀུན་ཏུ་དམ་ཚིག་སྡོམ་པ་སྤྱི་བྱེ་བྲག་ལ་གནས་ཤིང་བག་དང་ལྡན་པའི་སྒོ་ནས་ཉམས་སུ་བསྟར་བའི་རིམ་པ་ལ།
47-6-149
༄། །ཆོས་ཕྱོགས་ཀྱི་བྱེད་སྒོ་དང་། བླང་དོར་གྱི་རྣམ་གཞག
མ༽ ཆོས་ཕྱོགས་ཀྱི་བྱེད་སྒོ་དང་། བླང་དོར་གྱི་རྣམ་གཞགགཙོ་བོ་ཟུང་འཇུག་སྒྲུབ་པའི་བསྐྱེད་རྫོགས་འཁྲིད་ཀྱི་རིམ་པ་སློབ་དཔོན་འདུས་ཚོགས་རྣམས་ཀྱིས་འཆད་ཉན་གྱི་རྐང་དང་། གནམ་ལོ་གསར་པའི་ཉིན་དཔལ་མགོན་མ་ནིང་དམ་ཅན་སྡེ་བརྒྱད། ནག་པོ་སྐོར་གསུམ། དྲག་པོ་གསུམ། ལྷ་མོ་གསུམ། བརྟན་མ་བཅུ་གཉིས།བལ་མོ་སྲོག་ལུང་དམར་པོ། བདུད་པོ་ཟོར་བ་ར་སྐྱེས། དབང་མོ་ཉེར་བརྒྱད། ཕུར་སྲུང་བཅུ་གཉིས་གཞི་(༡༠༡བ)བདག་སོགས་ཆོས་སྲུང་རྣམས་དང་བཅས་དུས་གཏོར་གཟབ་གསོལ།སྒྲུབ་མཆོད་དང་མ་འགྲིག་པའི་དུས། ཟླ་བ་བྱུང་ངོ་ཅོག་གི་ཚེས་གསུམ་ལ་བསངས་རྒྱགས་རྔན། གཏེར་ཁ་འདི་ཉིད་ནས་མ་གསུངས་ཀྱང་བོད་ཁམས་སྐྱོང་བ་གལ་ཆེ་བས་བསྟན་མ་བཅུ་གཉིས་དང་བཅས་པའི་གསོལ་ཁ། བརྒྱད་ལ་བསངས་རྒྱགས་རྔན། དམ་ཅན་སྡེ་བརྒྱད་ཀྱི་བསྐང་གསོ།སྤྲེལ་ཟླར་རྒྱས་པ་ཉིན་གསུམ་དང་རྒྱུན་གཏན་བཅུ་ལ་བླ་མ་ནོར་བུ་རྒྱ་མཚོའི་ལས་བྱང་ནོར་བུ་པདྨའི་ལྗོན་ཤིང་། ཆོས་སྐྱོང་གཏེར་སྲུང་། མ་མོ་རྗེ་ཁོལ། ཙཎྜི་ཀ །བཀའ་སྲུང་བཅས་ཀྱི་གཏོར་བསྔོ། བཅུ་བཞི་ལ་བཀའ་བརྒྱད་ཐུགས་ཀྱི་མེ་ལོང་། བཀའ་སྲུང་མ་མགོན་སྡེ་བརྒྱད་དང་བཅས་པའི་བཀང་བ། བཅོ་ལྔ་ལ་བསངས་རྒྱགས་རྔན། ཚེ་འཁྲིད་རྡོ་རྗེའི་འཕྲེང་བ། ལྷ་མོ་རྗེ་ཁོལ། ཙཎྜི་ཀ །མ་ནིང་། དམ་ཅན་(༡༠༢ན)སྡེ་བརྒྱད་བཅས་པའི་བསྐང་བ། བཅུ་དགུ་ལ་ཕུར་པ་ཡང་གསང་བླ་མེད། ཉེར་ལྔ་ལ་ལས་བྱང་ནོར་བུ་པདྨའི་ལྗོན་ཤིང་།ལྷ་མོ་གསུམ་གྱི་དུས་གཏོར།ཉེར་དགུར་ཕྱག་རྡོར་དྲེགས་འདུལ། ཙཎྜི་ཀ །མ་ནིང་། དམ་ཅན་སྡེ་བརྒྱད། ནག་པོ་སྐོར་གསུམ་རྣམས་ཀྱི་དུས་གཏོར། སྒྲུབ་མཆོད་ཀྱི་རིམ་པ་ཟླ་བ་གཉིས་པའི་ཚེས་གཅིག་
47-6-150
ནས་བདུན་གྱི་བར་ཐུགས་རྗེ་ཆེན་པོ་མུན་སེལ་སྒྲོན་མེའི་སྒྲུབ་པ་འཛབ་ཡིག་དྲུག་གང་འགྲོ།གསུམ་པའི་ཚེས་གཉིས་ནས་བརྒྱད་ཀྱི་བར་ཚེ་ཁྲིད་རྡོར་འཕྲེང་གི་སྒྲུབ་པ། ཟླ་བ་བཞི་པ་ཚེས་གཉིས་ནས་དགུའི་བར་དཔལ་རྡོ་རྗེ་སེམས་དཔའ་ཞི་ཁྲོ་རིགས་བརྒྱའི་སྒྲུབ་པ་འཛབ་ཡིག་བརྒྱ་གང་འགྲོ། ཚེས་ཞག་གི་དབང་སོགས་འཕྱུགས་སྲིད་པའི་ཟླ་བ་ལྔ་པའི་ཚེས་བརྒྱད་ནས་བཅུའི་བར་ལས་བྱང་ནོར་བུ་པདྨའི་ལྗོན་ཤིང་གཏེར་བསྲུངས་དང་བཅས་པ།ཟླ་བ་བརྒྱད་པའི་ཉེར་(༡༠༢བ)གསུམ་ནས་གནམ་གང་གི་བར་རིག་འཛིན་བཀྲ་ཤིས་བསྟན་འཛིན་གྱི་སྐུ་མཆོད་ལ་ཆེད་དམིགས་ཞི་ཁྲོ་ན་རག་གི་བསྐང་བཤགས།ཟླ་བ་དགུ་པའི་ཉེར་གསུམ་ནས་དགུའི་བར་གུར་དྲག་གི་སྒྲུབ་མཆོད་གཏོར་བཟློག་དང་འབྲེལ་བ། བཅུ་པའི་ཉེར་གསུམ་ནས་དགུའི་བར་བཀའ་བརྒྱད་ཁྲོ་བོ་རོལ་པ་གོང་མའི་ཆོག་བསྒྲིགས་ལྟར་གྱི་གཏོར་རྒྱག །ཟླ་བ་བཅུ་གཅིག་པའི་ཚེས་བཅུ་དྲུག་ནས་ཉེར་གཉིས་ཀྱི་བར་ཕུར་པ་ཡང་གསང་བླ་མེད་དང་ཕྱག་རྡོར་དྲེགས་འདུལ་གྱི་ཆོག་གྲ་ཁག་གཉིས་ཀྱི་སྒྲུབ་པ། ཟླ་བ་བཅུ་གཉིས་པའི་ཉེར་གསུམ་ནས་དགུའི་བར་དཔལ་མགོན་མ་ནིང་གི་སྒྲུབ་པ་དང་འབྲེལ་བའི་གཏོར་རྒྱག །སྤྲེལ་ལོ་སྤྲེལ་ཟླ་ལ་ཚེས་བཅུ་རྒྱས་པ་དང་ལོ་གྲངས་ངེས་མེད་སྐབས་མཚམས་སུ་བདུད་རྩི་སྨན་གྱི་སྒྲུབ་པ་རེ་ཉམས་སུ་བསྟར་རྒྱུ་དང་། རྒྱུན་གཏན་གྱི་ཚོགས་འདོན་གོང་གསལ་ཚུལ་དུས་(༡༠༣ན)མཆོད།དུས་གཏོར་དགོས་པ་རྣམས་དང་སྐྱབས་འགྲོ་སོགས་ཤུགས་ལ་གསལ་ཞིང་ལེའུ་བདུན་མ། བསམ་པ་ལྷུན་འགྲུབ་མ། བསྟན་སྲིད་བདེ་ཐབས་ཀྱི་འདོད་གསོལ་ཁ་བསྒྱུར་དང་བཅས་པ། ཆོས་སྤྱོད་སོགས་ཀྱི་རིམ་པ་ཐུབ་དབང་གི་བསྟོད་པ་གོང་མ་ལྔ་པའི་བཀའ་རྩོམ་ལེགས་བཤད་ཡོངས་འདུའི་སྙེ་མ་རྗེ་བཙུན་ཙོང་ཁ་པའི་བསྟོད་པ་དམིགས་བརྩེ་མ། ལྔ་པའི་འཁྲུངས་རབས་གསོལ་འདེབས་རྨད་བྱུང་བསྐལ་པ་ཡང་སྙིང་བདུད་བཞི་རབ་བཅོམ་དང་བཅས་པ། རྣམ་པར་རྒྱལ་བའི་ཕན་བདེ་ལེགས་བཤད་གླིང་སྤྱི་ཚོགས་ཀྱིས་བསྐུལ་བ་
47-6-151
ལྟར་བགྱིས་པ་ངེད་རང་སྡེ་པའི་རིང་འཚོ་གསོལ་འདེབས་སྦྲགས་པ་གངས་ཅན་ཕན་བདེ་མ་དང་། དྲིན་ཅན་རྩ་བའི་བླ་མར་གསོལ་འདེབས་དངོས་གྲུབ་གཉིས་ཀྱི་འདོད་འཇོའི་དཔལ་སྟེར་ཙམ་ལས། གཞན་པ་འདི་ག་དང་སྡེ་པ་ནས་དམིགས་བསལ་བྱུང་ན་མ་གཏོགས་ལེགས་ཆ་(༡༠༣བ)ཡིན་ཁུལ་གྱིས་འདོན་ཆ་གཞན་གྱི་སྒོ་འགེགས་པའི་ཆོས་སྤྱོད་ཀྱི་རིགས་མི་འདོན་ཞིང་། གོང་གསལ་གྱི་ཚུལ་སྒྲུབ་མཆོད་རྣམས་སུ་དགོས་པའི་ཆོ་ག །ཕྱག་ལེན། གདངས།དབྱངས། གཏོར་བཟོ། དཀར་རྒྱན། དཀྱིལ་འཁོར་བྲིས་ཐིག །རྔ་ཆིངས། དུང་། རྒྱ་གླིང་།རྐང་གླིང་སོགས་གཙོ་བོ་འགྲོ་ཀུན་ཟུང་འཇུག་སྒྲུབ་པའི་ལམ་གྱི་རིམ་པ་དང་། ཞར་བྱུང་དུ་སྐལ་ལྡན་དང་བ་འདྲེན་པའི་འཕྲིན་ལས་བཞིའི་ཁོ་ལག་ཏུ་དགོས་པ་མཐའ་དག་བྱིན་དང་ལྡན་པ་ཞིག་གལ་ཆེའོ། །
༄། །སྐུ་གསུང་ཐུགས་རྟེན་བཞེངས་པའི་ཕན་ཡོན།
ཙ༽ སྐུ་གསུང་ཐུགས་རྟེན་བཞེངས་པའི་ཕན་ཡོན།དེ་ལྟ་བུའི་དང་པོ་སྐུ་རྟེན་བཞེངས་པའི་ཕན་ཡོན་ནི། ཏིང་འཛིན་རྒྱལ་པོའི་མདོ་ལས།འཇིམ་པ་དང་ནི་དེ་བཞིན་རྡོ་བ་དང་། །ཤིང་དང་རི་མོར་བྲིས་པའི་སྐུ་གཟུགས་དང་། །མཛེས་ཤིང་ཤིན་ཏུ་ལྟ་ན་སྡུག་པར་གྱིས། །རིང་པོར་མི་ཐོགས་ཏིང་འཛིན་མཆོག་འདི་ཐོབ། །ཅེས་དང་། དམ་ཆོས་པད་(༡༠༤ན)དཀར་ལས། རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །ལྟ་ན་སྡུག་པ་འཇིམ་པ་ལས་བྱེད་བཅུག །དེ་དག་ཐམས་ཅད་བྱང་ཆུབ་ཐོབ་པར་འགྱུར། །ཞེས་དང་། སྤྱན་རས་གཟིགས་ཀྱི་མདོ་ལས། འདྲེན་པའི་སྐུ་གཟུགས་རབ་ཏུ་མཛེས་བྱས་ན། །དེ་ནི་མཆོག་འགྱུར་སྐྱེ་བོ་མང་
47-6-152
མཆོད་འོས། །བློ་ལྡན་ཕྱུག་ཅིང་ཚེ་ཉིད་རིང་པོར་ལྡན། །དབང་ལྡན་འཁོར་ལོས་བསྒྱུར་བའི་རྒྱལ་པོར་འགྱུར། །ཞེས་དང་། རྒྱལ་པོ་གསལ་རྒྱལ་གྱིས་ཞུས་པའི་མདོ་ལས། སུ་དག་འདི་ནི་རྒྱལ་བའི་གཟུགས་བྱེད་པ། །དེ་དག་གཟུགས་བཟང་ཡིད་འོང་ཡོན་ཏན་ལྡན། །དབང་པོ་བསྡམས་ཤིང་འོད་འབར་ཉི་མ་བཞིན། །འཇིག་རྟེན་དག་ན་མིག་ཏུ་སྡུག་པར་འགྱུར། །ཞེས་སོགས་མདོ་རྒྱུད་དུ་མ་ལས་གསུངས་པ་དང་། གསུང་རྟེན་བཞེངས་པའི་ཕན་ཡོན་ནི། མདོ་སྡུད་(༡༠༤བ)པ་ལས། ལ་ལས་གངྒཱའི་ཀླུང་གི་བྱེ་སྙེད་ཞིང་རྣམས་དང་། །སེམས་ཅན་ཇི་སྙེད་འཁོད་ཀུན་དགྲ་བཅོམ་གྱིས་བཏུལ་བས། །གང་གིས་ཤེས་རབ་ཕ་རོལ་ཕྱིན་འདི་ཡིག་བྲིས་ཏེ། །སེམས་ཅན་མཆོག་ལ་གླེགས་བམ་བསོད་ནམས་ཁྱད་པར་འཕགས། །ཞེས་སོགས་ཤེར་ཕྱོགས་རྣམས་དང་། དཀོན་ཅོག་ཏ་ལར། ཀུན་དགའ་བོ་གང་ལ་ལ་ཞིག་ཆོས་ཀྱི་རྣམ་གྲངས་འདི་ཡི་གེར་འབྲི་བ་དེ་ནི། ལུས་ལ་ནད་འབྱུང་བར་མི་འགྱུར། དྲི་མི་ཞིམ་པར་མི་འགྱུར། ཕ་རོལ་གྱི་གནོད་པ་འབྱུང་བར་མི་འགྱུར། འདི་ནས་ཤི་འཕོས་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་སྐྱེ་བར་འགྱུར་རོ། །ཞེས་ཐེག་ཆེན་གྱི་མདོ་དུ་མ་དང་། ཧེ་རུ་ཀ་ངེས་པར་བརྗོད་པའི་རྒྱུད་ལས། ཀློག་ཅིང་ཁ་ཏོན་བྲིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་ལ། །ཡང་ན་འཁོར་ལོས་སྒྱུར་བ་ཐོབ། །ཅེས་སོགས་(༡༠༥ན)རྒྱུད་སྡེ་གོང་འོག །རྒྱལ་ཚབ་བྱམས་པས་དབུས་ཐར། ཡི་གེ་འདྲི་མཆོད་སྦྱིན་པ་དང་། །ཉན་དང་ཀློག་དང་འཛིན་པ་དང་། །འཆད་དང་ཁ་ཏོན་བྱེད་པ་དང་། །དེ་སེམས་པ་དང་སྒོམ་པ་སྟེ། །སྤྱོད་པ་འདི་བཅུའི་བདག་ཉིད་ཀྱི། །བསོད་ནམས་ཕུང་པོ་གཞལ་དུ་མེད། །ཅེས་སོགས་བསྟན་བཅོས་ཏེ་རྒྱལ་བ་སྲས་དང་སློབ་མར་བཅས་པས་གསུངས་པ་བརྗོད་པའི་ཡུལ་ལས་འགོངས་པ། ལྔ་པ་ཆེན་པོའི་བཀའ་ལས། ཐུབ་གསུང་འདྲི་དང་ཉན་བཀླག་ཀུན་ཆུབ་པ། །སྲི་ཞུ་རི་མོར་བྱས་པའི་གྲངས་ཀྱི་ཚད། །ཞིང་ཁམས་རྒྱ་མཚོའི་ལྕགས་རྡུལ་གྱིས་བགྲངས་ཀྱང་། །མ་ལྡངས་ངལ་བས་ཚངས་པ་གཉིད་ལ་གཡུར། །དམྱལ་སོགས་ངན་
47-6-153
དུ་འགྲོ་བའི་གཡང་སའི་ཁུང་། །གཅིག་ཅར་འགེབས་པའི་སྒོ་ཆེན་ཉེར་བཀབ་ནས། །མཐོ་རིས་སྐས་ལ་འཁྲིད་དེ་ཐར་པ་ཡི། །ཁང་པར་འཇུག་པའི་དགེ་ཚོགས་ཀུན་གྱི་(༡༠༥བ)རྩེ། །ཞེས་གསུངས་པ་ལྟར་རོ། །ཐུགས་རྟེན་བཞེངས་པའི་ཕན་ཡོན་ནི། དགེ་བའི་རྩ་བ་ཡོངས་སུ་འཛིན་པའི་མདོ་ལས། གང་ཞིག་ལམ་གྱི་བཞི་མདོར་ནི། །དེ་བཞིན་གཤེགས་པའི་མཆོད་རྟེན་བྱེད། །དེ་ཡི་གྲགས་པ་འཕེལ་བར་འགྱུར། །ཞེས་དང་།པད་དཀར་ལས། གང་གིས་མཆོད་རྟེན་རྡོ་ལས་བྱས་པ་དང་། །གང་གི་ཨ་ཀ་རུ་དང་ཙན་དན་ནམ། །གང་གིས་ཐང་ཤིང་མཆོད་རྟེན་བྱས་པ་དང་། །ལ་ལས་ཤིང་མང་གཞན་ལས་བྱས་པ་དང་། །ས་དང་སོ་ཕག་ལས་ནི་བརྩིགས་པ་ཡི། །རྒྱལ་བའི་མཆོད་རྟེན་དགའ་བཞིན་བྱས་པ་དང་། །དེ་ཕྱིར་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་དག་ཏུ་བྱས་པ་དང་། །བྱིས་པས་རྩེད་མོར་དེ་དང་དེ་དག་ཏུ། །གང་གི་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོ་བྱས་པ་ཡང་། །དེ་རྣམས་ཀྱིས་ཀྱང་(༡༠༦ན)བྱང་ཆུབ་ཐོབ་པར་འགྱུར། །ཞེས་དང་།སྒྲ་ཆེན་པོའི་མདོ་ལས། ཀུན་དགའ་བོ་འཛམ་བུའི་གླིང་མཆུ་ཞེང་དང་རྒྱར་དཔག་ཚད་བདུན་སྟོང་ཡོད་པ་འདི་རྒྱུན་དུ་ཞུགས་པ་རྣམས་དང་། ལན་ཅིག་ཕྱིར་འོང་བ་རྣམས་དང་།དགྲ་བཅོམ་པ་རྣམས་དང་། རང་སངས་རྒྱས་རྣམས་ཀྱིས་འབྲས་སཱ་ལུའི་ཞིང་ལྟར་གང་བར་གྱུར་བ་དེ་དག་ལ། མི་ལ་ལ་ཞིག་གིས་ཇི་སྲིད་འཚོའི་བར་དུ་ཆོས་གོས་དང་། བསོད་སྙོམས་དང་། མལ་སྟན་དང་། ནད་ཀྱི་གསོས་སྨན་དང་། ཡོ་བྱད་རྣམས་ཀྱིས་ཅི་འདོད་པ་བསྟབས་ལ། དེ་དག་མྱ་ངན་ལས་འདས་ནས་ཀྱང་སྐུ་གསུང་གི་ཕྱིར་མཆོད་རྟེན་བརྩིགས་ཏེ་སྲི་ཞུར་བྱས་པ་དང་། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་མཆོད་རྟེན་གྱི་བུམ་པ་སྐྱུ་རུ་ར་ཙམ་གྱི་ནང་དུ་བཅུག་སྟེ། སྲོག་ཤིང་ཁབ་ཙམ་བཙུགས་ནས་གདུགས་རྒྱ་(༡༠༦བ)ཤུག་གི་ལོ་མ་ཙམ་འདོགས་པར་བྱེད་
47-6-154
ན། ཀུན་དགའ་བོ་བསོད་ནམས་འདི་ལ་བསོད་ནམས་སྔ་མ་དེས་བརྒྱའི་ཆར་ཡང་ཉེ་བར་མི་འགྲོའོ། །ཞེས་དང་། སངས་རྒྱས་ཀྱི་སྟོབས་བསྐྱེད་པའི་ཆོ་འཕྲུལ་རྣམ་པར་འཕྲུལ་བ་ལས།མཆོད་རྟེན་དང་ནི་རི་མོ་དང་། །སྐུ་གཟུགས་བྱེད་དུ་ཞུགས་པ་དང་། །མཆོད་དང་བཀུར་སྟི་བྱ་བའི་ཕྱིར། །གང་དག་མཚན་མ་འདྲ་བྱེད་པ། །བྱང་ཆུབ་ཕྱིར་དུ་གནས་པ་རྣམས། །ཐམས་ཅད་ཐར་པ་ཐོབ་པར་འགྱུར། །ཞེས་དང་།བྱ་བའི་རྒྱུད་གཙུག་ཏོར་དྲི་མེད་ལས། མཆོད་རྟེན་གྱི་ལས་བྱས་ན་ཚེ་ཟད་པ་ལས་སླར་ནུར་ཏེ་ཚེ་རིང་པོར་སྦྱོང་བར་བྱེད་དོ། །གལ་ཏེ་ཤི་འཕོས་ན་ཡང་སྦྲུལ་གྱི་པགས་པ་བརྗེས་པ་བཞིན་དུ་ལུས་བོར་ནས་བསྐལ་པ་མཉམ་པས་འཇིག་རྟེན་གྱི་ཁམས་བདེ་བ་ཅན་དུ་འགྲོ་བར་འགྱུར་རོ། །ཞེས་དང་། ཤེས་རབ་ཐམས་ཅད་མཐར་ཕྱིན་པར་(༡༠༧ན)གྲུབ་པའི་རྒྱུད་ལས། འབྱུང་བ་ཆེན་པོ་གང་ལ་མཆོད་རྟེན་བཏབ་ཀྱང་བསྐལ་པ་དཔག་ཏུ་མེད་པ་ཐམས་ཅད་ཀྱི་སྒྲིབ་པའི་དྲི་མ་དག་ནས། ཁྱིམ་བདག་གི་རིགས་ཤིང་སཱ་ལ་པ་ཆེན་པོ་ལྟ་བུར་གྱུར་ཏེ་མཐར་ཕྱིར་མི་ལྡོག་པའི་ས་ཐོབ་པར་འགྱུར་རོ། །ཞེས་དང་། བཀའ་བརྒྱད་གསང་བ་ཡོངས་རྫོགས་ལས།བདེ་གཤེགས་སྐུ་གསུང་ཐུགས་ཀྱི་རྟེན༔ ཡོངས་སུ་རྫོགས་པ་བཞེངས་གྱུར་ན༔ སངས་རྒྱས་བསྟན་པ་ཡུན་དུ་གནས༔ ཞེས་དང་། རྟེན་གསུམ་ཡོངས་རྫོགས་ངོ་མཚར་ཆེ༔ ཇི་སྲིད་རྟེན་འདི་གནས་ཀྱི་བར༔ དེ་སྲིད་སངས་རྒྱས་བསྟན་པ་རྒྱས༔ འགྲོ་བ་ཀུན་འདུལ་ལས་སྒྲིབ་སྦྱོང་༔ བསོད་ནམས་ཕུན་ཚོགས་ཡོངས་རྫོགས་ཤིང་༔ བཀྲ་ཤིས་ཚེ་རིང་ལོངས་སྤྱོད་འཕེལ༔ཐ་མ་ཞིང་ཁམས་རྣམ་དག་ཐོབ༔ ཡུལ་ཕྱོགས་གླིང་ཁམས་བཀྲ་ཤིས་འགྱུར༔ ཞེས་དང་།རང་བྱུང་རང་ཤར་རྩ་བའི་(༡༠༧བ)རྒྱུད་ལེའུ་གཉིས་པ་ལས། སྐུ་གསུང་རྒྱལ་བ་ཞི་དང་ཁྲོ༔གསང་བ་བདེ་གཤེགས་ཡོངས་རྫོགས་ཀྱི༔ རྟེན་གསུམ་ཡོངས་རྫོགས་ངོ་མཚར་ཆེ༔ རྟེན་འདི་ཇི་སྲིད་གནས་ཀྱི་བར༔ དེ་སྲིད་སངས་རྒྱས་བསྟན་པ་རྒྱས༔ འགྲོ་བ་ཀུན་འདུལ་ལས་
47-6-155
སྒྲིབ་སྦྱོང་༔ བསོད་ནམས་ཕུན་ཚོགས་ཡོངས་རྫོགས་ཤིང་༔ རྒྱུ་སྦྱོར་བཞེང་མཁན་མ་ལུས་ཀུན༔ ཚེ་འདིར་བཀྲ་ཤིས་ལོངས་སྤྱོད་འཕེལ༔ ཕྱི་མ་རྣམ་དག་ཞིང་ཁམས་ཐོབ༔ ཡུལ་ཁམས་བཀྲ་ཤིས་བདེ་ལེགས་འབྱུང་༔ ཐབས་མཆོག་ཡོངས་རྫོགས་རྨད་དུ་བྱུང་༔ བསྟན་པའི་རིམ་གྲོ་དེ་ཁོ་ན༔ གང་གིས་དང་ལེན་དེ་བསམ་འགྲུབ༔ ཅེས་སོགས་མང་པོ་དང་།
༄། །གཙུག་ལག་ཁང་ཀུན་རར་བཅས་པའི་ཕན་ཡོན།
ཚ༽ གཙུག་ལག་ཁང་ཀུན་རར་བཅས་པའི་ཕན་ཡོན།གཙུག་ལག་ཁང་ཀུན་རར་བཅས་པའི་ཕན་ཡོན་ནི། དྲན་པ་ཉེར་བཞག་ལས། རྟེན་དང་བརྟེན་པར་ལེགས་བསྐྲུན་དང་༔ དགེ་འདུན་གནས་མལ་(༡༠༨ན)བཅའ་བ་སོགས། །དགེ་འདུན་དགེ་བར་རྟག་ཏུ་འགྱུར། །བསྐལ་པ་བྱེ་བ་སྟོང་དུ་ཡང་། །དགེ་བ་ཡོངས་སུ་ཆུད་མི་ཟ། །ཞེས་དགེ་འདུན་གྱི་གནས་མལ་བརྩིགས་པའི་ཕན་ཡོན་བསྐལ་པ་བྱེ་བ་སྟོང་དུ་ཆུད་མི་ཟ་བ་སོགས་དང་། ཁྱད་པར་འཕགས་བསྟོད་ལས། གཅེར་བུ་ཀུན་དགའ་ར་བ་སོགས། །རྩིག་པ་སྡིག་པའི་རྒྱུ་རུ་སྨྲ། །ཐམས་ཅད་མཁྱེན་པ་ཁྱེད་ཀྱིས་ནི། །དེ་ཉིད་བསོད་ནམས་རྒྱུ་ཞེས་གསུངས། །ཞེས་བཤད་པ་འདི་ལ། པཎ་ཆེན་ཝ་ན་རཏྣའི་གསུང་ལས།མུ་སྟེགས་པ་ཐབས་མཁས་པ་མ་ཡིན་པས་སངས་རྒྱས་ཀྱིས་གསུངས་པའི་འདུལ་བ་མདོ་སྡེ་ནང་དུ་གསལ་བ་ལྟར་ཡིན་ཞིང་། བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་བཞུགས་པའི་གཙུག་ལག་ཁང་དང་གནས་མལ་བཞེངས་པ་ལྟ་ཅི་སྨོས། ཐ་ན་དེ་རྣམས་ཀྱི་སྒོ་ཁྱམས་དང་། གཡོས་མལ་བྱེད་པའི་ཁང་ཕྲན་ཙམ་བཞེངས་པའི་(༡༠༨བ)ཆེད་དུ་གོམ་པ་བདུན་བརྒྱབ་ན་ཡང་ངན་སོང་དུ་མི་འགྲོ་ཞིང་ལྷ་ལུས་ཐོབ་བོ། །དཀོན་ཅོག་གསུམ་བཞུགས་པའི་གནས་གཞི་བཟོ་བ་དེ་ལ་དམིགས་པའི་བཟའ་བཏུང་གི་སྦྱོར་བའི་དུ་བ་འཕོག་པའི་སེམས་ཅན་དང་། ལས་མིའི་རྐང་འོག་སོགས་སུ་སྲོག་ཆགས་
47-6-156
ཤི་བ་རྣམས་ངན་སོང་གསུམ་གྱི་གནས་སུ་མི་ལྟུང་། ཕ་ལ་ཕ་ལ། ཞེས་དང་། སློབ་དཔོན་ཤེས་རབ་གོ་ཆས་ཁྱད་པར་འཕགས་བསྟོད་ཀྱི་འགྲེལ་བར་མདོ་ལུང་དྲངས་པ། ཀུན་དགའ་ར་བ་ནགས་ཚལ་བསྐྱེད། །སྐྱེ་བོ་གང་ཞིག་ཟམ་པ་བྱེད། །ཆུ་གཏེར་ཁང་དང་ཆུ་མིག་དང་། །ཞེས་བྱུང་ཞིང་།
༄། །དགེ་འདུན་སྡེ་བཙུགས་པའི་ཕན་ཡོན།
ཛ༽ དགེ་འདུན་སྡེ་བཙུགས་པའི་ཕན་ཡོན།དགེ་འདུན་སྡེ་བཙུགས་པའི་ཕན་ཡོན་ནི། མདོ་སྡེ་ཉི་མའི་སྙིང་པོའི་མདོ་པའི་ཆོས་སྲུང་བའི་འདུས་པ་དང་པོ་ལས། རྒྱལ་པོ་ཆེན་པོ་མ་འོངས་པའི་དུས་ན་ལ་ལར་གང་དགེ་སློང་ཆོས་ཀྱི་གནས་པ་རྣམས་ལ། ཤིན་ཏུ་དང་བའི་རྒྱལ་རིགས་དང་།(༡༠༩ན) བྲམ་ཟེ་དང་རྗེ་རིགས་དང་། དམངས་རིགས་དག་འབྱུང་བར་འགྱུར་ཏེ། དེ་དག་གི་དོན་དུ་དགོན་པའི་གནས་དག་བྱེད་པར་འགྱུར་རོ། །གཙུག་ལག་ཁང་དང་དགོན་པའི་གནས་དེར་ཡང་ཁྱིམ་གྱི་གཞི་ནས། ཞིང་གི་གཞི་དང་།བྲན་དང་། བྲན་མོ་དང་། ཀུན་དགའ་ར་བའི་བར་དེ་དག་གི་ལོངས་སྤྱོད་དང་ཉེ་བར་སྤྱོད་པའི་ཕྱིར་གཏོང་བར་བྱེད་པ་དེ་དག་འཆི་བའི་དུས་བྱས་ནས་ཀྱང་རྒྱལ་རིགས་ཤིང་སཱ་ལ་པ་ཆེན་པོ་དག་ཏུ་སྐྱེ་བར་འགྱུར་རོ། །ཞེས་དང་། སྐྱེས་རབས་གླེང་གཞིའི་མདོ་ལས། གྲང་དང་དྲོ་བས་མི་ཉམས་ཤིང་། །དེ་ལྟར་རི་དྭགས་ལ་སོགས་པའི། །སྡིག་སྦྲུལ་དང་ནི་སྦྲང་བུ་དང་། །བ་མོ་དང་ནི་ཆར་པས་སོ། །དེ་ལྟར་རླུང་དང་ཤིན་ཏུ་དྲོ། །སོ་སོར་ལུས་ལ་གོས་པ་དང་། །ཁང་ནང་གནས་ནས་བདེ་བ་སྐྱེས། །ཁང་པར་བསམ་གཏན་ལྷག་མཐོང་རྣམས། །དགེ་འདུན་གཙུག་ལག་ཁང་འབུལ་བ། །སངས་རྒྱས་མཆོག་(༡༠༩བ)གིས་བསྔགས་པར་མཛོད། །ཅེས་དང་།དཔལ་མགོན་ཀླུའི་རིན་ཆེན་ཕྲེང་བར། སངས་རྒྱས་སྐུ་གཟུགས་མཆོད་རྟེན་ཅན། །གཙུག་
47-6-157
ལག་ཁང་དག་གུས་ཚུལ་དུ། །ཤིན་ཏུ་རྒྱ་ཆེན་གནས་མལ་སོགས། །རྒྱ་ཆེན་ཕྱུག་པོ་སྒྲུབ་པར་མཛོད། །དམ་ཆོས་སྨྲ་ལ་མཆོད་པ་དང་། །རྙེད་དང་བཀུར་སྟི་དང་ལྡན་པ། །དགའ་བར་འགྱུར་བ་རྣམས་ཀྱི་ཞིང་། །ཆོས་དྲུག་གུས་པས་བརྟེན་པའི་མཛོད། །སྔོན་གྱི་རྒྱལ་པོས་ཆོས་ཀྱི་གཞི། །ལྷ་ཁང་ལ་སོགས་གང་བགྱིས་པ། །གང་དག་ལེགས་པ་དེ་དག་ཀུན། །སྔར་ལུགས་བཞིན་དུ་བསྐྱང་བར་མཛོད། །ཅེས་དང་།རྒྱ་གར་མཁས་པའི་དབང་ཕྱུག་རྟ་དབྱངས་ཀྱིས། མི་དབང་དུས་ནི་ཐམས་ཅད་དུ། །ཉམས་དགའ་བ་ཡི་ཁང་བཟང་མཆོག །རོལ་མོའི་གནས་ཀྱི་ཉམས་དགའ་བར། །འཚོ་ཞིང་རྒྱལ་བའི་སྒྲ་སྒྲོགས་པ། །བཙུན་མོའི་འཁོར་དང་(༡༡༠ན)རོལ་བྱེད་པ། །གྲང་བ་སེལ་བའི་ཁང་པ་ནི། །ཕྱོགས་བཞི་ནས་ནི་བྱོན་པ་ཡི། །དགེ་འདུན་བཞུགས་གནས་ཕུལ་བས་ཡིན། །ཐུབ་པ་འཕགས་པའི་དགེ་འདུན་བཅས། །གཙུག་ལག་ཁང་གི་དོན་དུ་ནི། །ཚིག་གིས་རབ་ཏུ་བསྐུལ་བ་དང་། །ཚོགས་པ་ཡི་ནི་གྲོགས་བྱེད་ཅིང་། །ངེས་པར་དུས་སུ་འགྲོ་བྱེད་པ། །གཉིད་ལོག་པའམ་ལངས་པ་ན། །བསོད་ནམས་རྒྱུན་ནི་ཚད་མེད་འཕེལ། །ཤེས་རབ་རྡོ་རྗེའི་མཚོན་ཆ་ཡིས། །ཕྱིན་ཅི་ལོག་གི་རི་བཅོམ་ནས། །ས་དང་བཅས་པའི་ཁང་བཟང་འགྱུར། །དགེ་འདུན་ལ་ནི་ཡོ་བྱད་དང་། །ལོངས་སྤྱོད་བཟང་པོ་དང་བཅས་པ། །གཙུག་ལག་ཁང་ནི་གང་ཞིག་བྱེད། །རྣམ་པར་རྒྱལ་བའི་ཁང་བཟང་ནི། །རིན་ཆེན་མཆོག་གི་རང་བཞིན་གྱི། །བརྩིག་པ་ཀ་བ་གདུང་ལྡན་པའི། །མཛེས་དང་ལྷན་ཅིག་དུས་ཀུན་ཏུ། །དེ་ནི་ལྷ་ཡི་འཇིག་རྟེན་འདིར། །ཡུན་རིང་དུ་ནི་མངོན་(༡༡༠)པར་དགའ། །དཔལ་དང་ལྡན་པའི་བླ་བྲེ་དང་། །སྣ་ཚོགས་ཀྱི་ནི་གོས་ཀྱིས་སྤྲས། །ཁང་བཟང་མཆོག་ནི་འོད་འཕྲོ་བ། །ཡང་དག་གནས་པར་གྱུར་པ་ནི། །ཡོན་ཏན་ཚོགས་ལྡན་ཕུལ་བ་ཡི། །བརྒྱ་བྱིན་གྱི་ནི་ཁང་བཟང་མཆོག །རྣམ་པར་རྒྱལ་བྱེད་ཐོབ་པ་ཡིན། །ཞེས་སོགས་གསུང་རབ་བསྟན་བཅོས་དང་བཅས་དུ་མ་ལས་གཙུག་ཁང་ངམ་དགེ་འདུན་འདུ་བའི་གནས་མལ་བཅའ་བར་ཕན་ཡོན་བསམ་གྱིས་མི་ཁྱབ་
47-6-158
པར་བཤད་ཅིང་། ཁྱད་པར་འདུལ་བ་ལུང་རྣམ་འབྱེད་ལས། ཀུན་དགའ་ར་བ་གཙུག་ལག་ཞིང་། །མལ་སྟན་འཚོ་བ་ནར་མ་དང་། །ཞེས་རྫས་ལས་བྱུང་བའི་བསོད་ནམས་བདུན་གྱི་གཙོ་བོར་བཤད་པ་སོགས་འོ་སྐོལ་གྱི་སྟོན་པ་ཤཱཀྱ་སེང་གེས་ལྗགས་ཀྱི་དབང་པོ་ལས་ལན་གཅིག་མ་ཡིན་པར་བཀའ་སྩལ་བ་ནི། ལུང་ཕྲན་ཚེགས་ལས། ཟླ་བ་སྐར་མའི་ཚོགས་བཅས་ས་ལ་ལྷུང་ཡང་(༡༡༡ན)སྲིད། །ས་འདི་རི་དང་ནགས་བཅས་མཁའ་འགྲོ་ཡང་སྲིད། །རྒྱ་མཚོ་ཆེན་པོའི་ཆུ་ནི་སྐམ་པར་འགྱུར་སྲིད་ཀྱི། །དྲང་སྲོང་ཆེན་པོ་རྫུན་གསུང་འགྱུར་བ་སྲིད་མ་ཡིན། །ཞེས་ནམ་ཡང་བསླུ་བ་མེད་པའི་བཀའ་ཚད་མའོ། །
༄། །མཇུག་གི་བསྔོ་སྨོན།
ཝ༽ མཇུག་གི་བསྔོ་སྨོན།དེ་ལྟར་རྟེན་དང་བརྟེན་པའི་སྙིང་པོ་ཞི་ཁྲོ་རབ་འབྱམས་མཆོག་གང་རིག་འཛིན་འདུས་སྡེར་བཅས། །ཚུགས་པའི་དགེ་མཚན་དག་པའི་མཐུ་ལས་འཛམ་བུའི་ཤིང་གི་ཅོད་པན་གྱིས་མཛེས་པའི་ནོར་འཛིན་མར། །གསང་ཆེན་སྔ་འགྱུར་ཐེག་ཀུན་ཡང་དག་དོན་གྱི་རྩེར་སོན་དམ་ཆོས་ནོར་བུའི་འོད་ཀྱི་སྲིད་དང་ཞིའི། །མུན་པ་གཏན་འཇོམས་སྒྲོན་མེའི་བསྐལ་བཟང་དུས་ཀྱི་དགའ་སྟོན་ནམ་མཁའ་ཇི་སྲིད་ཆེར་རྒྱས་ཤིང་། །བཀའ་གཏེར་གཉིས་ལས་བྱིན་བརླབས་བརྒྱུད་པའི་སྙིང་ཐག་ཉེ་བའི་མཛའ་བ་གསར་པ་ཡི། །གདམས་ངག་མི་འཕྱུགས་ཕྱག་རྒྱས་འཁྱུད་སོགས་ཡན་ལག་གཉིས་གཟུགས་ཁྱད་ཆོས་དུ་(༡༡༡བ)མས་ཆོས་ཟབ་པའི། །རྣམ་དག་གཏེར་གཞུང་པདྨའི་ཞལ་ལུང་ངེས་དོན་སྦྲང་རྩིའི་ཟིལ་དངར་གྱིས། །ལས་ཅན་གདུལ་བྱ་བུང་བའི་འཁོར་གྱི་ཉེར་ཚོར་གྱུར་པའི་ཕྱོགས་ཅི་དང་། །ཁྱད་པར་རྒྱལ་ཀུན་ཡེ་ཤེས་སྣང་མཐའི་འོད་ཀྱིས་ཆེས་བསྐྱེད་པའི། །འདབ་སྟོང་གྲོལ་དབུས་རང་བྱུང་སངས་རྒྱས་གཉིས་པ་པདྨའི་མཚན། །མགོན་ལྡན་གཟུགས་དེའི་འཕྲིན་ལས་ཤིང་རྟ་འདྲེན་པའི་བྱེད་པོ་གླིང་པའི་
47-6-159
གྲས། །ཉིད་ཀྱི་བགོ་སྐལ་རིང་ལུགས་སྲིད་མཐར་དར་ཞིང་རྒྱས་གྱུར་ཅིག །གང་དུ་ཐོས་བསམ་སྒོམ་བརྩོན་འདུས་པའི་གྲས། །ཡང་ཟབ་སྔ་འགྱུར་ཐེག་པ་མཆོག་གི་རྩེར། །ཀུན་བཟང་རྒྱལ་བའི་དགོངས་པ་ཡོངས་འདུས་ཆ་ཤས་ཅན་གཟུགས་ཀྱི། །གསང་ཆེན་བསྟན་པ་གངས་ཅན་རི་བོ་ལས། །བསྐྱེད་རྫོགས་གཉིས་གཟུགས་རིམ་གཉིས་ལམ་གྱི་ཆུ་བོ་ཀུན། །རྫོགས་ཆེན་དགོངས་པའི་རྒྱ་མཚོར་རོ་གཅིག་པའི། །(༡༡༢ན)འབྲས་བུ་ཟག་མེད་བདེ་བའི་ཚོར་བ་ཅན། །ཟད་མི་ཤེས་པ་ཉམས་སུ་བླངས་པའི་མཐུས། །ཚེ་རབས་མང་པོར་ལུས་བསྐྱེད་མར་གྱུར་པའི། །འགྲོ་བ་མཐའ་དག་སྲིད་པ་མི་དགེའི་གྲོང་། །སྡུག་བསྔལ་བརྒྱུད་མར་འབབ་པའི་ངང་བསྡུས་ཤིང་མ་བསྡུས་གཟུགས་སྙིང་རྗེའི་ཉམས་བསྲེས་པ་ཚུལ་ལས། །དབུགས་འབྱིན་སྨིན་གྲོལ་ལམ་གྱི་མཆོག་བརྙེས་ཤོག །སྐྱེས་ཆེན་གངྒཱའི་ཞབས་རྡུལ་གྱིས་བཏབ་པའི། །ངེས་དོན་དག་ཞིང་དོན་མཐུན་ཨོ་རྒྱན་གླིང་། །སྔ་འགྱུར་བཤད་སྒྲུབ་སྐྱེ་བ་ལྔ་པའི་དུང་། །གཏམ་རྒྱུད་དང་སྦྱར་བའི་རིགས་རྒྱུ་རྩོད་པའི་རིམས་འཕྲོག་དབྱངས་སུ་སྙན་པར་ཤོག །ཁྱད་པར་རིག་འཛིན་གྲུབ་པའི་གཉིས་སྐྱེས་དབང་། །བཀྲ་ཤིས་ཆོས་དཀར་བདུད་རྩིའི་ཐིག་ལེ་ཅན། །བསྟན་འཛིན་རྒྱུ་སྐར་ཁྲོད་ན་གསལ་བའི་གསུམ་གཟུགས་འོད། །ནུབ་ཕྱོགས་ཨཽ་ཌཱི་ཡ་ནར་ཞིར་གཞོལ་བའི། །མཛད་པའི་ཐ་མ་དཔེའི་གཟུགས་ཅན་(༡༡༢བ)མཚོན་པའི་ཚེམས་དཀར་སྒོར། །ཐོན་པའི་ཞལ་ཆེམས་འཁོར་གྱི་གདུང་སེལ་གཏམ། །ཐུགས་ཀྱི་ལྷག་མ་བཞིན་དུ་བཞག་པའི་དོན། །འབྲལ་མེད་གཡེང་བའི་ལམ་དུ་མི་འདོར་ཞིང་། །ཇི་ལྟར་བཞེད་པའི་ཐུགས་དགོངས་དག་པའི་ཟླ། །གཞན་ཕན་རི་དྭགས་གཟུགས་ཀྱི་མཚན་མ་ཅན། །རྟག་ཏུ་ཡར་ངོར་རྫོགས་པ་བྱང་ཆེན་མཐའ་དག་གཟུགས་ཅན་གྱི། །སྤྱོད་མཆོག་འགྲོ་བའི་མཁའ་དང་མཉམ་པར་ཤོག །དེ་ལྟར་ལྷག་བསམ་དཀར་བ་རང་ཉིད་དང་། །མི་དབང་བུདྡྷ་མ་རྒན་ལྟོས་བཅས་ཀྱི། །བསོད་ནམས་ཚོགས་མང་རླབས་ཆེན་བསགས་པའི་གཉིས་གཟུགས་ཀླུངས། །བླ་མེད་བྱང་ཆེན་གཏིང་མཐའ་རྫོགས་པར་ཤོག །ཡེ་ཤེས་རྡོ་རྗེས་བདག་ལྟའི་རི་བོ་ཆེ། །བཤིག་པའི་དོན་ཀུན་གྲུབ་པའི་རྒྱལ་བའི་
47-6-160
བསྟན། །ལུང་རྟོགས་སྙེ་མ་དར་བའི་དགའ་ཚལ་གྱི། །གྲིབ་མས་འཇིགས་རུང་གི་(༡༡༣ན)ཉམས་དང་གཟུགས་ཅན་བསྲེས་པ་ཕྱོགས་ཀྱི་ཐ་གྲུར་འཇལ་བར་ཤོག །ཆོས་སྲིད་འཁོར་ལོའི་དཔུང་པ་ཆེས་དར་བའི། །ཕྱོགས་ལས་རྣམ་རྒྱལ་གྲགས་པའི་རུ་མཚོན་གྱིས། །ལྷ་ཡི་འཇིག་རྟེན་ཁེངས་པ་རྫས་མཐའ་གསལ་བསྙིལ་བྱེད་པའི། །དགའ་ལྡན་ཕོ་བྲང་མངའ་ཐང་བླར་འཕེལ་ཞིང་། །དེ་འཛིན་སྐྱེས་བུའི་མཆོག་ཏུ་སྲས་བཅས་ཀྱི། །རྒྱལ་བས་དབང་བསྐུར་ཤིས་པའི་བདེན་ཚིག་གིས། །གསེར་གྱི་མེ་ཏོག་ཆགས་པའི་བྱ་བའི་རང་བཞིན་ལྷག་པའི་ལྷ། །འཇམ་དབྱངས་མི་རྗེའི་ཟློས་གར་ཞབས་བརྟན་ཤོག །དེ་མཐུས་འགྲོ་བའི་ཁམས་ལ་ཐུན་མོང་དུ། །ཁྲོས་པའི་དུས་ཀྱི་ཆད་པ་དྲག་པོའི་དཔུང་། །ནད་མཚོན་མུག་སོགས་མི་མཐུན་རྒུད་པའི་རྐྱེན། །ཉི་མའི་འོད་ཀྱིས་མུན་པ་ལྟར་གསལ་ཏེ། །ཅི་འདོད་མཚུངས་གསལ་དཔེ་སློང་བའི་ལག་པ་རྐྱོང་བ་ལ། །སྦྱིན་པས་རེ་བ་ཡོངས་སུ་འགེང་བ་སོགས། །(༡༡༣བ)དགའ་སྐྱིད་བདེ་འབྱོར་ལྷ་མི་རྗེས་འགྲོ་བའི། །རྫོགས་ལྡན་དུས་ཀྱི་དཔལ་ལ་སྤྱོད་པར་ཤོག །ལྷ་ཀླུ་དགའ་བས་ཆར་ཆུ་དུས་བབ་ལོ་ཏོག་སོགས། །སྐྱོན་མེད་འབྲས་བུའི་ཁུར་གྱིས་ལྕི་ཞིང་སྐྱེ་བོའི་ཚོགས། །ཕན་ཚུན་བྱམས་པས་གླུ་གར་གྱིས་འཚོ་ས་སྤྱོད་རྒྱལ། །བཀྲ་ཤིས་གང་ཞིག་རྩ་གསུམ་འདུས་པས་དགེ་ལེགས་སྩོལ། །
༄། །མཇུག་བྱང་།
ཞ༽ མཇུག་བྱང་།ཞེས་དྲིན་ཅན་རིག་འཛིན་བཀྲ་ཤིས་བསྟན་འཛིན་གྱི་ཞལ་ཆེམས་ཡལ་བར་མི་འདོར་ཞིང་དགོངས་པ་རྫོགས་པ་དང་གསང་ཆེན་སྔ་འགྱུར་ཐེག་པའི་རིང་ལུགས་སྤྱི་དང་བྱེ་བྲག་རྒྱལ་བ་རི་རབ་མར་མེའི་རྒྱལ་མཚན་གང་འདུལ་གྱི་འདྲེན་པར་བཞེངས་པའི་གཏེར་ཆེན་པདྨ་གླིང་པའི་ཆོས་རྒྱུན་བཟང་པོ་མི་ཉམས་པར་སྤེལ་བས་སྐལ་ལྡན་གདུལ་བྱ་གང་དག་སྨིན་
47-6-161
གྲོལ་གྱི་ལམ་སྒོ་ཡངས་པོར་འབྱེད་པ་དང་། ངེད་རང་དང་སྡེ་པ་མ་རྒན་སོགས་སྤྱི་སྒོས་ཀྱི་ཕན་བདེ་རྣམ་དཀར་རླབས་ཆེན་གོང་འཕེལ་གྱི་(༡༡༤ན)ཆེད་ལུང་དང་མཐུན་པའི་གནས་ཆེན་ཁྱད་དུ་འཕགས་པ་གང་དེར་གསང་སྔགས་ཨ་ཏིའི་ལྟ་བ་ཁྱད་པར་དུ་འཕགས་པ་ལ་ངེས་པར་འཇུག་པའི་སྒོ་ཨོ་རྒྱན་གླིང་དུ་རྟེན་བརྟེན་པ་གསར་བསྐྲུན་དང་། འདུས་གྲྭའི་སྤྱི་བྱེ་བྲག་དང་བཅས་པའི་དཀར་ཆག་འཁོར་བའི་རྒྱ་མཚོ་སྒྲོལ་བའི་གྲུ་ཆེན་ཞེས་བྱ་བ་འདི་ནི་ལེགས་པར་སྦྱར་བ་སཾ་སྐྲྀ་ཏའི་སྐད་དུ་བྲྀ་ཥ་བྷ་སྟོད་འགྲེལ་བ་ཁྱུ་མཆོག །དབང་ཕྱོགས་ཟིན་ཟེར་འབོད་པ་ལྕགས་མོ་སྦྲུལ་གྱི་ལོ་རྒྱལ་ཟླའི་དཀར་ཕྱོགས་ཀྱི་རྫོགས་པ་གཉིས་པ་ཡར་ངོའི་ཌཱ་ཀི་འདུ་བའི་དུས་ཆེན་རེས་གཟའ་རྟ་བདུན་གྱི་དབང་པོས། ལས་སྐར་གསལ་བའི་བུ་མོ་དང་རྩེ་བའི་དུས་དགེ་བར་སྨྱོས་རིགས་བློ་བཟང་འཇིག་རྟེན་དབང་ཕྱུག་དཔལ་འབར་གྱིས་སྦྱར་བ་འདིས་ཀྱང་ཕྱོགས་དུས་གནས་སྐབས་ཐམས་ཅད་དུ་བླ་མ་དང་ལྷག་པའི་ལྷས་རྗེས་སུ་འཛིན་ཅིང་གང་གི་རིང་ལུགས་དྲི་མ་མེད་པ་འདི་དག་དར་ཞིང་རྒྱས་ལ་ཡུན་རིང་དུ་(༡༡༤བ)གནས་ནས་འཇིག་རྟེན་སྤྱི་དང་ཁྱད་པར་དུ་གངས་ལྗོངས་འདིར་གནས་སྐབས་མི་མཐུན་པའི་ཉེར་འཚེ་མ་ལུས་ཞི་ཞིང་མཐར་ཐུག་ཟབ་དོན་ཨ་ཏིའི་ལྟ་བ་རྙེད་བྱེད་མཆོག་གི་ས་ལ་རེག་པའི་རྒྱུར་གྱུར་ཅིག། །།༼དཔེ་སྒྲིག་པའི་མཆན། ལྕགས་མོ་སྦྲུལ་ལོ་སྟེ་ཕྱི་ལོ་༡༧༠༡ བོད་ཟླ་༡༢ ཚེས་༡༠ རེས་གཟའ་ཉི་མར་ལྗགས་རྩོམ་མཛད་པ་ཞིག་ཡིན་འདུག༽


